ਨਵੀਂ
ਦਿੱਲੀ, ੨੭ ਅਕਤੂਬਰ: ਦਿੱਲੀ ਸਿੱਖ ਗੁਰਦੁਆਰਾ
ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਗੁਰਲਾਡ ਸਿੰਘ ਨੇ ਗੁਰਦੁਆਰਾ ਕਮੇਟੀ ਵੱਲੋਂ
ਖੁਦ ਨੂੰ ਦਿੱਤੇ ਹੋਏ ਅਹੁਦਿਆਂ ਤੋਂ ਅਸਤੀਫਾ ਦੇ ਦਿੱਤਾ ਹੈ।
ਆਪਣੇ ਇਸ ਕਦਮ ਦੇ ਕਾਰਨਾਂ ਬਾਰੇ
ਜਾਣਕਾਰੀ ਦਿੰਦਿਆਂ ਨੇ ਆਪਣੇ ਅਸਤੀਫੇ ਵਿਚ ਲਿਖਿਆ ਕਿ ਪਿਛਲੇ ਸਾਲ ਦਿੱਲੀ
ਦੇ ਤਿਲਕ ਵਿਹਾਰ ਇਲਾਕੇ ਵਿਚ ਇਕ ਸਰਕਾਰੀ ਪਲਾਟ 'ਤੇ ਬਿਨਾਂ ਇਜਾਜ਼ਤ (ਅਸਲ
ਵਿਚ ਪਲਾਟ 'ਤੇ ਕਬਜ਼ੇ ਦੀ ਮਨਸ਼ਾ ਨਾਲ) ਗੁਰੂ ਗ੍ਰੰਥ ਸਾਹਿਬ ਦੇ ਅਖੰਡ ਪਾਠ
ਨੂੰ ਰੁਕਵਾਉਣ ਦੇ ਵਿਰੋਧ ਵਿਚ ਦਿੱਲੀ ਕਮੇਟੀ ਵੱਲੋਂ ਭਾਰੀ ਰੋਸ ਪ੍ਰਦਰਸ਼ਨ
ਕਰਦਿਆਂ ਤਿਲਕ ਨਗਰ ਥਾਣੇ ਸਾਹਮਣੇ ਸੜਕ ਜਾਮ ਕਰ ਦਿੱਤੀ ਗਈ ਅਤੇ ਮੈਟਰੋ
ਟਰੇਨ ਵੀ ਰੁਕਵਾ ਦਿੱਤੀ ਗਈ।
ਪੁਲਿਸ ਵੱਲੋਂ ਮੁਆਫੀ ਮੰਗਣ ਅਤੇ
ਮੁੜ ਤੋਂ ਅਖੰਡ ਪਾਠ ਰੱਖਣ ਦੀ ਇਜਾਜ਼ਤ ਦੇਣ ਉਪਰੰਤ ਹੀ ਇਹ ਧਰਨੇ ਚੁੱਕੇ ਗਏ
ਸਨ। ਪਰ ਪੰਜਾਬ ਦੇ ਕੋਟ ਕਪੂਰਾ ਇਲਾਕੇ ਵਿਚ ਗੁਰੂ ਗ੍ਰੰਥ ਸਾਹਿਬ ਦੇ ਪਤਰੇ
ਫਾੜ ਕੇ ਗਲੀਆਂ ਵਿਚ ਰੋਲਣ ਦੀ ਭਾਰੀ ਬੇਅਦਬੀ ਦੇ ਬਾਵਜੂਦ, ਦਿੱਲੀ ਕਮੇਟੀ
ਨੇ ਇਸ ਮਾਮਲੇ ਵਿਚ ਕੋਈ ਰੋਸ ਪ੍ਰਦਰਸ਼ਨ ਨਹੀਂ ਕੀਤਾ।
ਕੋਟ ਕਪੂਰਾ ਵਿਚ ਗੁਰੂ ਸਾਹਿਬ
