- ਪੰਜਾਬ ਬੰਦ, ਬੱਸਾਂ ਬੰਦ, ਰੇਲਾਂ ਬੰਦ, ਦੁਕਾਨਾ ਬੰਦ ਕਰਵਾ
ਕੇ ਆਮ ਪਬਲਿਕ ਦੀਆਂ ਪ੍ਰੇਸਾਨੀਆਂ ਵਿੱਚ ਵਾਧਾ ਨਹੀਂ ਕਰਨਾ ਚਾਹੀਂਦਾ।
- ਰੋਜ ਦੇ ਧਰਨਿਆਂ ਅਤੇ ਬੰਦ ਦੇ ਸੱਦਿਆਂ ਤੋਂ ਦੁਖੀ ਆਮ ਲੋਕ ਹੀ ਤੁਹਾਡੇ ਵਿਰੋਧੀ
ਬਣ ਜਾਂਣਗੇ।
ਗੁਰੂ
ਗ੍ਰੰਥ ਸਾਹਿਬ ਜੀ ਦੀ ਹੋ ਰਹੀ ਬੇਅਦਬੀ ਵਿੱਚ ਜਿੱਥੇ ਸਰਕਾਰ ਦੀ ਸਾਜਿਸ ਤੋਂ ਇੰਨਕਾਰ ਨਹੀਂ
ਕੀਤਾ ਜਾ ਸਕਦਾ ਉਥੇ ਗੁਰੂ ਘਰਾਂ ਦੇ ਮਾੜੇ ਪ੍ਰਬੰਧਾਂ ਤੋਂ ਵੀ ਮਨੁੱਕਰ ਨਹੀਂ ਹੋਇਆ ਜਾ
ਸਕਦਾ। ਜਿਹੜੇ ਗੁਰੂ ਘਰਾਂ ਵਿੱਚ ਗੁਰੂ ਗ੍ਰੰਥ ਸਾਹਿਬ ਜੀ ਸੁਰਖਿਅਤ ਨਹੀਂ ਹੈ ਜਾਂ ਜਿਹੜੇ
ਗੁਰੂ ਘਰਾਂ ਦੇ ਪ੍ਰਬੰਧਕ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਰਾਖੀ ਨਹੀਂ ਕਰ ਸਕਦੇ, ਅਜਿਹੇ ਗੁਰੂ
ਘਰਾਂ ਵਿੱਚ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਰੂਪ ਰੱਖਣੇ ਹੀ ਨਹੀਂ ਚਾਹੀਂਦੇ। ਇਸ ਲਈ ਅਸੀਂ
ਜਿੱਥੇ ਸਰਕਾਰ ਦੀਆਂ ਘੱਟੀਆ ਸਾਜਿਸਾਂ ਦਾ ਵਿਰੋਧ ਕਰਨਾ ਹੈ ਉਥੇ ਗੁਰੂ ਘਰਾਂ ਦੀ ਸੁਰੱਖਿਆ
ਦਾ ਪ੍ਰਬੰਧ ਵੀ ਸਾਨੂੰ ਕਰਨਾ ਚਾਹੀਂਦਾ ਹੈ। ਸਾਨੂੰ ਸਰਕਾਰ (ਬਾਦਲ)
ਦੀਆਂ ਚਾਲਾਂ ਨੂੰ ਸਮਝਣਾ ਚਾਹੀਂਦਾ ਹੈ, ਸੜਕਾਂ 'ਤੇ ਧਰਨੇ ਲਾਕੇ ਪੰਜਾਬ ਬੰਦ , ਬੱਸਾਂ
