ਟੋਰਾਂਟੋ,
31 ਜੁਲਾਈ (ਸਤਪਾਲ ਸਿੰਘ ਜੌਹਲ)- ਕੈਨੇਡਾ 'ਚ ਸਿੱਖਾਂ ਦੀ ਚੋਖੀ ਆਬਾਦੀ ਵਾਲ਼ੇ ਸ਼ਹਿਰ
ਬਰੈਂਪਟਨ ਵਿਖੇ ਅਦਾਲਤ ਦੇ ਜੱਜ ਨੇ ਮਿਸੀਸਾਗਾ 'ਚ ਸਥਿਤ ਗੁਰਦੁਆਰਾ ਉਂਟਾਰੀਓ ਖਾਲਸਾ
ਦਰਬਾਰ ਦੇ (ਪੇਚੀਦਾ) ਕੇਸ ਦਾ ਨਿਪਟਾਰਾ ਬੀਤੇ ਕੱਲ੍ਹ ਕਰ ਦਿੱਤਾ ਹੈ।
ਸਖਤ ਹੁਕਮ ਜਾਰੀ ਕਰਦਿਆਂ ਜਸਟਿਸ ਐਡਵਰਡਜ਼ ਨੇ
ਸ਼ਿਕਾਇਤਕਰਤਾ ਧਿਰ ਦੇ (ਰਣਜੋਧ ਸਿੰਘ ਪੰਧੇਰ,
ਨਰਿੰਦਰ ਸਿੰਘ ਢਿੱਲੋਂ, ਨਛੱਤਰ ਸਿੰਘ ਚੌਹਾਨ, ਗੁਰਦੇਵ ਸਿੰਘ ਨਾਹਲ, ਮਨੋਹਰ ਸਿੰਘ ਖਹਿਰਾ
ਅਤੇ ਸਵਰਨ ਸਿੰਘ ਕੈਰੋਂ) ਦੇ ਹੱਕ 'ਚ ਫੈਸਲਾ ਦਿੱਤਾ ਹੈ ਤੇ
ਬਚਾਓ ਧਿਰ ਦੇ (ਉਂਟਾਰੀਓ ਖਾਲਸਾ ਦਰਬਾਰ, ਜਸਜੀਤ ਸਿੰਘ ਭੁੱਲਰ, ਹਰਬੰਸ ਸਿੰਘ,
ਕਸ਼ਮੀਰ ਸਿੰਘ, ਸੁਖਦੇਵ ਸਿੰਘ ਬੈਂਸ, ਅਵਤਾਰ ਸਿੰਘ ਪੂਨੀਆ ਅਤੇ ਕੁਲਦੀਪ ਸਿੰਘ ਲੱਛੜ)
ਨੂੰ 7000 ਡਾਲਰ ਦਾ ਖਰਚ ਅਦਾ ਕਰਨ ਦਾ ਹੁਕਮ ਕੀਤਾ ਹੈ। ਇਹ ਵੀ ਕਿ ਬਚਾਓ ਧਿਰ ਦੇ ਫਰੀਕਾਂ
ਨੂੰ ਖਰਚੇ ਦੇ ਪੈਸੇ ਆਪਣੇ ਕੋਲੋਂ ਦੇਣ ਦਾ ਹੁਕਮ ਕੀਤਾ ਗਿਆ ਤੇ ਇਹ ਰਕਮ ਗੁਰਦੁਆਰੇ ਦੇ
ਖਾਤੇ 'ਚੋਂ ਦੇਣ ਤੋਂ ਮਨ੍ਹਾਂ ਕੀਤਾ
ਗਿਆ ਹੈ।
ਸ਼ਿਕਾਇਤਕਰਤਾ
ਧਿਰ ਦੇ ਨਛੱਤਰ ਸਿੰਘ ਚੌਹਾਨ ਤੇ ਨਰਿੰਦਰ ਸਿੰਘ ਢਿੱਲੋਂ ਨੇ ਦੱਸਿਆ ਹੈ ਕਿ ਇਸ ਮੁੱਕਦਮੇ
'ਤੇ ਦੋਵਾਂ ਧਿਰਾਂ ਦਾ 30 ਲੱਖ ਡਾਲਰ (150 ਕਰੋੜ ਰੁਪਏ) ਤੋਂ ਵੱਧ ਦਾ ਖਰਚ ਹੋ ਚੁੱਕਾ
