ਉਧ੍ਹਾਰਨ ਵਜੋਂ ਰਹਿਤ ਮਰਿਯਾਦਾ ਦਾ ਪਹਿਲਾ ਫੈਸਲਾ - "ਸਿੱਖ
ਦੀ ਤਾਰੀਫ" ਇਉਂ ਹੈ...
ਜੋ ਇਸਤਰੀ ਜਾਂ ਪੁਰਸ਼, ਇੱਕ ਅਕਾਲ
ਪੁਰਖ, ਦਸ ਗੁਰੂ ਸਹਿਬਾਨ (ਸ੍ਰੀ ਗੁਰੁ ਨਾਨਕ ਦੇਵ ਜੀ ਤੋਂ ਲੈ ਕੇ ਸ੍ਰੀ ਗੁਰੂ
ਗੋਬਿੰਦ ਸਿਘ ਸਾਹਿਬ ਤੱਕ) ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਅਤੇ ਦਸ ਗੁਰੂ ਸਹਿਬਾਨ ਦੀ
ਬਾਣੀ ਤੇ ਸਿਖਿਆ, ਅਤੇ ਦਸ਼ਮੇਸ਼ ਜੀ ਦੇ ਅੰਮ੍ਰਿਤ ਉਤੇ ਨਿਸ਼ਚਾ ਰੱਖਦਾ ਹੈ ਅਤੇ ਕਿਸੇ
ਹੋਰ ਧਰਮ ਨੂੰ ਨਹੀਂ ਮੰਨਦਾ, ਉਹ ਸਿੱਖ ਹੈ।
ਕੁੱਝ ਸਵਾਲ:
1. ਜੇ ਇੱਕ ਅਕਾਲ ਪੁਰਖ ਹੈ,
ਤਾਂ ਪ੍ਰਥਮ ਭਗਉਤੀ ਕਿਥੋਂ ਆਈ? ਕੀ ਸ੍ਰੀ ਗੁਰੂ
ਗ੍ਰੰਥ ਸਾਹਿਬ ਵਿੱਚ ਕਿਸੇ ਥਾਂ ਭੀ ਭਗਉਤੀ ਦਾ ਅਰਥ ਅਕਾਲ ਪੁਰਖ ਹੈ?
2. ਕੀ ਗੁਰਬਾਣੀ ਗੁਰਮਤਿ ਵਿੱਚ ਦਸ ਗੁਰੂਆਂ
ਦੀ ਗਿਣਤੀ ਨੂੰ ਮਾਨਤਾ ਹੈ? "ਇਕਾ ਬਾਣੀ ਇਕੁ ਗੁਰੁ
ਇਕੋ ਸਬਦੁ ਵੀਚਾਰਿ॥", "ਜੋਤਿ ਓਹਾ ਜੁਗਤਿ ਸਾਇ ਸਹਿ
ਕਾਇਆ ਫੇਰਿ ਪਲਟੀਐ॥", ਗੁਰਬਾਣੀ ਅਨੁਸਾਰ ਦੇਹ ਤਾਂ ਗੁਰੂ ਹੈ ਨਹੀਂ, ਜੋਤ ਗੁਰੂ
ਹੈ, ਜਿਹੜੀ ਸਾਰਿਆਂ ਜਾਮਿਆਂ ਵਿੱਚ ਕੰਮ ਕਰਦੀ ਰਹੀ। ਜਦੋਂ ਤੁਸੀਂ ਦਸ ਗੁਰੂ ਆਖਦੇ ਹੋ,
ਤਾਂ ਗੁਰਬਾਣੀ ਦੇ ਉਲਟ, ਦੇਹ ਗੁਰੂ ਮੰਨ ਰਹੇ ਹੋ। ਫਿਰ ਜੇ ਦੇਹ ਗੁਰੂ ਮੰਨੋ, ਤਾਂ ਦਸ
ਗੁਰੂ ਸਹਿਬਾਨ ਦੀ ਬਾਣੀ ਨਹੀਂ, ਬਾਣੀ ਸਿਰਫ ਛੇ ਗੁਰੂਆਂ ਦੀ ਬਣੇਗੀ, ਇਸ ਲਈ ਦਸ ਗੁਰੂ
ਸਹਿਬਾਨ ਦੀ ਬਾਣੀ ਲਿਖਣਾ ਹੀ ਗ਼ਲਤ ਹੈ।
3. ਫਿਰ ਜਦੋਂ ਤੁਸੀਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਅਤੇ ਦਸ ਗੁਰੂ