ਬੰਦ , ਰੇਲਾਂ ਬੰਦ, ਦੁਕਾਨਾਂ ਬੰਦ ਕਰਵਾ ਕੇ ਆਮ ਪਬਲਿਕ ਦੀਆਂ ਪ੍ਰੇਸਾਨੀਆਂ ਵਿੱਚ ਵਾਧਾ
ਨਹੀਂ ਕਰਨਾ ਚਾਹੀਦਾ। ਇਨ੍ਹਾਂ ਧਰਨਿਆਂ ਅਤੇ ਬੰਦ ਦੇ ਸੱਦਿਆਂ ਦਾ ਨੁਕਸਾਨ ਸਰਕਾਰਾਂ
ਨੂੰ ਘੱਟ ਤੇ ਆਮ ਪਬਲਿਕ ਨੂੰ ਵੱਧ ਹੁੰਦਾ ਹੈ ।
ਜੇ ਤੁਸੀਂ ਵਿਰੋਧ ਕਰਨਾ ਹੈ ਤਾਂ ਸਿਰਫ
ਸਰਕਾਰ ਦਾ ਕਰੋ, ਸਰਕਾਰ (ਬਾਦਲ) ਨਾਲ ਸਬੰਧਤ ਮੰਤਰੀਆਂ, MLAs, MPs, ਸ੍ਰੋਮਣੀ ਕਮੇਟੀ
ਦੇ ਪ੍ਰਧਾਨ, ਤਖਤਾਂ ਦੇ ਅਖੌਤੀ ਜਥੇਦਾਰਾਂ ਆਦਿ ਦਾ ਘਿਰਾਓ ਕਰੋ, ਇਨ੍ਹਾਂ ਦੀਆਂ ਕੋਠੀਆਂ
ਨੂੰ ਘੇਰੋ, ਇਨ੍ਹਾਂ ਦਾ ਘਰਾਂ ਵਿੱਚੋਂ ਬਾਹਰ ਨਿਕਲਣਾ ਬੰਦ ਕਰ ਦਿਓ, ਇਨ੍ਹਾਂ ਦਾ ਘਿਰਾਓ
ਕਰਦੇ ਸਮੇਂ ਵੀ ਧਿਆਨ ਰੱਖੋ ਕਿ ਆਮ ਪਬਲਿਕ ਨੂੰ ਕੋਈ ਸਮੱਸਿਆ ਨਾ ਆਵੇ। ਵੱਡੀਆਂ
ਘਟਨਾਵਾਂ ਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦਫਤਰਾਂ ਨੂੰ ਵੀ ਨਾ ਘੇਰੋ ਕਿਉਂਕਿ ਇਨ੍ਹਾਂ ਦੇ
ਘੇਰਨ ਨਾਲ ਵੀ ਆਮ ਪਬਲਿਕ ਦੇ ਕੰਮ ਹੀ ਰੁਕਣਗੇ।ਪ੍ਰਸ਼ਾਸਨਿਕ ਅਧਿਕਾਰੀ ਬਹੁਤੇ ਦੋਸ਼ੀ ਨਹੀਂ
ਹੁੰਦੇ, ਸਰਕਾਰਾਂ ਹੀ ਇਨ੍ਹਾਂ ਨੂੰ ਸਾਡੇ ਵਿਰੁੱਧ ਵਰਤਦੀਆਂ ਹਨ, ਜੋ ਸਰਕਾਰੀ ਮੁਲਾਜਮ,
ਸਰਕਾਰ ਦੀ ਮੰਨ ਕੇ ਆਪਣਿਆਂ ਤੇ ਜੁਰਮ ਕਰਦੇ ਹਨ ਉਨ੍ਹਾਂ ਨੂੰ ਤਰੱਕੀਆਂ ਮਿਲਦੀਆਂ ਹਨ ,ਜੋ
