ਅਖ਼ਬਾਰ ਵਿੱਚ ਛਪੀ ਖ਼ਬਰ ਮੁਤਾਬਕ ਇੱਕ ਅਕਾਲੀ ਨੇਤਾ
ਵਲੋਂ ਕਰਵਾਏ ਰਮਾਇਣ ਦੇ ਪਾਠ ਅਤੇ ਹਿੰਦੂ-ਸਿੱਖ ਅਰਦਾਸਿ ਦੇ ਸੰਬੰਧ ਵਿੱਚ
ਪੰਜ ਪਿਆਰਿਆਂ ਵਲੋਂ ਨੋਟਿਸ ਲੈਣ ਦੀ ਗੱਲ ਕੀਤੀ ਗਈ ਹੈ। ਹੋਰ ਵੀ ਕਈ
ਜਥੇਬੰਦੀਆਂ ਇਸ ਘਟਨਾ ਕ੍ਰਮ ਪਿੱਛੋਂ ਚਿੰਤਤ ਨਜ਼ਰ ਆਉਂਦੀਆਂ ਹਨ।
ਇਹ ਠੀਕ
ਹੈ ਕਿ ਇੱਕ ਅਕਾਲੀ ਨੇਤਾ ( ਜੇ ਉਹ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ
ਵਿਚਾਰਧਰਾ ਨੂੰ ਮੰਨਦਾ ਹੈ) ਵਲੋਂ ਹਿੰਦੂ ਰਹੁ ਰੀਤਾਂ ਨੂੰ ਅਪਨਾਉਂਣਾ ਅਤੇ
ਭਰੇ ਇਕੱਠ ਵਿੱਚ ਸਿੱਖਾਂ ਦੇ ਸਾਮ੍ਹਣੇ ਇਸ ਦਾ ਬੇ-ਖ਼ੌਫ਼ ਪ੍ਰਗਟਾਵਾ ਕਰਨਾ
ਠੀਕ ਨਹੀਂ ਹੈ।
ਹਿੰਦੂ
ਅਰਦਾਸਿ ਵਿੱਚ ਦੁਰਗਾ ਭਗਉਤੀ ਨੂੰ ਸਿਮਰਿਆ ਗਿਆ ਹੈ ਜਿਵੇਂ ਕਿ
ਸਿੱਖ ਅਰਦਾਸਿ ਵਿੱਚ ‘ਪ੍ਰਿਥਮ ਭਗਉਤੀ ਸਿਮਰ ਕੈ’ ਪਉੜੀ ਪੜ੍ਹ ਕੇ ਦੁਰਗਾ
ਭਗਉਤੀ ਨੂੰ ਸਿਮਰਿਆ ਜਾਂਦਾ ਹੈ।
ਰੋਜ਼ਾਨਾ ਸਿੱਖ ਇਤਿਹਾਸਕ ਧਰਮ ਸਥਾਨਾ
ਅਤੇ ਬਹੁਤੇ ਹੋਰ ਗੁਰਦੁਆਰਿਆਂ ਵਿੱਚ ਸਿੱਖ ਅਰਦਾਸਿ ਰਾਹੀਂ ਦੁਰਗਾ ਭਗਉਤੀ
ਨੂੰ ਧੰਨੁ ਗੁਰੂ ਨਾਨਕ ਪਾਤਿਸ਼ਾਹ ਜੀ ਦਾ ਨਾਂ ਲੈਣ ਤੋਂ ਪਹਿਲਾਂ ਸਿਮਰਨਾ
ਜ਼ਰੂਰੀ ਸਮਝਿਆ ਜਾਂਦਾ ਹੈ ਜੋ ਕਿ ਮਨਮਤਿ ਹੈ।
ਪੰਜ ਪਿਆਰੇ ਵੀ ਹੁਣ ਤਕ
ਇਸੇ ਦੁਰਗਾ ਭਗਉਤੀ ਨੂੰ ਹੀ ਅਰਦਾਸਿ ਵਿੱਚ ਚੇਤੇ ਕਰਦੇ ਆ ਰਹੇ ਹਨ। ਕੀ ਇਹ
ਸੱਚ ਨਹੀਂ? ਬਹੁ ਗਿਣਤੀ ਸਿੱਖ ਵੀ ਰੋਜ਼ਾਨਾ ਅਰਦਾਸਿ ਵਿੱਚ ਦੁਰਗਾ