ਸਹਿਬਾਨ ਦੀ ਬਾਣੀ ਲਿਖਦੇ ਹੋ, ਤਾਂ ਫਿਰ ਵਿੱਚ "ਅਤੇ"
ਲਫਜ਼ ਪਾ ਕੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ, ਦਸ ਗੁਰੂ ਸਹਿਬਾਨ ਦੀ ਗੁਰੂ ਜੋਤ ਤੋਂ ਵੱਖਰੇ ਕਰ
ਦੇਂਦੇ ਹੋ।
4. ਫਿਰ ਜਦੋਂ ਗੁਰੂ ਦੇ ਅੰਮ੍ਰਿਤ ਦੀ ਥਾਵੇਂ, ਸਪੈਸ਼ਲ ਦਸਮੇਸ਼
ਜੀ ਦੇ ਅੰਮ੍ਰਿਤ ਦੀ ਗੱਲ ਕਰਦੇ ਹੋ, ਤਾਂ ਦਸਵੇਂ ਜਾਮੇ ਨੂੰ ਇਕੋ ਗੁਰੂ ਜੋਤ ਤੋਂ ਵੱਖ ਕਰ
ਦੇਂਦੇ ਹੋ, ਜਦ ਕਿ ਗੁਰਬਾਣੀ ਅਨੁਸਾਰ "ਅੰਮ੍ਰਿਤੁ
ਪੀਆ ਸਤਿਗੁਰਿ ਦੀਆ॥ ਅਵਰੁ ਨ ਜਾਣਾ ਦੂਆ ਤੀਆ॥"
ਇਸ ਤੋਂ ਸਾਬਿਤ ਹੁੰਦਾ ਹੈ ਕਿ ਦਸ ਗੁਰੂ ਦੇਹ ਰੂਪ, ਸ੍ਰੀ ਗੁਰੁ
ਗ੍ਰੰਥ ਸਾਹਿਬ ਆਦਿ ਵੱਖ ਕਰਕੇ ਪਾਤਸ਼ਾਹੀ ਦਸਵੀਂ ਦੀ ਬਾਣੀ ਅਤੇ ਅੰਮ੍ਰਿਤ ਦੇ ਨਾਮ ਹੇਠ
ਚੱਕਰ ਵਿੱਚ ਪਾਕੇ, ਬਚਿੱਤਰ ਨਾਟਕ ਦੀਆਂ ਰਚਨਾਵਾਂ, ਸਿੱਖੀ ਦੇ ਗਲ ਪਾਉਣ ਦੀ ਸਾਜਿਸ਼ ਤਾਂ
ਪਹਿਲੇ ਪੈਰੇ ਤੋਂ ਹੀ ਸ਼ੁਰੂ ਹੋਈ ਲਗਦੀ ਹੈ। ਐਸੀ
ਸਾਜਿਸ਼ ਥਾਂ ਥਾਂ ਦੇਖ ਕੇ ਹੀ, ਸਿੱਖ ਲਈ ਗੁਰਬਾਣੀ ਜੀਵਨ ਜੁਗਤਿ ਲਿਖਣ ਦੀ ਲੋੜ ਪ੍ਰਤੀਤ
ਹੋ ਰਹੀ ਹੈ, ਤਾਂ ਕਿ ਗੁਰਸਿੱਖ ਬਾਣੀ ਗੁਰੂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬਖਸ਼ੀ ਹੋਈ
ਸਰਲ ਜੀਵਨ ਜੁਗਤ ਵਿੱਚ ਜੀ ਸਕੇ।
ਟਿੱਪਣੀ:
ਪਾਠਕਾਂ ਅੱਗੇ ਬੇਨਤੀ ਹੈ ਕਿ ਵਿਸ਼ੇ 'ਤੇ ਰਹਿ ਕੇ ਹੀ ਕੁਮੈਂਟ ਕੀਤੇ ਜਾਣ, ਜੇ ਤੁਹਾਡੇ
ਕੋਲ ਇਨ੍ਹਾਂ ਸਵਾਲਾਂ ਦੇ ਜਵਾਬ ਜਾਂ ਇਨ੍ਹਾਂ ਸਵਾਲਾਂ ਤੋਂ ਇਲਾਵਾ ਕੋਈ ਸੁਝਾਅ ਹੈ, ਤਾਂ
ਬੇਸ਼ਕ ਕੁਮੈਂਟ ਕਰੋ, ਪਰ ਬੇਸਿਰਪੈਰ ਦੀਆਂ ਗੱਲਾਂ, ਆਪਣੀ ਨੀਜੀ ਭੜਾਸ ਤੋਂ ਸੰਕੋਚ ਕੀਤਾ
ਜਾਵੇ। - ਸੰਪਾਦਕ ਖ਼ਾਲਸਾ ਨਿਊਜ਼
