ਨਵੀਂ
ਦਿੱਲੀ, 30 ਮਈ (ਸਪੋਕਸਮੈਨ ਸਮਾਚਾਰ ਸੇਵਾ) : ਰਾਸ਼ਟਰੀ ਸਿੱਖ ਸੰਗਤ ਦਾ ਵਫ਼ਦ ਰਾਸ਼ਟਰੀ
ਪ੍ਰਧਾਨ ਗੁਰਚਰਨ ਸਿੰਘ ਗਿੱਲ ਦੀ ਅਗਵਾਈ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਮਿਲਿਆ।
ਵਫ਼ਦ ਵਿਚ ਰਾਸ਼ਟਰੀ ਸਿੱਖ ਸੰਗਤ ਦੇ ਮੁੱਖ ਕਨਵੀਨਰ ਚਿਰੰਜੀਵ ਸਿੰਘ, ਕਨਵੀਨਰ ਰਮੇਸ਼ ਪ੍ਰਕਾਸ਼
ਸ਼ਰਮਾ, ਰਾਸ਼ਟਰੀ ਜਨਰਲ ਸਕੱਤਰ ਸੰਗਠਨ ਅਵਿਨਾਸ਼ ਜਾਇਸਵਾਲ ਅਤੇ ਰਾਸ਼ਟਰੀ ਜਨਰਲ ਸਕੱਤਰ ਅਵਤਾਰ
ਸਿੰਘ ਸ਼ਾਸਤਰੀ ਸ਼ਾਮਲ ਸਨ।
ਵਫ਼ਦ ਨੇ ਪ੍ਰਧਾਨ ਮੰਤਰੀ ਨੂੰ ਬੇਨਤੀ ਕੀਤੀ ਕਿ ਸਰਬੰਸਦਾਨੀ ਗੁਰੂ
ਗੋਬਿੰਦ ਸਿੰਘ ਜਿਨ੍ਹਾਂ ਦਾ 350ਵਾਂ ਪ੍ਰਕਾਸ਼ ਦਿਹਾੜਾ ਸਾਰੀ ਦੁਨੀਆਂ ਵਿਚ 2016-17 ਵਿਚ
ਧੂਮਧਾਮ ਨਾਲ ਮਨਾਇਆ ਜਾਵੇਗਾ, ਉਸ ਨੂੰ ਖ਼ਾਲਸਾ ਸਾਜਨਾ ਦਿਵਸ ਦੇ 300 ਸਾਲਾ ਸਮਾਗਮਾਂ
ਵਾਂਗ ਵੱਡੇ ਪੱਧਰ 'ਤੇ ਮਨਾਇਆ ਜਾਵੇ ਅਤੇ ਇਸ ਵਿਚ ਭਾਰਤ ਸਰਕਾਰ ਅਪਣਾ ਇਤਿਹਾਸਕ ਯੋਗਦਾਨ
ਪਾਏ।
ਵਫ਼ਦ ਨੇ ਇਹ ਵੀ ਮੰਗ ਕੀਤੀ ਕਿ ਜੀ.ਟੀ. ਕਰਨਾਲ ਰੋਡ ਨੂੰ ਗੁਰੂ ਤੇਗ
ਬਹਾਦਰ ਮਾਰਗ ਦਾ ਨਾਮ ਦਿਤਾ ਜਾਵੇ ਕਿਉਂਕਿ ਇਸ ਮਾਰਗ ਤੋਂ ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦਾ
ਸੀਸ ਆਨੰਦਪੁਰ ਸਾਹਿਬ ਗਿਆ ਸੀ। ਉਨ੍ਹਾਂ ਇਹ ਵੀ ਮੰਗੀ ਕੀਤੀ ਕਿ ਇਹ ਗ਼ਦਰ ਪਾਰਟੀ ਦੇ ਸ਼ਹੀਦਾਂ