ਭਗਉਤੀ ਨੂੰ ਹੀ ਪਹਿਲਾਂ ਚੇਤੇ ਕਰਦੇ ਹਨ। ਕੀ ਇਹ ਝੂਠ ਹੈ? ਸਵਾਲ ਇਹ ਹੈ
ਕਿ ਜਦੋਂ ਹਿੰਦੂ ਅਰਦਾਸਿ ਉੱਤੇ ਕਿੰਤੂ ਕਰਨ ਵਾਲ਼ੇ
ਸਿੱਖ ਆਪ ਹੀ ਅਰਦਾਸਿ ਰਾਹੀਂ ਹਰ ਰੋਜ਼ ਦੁਰਗਾ
ਭਗਉਤੀ ਨੂੰ ਸਿਮਰ ਰਹੇ ਹਨ ਤਾਂ ਉਹ ਹਿੰਦੂਆਂ ਨੂੰ ਦੁਰਗਾ ਭਗਉਤੀ ਸਿਮਰ ਕੇ
ਕਹਿੰਦਿਆਂ ਕਿਵੇਂ ਰੋਕਣ ਦੀਆਂ ਗੱਲਾਂ ਕਰਦੇ ਹਨ?
ਹਿੰਦੂ ਅਰਦਾਸਿ ਉੱਤੇ
ਕਿੰਤੂ ਕਰਨ ਤੋਂ ਪਹਿਲਾਂ ਅਪਣੀ ਪੀੜ੍ਹੀ ਹੇਠਾਂ ਸੋਟਾ ਫੇਰਨ ਦੀ ਲੋੜ ਹੈ।
ਪਹਿਲਾਂ ਬ੍ਰਾਹਮਣਵਾਦ ਵਲੋਂ ਪਾਈ ‘ਪ੍ਰਿਥਮ ਭਗਉਤੀ’ ਵਾਲ਼ੀ ਪਉੜੀ ਨੂੰ ਆਪਣੀ
ਸਿੱਖ ਅਰਦਾਸਿ ਵਿੱਚੋਂ ਪਰੇ ਵਗਾਹ ਮਾਰੋ ਤੇ ਫੇਰ ਹਿੰਦੂ ਅਰਦਾਸਿ ਤੇ ਕਿੰਤੂ
ਕਰੋ। ਬ੍ਰਾਹਮਣਵਾਦ ਨੇ ਸਿੱਖਾਂ ਨੂੰ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਵਿੱਚ ਲਿਖੇ
ਪੰਜਵੇਂ ਗੁਰੂ ਜੀ ਦੇ ਬਣਾਏ ਅਤੇ ਦਸਵੇਂ ਗੁਰੂ ਜੀ ਤੋਂ ਪ੍ਰਵਾਨਤ
ਨਿੱਤ-ਨੇਮ ਨਾਲੋਂ ਤੋੜ ਕੇ ਪਰੇ ਸੁੱਟਿਆ ਹੋਇਆ ਹੈ। ਕੀ ਹਿੰਦੂ ਅਰਦਾਸਿ
ਉੱਤੇ ਕਿੰਤੂ ਕਰਨ ਵਾਲ਼ੇ ਆਪਿ ਇਹ ਬ੍ਰਾਹਮਣਵਾਦੀ ਨਿੱਤ-ਨੇਮ ਨਹੀਂ ਕਰਦੇ?
ਬ੍ਰਾਹਮਣਵਾਦ ਨੇ ਸਿੱਖਾਂ ਨੂੰ ਦਿੱਤੀ ਜਾਂਦੀ ਪਾਹੁਲ ਵਿੱਚ ਦੁਰਗਾ ਦੇਵੀ
ਭਗਉਤੀ ਅਤੇ ਮਹਾਂਕਾਲ਼ ਦੀ ਪੂਜਾ ਵਾਲ਼ੀਆਂ ਰਚਨਾਵਾਂ ਰਲ਼ਾ ਦਿੱਤੀਆਂ। ਕੀ ਪੰਜ
ਪਿਆਰੇ ਅਜੇ ਵੀ ਸੱਚੀਆਂ ਬਾਣੀਆਂ ਨਾਲ਼ ਹਿੰਦੂ ਰਚਨਾਵਾਂ ਪੜ੍ਹ ਕੇ ਪਾਹੁਲ
ਨਹੀਂ ਦੇ ਰਹੇ? ਜੇ ਦੇ ਰਹੇ ਹਨ ਤਾਂ ਹਿੰਦੂ ਅਰਦਾਸਿ ਉੱਤੇ ਕਾਹਦਾ ਕਿੰਤੂ?