ਨਹੀਂ ਮੰਨਦੇ ਉਨ੍ਹਾਂ ਨੂੰ ਖੁੱਡੇ ਲਾ ਦਿੱਤਾ ਜਾਂਦਾ ਹੈ। ਬਹੁਤ ਸਾਰੇ ਸਰਕਾਰੀ ਮੁਲਾਜਮ
ਸਰਕਾਰ ਦੀਆਂ ਨੀਤੀਆਂ ਤੋਂ ਤੰਗ ਹੁੰਦੇ ਹਨ ਪਰ ਉਹ ਡਰਦੇ ਬੋਲ ਨੀ ਸਕਦੇ ਹੁੰਦੇ ਪਰ ਉਹ
ਅੰਦਰੋ ਅੰਦਰੀ ਸਰਕਾਰ ਤੋਂ ਬਦਲਾ ਵੀ ਲੈਣਾ ਚਾਹੁੰਦੇ ਹੁੰਦੇ ਹਨ।ਪੰਜਾਬ ਪੁਲਿਸ ਵੀ ਬਾਦਲ
ਸਰਕਾਰ ਦੀਆਂ ਨੀਤੀਆਂ ਤੋਂ ਤੰਗ ਹੈ।
ਖਾੜਕੂਵਾਦ ਦੇ ਸਮੇਂ ਵੀ ਇਹੀ ਕੁੱਝ
ਹੋਇਆ ਸੀ। ਸ਼ੁਰੂ ਵਿੱਚ ਪੁਲਿਸ ਖਾੜਕੂ ਸਿੰਘਾਂ ਦੀ ਵਿਰੋਧੀ ਨਹੀਂ ਸੀ ਆਮ ਪਬਲਿਕ
ਦਾ ਵੀ ਖਾੜਕੂ ਸਿੰਘਾਂ ਨੂੰ ਪੂਰਾ ਸਾਥ ਸੀ । ਕਿਉਂਕਿ ਖਾੜਕੂ ਸਿੰਘਾਂ ਨੇ ਸਮਾਜਿਕ
ਕੁਰੀਤੀਆਂ (ਦਾਜ ਦਹੇਜ,ਨਸਿਆਂ ਅਤੇ ਲੱਚਰਤਾ) ਨੂੰ ਨੱਥ ਪਾਈ ਹੋਈ ਸੀ, ਇਸ ਗੱਲ ਦੀ
ਪ੍ਰੋੜਤਾ ਕਰਦਿਆਂ ਸਾਬਕਾ ਡੀ ਜੀ ਪੀ ਸ਼ਸੀਕਾਂਤ ਨੇ ਕਿਹਾ ਸੀ ਕਿ ਖਾੜਕੂਆਂ ਨੇ ਪੰਜਾਬ
ਵਿੱਚ ਨਸ਼ਾ ਨਹੀਂ ਸੀ ਵਿਕਣ ਦਿੱਤਾ।ਇਸ ਲਈ ਸਰਕਾਰ ਨੂੰ ਖਾੜਕੂ ਸਿੰਘਾਂ ਤੋਂ ਘੱਟ ਪਰ ਖਾੜਕੂ
ਸਿੰਘਾਂ ਦੀ ਲੋਕਾਂ ਵਿੱਚ ਵੱਧ ਰਹੀ ਹਰਮਨ ਪਿਆਰਤਾ ਤੋਂ ਜਿਆਦਾ ਖੱਤਰਾ ਸੀ। ਇਸੇ ਲਈ
ਸਰਕਾਰ ਨੇ ਆਪਣੇ ਭਾੜੇ ਦੇ ਖਾੜਕੂ ਪੈਦਾ ਕਰਕੇ, ਚਲਦੀਆਂ ਬੱਸਾਂ ਵਿੱਚੋਂ ਲਾਹ ਕੇ ਇੱਕ
ਫਿਰਕੇ ਦੇ ਲੋਕ ਮਰਵਾਏ, ਪੁਲਿਸ ਵਾਲਿਆਂ ਦੇ ਪਰੀਵਾਰਾਂ ਨੂੰ ਮਰਵਾਇਆ, ਲੋਕਾਂ ਦੀਆਂ ਧੀਆਂ
