Main News Page

ਨਿਊਯਾਰਕ, 7 ਅਕਤੂਬਰ (ਮਨਜੀਤ ਸਿੰਘ)
🕉️ ਪੌਰਾਣਿਕ ਕਥਾ ਮੁਤਾਬਿਕ ਰੰਭ ਨਾਂ ਦੇ ਦੈਂਤ ਅਤੇ ਮੱਝ (ਭੈਂਸ) ਦੇ ਸੰਜੋਗ ਤੋਂ ਪੈਦਾ ਹੋਏ #ਮਹਿਖਾਸੁਰ (ਮਹੇਸ਼ਾਸੁਰ) ਨੇ ਘੋਰ ਤਪ ਕਰਕੇ #ਬ੍ਰਹਮਾ ਜੀ ਪਾਸੋਂ ਵਰ ਪ੍ਰਾਪਤ ਕਰ ਲਿਆ ਕਿ ਉਹ ਕਿਸੇ ਪੁਰਸ਼, ਅਸੁਰ ਅਤੇ ਦੇਵਤੇ ਹੱਥੋਂ ਨਾ ਮਰੇ । ਜਦੋਂ ਉਸ ਨੇ ਦੈਂਤਾਂ ਦੀ ਵੱਡੀ ਸੈਨਾ ਤਿਆਰ ਕਰਕੇ ਇੰਦਰ-ਲੋਕ ਸਮੇਤ ਤਿੰਨੇ ਲੋਕਾਂ ਨੂੰ ਜਿੱਤ ਲਿਆ ਤਾਂ ਦੇਵਤਿਆਂ ਨੇ #ਵਿਸ਼ਨੂ ਭਗਵਾਨ ਦੀ ਸ਼ਰਨ ਲਈ । ਸ੍ਰੀ ਬ੍ਰਹਮਾ, ਵਿਸ਼ਨੂ, ਸ਼ਿਵ ਅਤੇ ਇੰਦ੍ਰ ਨੇ ਆਪਣੀ ਸ਼ਕਤੀ ਨਾਲ ਦੁਰਗਾ ਪੈਦਾ ਕੀਤੀ ਅਤੇ ਇਨ੍ਹਾਂ ਸਾਰਿਆਂ ਨੇ ਉਸ ਨੂੰ ਆਪਣੇ ਅਸਤ੍ਰ ਸ਼ਸ਼ਤ੍ਰ ਦਿੱਤੇ ।

👹 ਸ੍ਰੀ ਦੁਰਗਾ ਨੇ ਨੌਂ ਦਿਨ (ਨਵਰਾਤ੍ਰੀ) ਘਮਸਾਣ ਦਾ ਯੁਧ ਕਰਕੇ 10ਵੇਂ ਦਿਨ ਮਹਿਖਾਸਰ ਨੂੰ ਮਾਰਿਆ । ਇਸ ਲਈ ਦੁਰਗਾ ਉਪਾਸ਼ਕ ਸਾਕਤਮਤੀ ਅਤੇ ਵੈਸ਼ਨਵ ਹਿੰਦੂ ਹਰ ਵਰ੍ਹੇ ਅਸੂ ਸੁਦੀ 10ਵੀਂ ਨੂੰ #ਵਿਜੈ-ਦਸਮੀ (ਦਸਹਿਰਾ) ਦਾ ਤਿਉਹਾਰ ਬੜੀ ਧੂਮ-ਧਾਮ ਨਾਲ ਮਨਾਉਂਦੇ ਹਨ । ਇਸ ਦਿਨ ਸ਼ਸ਼ਤ੍ਰ ਪੂਜਾ ਵੀ ਕੀਤੀ ਜਾਂਦੀ ਹੈ । ਇਸ ਵਰ੍ਹੇ ਮਲ ਮਾਸ ਆਉਣ ਕਰਕੇ ਇਹ ਪਰਵ ਇਕ ਮਹੀਨਾ ਲੇਟ 12 ਅਕਤੂਬਰ ਸ਼ਨੀਵਾਰ ਨੂੰ ਮਨਾਇਆ ਜਾ ਰਿਹਾ ਹੈ ।

