ਸਰੀਰ
ਦੇ ਸਾਰੇ ਅੰਗਾਂ ਦੀ ਲੋੜ ਹੁੰਦੀ ਹੈ, ਇਸੇ ਲਈ ਮਨੁੱਖ ਅੰਗਾਂ ਦੀ ਸੰਭਾਲ ਕਰਦਾ ਹੈ। ਇੱਕ
ਖਿਆਲ ਕਰਿਓ, ਰੋਗ ਆਪੇ ਨਹੀਂ ਆਉਂਦਾ, ਪਹਿਲੇ ਕੋਈ ਅੰਗ ਆਪਣੇ ਅੰਦਰ ਰੋਗ ਨੂੰ ਥਾਂ ਦਿੰਦਾ
ਹੈ, ਫਿਰ ਉਹ ਰੋਗ ਹੌਲੀ ਹੌਲੀ ਦੂਜੇ ਅੰਗਾਂ ਵਿੱਚ ਫੈਲ ਜਾਂਦਾ ਹੈ।
ਆਖਿਰ ਸਿਆਣਾ ਡਾਕਟਰ ਰੋਗੀ ਅੰਗਾਂ ਨੂੰ ਕੱਟ
ਦਿੰਦਾ ਹੈ, ਨਹੀਂ ਤਾਂ ਸਰੀਰ ਰੋਗੀ ਹੋਕੇ ਮਰ ਜਾਵੇਗਾ। ਸਿੱਖੀ ਦੇ ਜਿਉਂਦੀ ਆਤਮਾ, ਗ਼ੈਰਤ,
ਅਣਖ, ਅਤੇ ਬਲਵਾਨ ਇਰਾਦਿਆਂ ਦੇ ਤੰਦਰੁਸਤ ਸਰੀਰ ਨੂੰ ਬਦਕਿਸਮਤ ਸਮੇਂ ਨਾਲ ਗੁਰੂ ਨਾਨਕ ਜੀ
ਦਾ ਦੱਸਿਆ ਇਹ ਰੋਗ ਲੱਗ ਗਿਆ:
ਸਲੋਕ ਮ: ੧ ॥
ਚੋਰਾ ਜਾਰਾ ਰੰਡੀਆ ਕੁਟਣੀਆ ਦੀਬਾਣੁ ॥ ਵੇਦੀਨਾ
ਕੀ ਦੋਸਤੀ ਵੇਦੀਨਾ ਕਾ ਖਾਣੁ ॥ ਸਿਫਤੀ ਸਾਰ ਨ
ਜਾਣਨੀ ਸਦਾ ਵਸੈ ਸੈਤਾਨੁ ॥ ਗਦਹੁ ਚੰਦਨਿ ਖਉਲੀਐ
ਭੀ ਸਾਹੂ ਸਿਉ ਪਾਣੁ ॥ ਨਾਨਕ ਕੂੜੈ ਕਤਿਐ ਕੂੜਾ
ਤਣੀਐ ਤਾਣੁ ॥ ਕੂੜਾ ਕਪੜੁ ਕਛੀਐ ਕੂੜਾ ਪੈਨਣੁ
ਮਾਣੁ ॥੧॥ {ਪੰਨਾ 790}
ਬੱਸ ਸਿੰਘੋ!!!
ਅਕਾਲੀ ਦਲ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਤਖ਼ਤਾਂ ਦੇ ਅਖੌਤੀ ਜੱਥੇਦਾਰ, ਝੂਠਾ
ਲੋਕਤੰਤਰ, ਗੁਰਦੁਆਰਾ ਐਕਟ ਦੀ ਗ਼ੁਲਾਮੀ ਅੱਜ ਇਹ ਅੰਗ ਇਤਨੇ ਅਸਾਧ ਰੋਗੀ ਹੋ ਚੁਕੇ ਹਨ
ਕਿ ਜਦੋਂ ਬਦਬੂ ਆਉਂਦੀ ਹੈ ਤਾਂ ਗੁਰੂ ਪੰਥ ਅਤੇ ਅਕਾਲ ਤਖ਼ਤ ਦੇ
ਨਾਮ ਦੀ ਅਖੌਤੀ ਚਾਦਰ ਓੜ੍ਹ ਲੈਂਦੇ ਹਨ। ਜਦੋਂ ਕੌਮ ਵੱਲੋਂ ਸਰਬੱਤ ਖ਼ਾਲਸੇ ਦਾ
ਹਥਿਆਰ ਫੜ ਇਨ੍ਹਾਂ ਦਾ ਆਪ੍ਰੇਸ਼ਨ ਕਰਣ ਦੀ ਗੱਲ ਉਠਦੀ ਹੈ ਤਾਂ ਹਾਲ ਪਾਹਰਿਆ ਪਾ ਦਿੰਦੇ ਹਨ।
ਪਰ ਸਿੰਘੋ !!! ਇਹ ਆਪ੍ਰੇਸ਼ਨ ਹੁਣ ਜ਼ਰੂਰੀ ਹੋ ਗਿਆ ਹੈ, ਨਹੀਂ ਤਾਂ ਇਨ੍ਹਾਂ ਦੀਆਂ ਕਰਤੂਤਾਂ
ਨਾਲ ਸਾਰਾ ਕੌਮੀ ਸਰੀਰ ਰੋਗੀ ਹੋ ਜਾਵੇਗਾ। ਆਉਣ ਵਾਲੀ ਪੀੜ੍ਹੀ ਦੇ ਲੋਕ ਨਫ਼ਰਤ ਕਰਣਗੇ।
ਜਾਗ ਪਓ,
ਬਚਾ ਲਓ ਕੌਮ ਦਾ ਭਵਿੱਖ।