Khalsanews

ਘਰ ਦੇ ਭਾਗ ਵਿਹੜਿਓਂ ਹੀ ਪਤਾ ਲੱਗ ਜਾਂਦੇ ਹਨ
-: ਸੰਪਾਦਕ ਖ਼ਾਲਸਾ ਨਿਊਜ਼

ਪੁਰਾਣੇ ਸਮਿਆਂ 'ਚ ਕਿਸੇ ਦੇ ਘਰ ਜਾਈਦਾ ਸੀ ਤਾਂ ਉਨ੍ਹਾਂ ਦੇ ਵਿਹੜੇ ਦੀ ਸਲੀਕੇ ਜਾਂ ਬੇਤਰਤੀਬੀ ਤੋਂ ਪਤਾ ਲੱਗ ਜਾਂਦਾ ਸੀ ਕਿ ਘਰ 'ਚ ਰਹਿਣ ਵਾਲੇ ਕਿਸ ਤਬੀਅਤ ਦੇ ਮਾਲਿਕ ਹਨ। ਇਸੇ ਲਈ ਇਹ ਮੁਹਾਵਰਾ ਬਣਿਆ "ਘਰ ਦੇ ਭਾਗ ਵਿਹੜਿਓਂ ਹੀ ਪਤਾ ਲੱਗ ਜਾਂਦੇ ਹਨ"।

ਜਾਗਰੂਕ ਸਿੱਖਾਂ ਅਤੇ ਖ਼ਾਲਸਾ ਨਿਊਜ਼ ਨੂੰ ਇਹ ਅੰਦਾਜ਼ਾ ਪਹਿਲਾਂ ਹੀ ਸੀ, ਕਿ ਜਿਸ ਕਿਸੇ ਵੀ ਮੁਹਿੰਮ 'ਚ ਮਾਨ, ਦਾਦੂਵਾਲ, ਨੰਦਗੜ੍ਹ, ਗੁਰਦੀਪ ਸਿੰਘ ਬਠਿੰਡਾ, ਮੋਹਕਮ ਸਿੰਘ, ਕੇਵਲ ਸਿੰਘ, ਪੀਰ ਮੁਹੰਮਦ.... (ਇਹ ਲਿਸਟ ਬਹੁਤ ਲੰਮੀ ਹੈ...) ਆਦਿ ਸ਼ਾਮਿਲ ਹੋ ਜਾਣ, ਉਹ ਮੁਹਿੰਮ ਚਲੱਣ ਤੋਂ ਪਹਿਲਾਂ ਹੀ ਹਾਈਜੈਕ ਹੋ ਜਾਂਦੀ ਹੈ।

ਜਿਸ ਦਿਨ ਦਾ ਮਾਨ ਅਤੇ ਸਾਥੀਆਂ ਵੱਲੋਂ ਸਰਬੱਤ ਖ਼ਾਲਸਾ ਬੁਲਾਉਣ ਦਾ ਐਲਾਨ ਕੀਤਾ ਗਿਆ ਹੈ, ਉਸੇ ਦਿਨ ਪਤਾ ਚੱਲ ਗਿਆ ਸੀ, ਕਿ ਇਨ੍ਹਾਂ ਕੀ ਕੜ੍ਹੀ ਘੋਲਣੀ ਹੈ। ਸਰਬੱਤ ਖ਼ਾਲਸਾ ਬੁਲਾਉਣ ਦਾ ਮਕਸਦ ਹੋਣਾ ਚਾਹੀਦਾ ਸੀ -

- ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਸਰਵਉੱਚਤਾ ਨੂੰ ਗੁਰਮਤਿ ਵਿਰੋਧੀ ਅਨਸਰਾਂ ਵਲੋਂ ਲਾਈ ਜਾ ਰਹੀ ਢਾਅ ਵਿਰੁੱਧ ਨੀਤੀ ਬਣੇ,
- ਸ਼੍ਰੋਮਣੀ ਕਮੇਟੀ ਤੋਂ ਬਾਦਲ ਦਾ ਗ਼ਲਬਾ ਲਾਹਿਆ ਜਾਵੇ,
- ਅਖੌਤੀ ਜਥੇਦਾਰੀ ਪਰੰਪਰਾ ਰੱਦ ਹੋਵੇ...