ਭੈਣਾਂ ਦੀਆਂ ਇੱਜਤਾਂ ਲੁੱਟਵਾਈਆਂ, ਲੁੱਟਾਂ ਖੋਹਾਂ ਕਰਵਾਈਆਂ ਆਦਿ, ਅਜਿਹੀਆਂ ਕਾਰਵਾਈਆਂ
ਕਰਕੇ ਖਾੜਕੂ ਸਿੰਘਾਂ ਨੂੰ ਆਮ ਲੋਕਾਂ (ਪਬਲਿਕ) ਦੀਆਂ ਨਜਰਾਂ ਵਿੱਚੋਂ ਡੇਗ ਦਿੱਤਾ। ਆਪਣੇ
ਆਪ ਨੂੰ ਖਾੜਕੂ ਕਹਾਉਂਦੀਆਂ ਫੈਂਡਰੇਸਨਾ (ਜੋ ਅੱਜ ਬਾਦਲ ਦੀਆਂ ਸੇਵਾਦਾਰ ਹਨ) ਵੱਲੋਂ ਰੋਜ
ਦੇ ਬੰਦ ਦੇ ਸੱਦਿਆਂ ਤੋਂ ਦੁਖੀ ਲੋਕ, ਜਿਹੜੇ ਖਾੜਕੂ ਸਿੰਘਾਂ ਨੂੰ ਆਪਣੇ ਰਾਖੇ ਸਮਝਦੇ
ਸੀ, ਉਹੀ ਕਹਿਣ ਲੱਗ ਗਏ ਕਿ ਖਾੜਕੂ ਸਿੰਘ ਤਾਂ ਮਾੜੇ ਕੰਮ ਕਰਨ ਲੱਗ ਪਏ ਹਨ, ਹੁਣ ਤਾਂ
ਇਨ੍ਹਾਂ ਤੋਂ ਮੁਕਤੀ ਹੀ ਚਾਹੀਂਦੀ ਹੈ, ਬੱਸ ਫਿਰ ਕੀ ਸੀ ਥੋੜੇ ਜਿਹੇ ਸਮੇਂ ਵਿੱਚ ਹੀ ਸਮੇਂ
ਦੀ ਸਰਕਾਰ ਨੇ ਖਾੜਕੂ ਸਿੰਘਾਂ ਨੂੰ ਖਤਮ ਕਰ ਦਿੱਤਾ ਸੀ, ਠੀਕ ਹੈ ਕਿ ਖਾੜਕੂਵਾਦ ਸਮੇਂ ਵੀ
ਤੇ ਅੱਜ ਵੀ ਸਾਡੇ ਉਤੇ ਗੋਲੀਆਂ ਪੁਲਿਸ ਨੇ ਹੀ ਚਲਾਈਆਂ ਹਨ। ਪਰ ਇਸ ਗੱਲ ਤੋਂ ਵੀ ਮਨੁੱਕਰ
ਨਹੀਂ ਹੋਇਆ ਜਾ ਸਕਦਾ ਕਿ ਇੰਦਰਾ ਗਾਂਧੀ ਤੇ ਬੇਅੰਤ ਸਿੰਘ ਨੂੰ ਮਾਰਨ ਵਾਲੇ ਵੀ ਪੁਲਿਸ
ਵਾਲੇ ਹੀ ਸਨ, ਜਿੰਨਾ ਪੁਲਿਸ ਵਾਲਿਆਂ ਨੇ ਖਾੜਕੂ ਸਿੰਘਾਂ ਤੇ ਤਸੱਦਦ ਨਹੀਂ ਸੀ ਕੀਤਾ,
ਉਨ੍ਹਾਂ ਬਹੁਤਿਆਂ ਨੂੰ ਸਿੰਘਾਂ ਦੇ ਨਾਲ ਹੀ ਝੂਠੇ ਪੁਲਿਸ ਮੁਕਾਬਲਿਆਂ ਵਿੱਚ ਖਤਮ ਕਰ
ਦਿੱਤਾ ਸੀ, ਜੇ ਤਰੱਕੀਆਂ ਮਿਲੀਆਂ ਹਨ ਉਹ ਸਰਕਾਰ ਦੇ ਇਸਾਰੇ 'ਤੇ ਜੁਰਮ ਕਰਨ ਵਾਲਿਆਂ ਨੂੰ
