ਸਰੀ,
19 ਅਕਤੂਬਰ (ਗੁਰਪ੍ਰੀਤ ਸਿੰਘ ਸਹੋਤਾ)- ਕੈਨੇਡਾ ਦੇ ਸੂਬੇ ਬ੍ਰਿਟਿਸ਼ ਕੋਲੰਬੀਆ ਦੇ ਸਿੱਖਾਂ
ਨੇ ਅੱਜ ਸਰੀ ਸ਼ਹਿਰ 'ਚ ਦੋ ਵੱਡੇ ਇਕੱਠ ਕਰਕੇ ਜੈਕਾਰਿਆਂ ਦੀ ਗੂੰਜ 'ਚ ਪੰਜੇ ਜਥੇਦਾਰਾਂ
ਨੂੰ ਰੱਦ ਕਰ ਦਿੱਤਾ ਤੇ ਐਲਾਨ ਕੀਤਾ। ਕੈਨੇਡੀਅਨ ਸਿੱਖ ਕੇਵਲ ਤੇ ਕੇਵਲ 10 ਨਵੰਬਰ ਨੂੰ
ਹੋ ਰਹੇ ਸਰਬੱਤ ਖਾਲਸੇ ਰਾਹੀਂ ਚੁਣੇ ਜਥੇਦਾਰਾਂ ਨੂੰ ਹੀ ਮਾਨਤਾ ਦੇਣਗੇ।
ਪੰਜਾਬ 'ਚ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪਾਂ ਨੂੰ ਲਗਾਤਾਰ ਬੇਅਦਬ
ਕਰਨ ਵਾਲੇ ਸ਼ਰਾਰਤੀ ਅਨਸਰਾਂ ਨੂੰ ਖਾਲਸੇ ਦਾ ਸਬਰ ਨਾ ਪਰਖਣ ਦੀ ਚੇਤਾਵਨੀ ਵੀ ਦਿੱਤੀ ਗਈ।
ਸਰੀ ਦੇ ਬੈੱਲ ਸੈਂਟਰ 'ਚ 1700 ਦੇ ਕਰੀਬ ਇਕੱਠ ਤੇ ਸਰੀ ਦੇ ਗੁਰੂ
ਨਾਨਕ ਸਿੱਖ ਗੁਰਦੁਆਰਾ ਸਾਹਿਬ ਦੇ ਬਾਹਰ 1500 ਤੋਂ ਵੱਧ ਸਿੱਖਾਂ ਦੇ ਇਕੱਠ ਨੇ ਪੰਜਾਬ 'ਚ
ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪਾਂ ਦੀ ਬੇਅਦਬੀ ਤੇ ਸ਼ਾਂਤਮਈ ਧਰਨਿਆਂ 'ਤੇ ਪੁਲਿਸ ਵਲੋਂ ਕੀਤੇ
ਕਤਲਾਂ ਦੀ ਸਖ਼ਤ ਨਿੰਦਾ ਕੀਤੀ।
ਇਸਦੇ ਨਾਲ ਹੀ ਇਕੱਠ 'ਚ ਪੁੱਜੇ 'ਨੈਸ਼ਨਲ
ਕਬੱਡੀ ਫੈਡਰੇਸ਼ਨ ਆਫ਼ ਕੈਨੇਡਾ' ਅਤੇ 'ਕੈਨੇਡਾ ਵੈਸਟ ਕਬੱਡੀ ਫੈਡਰੇਸ਼ਨ' ਦੇ ਅਹੁਦੇਦਾਰਾਂ
ਨੇ ਨਵੰਬਰ ਮਹੀਨੇ ਪੰਜਾਬ ਸਰਕਾਰ ਵੱਲੋਂ ਕਰਵਾਏ ਜਾ ਰਹੇ 'ਵਿਸ਼ਵ ਕਬੱਡੀ ਕੱਪ' ਦੇ ਮੁਕੰਮਲ
ਬਾਈਕਾਟ ਦਾ ਐਲਾਨ ਕਰ ਦਿੱਤਾ।