ਅੰਮ੍ਰਿਤਸਰ,
15 ਅਪ੍ਰੈਲ (ਚਰਨਜੀਤ ਸਿੰਘ) : ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ
ਬਾਦਲ ਨੇ ਕਿਹਾ ਹੈ ਕਿ ਸ਼੍ਰੋਮਣੀ ਅਕਾਲੀ ਦਲ ਦਾ ਧਰਮ 'ਚ ਕੋਈ ਦਖ਼ਲ ਨਹੀਂ ਅਤੇ ਕੋਈ ਵੀ
ਰਾਜਨੀਤਕ ਵਿਅਕਤੀ ਧਾਰਮਕ ਮਾਮਲਿਆਂ ਵਿਚ ਕਿਸੇ ਕਿਸਮ ਦੀ ਦਖ਼ਲਅੰਦਾਜ਼ੀ ਨਹੀਂ ਕਰਦਾ।
ਸ੍ਰੀ ਦਰਬਾਰ ਸਾਹਿਬ ਸੂਚਨਾ ਕੇਦਰ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ
ਕਰਦਿਆਂ ਸ. ਬਾਦਲ ਨੇ ਕਿਹਾ ਕਿ ਧਾਰਮਕ ਫ਼ੈਸਲੇ ਲੈਣ ਲਈ ਧਾਰਮਕ ਆਗੂ ਪੂਰੀ ਤਰ੍ਹਾਂ ਆਜ਼ਾਦ ਹਨ।
ਗਿਆਨੀ ਬਲਵੰਤ ਸਿੰਘ ਨੰਦਗੜ੍ਹ ਦੇ ਤਾਜ਼ਾ ਬਿਆਨ ਕਿ ਤਖ਼ਤਾਂ ਦੇ ਹੁਕਮਨਾਮੇ
ਆਰ.ਐਸ.ਐਸ ਦੇ ਪ੍ਰਭਾਵ ਹੇਠ ਜਾਰੀ ਹੁੰਦੇ ਹਨ, 'ਤੇ ਟਿਪਣੀ ਕਰਦਿਆਂ ਉਨ੍ਹਾਂ ਕਿਹਾ ਕਿ
ਤਖ਼ਤਾਂ ਦੀ ਮਹਾਨ ਸੇਵਾ ਕਰਨ ਵਾਲੇ ਜਥੇਦਾਰਾਂ ਨੂੰ ਗੁਮਰਾਹਕੁਨ
ਬਿਆਨ ਦੇਣ ਤੋਂ ਸੰਕੋਚ ਕਰਨਾ ਚਾਹੀਦਾ ਹੈ।
ਉਨ੍ਹਾਂ ਕਿਹਾ ਕਿ ਤਖ਼ਤਾਂ ਤੋਂ ਜਾਰੀ ਹੁਕਮਨਾਮਿਆਂ
ਬਾਰੇ ਗਿਆਨੀ ਨੰਦਗੜ੍ਹ ਅਤੇ ਗਿਆਨੀ ਜੋਗਿੰਦਰ ਸਿੰਘ ਵੇਦਾਂਤੀ ਦੇ ਬਿਆਨ ਅਸਲੀਅਤ ਤੋਂ ਕੋਹਾਂ
ਦੂਰ ਹਨ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਧਰਮ ਨਾਲ ਸਬੰਧਤ ਸਾਰੇ ਫ਼ੈਸਲੇ ਲੈਣ ਦਾ ਅਧਿਕਾਰ ਜਥੇਦਾਰਾਂ
ਕੋਲ ਹੈ ਤੇ ਜਥੇਦਾਰ ਧਾਰਮਕ ਫ਼ੈਸਲੇ ਲੈਣ ਲਈ ਆਜ਼ਾਦ ਹਨ।
ਟਿੱਪਣੀ: ਗੱਪ, ਗੱਪ ਗੱਪ... ਮਾਰ
ਲਾ ਹੋਰ ਗੱਪ, ਸੁਖਬੀਰ ਬਾਦਲ। ਇਹ ਕੋਈ ਲੁਕੀ ਛੁਪੀ ਗੱਲ ਨਹੀਂ, ਜਿਹੜੀ ਨੰਦਗੜ੍ਹ ਜਾਂ ਵੇਦਾਂਤੀ
ਨੇ ਕਹੀ ਹੈ। ਸਿਤਮ ਇਹ ਹੈ ਕਿ ਪਹਿਲਾਂ ਇਹ ਦੋਵੇਂ ਤੁਹਾਡੇ ਝੂਟੇ ਲੈਂਦੇ ਰਹੇ, ਹੁਣ ਬਾਹਰ ਆ
ਕੇ ਇਨ੍ਹਾਂ ਨੂੰ ਹੇਜ ਜਾਗਿਆ ਹੈ। - ਸੰਪਾਦਕ ਖ਼ਾਲਸਾ ਨਿਊਜ਼
