July 19, 2015 12:02 PM
ਨਵੀਂ
ਦਿੱਲੀ, 18 ਜੁਲਾਈ: ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨੇ ਸ਼ੁਰੂ ਤੋਂ ਹੀ ਸੰਘ ਦੇ ਹਿੰਦੂਵਾਦ
ਦੇ ਪ੍ਰਚਾਰ ਤੋਂ ਸਰਕਾਰੀ ਦੂਰੀ ਬਣਾ ਕੇ ਰੱਖੀ ਹੈ ਪਰ ਸੰਘ ਦੇ ਸਮਾਗਮਾਂ ਵਿਚ ਸ਼ਾਮਲ ਹੋ
ਕੇ ਭਾਜਪਾ ਅਪਣੀ ਖ਼ਾਮੋਸ਼ ਹਾਮੀ ਭਰ ਹੀ ਜਾਂਦੀ ਹੈ।
ਦੁਨੀਆਂ ਭਰ ਵਿਚ ਜਦੋਂ ਅੱਜ ਮੁਸਲਮਾਨਾਂ ਵਲੋਂ ਈਦ ਮਨਾਈ ਜਾ ਰਹੀ
ਹੈ ਐਨ ਉਸ ਮੌਕੇ ਸੰਘ ਪੂਰੀ ਦੁਨੀਆਂ ਨੂੰ ਹਿੰਦੂ ਧਰਮ ਵਿਚ ਬਦਲਣ ਦੀਆਂ ਪੇਸ਼ਨਗੋਈਆਂ ਕਰ
ਰਹੀ ਹੈ। 2014 ਦੀਆਂ ਲੋਕ ਸਭਾ ਚੋਣਾਂ 'ਚ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਗਠਜੋੜ ਦੀ
ਜਿੱਤ ਨੂੰ ਦੇਸ਼ 'ਚ ਇਕ ਕ੍ਰਾਂਤੀ ਦੀ ਸ਼ੁਰੂਆਤ ਕਰਾਰ ਦਿੰਦਿਆਂ ਵਿਸ਼ਵ ਹਿੰਦੂ ਪਰਿਸ਼ਦ ਦੇ
ਸਰਪ੍ਰਸਤ ਅਸ਼ੋਕ ਸਿੰਘਲ ਨੇ ਅੱਜ ਕਿਹਾ ਕਿ 2020 ਤਕ ਭਾਰਤ ਹਿੰਦੂ ਦੇਸ਼ ਬਣ ਜਾਵੇਗਾ।
ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਅਤੇ ਆਰ.ਐਸ.ਐਸ. ਅਹੁਦੇਦਾਰਾਂ ਦੀ
ਹਾਜ਼ਰੀ 'ਚ ਇਕ ਸਮਾਗਮ 'ਚ ਸਿੰਘਲ ਨੇ ਕਿਹਾ, ''ਮੈਂ ਸਾਈ ਬਾਬਾ
ਦੇ ਆਸ਼ਰਮ 'ਚ ਸੀ ਜਿਥੇ ਮੈਨੂੰ ਸਾਈ ਬਾਬਾ ਨੇ ਕਿਹਾ ਕਿ 2020 ਤਕ ਪੂਰਾ ਦੇਸ਼ ਹਿੰਦੂ ਹੋ
ਜਾਵੇਗਾ ਅਤੇ 2030 ਤਕ ਪੂਰੀ ਦੁਨੀਆਂ ਹਿੰਦੂ ਹੋ ਜਾਵੇਗੀ। ਮੈਂ ਮਹਿਸੂਸ ਕਰਦਾ ਹਾਂ ਕਿ
ਇਸ ਕ੍ਰਾਂਤੀ ਦੀ ਸ਼ੁਰੂਆਤ ਹੋ ਚੁੱਕੀ ਹੈ।''
ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਸਰਕਾਰ ਦੇ ਸੱਤਾ 'ਚ ਆਉਣ ਦੀ
ਤਾਰੀਫ਼ ਕਰਦਿਆਂ ਉੁਨ੍ਹਾਂ ਕਿਹਾ ਕਿ ਇਸ ਜਿੱਤ ਨਾਲ 800 ਸਾਲਾਂ ਦੀ ਗ਼ੁਲਾਮੀ ਖ਼ਤਮ ਹੋ ਗਈ।
ਉੁਨ੍ਹਾਂ ਕਿਹਾ, ''ਇਹ ਕੋਈ ਛੋਟੀ ਕ੍ਰਾਂਤੀ ਨਹੀਂ ਹੈ। ਇਹ
ਭਾਰਤ ਤਕ ਹੀ ਸੀਮਤ ਨਹੀਂ ਰਹੇਗੀ ਸਗੋਂ ਦੁਨੀਆਂ ਸਾਹਮਣੇ ਇਕ ਨਵੀਂ ਵਿਚਾਰਧਾਰਾ ਪੇਸ਼ ਕਰੇਗੀ।''
ਸਿੰਘਲ ਇਥੇ ਆਰ.ਐਸ.ਐਸ. ਦੇ ਸਾਬਕਾ ਮੁਖੀ ਕੇ.ਐਸ. ਸੁਦਰਸ਼ਨ ਦੇ
ਜੀਵਨ ਅਤੇ ਕੰਮਾਂ ਸਬੰਧੀ ਇਕ ਪੁਸਤਕ ਦੇ ਰੀਲੀਜ਼ ਸਮਾਗਮ ਦੌਰਾਨ ਬੋਲ ਰਹੇ ਸਨ। ਸੁਦਰਸ਼ਨ ਦੀ
ਪਿਛਲੇ ਸਾਲ ਮੌਤ ਹੋ ਗਈ ਸੀ। (ਪੀਟੀਆਈ)