ਹੀ ਮਿਲੀਆਂ ਹਨ, ਅੱਜ ਵੀ ਤੁਹਾਡੇ ਉਪਰ ਸਰਕਾਰ ਦੇ ਇਸਾਰੇ (ਹੁਕਮ) ਨਾਲ ਹੀ ਗੋਲੀ ਚਲਦੀ
ਹੈ, ਜਦੋਂ ਕਿਸਾਨਾ ਨੇ ਬੰਦ ਦੇ ਸੱਦੇ ਦਿੱਤੇ ਰੇਲਾਂ ਰੋਕੀਆਂ ਤਾਂ ਪੁਲਿਸ ਦੀ ਗੋਲੀ ਨਹੀਂ
ਚੱਲੀ, ਜਦੋਂ ਸਿਰਸੇ ਵਾਲਿਆਂ ਨੇ ਰੇਲਾਂ ਰੋਕੀਆਂ ਉਦੋਂ ਵੀ ਪੁਲਿਸ ਦੀ ਗੋਲੀ ਨਹੀਂ ਚੱਲੀ,
ਪਰ ਜਦੋਂ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਹੋਈ ਬੇਅਦਬੀ ਦੇ ਦੁੱਖ ਵਿੱਚ ਸਿਖਾਂ ਨੇ ਰੋਸ
ਪ੍ਰਗਟ ਕੀਤਾ ਤਾਂ ਤੁਰੰਤ ਗੋਲੀਆਂ ਚਲਾ ਕੇ ਸਿੰਘ ਸ਼ਹੀਦ ਕਰ ਦਿੱਤੇ, ਇਸ ਵਿੱਚ ਪੁਲਿਸ ਦੀ
ਉਨ੍ਹਾਂ ਸ਼ਹੀਦ ਸਿੰਘਾਂ ਨਾਲ ਕੋਈ ਦੁਸ਼ਮਣੀ ਨਹੀਂ ਸੀ, ਬੱਸ ਉਨ੍ਹਾਂ ਨੇ ਤਾਂ ਸਰਕਾਰ ਦਾ
ਹੁਕਮ ਹੀ ਵਜਾਇਆ ਹੈ, ਸਰਕਾਰ ਦਾ ਹੁਕਮ ਸੀ ਕਿ ਸਿੰਘਾਂ ਨੂੰ ਮਾਰੋ, ਪੁਲਿਸ ਨੇ ਮਾਰ ਦਿੱਤੇ,
ਇਹ ਕੋਈ ਪਹਿਲੀ ਵਾਰ ਨਹੀਂ ਹੋਇਆ।
ਬਾਦਲ ਨੂੰ ਪਤਾ ਹੈ ਕਿ ਸਿੱਖ ਕੌਮ ਦੀ
ਯਾਦਅਸਤ ਬਹੁਤ ਕੰਮਜੋਰ ਹੈ ਇਹ ਤਾਂ ਸਾਲ ਛੇ ਮਹੀਨਿਆਂ ਵਿੱਚ ਹੀ ਆਪਣੇ ਤੇ ਹੋਏ ਜੁਰਮ ਨੂੰ
ਭੁਲ ਜਾਂਦੀ ਹੈ, ਵੋਟਾਂ ਵੇਲੇ ਕਹਿ ਦਿਓ ਕਿ ਕਾਂਗਰਸ ਸਿੱਖਾਂ ਦੀ ਦੁਸ਼ਮਣ ਹੈ ਬੱਸ
ਇਸਨੇ ਮੇਰੇ ਵਾਲੇ ਕੀਤੇ ਜੁਰਮਾਂ ਨੂੰ ਭੁਲਾ ਕੇ ਵੋਟਾਂ ਮੈਨੂੰ ਹੀ ਪਾ ਦੇਣੀਆਂ ਹਨ,ਇਸੇ