ਦੀ ਬੇਅਦਬੀ ਦੇ ਵਿਰੋਧ ਵਿਚ ਸ਼ਾਂਤਮਈ ਪ੍ਰਦਰਸ਼ਨ ਕਰ ਰਹੇ ਸਿੱਖਾਂ ਦੀਆਂ ਪੱਗਾਂ
ਰੋਲਣ ਅਤੇ ਦੋ ਸਿੰਘਾਂ ਨੂੰ ਸ਼ਹੀਦ ਕੀਤੇ ਜਾਣ ਦੇ ਬਾਅਦ ਵੀ ਦਿੱਲੀ ਕਮੇਟੀ
ਨੇ ਇਸ ਮਾਮਲੇ ਵਿਚ ਕੋਈ ਰੋਸ ਪ੍ਰਦਰਸ਼ਨ ਨਹੀਂ ਕੀਤਾ ਜਦਕਿ ਵਿਦੇਸ਼ਾਂ ਵਿਚ
ਸਿੱਖਾਂ ਦੀ ਪਗੜੀ ਦੇ ਮਸਲੇ 'ਤੇ ਦਿੱਲੀ ਕਮੇਟੀ ਵੱਲੋਂ ਰੋਸ ਪ੍ਰਦਰਸ਼ਨ ਕਰਨ
ਵਿਚ ਕੋਈ ਸੰਕੋਚ ਨਹੀਂ ਕੀਤਾ ਜਾਂਦਾ।
ਇਥੋਂ ਤੱਕ ਕਿ ਬਰਗਾੜੀ ਵਿਚ
ਇਨ੍ਹਾਂ ਸਿੰਘਾਂ ਨਮਿਤ ਅੰਤਿਮ ਅਰਦਾਸ ਸਮਾਗਮ ਵਿਚ ਦਿੱਲੀ ਕਮੇਟੀ ਦੇ ਕਿਸੇ
ਅਹੁਦੇਦਾਰ ਜਾਂ ਪ੍ਰਤੀਨਿਧੀ ਨੇ ਪੁੱਜਣ ਦੀ ਖੇਚਲ ਨਹੀਂ ਕੀਤੀ। ਇਸਦੇ ਉਲਟ,
ਅਰਦਾਸ ਸਮਾਗਮ ਬਾਰੇ ਕੇਜਰੀਵਾਲ ਅਤੇ ਭਗਵੰਤ ਮਾਨ ਦੀ ਆਲੋਚਨਾ ਵਾਲੇ ਬਿਆਨ
ਜਾਰੀ ਕਰਕੇ, ਦਿੱਲੀ ਕਮੇਟੀ ਵੱਲੋਂ ਸਿੱਖਾਂ ਦੇ ਦੁਖਾਂ ਦਾ ਮਖੌਲ ਉਡਾਉਣ
ਦੀ ਕੋਸ਼ਿਸ਼ ਕੀਤੀ ਗਈ।
ਗੁਰਲਾਡ ਸਿੰਘ ਨੇ ਕਿਹਾ ਕਿ ਅਕਾਲੀ ਦਲ ਦੀਆਂ ਅਜਿਹੀਆਂ ਨੀਤੀਆਂ ਕਾਰਨ ਉਹ
ਪਿਛਲੇ ਸਾਲ ਹੀ ਅਕਾਲੀ ਦਲ (ਬਾਦਲ) ਤੋਂ ਅਸਤੀਫਾ ਦੇ ਚੁੱਕੇ ਸਨ।
ਹੁਣ ਅਕਾਲੀ ਦਲ ਦੀਆਂ ਉਸੇ ਕਿਸਮ ਦੀਆਂ ਮੌਜੂਦਾ ਨੀਤੀਆਂ ਕਰਕੇ ਉਹ ਦਿੱਲੀ
ਕਮੇਟੀ ਵੱਲੋਂ ਦਿੱਤੀ ਗਈ ਚੇਅਰਮੈਨੀ ਤੋਂ ਵੀ ਅਸਤੀਫਾ ਦੇ ਰਹੇ ਹਨ।