👉 ਇਸ ਮਿਥਿਹਾਸਕ ਕਥਾ ਦੇ ਪ੍ਰਮਾਣ ਬਚਿਤ੍ਰਨਾਟਕ (ਦਸਮ ਗ੍ਰੰਥ) ਅੰਦਰ ਚੰਡੀ ਦੀ ਵਾਰ ਦੇ ਨਾਂ ਤੋਂ ਪ੍ਰਸਿੱਧ "ਵਾਰ ਦੁਰਗਾ ਕੀ" (ਵਾਰ ਸ੍ਰੀ ਭਗਉਤੀ ਜੀ ਕੀ, ਜਿਸ ਦੀ ਪਹਿਲੀ ਪਉੜੀ ਬਦਕਿਸਮਤੀ ਨਾਲ ਇੱਕ ਅਕਾਲਪੁਰਖ ਦੇ ਉਪਾਸ਼ਕ ਗੁਰਸਿੱਖਾਂ ਦੀ ਅਰਦਾਸ ਦਾ ਭਾਗ ਬਣ ਚੁੱਕੀ ਹੈ) ਅਤੇ ਸ੍ਰੀ #ਮਾਰਕੰਡੇ #ਪੁਰਾਣ ਦੇ ਅਨੁਵਾਦ ਚੰਡੀ ਚਰਿਤ੍ਰ ਉਕਤ ਬਿਲਾਸ ਅਧਿਆਇ-2 ਵਿੱਚ ਵਾਚੇ ਜਾ ਸਕਦੇ ਹਨ । ਜਿਵੇਂ...

🔹 ਸਟ ਪਈ ਜਮਧਾਣੀ ਦਲਾ ਮੁਕਾਬਲਾ ॥ ਧੂਹਿ ਲਈ ਕ੍ਰਿਪਾਣੀ ਦੁਰਗਾ ਮਿਆਨ ਤੇ ॥
ਚੰਡੀ ਰਾਕਸ ਖਾਣੀ ਵਾਹੀ ਦੈਤ ਨੂੰ ॥ ਕੋਪਰ ਚੂਰਿ ਦੁਆਣੀ ਲਥੀ ਕਰਗ ਲੈ ॥
ਅਤੇ
🐃 ਜਬ ਮਹਖਾਸੁਰ ਮਾਰਿਓ ਸਬ ਦੈਤਨ ਕੋ ਰਾਜ ॥
ਤਬ ਕਾਇਰ ਭਾਜੇ ਸਬੈ, ਛਾਡਿਓ ਸਕਲ ਸਮਾਜ ॥

📍 ਇਸ ਲਈ ਸਪਸ਼ਟ ਹੈ ਕਿ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਅਨੁਆਈ ਗੁਰਸਿਖਾਂ ਦਾ ਵਿਜੈ-ਦਸਮੀ ਅਥਵਾ #ਦਸਹਿਰੇ ਨਾਲ ਕੋਈ ਸਬੰਧ ਨਹੀਂ ਹੈ । ਇਹ ਵਿਚਾਰ ਹਨ ਅੰਤਰਾਸ਼ਟਰੀ ਸਿੱਖ ਪ੍ਰਚਾਰਕ ਗਿਆਨੀ ਜਗਤਾਰ ਸਿੰਘ ਜਾਚਕ ਦੇ, ਜੋ ਉਨ੍ਹਾਂ ਨਿਊਯਾਰਕ ਤੋਂ ਆਪਣੇ ਈਮੇਲ ਪ੍ਰੈਸ-ਨੋਟ ਰਾਹੀ ਸਾਂਝੇ ਕੀਤੇ।

