ਅੰਮ੍ਰਿਤਸਰ 10 ਅਪ੍ਰੈਲ (ਜਸਬੀਰ ਸਿੰਘ ਪੱਟੀ): ਲੋਕ ਭਲਾਈ ਇਨਸਾਫ
ਵੇਲਫੇਅਰ ਸੁਸਾਇਟੀ ਦੇ ਪ੍ਰਧਾਨ ਸ. ਬਲਦੇਵ ਸਿੰਘ ਸਿਰਸਾ ਨੇ ਜਿਲੇ ਦੇ ਡਿਪਟੀ ਕਮਿਸ਼ਨਰ ਦੇ ਨਾਮ
ਇੱਕ ਪੱਤਰ ਦੇ ਕੇ ਮੰਗ ਕੀਤੀ ਹੈ ਕਿ ਵੱਖ ਵੱਖ ਪਿੰਡਾਂ ਦੀਆ ਜ਼ਮੀਨਾਂ ਤੇ ਧੱਕੇ ਤੇ ਗੈਰ ਕਨੂੰਨੀ
ਤਰੀਕੇ ਨਾਲ ਰਾਧਾ ਸੁਆਮੀ ਡੇਰਾ ਬਿਆਸ ਦੇ ਮੁੱਖੀ ਬਾਬਾ ਗੁਰਿੰਦਰ ਸਿੰਘ ਵੱਲੋ ਕੀਤੇ ਗਏ ਕਬਜ਼ਿਆਂ
ਨੂੰ ਤੁਰੰਤ ਖਤਮ ਕਰਵਾ ਕੇ ਜ਼ਮੀਨ ਅਸਲ ਮਾਲਕਾਂ ਦੇ ਹਵਾਲੇ ਕੀਤੀ ਜਾਵੇ।
ਅੱਜ
ਆਪਣੇ ਸਾਥੀਆਂ ਤੇ ਵੱਖ ਵੱਖ ਪਿੰਡਾਂ ਦੇ ਪੀੜਤ ਲੋਕਾਂ ਨਾਲ ਸ੍ਰ. ਬਲਦੇਵ ਸਿੰਘ ਸਿਰਸਾ ਨੇ ਜਿਲੇ
ਦੇ ਡਿਪਟੀ ਕਮਿਸ਼ਨਰ ਦੇ ਨਾਮ ਏ.ਡੀ.ਸੀ ਭੁਪਿੰਦਰ ਸਿੰਘ ਨੂੰ ਮੰਗ ਪੱਤਰ ਦਿੱਤਾ। ਡੇਰਾ ਰਾਧਾ
ਸੁਆਮੀ ਦੇ ਮੁੱਖੀ ਨੂੰ ਆੜੇ ਹੱਥੀ ਲੈਦਿਆ ਸ੍ਰ. ਬਲਦੇਵ ਸਿੰਘ ਸਿਰਸਾ
ਨੇ ਕਿਹਾ ਕਿ ਇਹਨਾਂ ਨੇ ਮਖੌਟਾ ਤਾਂ ਧਰਮ ਦਾ ਪਾਇਆ ਹੈ, ਪਰ ਅਸਲ ਵਿੱਚ ਇਹ ਭੂ ਮਾਫੀਆ ਹੈ,
ਜਿਹੜਾ ਹੁਣ ਤੱਕ ਵੱਖ ਵੱਖ ਪਿੰਡਾਂ ਦੇ ਲੋਕਾਂ ਤੇ ਪੰਚਾਇਤੀ ਜਮੀਨਾਂ ਹੜੱਪ ਚੁੱਕਾ ਹੈ, ਪਰ
ਹਾਲੇ ਤੱਕ ਕਿਸੇ ਵੀ ਅਧਿਕਾਰੀ ਜਾਂ ਸਰਕਾਰ ਨੇ ਉਹਨਾਂ ਦੀ ਸਹੀ ਤਰੀਕੇ ਨਾਲ ਜਾਂਚ ਨਹੀਂ ਕਰਵਾਈ,
ਜਦ ਕਿ ਉਹ ਥੱਲੇ ਉਪਰ ਭਾਵ ਸੰਤਰੀ ਤੋ ਲੈ ਮੰਤਰੀ ਤੱਕ ਤੇ ਪਟਵਾਰੀ ਤੋ ਲੈ ਕੇ ਰਾਜਪਾਲ ਤੱਕ
ਦਰਖਾਸਤਾਂ ਦੇ ਚੁੱਕੇ ਹਨ, ਪਰ ਸਿਆਸੀ ਪਹੁੰਚ ਕਾਰਨ ਅੱਜ ਤੱਕ ਇਹਨਾਂ ਦੇ ਖਿਲਾਫ ਕੋਈ ਕਾਰਵਾਈ
