ਨਾਗਪੁਰ,
13 ਮਾਰਚ: ਆਰ.ਐਸ.ਐਸ. ਦੇ ਸੀਨੀਅਰ ਆਗੂ ਦੱਤਾਤਰੇ ਹੋਸਾਬਲੇ ਨੇ ਅੱਜ ਕਿਹਾ ਕਿ ਭਾਰਤ 'ਚ ਕੋਈ
ਘੱਟ ਗਿਣਤੀ ਨਹੀਂ ਹੈ, ਜਿੱਥੇ ਸਾਰੇ ਲੋਕ 'ਸਭਿਆਚਾਰਕ, ਕੌਮੀਅਤ ਅਤੇ ਡੀ.ਐਨ.ਏ. ਤੋਂ ਹਿੰਦੂ
ਹਨ।'
ਆਰ.ਐਸ.ਐਸ. ਦੇ ਫ਼ੈਸਲਾ ਲੈਣ ਵਾਲੀ ਸਿਖਰਲੀ ਇਕਾਈ ਕੁੱਲ ਭਾਰਤੀ
ਪ੍ਰਤੀਨਿਧੀ ਸਭਾ ਦੇ ਤਿੰਨ ਦਿਨਾ ਜਾਰੀ ਸੰਮੇਲਨ ਵਿਚਕਾਰ ਹੋਸਾਬਲੇ ਨੇ ਕਿਹਾ, ''ਤੁਸੀਂ
ਕਿਸ ਨੂੰ ਘੱਟ ਗਿਣਤੀ ਕਹੋਗੇ? ਅਸੀਂ ਕਿਸੇ ਨੂੰ ਵੀ ਘੱਟ ਗਿਣਤੀ ਨਹੀਂ ਮੰਨਦੇਹਾਂ। ਦੇਸ਼ ਅੰਦਰ
ਘੱਟ ਗਿਣਤੀ ਕੋਈ ਹੈ ਹੀ ਨਹੀਂ।''
ਉਨ੍ਹਾਂ ਅੱਗੇ ਕਿਹਾ, ''ਆਰ.ਐਸ.ਐਸ. ਮੁਖੀ ਮੋਹਨ ਭਾਗਵਤ ਨੇ ਕਈ ਵਾਰੀ
ਕਿਹਾ ਹੈ ਕਿ ਭਾਰਤ 'ਚ ਜਨਮ ਲੈਣ ਵਾਲੇ ਸਾਰੇ ਹਿੰਦੂ ਹਨ। ਭਾਵੇਂ ਕੋਈ ਮੰਨੇ ਜਾਂ ਨਾ ਨਾ,
ਸਭਿਆਚਾਰਕ, ਕੌਮੀਅਤ ਅਤੇ ਡੀ.ਐਨ.ਏ. ਤੋਂ ਸਾਰੇ ਇਕ ਹਨ।'' ਉਹ ਇਕ ਸਵਾਲ ਦਾ ਜਵਾਬ ਦੇ ਰਹੇ ਸਨ
ਜਿਸ 'ਚ ਉਨ੍ਹਾਂ ਤੋਂ ਪੁਛਿਆ ਗਿਆ ਸੀ ਕਿ ਕੀ ਆਰ.ਐਸ.ਐਸ. ਧਾਰਮਕ ਘੱਟ ਗਿਣਤੀਆਂ ਅਤੇ ਔਰਤਾਂ
ਲਈ ਅਪਣੇ ਦਰਵਾਜ਼ੇ ਖੋਲ੍ਹੇਗਾ।
ਆਰ.ਐਸ.ਐਸ. ਦੇ ਜਨਰਲ ਸਕੱਤਰ ਹੋਸਾਬਲੇ ਨੇ ਕਿਹਾ, ''ਸੰਘ ਬ੍ਰਾਂਚਾਂ 'ਚ
ਜਿਸ ਨੂੰ ਤੁਸੀਂ ਕਥਿਤ ਤੌਰ 'ਤੇ ਘੱਟ ਗਿਣਤੀ ਕਹਿੰਦੇ ਹੋ, ਪਹਿਲਾਂ ਤੋਂ ਹਨ ਅਤੇ ਉਹ
ਸਵੈਮਸੇਵਕ ਹਨ।'' ਉਨ੍ਹਾਂ ਕਿਹਾ ਕਿ ਕੌਮੀ ਸੇਵਕਾ ਕਮੇਟੀਆਂ 'ਚ ਔਰਤਾਂ ਹਨ ਅਤੇ ਆਰ.ਐਸ.ਐਸ.
ਦੀਆਂ ਗਤੀਵਿਧੀਆਂ 'ਚ ਸਰਗਰਮ ਤੌਰ 'ਤੇ ਹਿੱਸਾ ਲੈਂਦੀਆਂ ਹਨ।