☢️ ਉਨ੍ਹਾਂ ਦੱਸਿਆ ਕਿ ਪਿਛੋਂ ਜਾ ਕੇ ਦਸਹਿਰੇ ਨੂੰ ਸ੍ਰੀ ਵਿਸ਼ਨੂੰ ਦੇ ਅਵਤਾਰ ਮੰਨੇ ਜਾਂਦੇ ਸ੍ਰੀ #ਰਾਮਚੰਦਰ ਦੁਆਰਾ ਰਾਵਣ (ਦਹਸਿਰ) ਦੇ ਬੱਧ ਨਾਲ ਵੀ ਜੋੜ ਦਿੱਤਾ ਗਿਆ, ਜਿਸ ਨੂੰ ਹਰ ਸਾਲ ਰਾਮਲੀਲਾ ਦੇ ਰੂਪ ਵਿੱਚ ਦਿਨ ਮਨਾਇਆ ਜਾਂਦਾ ਹੈ । ਦਸਹਿਰੇ ਵਾਲੇ ਦਿਨ ਅਸੂ ਸੁਦੀ 10ਵੀਂ ਨੂੰ ਰਾਵਣ ਸਮੇਤ ਕੁੰਭਕਰਨ ਤੇ ਮੇਘ ਨਾਦ ਦੇ ਪੁਤਲੇ ਫੂਕੇ ਜਾਂਦੇ ਹਨ । ਸ਼ਿਵ ਜੀ ਦੇ ਉਪਾਸ਼ਕ ਸ਼ੈਵਾਂ ਨੂੰ ਦਸਹਿਰੇ ਨਾਲ ਜੋੜਣ ਲਈ ਦਸ ਪਾਪਾਂ ਨੂੰ ਧੋਣ ਵਾਲੀ ਗੰਗਾ ਦੇ ਜਨਮ ਦਿਨ ਜੇਠ ਸੁਦੀ 10ਵੀਂ ਨੂੰ ਵੀ 'ਗੰਗਾ ਦਸਹਿਰਾ' ਦਾ ਨਾਂ ਦੇ ਦਿੱਤਾ ਗਿਆ ਹੈ।

📙 #ਬਾਲਮੀਕੀ #ਰਮਾਇਣ ਦੀ ਕਥਾ ਹੈ ਕਿ ਸ਼ਿਵ ਜੀ ਨੇ ਆਪਣਾ ਵੀਰਯ ਸੁਮੇਰ ਪ੍ਰਬਤ ਦੀ ਧੀ ਗੰਗਾ ਦੇ ਉਦਰ ਵਿੱਚ ਪਾਇਆ, ਪਰ ਉਹ ਝੱਲ ਨਾ ਸਕੀ ਅਤੇ ਗਰਭ ਨੂੰ ਸੁੱਟ ਕੇ ਬ੍ਰਹਮਾ ਜੀ ਦੇ ਕਮੰਡਲ ਵਿੱਚ ਜਾ ਵੜੀ । ਰਿਸ਼ੀ ਭਗੀਰਥ ਦੀ ਬੇਨਤੀ 'ਤੇ ਬ੍ਰਹਮਾ ਜੀ ਨੇ ਬ੍ਰਹਮਲੋਕ ਤੋਂ ਜਦੋਂ ਆਪਣਾ ਕਮੰਡਲ ਮੂਧਾ ਕੀਤਾ ਤਾਂ ਉਹ ਗੰਗਾ ਨਦੀ ਦਾ ਰੂਪ ਧਾਰ ਕੇ ਸ਼ਿਵ ਜੀ ਦੀਆਂ ਜਟਾਂਵਾਂ ਵਿੱਚੋਂ ਹੁੰਦੀ ਹੋਈ ਮਾਤਲੋਕ 'ਤੇ ਆਈ।