ਲਈ ਬਾਦਲ ਸਿੱਖਾਂ ਨੂੰ ਮਾਰਨ ਲੱਗਿਆਂ ਨਹੀਂ ਡਰਦਾ,1978 ਦੀ ਵਸਾਖੀ ਵਾਲੇ ਦਿਨ ਵੀ
ਨਰੰਕਾਰੀ ਕਾਂਢ ਰਾਹੀਂ ਇਸ ਨੇ ਹੀ ਪੁਲਿਸ ਤੋਂ 13 ਸਿੰਘਾਂ ਨੂੰ ਸ਼ਹੀਦ ਅਤੇ ਦਰਜਨਾ ਸਿੰਘਾਂ
ਨੂੰ ਜਖਮੀ ਕਰਵਾਇਆ ਸੀ, ਇਹੀ ਕਾਂਢ ਦਰਵਾਰ ਸਾਹਿਬ ਤੇ ਹਮਲੇ ਦਾ ਮੁੱਢ ਸੀ। ਇਹੀ ਕਾਂਡ
ਦਿੱਲੀ ਸਿੱਖ ਕਤਲੇਆਮ ਦਾ ਮੁੱਢ ਸੀ।
ਲੁਧਿਆਣੇ ਵਿੱਚ 5 ਦਸੰਬਰ 2009 ਨੂੰ ਆਸ਼ੂਤੋਸ਼ ਦੇ ਹੋ ਰਹੇ ਸਮਾਗਮ
ਨੂੰ ਰੁਕਵਾਉਣ ਲਈ ਸ਼ਾਂਤ ਮਈ ਰੋਸ ਮਾਰਚ ਕਰ ਰਹੇ ਸਿੰਘਾਂ ਉਪਰ ਵੀ ਬਾਦਲ ਸਰਕਾਰ ਨੇ ਗੋਲੀਆਂ
ਚਲਵਾ ਕੇ ਇੱਕ ਸਿੰਘ ਨੂੰ ਸ਼ਹੀਦ ਅਤੇ ਦਰਜਨਾ ਸਿੰਘਾਂ ਨੁੰ ਜਖਮੀ ਕਰਵਾਇਆ ਸੀ, 29 ਮਾਰਚ
2012 ਨੂੰ ਗੁਰਦਾਸਪੁਰ ਵਿਖੇ ਭਾਈ ਰਾਜੋਆਣਾ ਦੀ ਫਾਸੀ ਦਾ ਵਿਰੋਧ ਕਰਦੇ ਸਿੰਘਾਂ ਤੇ ਗੋਲੀ
ਚਲਵਾ ਕੇ ਭਾਈ ਜਸਪਾਲ ਸਿੰਘ ਨੂੰ ਸ਼ਹੀਦ ਅਤੇ ਕਈ ਸਿੰਘਾਂ ਨੂੰ ਜਖਮੀ ਕਰਵਾਇਆ। ਹੁਣ ਫੇਰ
14 ਅਕਤੂਬਰ ਨੂੰ ਜਦੋਂ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਹੋਈ ਬੇਅਬਦੀ ਦੇ ਰੋਸ ਵਿੱਚ ਸਿਖਾਂ
ਨੇ ਰੋਸ ਕੀਤਾ ਤਾਂ ਤੁਰੰਤ ਗੋਲੀਆਂ ਚਲਾ ਕੇ 2 ਸਿੰਘ ਸ਼ਹੀਦ ਅਤੇ ਦਰਜਨਾਂ ਸਿੰਘ ਜਖਮੀ ਕਰ
ਦਿੱਤੇ, ਇਹ ਸੱਭ ਕੁੱਝ ਸਰਕਾਰ ਨੇ ਗਿਣੀ ਮਿਥੀ ਸਾਜਿਸ ਅਧੀਨ ਕਰਵਾਇਆ ਹੈ। ਸਰਕਾਰ ਦੀਆਂ