ਹੈ। ਬਚਾਓ ਧਿਰ ਨੇ ਮੁਕੱਦਮੇ ਦਾ ਖਰਚ ਗੋਲਕ ਦੀ ਮਾਇਆ 'ਚੋਂ ਅਦਾ ਕਰਨ ਦਾ ਫੈਸਲਾ
ਕੀਤਾ ਸੀ। ਹਰਬੰਸ ਸਿੰਘ (ਜੰਡਾਲੀ) ਨੇ 'ਅਜੀਤ' ਨੂੰ ਦੱਸਿਆ
ਕਿ ਅਦਾਲਤ ਦੇ ਫੈਸਲੇ ਦਾ ਸਤਿਕਾਰ ਕੀਤਾ ਜਾਵੇਗਾ, ਅਪੀਲ ਨਹੀਂ ਕੀਤੀ ਜਾਵੇਗੀ ਤੇ 7000
ਡਾਲਰ ਬਚਾਓ ਧਿਰ ਦੇ ਮੈਂਬਰ ਆਪਣੇ ਕੋਲੋਂ ਅਦਾ ਕਰਨਗੇ।
ਨਵੀਂ ਮੈਂਬਰਸ਼ਿਪ (2,500 ਦੇ ਕਰੀਬ ਵਿਅਕਤੀ) ਭਰਤੀ 'ਚ ਘਪਲੇਬਾਜ਼ੀ
ਦੇ ਦੋਸ਼ਾਂ ਕਾਰਨ ਮੁਕੱਦਮੇਬਾਜ਼ੀ 'ਚ ਬੀਤੇ ਲੰਬੇ ਸਮੇਂ ਤੋਂ ਰੁਕੀ ਪਈ ਪ੍ਰਬੰਧਕੀ ਕਮੇਟੀ
ਚੋਣ ਦੀ ਤਰੀਕ ਅਦਾਲਤ ਨੇ 4 ਅਕਤੂਬਰ 2015 ਤੈਅ ਕੀਤੀ ਹੈ। ਇਸ ਚੋਣ 'ਚ 2,750 ਦੇ ਕਰੀਬ
ਸਿੱਖ ਮੈਂਬਰ ਵੋਟ ਪਾ ਸਕਣਗੇ ਤੇ ਚੋਣ ਆਜ਼ਾਦ ਤੀਸਰੀ ਧਿਰ ਦੀ ਨਿਗਰਾਨੀ 'ਚ ਕਰਵਾਉਣੀ ਦੀ
ਹਦਾਇਤ ਕੀਤੀ ਗਈ ਹੈ। ਜੇਕਰ ਦੋਵੇਂ ਧਿਰਾਂ ਨਿਗਰਾਨ ਧਿਰ 'ਤੇ ਸਹਿਮਤੀ ਨਾ ਬਣਾ ਸਕਣ ਤਾਂ
ਇਸ ਬਾਰੇ ਅਦਾਲਤ 'ਚ ਮੋਸ਼ਨ ਪੇਸ਼ ਕੀਤਾ ਜਾ ਸਕਦਾ ਹੈ।
ਪ੍ਰਬੰਧਕੀ ਕਮੇਟੀ ਦੀ 2003 'ਚ ਹੋਈ ਚੋਣ ਤੋਂ ਬਾਅਦ 2006 'ਚ
ਉਪਰੋਕਤ ਅਦਾਲਤੀ ਕੇਸ ਚੱਲ ਪਿਆ ਸੀ, ਜਿਸ ਤੋਂ ਬਾਅਦ ਚੋਣ ਨਾ ਹੋ ਸਕੀ ਤੇ ਪ੍ਰਬੰਧਕੀ
ਕਾਰਜਾਂ ਲਈ 12 ਸਾਲ ਕੁ ਪਹਿਲਾਂ ਚੁਣੇ ਗਏ ਡਾਇਰੈਕਟਰ ਹੀ ਕਾਇਮ ਰਹੇ ਹਨ। 1976 ਤੋਂ ਚੱਲ
ਰਿਹਾ ਇਹ ਗੁਰਦਵਾਰਾ ਸਾਹਿਬ ਉੱਤਰੀ ਅਮਰੀਕਾ 'ਚ ਵੱਡੇ ਗੁਰਦਵਾਰਿਆਂ ਵਿਚੋਂ ਇਕ ਹੈ।