ਬ੍ਰਾਹਮਣਵਾਦ ਤਾਂ ਸਿੱਖਾਂ ਨੂੰ ਪਹਿਲਾਂ ਹੀ ਸਿੱਖ ਰਹਤ ਮਰਯਾਦਾ ਰਾਹੀਂ
ਕੇਸ਼ਾਧਾਰੀ ਹਿੰਦੂ ਬਣਾ ਚੁੱਕਾ ਹੈ ਤੇ ਹੁਣ ਰੋਣਾਂ ਕਾਹਦਾ?
ਜੇ ਸੱਚ ਮੁੱਚ ਹੀ ਸਿੱਖੀ ਦੇ ਮਾੜੇ ਵਰਤਮਾਨ ਅਤੇ
ਭਵਿੱਖ ਦੀ ਚਿੰਤਾ ਹੈ ਤਾਂ ਪਹਿਲਾਂ ਆਪਣਾ ਘਰ ਸੁਧਾਰੋ, ਭਾਵ, ਹੇਠ ਲਿਖੇ
ਕੰਮ ਕਰੋ:
1. ਅਖੌਤੀ ਦਸਮ
ਗ੍ਰੰਥ ਨੂੰ ਸਿੱਖੀ ਵਿਹੜੇ ਵਿੱਚੋਂ ਬਾਹਰ ਕੱਢੋ। ਸ਼੍ਰੋ. ਕਮੇਟੀ ਵਲੋਂ
ਰਹਤ ਮਰਯਾਦਾ ਵਿੱਚ ਇਸ ਨੂੰ ਦਿੱਤੀ ਗਈ ਮਾਨਤਾ ਰੱਦ ਕਰੋ।
2. ਨਿੱਤ-ਨੇਮ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ
ਅਨੁਸਾਰ ਕਰੋ ਅਤੇ ਬਾਕੀਆਂ ਨੂੰ ਕਰਵਾਓ।
3. ਪਾਹੁਲ ਦੀਆਂ ਬਾਣੀਆਂ ਸ਼੍ਰੀ ਗੁਰੂ
ਗ੍ਰੰਥ ਸਾਹਿਬ ਵਿੱਚੋਂ ਪੜ੍ਹੋ।
4. ਸਿੱਖ ਅਰਦਾਸਿ ਵਿੱਚੋਂ ‘ਪ੍ਰਿਥਮ ਭਗਉਤੀ’
ਵਾਲ਼ੀ ਪਉੜੀ ਬਾਹਰ ਕੱਢੋ ਅਤੇ ਕੇਵਲ ਗੁਰਬਾਣੀ ਅਤੇ ਦਸ ਗੁਰੂ ਪਾਤਿਸ਼ਾਹਾਂ
ਦੇ ਨਾਂ ਲੈ ਕੇ ਅਰਦਾਸਿ ਸ਼ੁਰੂ ਕਰੋ।
5. ਧਰਮ ਸਥਾਨਾਂ ਉੱਪਰ ਅਖੌਤੀ ਦਸ਼ਮ ਗ੍ਰੰਥ
ਦੀਆਂ ਰਚਨਾਵਾਂ ਪੜ੍ਹਨ ਉੱਪਰ ਵਿਰੋਧ ਜਤਾਓ।
6. ਜਿੱਥੇ ਅਖੌਤੀ ਦਸ਼ਮ ਗ੍ਰੰਥ ਦੀ ਸਥਾਪਨਾ
ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਪਾਤਿਸ਼ਾਹ ਜੀ ਦੇ ਬਰਾਬਰ ਕੀਤੀ ਜਾ ਰਹੀ
ਹੈ, ਓਥੇ ਇਹ ਕਾਨੂੰਨ ਰਾਹੀਂ ਬੰਦ ਕਰਾਓ।