ਨਹੀਂ ਹੌਈ। ਉਹਨਾਂ ਕਿਹਾ ਕਿ ਜਿਲੇ ਦੇ ਡਿਪਟੀ ਕਮਿਸ਼ਨਰ ਨੂੰ ਉਹ ਕਈ ਵਾਰੀ ਪੱਤਰ ਦੇ ਚੁੱਕੇ ਹਨ
ਪਰ ਸਿਆਸੀ ਆਗੂਆ ਦੀ ਘੁਰਕੀ ਥੱਲੇ ਕੋਈ ਵੀ ਕੁਝ ਵੀ ਕਰਨ ਲਈ ਨਹੀਂ ਤਿਆਰ।
ਉਨ੍ਹਾਂ ਕਿਹਾ ਕਿ ਤਹਿਸੀਲ ਬਾਬਾ ਬਕਾਲਾ ਦੇ ਪਿੰਡ ਜੋਧੇ ਦੀ ਪੰਚਇਤੀ
ਜ਼ਮੀਨ ਦੇ ਜਾਅਲੀ ਦਸਤਾਵੇਜ਼ ਤਿਆਰ ਕਰਨਾ ਕੇ ਰਾਧਾ ਸੁਆਮੀਆ ਨੇ ਪਿੰਡ ਦੀ 31 ਕਨਾਲ 2 ਮਰਲੇ
ਜਮੀਨ ਤੇ ਕਬਜ਼ਾ ਕਰ ਲਿਆ ਅਤੇ ਡੇਰੇ ਦਾ ਨਾਮ ਤੇ ਰਜਿਸਟਰੀ ਵੀ ਕਰਵਾ ਲਈ, ਪਰ ਸਾਰੇ ਸਬੂਤ ਪੇਸ਼
ਕਰਨ ਦੇ ਬਾਵਜੂਦ ਵੀ ਕੋਈ ਕਾਰਵਾਈ ਨਹੀਂ ਹੋਈ। ਉਹਨਾਂ ਕਿਹਾ ਕਿ ਪੰਜਾਬ ਦੀ ਇਸ ਵੇਲੇ ਇਹ ਹਾਲਤ
ਹੋ ਗਈ ਹੈ ਕਿ ਇਥੇ ਇੰਨੇ ਰੋਟੀ ਖਾਣ ਲਈ ਢਾਬੇ ਨਹੀਂ ਜਿੰਨੇ ਚਿੰਟੀਆਂ ਵਰਦੀਆਂ ਪਾਈ ਬਾਬੇ
ਸੰਗਤਾਂ ਦੇ ਪੈਸੇ ਨਾਲ ਸੜਕਾਂ ਤੇ ਮਹਿੰਗੀਆਂ ਗੱਡੀਆਂ ਭਜਾਈ ਫਿਰਦੇ ਹਨ।
ਉਹਨਾਂ ਕਿਹਾ ਕਿ ਜੇਕਰ ਇਸ ਚਿੱਟੀ ਸਿਉਕ ਦਾ ਤੁਰੰਤ ਕੋਈ ਬੰਦੋਬਸਤ ਨਾ
ਕੀਤਾ ਗਿਆ, ਤਾਂ ਉਹ ਦਿਨ ਦੂਰ ਨਹੀਂ ਜਦੋ ਕਿਸਾਨਾਂ ਦੀ ਜ਼ਮੀਨ ਦਾ ਇੱਕ ਹਿੱਸਾ ਅੰਡਾਨੀ ਅੰਬਾਨੀ
ਖੋਹ ਲੈਣਗੇ ਤੇ ਦੂਜੇ ਹਿੱਸੇ ਨੂੰ ਇਹ ਸਾਧ ਲਾਣਾ ਭਾਵ ਚਿੱਟੀ ਸਿਉਕ ਖਾ ਜਾਵੇਗੀ। ਉਹਨਾਂ
ਪੰਜਾਬ ਸਰਕਾਰ ਤੇ ਰਾਜਪਾਲ ਤੋ ਮੰਗ ਕੀਤੀ ਕਿ ਉਹ ਲੋਕਾਂ ਦੀਆ ਜ਼ਮੀਨਾਂ 'ਤੇ ਨਜਾਇਜ ਕਬਜੇ ਕਰਨ
ਵਾਲੀ ਚਿੱਟੀ ਸਿਉਂਕ ਲਈ ਕੋਈ ਸਿਆਸੀ, ਕਨੂੰਨੀ ਤੇ ਜਨੂੰਨੀ ਦਵਾ ਤਿਆਰ ਕੀਤੀ ਜਾਵੇ ਜਿਹੜੀ ਇਹਨਾਂ
ਦਾ ਖਾਤਮਾ ਕਰ ਸਕੇ।