ਚਾਲਾਂ ਨੂੰ ਪਹਿਚਾਣੋ, ਸਰਕਾਰ ਦੀਆਂ ਧੱਕੇਸਾਹੀਆਂ ਦੀ ਸਜਾ ਸੜਕਾਂ ਤੇ ਧਰਨੇ ਲਾਕੇ ਪੰਜਾਬ
ਬੰਦ, ਬੱਸਾਂ ਬੰਦ, ਰੇਲਾਂ ਬੰਦ, ਦੁਕਾਨਾਂ ਬੰਦ ਕਰਵਾ ਕੇ ਆਮ ਪਬਲਿਕ ਨੂੰ ਨਾ ਦਿਓ,
ਸਰਕਾਰ ਵੀ ਤੁਹਾਡੇ ਤੋਂ ਇਹੀ ਕੁੱਝ ਕਰਵਾਉਣਾ ਚਾਹੁੰਦੀ ਹੈ, ਕਿਉਂਕਿ ਤੁਹਾਡੇ ਇਨ੍ਹਾਂ
ਰੋਜ ਦੇ ਧਰਨਿਆਂ ਅਤੇ ਬੰਦ ਦੇ ਸੱਦਿਆਂ ਤੋਂ ਦੁਖੀ ਆਮ ਲੋਕ ਹੀ ਤੁਹਾਡੇ ਵਿਰੋਧੀ ਬਣ
ਜਾਂਣਗੇ। ਜਦੋਂ ਕਿਸੇ ਸੰਘਰਸ ਦਾ ਵਿਰੋਧ ਆਮ ਲੋਕ ਕਰਨ ਲੱਗ ਜਾਣ ਤਾਂ ਫਿਰ ਸਰਕਾਰ ਉਤੇ ਵੀ
ਉਸ ਸੰਘਰਸ ਦਾ ਕੋਈ ਅਸਰ ਨਹੀਂ ਰਹਿੰਦਾ ਅਤੇ ਸਰਕਾਰ ਨੂੰ ਸੰਘਰਸ ਕਰਦੇ ਲੋਕ ਕੁੱਟਣੇ ਮਾਰਨੇ
ਵੀ ਸੌਖੇ ਹੋ ਜਾਂਦੇ ਹਨ, ਕਿਉਂਕਿ ਸਰਕਾਰ ਵੱਲੋਂ ਕੀਤੀ ਗਈ ਕੁੱਟ ਮਾਰ ਦਾ ਆਮ ਲੋਕਾਂ
ਵਿੱਚ ਰੋਸ ਨਹੀਂ ਫੈਲਦਾ। ਰੋਸ ਤਾਂ ਕੀ ਆਮ ਲੋਕ ਤਾਂ ਇਹ ਕਹਿਣ ਲੱਗ ਜਾਂਦੇ ਹਨ ਕਿ ਇਨ੍ਹਾਂ
ਨੇ ਤਪਾ ਰੱਖੇ ਸੀ, ਕੁੱਟੇ ਮਾਰੇ ਬਿਨਾ ਇਹ ਠੀਕ ਨਹੀਂ ਸਨ ਆਉਂਦੇ ਸਰਕਾਰ ਨੇ ਵਧੀਆ ਕੀਤਾ
ਇਨ੍ਹਾਂ (ਧਰਨਾਕਾਰੀਆਂ) ਨੂੰ ਸਬਕ ਸਿੱਖਾ ਦਿੱਤਾ।
ਇਸ ਲਈ ਬੇਨਤੀ ਹੈ ਕਿ ਬੰਦ ਦੇ ਸੱਦੇ
ਦੇਣੇ ਬੰਦ ਕਰਕੇ ਸਰਕਾਰ ਦੀਆਂ ਭਰਾ ਮਾਰੂ ਨੀਤੀਆਂ ਨੂੰ ਲੋਕਾਂ ਵਿੱਚ ਨੰਗਾ ਕਰਕੇ ਆਮ ਲੋਕਾਂ
(ਪਬਲਿਕ) ਨੂੰ ਨਾਲ ਜੋੜੋ।