️🎯 ਯਾਦ ਰੱਖਣ ਦੀ ਲੋੜ ਹੈ ਆਰੀਅਨ ਲੋਕਾਂ (ਬ੍ਰਾਹਮਣਾਂ) ਨੇ ਇਥੋਂ ਦੇ ਮੂਲਵਾਸੀ ਜੋਧਿਆਂ ਤੇ ਰਾਜਿਆਂ ਨੂੰ ਦੈਂਤ ਤੇ ਰਾਕਸ਼ ਪ੍ਰਚਾਰਿਆ । ਇਹੀ ਕਾਰਣ ਹੈ ਕਿ ਹੁਣ ਜਦੋਂ ਭਾਰਤ ਦੇ ਮੂਲਵਾਸੀ ਜਾਗਰੂਕ ਹੋਏ ਹਨ ਤਾਂ ਉਨ੍ਹਾਂ ਨੇ ਜਿਥੇ ਮਹਿਖਾਸੁਰ ਤੇ ਰਾਵਣ ਨੂੰ ਆਪਣਾ ਹੀਰੋ ਐਲਾਨਿਆ ਹੈ, ਉਥੇ ਨਾਰ੍ਹਾ ਵੀ ਬੁਲੰਦ ਕਰਨਾ ਸ਼ੁਰੂ ਕਰ ਦਿੱਤਾ ਹੈ ਕਿ "ਬ੍ਰਾਹਮਣੋ ਭਾਰਤ ਛੱਡੋ"। ਸਚਮੁੱਚ ਹੀ ਅਜਿਹੀ ਸਥਿਤੀ ਚਿੰਤਾਜਨਕ ਹੈ, ਕਿਉਂਕਿ ਜੇ ਭਾਰਤੀ ਹਕੂਮਤ ਨਾ ਸੰਭਲੀ ਤਾਂ ਇਹ ਲੜਾਈ ਗ੍ਰਹਿ-ਯੁਧ ਵਿੱਚ ਬਦਲ ਸਕਦੀ ਹੈ ।

ਜੇ ਕਿਸੇ ਪਾਠਕ ਨੇ ਕੁਮੈਂਟ ਕਰਨਾ ਹੋਵੇ ਤਾਂ ਇੱਥੇ ਕਲਿੱਕ ਕਰਕੇ ਕਰ ਸਕਦਾ ਹੈ। ਵਾਹਿ ਗੁਰੂ ਜੀ ਕਾ ਖ਼ਾਲਸਾ, ਵਾਹਿ ਗੁਰੂ ਜੀ ਕੀ ਫ਼ਤਿਹ॥ ਖ਼ਾਲਸਾ ਨਿਊਜ਼ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਸਮਰਪਿਤ ਹੈ। ਅਸੀਂ ਅਖੌਤੀ ਦਸਮ ਗ੍ਰੰਥ ਅਤੇ ਹੋਰ ਅਨਮਤੀ ਗ੍ਰੰਥ, ਪੱਪੂ (ਅਖੌਤੀ ਜਥੇਦਾਰ), ਪਖੰਡੀ ਸਾਧ, ਸੰਤ, ਬਾਬੇ, ਅਨਮਤੀ ਕਰਮਕਾਂਡਾਂ ਦੇ ਖਿਲਾਫ ਪ੍ਰਚਾਰ ਕਰਦੇ ਰਹੇ ਹਾਂ ਅਤੇ ਕਰਦੇ ਰਹਾਂਗੇ। ਅਸੀਂ ਹਰ ਉਸ ਸਿੱਖ / ਸਿੱਖ ਜਥੇਬੰਦੀ ਦਾ ਸਾਥ ਦੇਵਾਂਗੇ, ਜਿਸਦਾ ਨਿਸ਼ਚਾ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ 'ਤੇ ਹੋਵੇ, ਸੱਚ ਬੋਲਣ ਅਤੇ ਸੱਚ 'ਤੇ ਪਹਿਰਾ ਦੇਣ ਦੀ ਹਿੰਮਤ ਅਤੇ ਬਾਬਰ ਦੇ ਸਾਹਮਣੇ ਖਲੋ ਕੇ ਜਾਬਰ ਕਹਿਣ ਦੀ ਹਿੰਮਤ ਰੱਖਦਾ ਹੋਵੇ।

Disclaimer: Khalsanews.org does not necessarily endorse the views and opinions voiced in the news / articles / audios / videos or any other contents published on www.khalsanews.org and cannot be held responsible for their views.  Read full details....