ਦਾ ਸ਼ਤਾਬਦੀ ਵਰ੍ਹਾ ਹੈ, ਇਸ ਲਈ ਭਾਰਤ ਸਰਕਾਰ ਦਿੱਲੀ ਵਿਚ ਉਨ੍ਹਾਂ ਦੀ ਯਾਦਗਾਰ ਬਣਾਏ ਅਤੇ
ਖੋਜ ਸੰਸਥਾ ਵੀ ਬਣਾਈ ਜਾਵੇ।
ਵਫ਼ਦ ਨੇ ਪ੍ਰਧਾਨ ਮੰਤਰੀ ਦਾ 84 ਦੇ ਪੀੜਤਾਂ ਨੂੰ 5 ਲੱਖ ਦੀ ਸਹਾਇਤਾ
ਰਾਸ਼ੀ ਦੇਣ ਅਤੇ ਐਸਆਈਟੀ ਗਠਨ ਲਈ ਧਨਵਾਦ ਕੀਤਾ। ਉਨ੍ਹਾਂ ਮੰਗ ਕੀਤੀ ਕਿ ਰਾਸ਼ੀ ਵੰਡਣ ਲਈ
ਮੰਤਰਾਲੇ ਵਿਚ ਇਕ ਵਿਸ਼ੇਸ਼ ਸੈੱਲ ਬਣਾਇਆ ਜਾਵੇ। ਵਫ਼ਦ ਨੇ ਸਿੱਖ ਸੰਗਤ ਨਾਲ ਸਬੰਧਤ ਅਹਿਮ
ਮਸਲਿਆਂ ਬਾਰੇ ਵਿਚਾਰ ਸਾਂਝੇ ਕੀਤੇ। ਪ੍ਰਧਾਨ ਮੰਤਰੀ ਨੇ ਵਫ਼ਦ ਦੇ ਵਿਚਾਰਾਂ ਨੂੰ ਗਹੁ ਨਾਲ
ਸੁਣਿਆ ਅਤੇ ਛੇਤੀ ਹੀ ਕਾਰਵਾਈ ਕਰਨ ਦਾ ਭਰੋਸਾ ਦਿਤਾ।
ਟਿੱਪਣੀ: ਪਾਠਕਾਂ ਦੀ ਜਾਣਕਾਰੀ
ਹੇਤ ਇਹ ਦੱਸਣਾ ਬਣਦਾ ਹੈ ਕਿ ਰਾਸ਼ਟਰੀ ਸਿੱਖ ਸੰਗਤ, ਰਾਸ਼ਟਰੀ ਸਵਯੰਮ ਸੇਵਕ ਸੰਘ RSS ਦੀ
ਹੀ ਸ਼ਾਖਾ ਹੈ, ਜੋ ਸਿੱਖਾਂ 'ਚ ਘੁਸਪੈਠ ਕਰ ਚੁਕੀ ਹੈ, ਜਿਸਦੇ ਕਾਰਕੁੰਨਾਂ 'ਚ ਪਟਨੇ ਵਾਲਾ
ਇਕਬਾਲ ਸਿੰਘ, ਹਜ਼ੂਰ ਸਾਹਿਬ ਵਾਲਾ ਕੁਲਵੰਤ ਸਿੰਘ, ਅਖੌਤੀ ਦਮਦਮੀ ਟਕਸਾਲ ਦਾ ਗੱਪੀ ਠਾਕੁਰ
ਸਿੰਘ, ਅਖੌਤੀ ਬ੍ਰਹਮਗਿਆਨੀ ਠਾਕੁਰ ਸਿੰਘ ਜੋ ਕਿ 21 ਸਾਲ ਝੂਠ ਬੋਲਦਾ ਰਿਹਾ ਕਿ "ਸੰਤ
ਜ਼ਿੰਦਾ ਹਨ" ਅਤੇ ਕਈ ਹੋਰ...
- ਸੰਪਾਦਕ ਖ਼ਾਲਸਾ ਨਿਊਜ਼