ਪਰ ਕਦੇ ਮੰਗਤਿਆਂ ਕੋਲ਼ੋਂ ਵੀ ਕ੍ਰਾਂਤੀ ਦੀ ਉਮੀਦ ਲਗਾਈ ਜਾ ਸਕਦੀ ਹੈ, ਜਿਹੜੇ ਪੈਰ ਪੈਰ 'ਤੇ ਬੇਨਤੀਆਂ ਕਰਣ ਦੇ ਆਦੀ ਹੋਣ... ਵਾਰਸ ਸ਼ਾਹ ਨਾ ਆਦਤਾਂ ਜਾਂਦੀਆਂ, ਭਾਵੇਂ ਕੱਟੀਏ ਪੋਰੀ ਪੋਰੀ ਜੀ!

ਦੇਖ ਲਵੋ ਸਰਬੱਤ ਖ਼ਾਲਸਾ ਬੁਲਾਉਣ ਵਾਲਿਆਂ ਦੇ ਹਾਲ, ਜਿਨ੍ਹਾਂ ਨੇ ਆਪਣੇ ਏਲਚੀ ਮੋਹਕਮ ਸਿੰਘ ਨੂੰ ਭੇਜਿਆ ਹੈ ਮੱਕੜ ਨੂੰ ਬੇਨਤੀ ਕਰਣ ਕਿ ਸਾਨੂੰ ਮੰਜੀ ਸਾਹਿਬ ਜਗ੍ਹਾ ਦਿੱਤੀ ਜਾਵੇ, ਅਤੇ "ਮੱਕੜ ਸਾਹਿਬ" ਨੂੰ ਸੱਦਾ ਪੱਤਰ!!! ਜਿਨ੍ਹਾਂ ਨੇ ਸਿੱਖੀ ਦਾ ਬੇੜਾ ਗਰਕ ਕੀਤਾ ਹੋਵੇ, ਉਨ੍ਹਾਂ ਨੂੰ ਸੱਦਾ ਪੱਤਰ??? ਜਿਨ੍ਹਾਂ ਵਿਰੁੱਧ ਸਰਬੱਤ ਖ਼ਾਲਸਾ ਇੱਕਠਾ ਹੋਣਾ ਚਾਹੀਦਾ ਸੀ, ਉਨ੍ਹਾਂ ਨੂੰ ਬੇਨਤੀਆਂ ???

ਦੁਰ ਫਿੱਟੇ ਮੁੰਹ ਕਹਿਣ ਨੂੰ ਵੀ ਜੀ ਨਹੀਂ ਕਰਦਾ, ਖ਼ਾਲਿਸਤਾਨ ਤੋਂ ਹੇਠਾਂ ਗੱਲ ਨਾ ਕਰਣ ਵਾਲੇ ਮੱਕੜ ਕੋਲੋਂ ਮੰਜੀ ਸਾਹਿਬ ਦਾ ਹਾਲ ਵੀ ਨਹੀਂ ਲੈ ਸਕਦੇ, ਤੇ ਇਨ੍ਹਾਂ ਨੂੰ ਖ਼ਾਲਿਸਤਾਨ ਦਾ ਮਸੀਹਾ ਕਹਿੰਦੇ ਨੇ... ਤੇ ਇਨ੍ਹਾਂ ਨੂੰ ਖ਼ਾਲਿਸਤਾਨ ਦੀ ਆਸ ਲਾਈ ਬੈਠੇ ਹੋ !!! ਲੱਖ ਲਾਹਨਤ ਹੈ ਇਨ੍ਹਾਂ ਦੋਗਲਿਆਂ 'ਤੇ... ਜੱਦੇ ਸਰਬੱਤ ਖ਼ਾਲਸਾ ਬੁਲਾਉਣ ਦੇ...

ਭਾਨੂਮਤੀ ਕਾ ਕੁਨਬਾ ਜੋੜਾ, ਇਧਰ ਕੀ ਈਂਟ, ਉਧਰ ਕਾ ਰੋੜਾ... ਇਹ ਹੈ ਇਨ੍ਹਾਂ ਦਾ ਸਰਬੱਤ ਖਾਲਸਾ!!! ਕੀ ਇਹ ਜ਼ਰੂਰੀ ਹੈ ਕਿ ਸਰਬੱਤ ਖ਼ਾਲਸਾ ਦਰਬਾਰ ਸਾਹਿਬ ਹੀ ਕਰਨਾ ਹੈ? ਕਿਤੇ ਹੋਰ ਵੀ ਹੋ ਸਕਦਾ ਹੈ, ਜੇ ਨੀਅਤ ਸਾਫ ਹੋਵੇ ਤਾਂ!!!

ਜੋ ਹਾਲ ਇਨ੍ਹਾਂ ਨੇ ਬਰਗਾੜੀ ਸਮਾਗਮ ਦੀ ਫੂਕ ਕੱਢਕੇ ਕੀਤਾ ਹੈ, ਸਰਬੱਤ ਖ਼ਾਲਸਾ ਦਾ ਜੋ ਹਾਲ ਹੋਣਾ ਹੈ, ਉਸ ਦਾ ਅੰਦਾਜ਼ਾ ਲਗਾਉਣਾ ਕੋਈ Rocket Science ਨਹੀਂ, ਇਨ੍ਹਾਂ ਲੋਕਾਂ ਨੇ ਸਰਬੱਤ ਖ਼ਾਲਸਾ ਦਾ ਵੀ ਮਖੌਲ ਬਣਾ ਕੇ ਰੱਖ ਦੇਣਾ ਹੈ। ਹੇ ਰੱਬਾ, ਅਕਲ ਵੰਡਣ ਲੱਗਾ, ਥੋੜ੍ਹੀ ਜਿਹੀ ਸਿੱਖਾਂ ਦੀ ਝੋਲ਼ੀ ਵਿੱਚ ਵੀ ਪਾ ਦਿੰਦਾ!!!

ਰੱਬ ਰਾਖਾ!!!

ਵਾਹਿਗੁਰੂ ਜੀ ਕਾ ਖ਼ਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਹਿ॥
ਖ਼ਾਲਸਾ ਨਿਊਜ਼ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਸਮਰਪਿਤ ਹੈ। ਅਸੀਂ ਅਖੌਤੀ ਦਸਮ ਗ੍ਰੰਥ ਅਤੇ ਹੋਰ ਅਨਮਤੀ ਗ੍ਰੰਥ, ਪੱਪੂ (ਅਖੌਤੀ ਜੱਥੇਦਾਰ), ਪਖੰਡੀ ਸਾਧ, ਬਾਬੇ, ਪਾਸ਼ਰੂਕ (ਅਖੌਤੀ ਜਾਗਰੂਕ), ਅਨਮਤੀ ਕਰਮਕਾਂਡਾਂ ਦੇ ਖਿਲਾਫ ਪ੍ਰਚਾਰ ਕਰਦੇ ਰਹੇ ਹਾਂ ਅਤੇ ਕਰਦੇ ਰਹਾਂਗੇ। ਅਸੀਂ ਹਰ ਉਸ ਸਿੱਖ / ਸਿੱਖ ਜਥੇਬੰਦੀ ਦਾ ਸਾਥ ਦੇਵਾਂਗੇ, ਜਿਸਦਾ ਨਿਸ਼ਚਾ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ 'ਤੇ ਹੋਵੇ, ਸੱਚ ਬੋਲਣ ਅਤੇ ਸੱਚ 'ਤੇ ਪਹਿਰਾ ਦੇਣ ਦੀ ਹਿੰਮਤ ਅਤੇ ਬਾਬਰ ਦੇ ਸਾਹਮਣੇ ਖਲੋ ਕੇ ਜਾਬਰ ਕਹਿਣ ਦੀ ਹਿੰਮਤ ਰੱਖਦਾ ਹੋਵੇ।


Disclaimer: Khalsanews.org does not necessarily endorse the views and opinions voiced in the news, articles, audios, videos or any other contents published on www.khalsanews.org and cannot be held responsible for their views. Read full details...