Share on Facebook

Main News Page

ਪੰਜਾਬ ਸਰਕਾਰ ਪਾਣੀ ਥੱਲੇ ਅੱਗ ਲਾਕੇ, ਉਸ 'ਤੇ ਢੱਕਣ ਦੇਣ ਦੀ ਕੋਸ਼ਿਸ਼ ਕਰ ਰਹੀ ਹੈ, ਜੋ ਵਿਨਾਸ਼ ਦਾ ਕਾਰਣ ਬਣ ਸਕਦੀ ਹੈ
-: ਸੰਪਾਦਕ ਖ਼ਾਲਸਾ ਨਿਊਜ਼

ਪੰਜਾਬੀ ਪੱਤਰਕਾਰਾਂ ਨੂੰ, ਫੇਸਬੁੱਕ 'ਤੇ ਕੁਮੈਂਟ ਕਰਣ ਵਾਲਿਆਂ ਨੂੰ ਪੰਜਾਬ ਦੀ ਸਰਕਾਰ ਵੱਲੋਂ ਝੂਠੇ ਜਾਂ ਦਬੇ ਹੋਏ ਕੇਸਾਂ 'ਚ ਫੜਨਾ, ਸੱਚ ਬੋਲਣ ਵਾਲਿਆਂ ਦੇ ਮੂੰਹ 'ਤੇ ਤਾਲ਼ਾ ਲਾਉਣਾ, ਮਨੁੱਖੀ ਹੱਕਾਂ ਦੀ ਉਲੰਘਣਾ ਹੈ, ਹੋਰ ਹੋਰ ਤਾਂ ਭਾਰਤ ਦੇ ਸੁਪਰੀਮ ਕੋਰਟ ਦੇ ਆਦੇਸ਼ਾਂ ਦੀ ਵੀ ਉਲੰਘਣਾ ਹੈ, ਜੋ ਕਿ ਸਾਫ ਦਰਸਾਉਂਦਾ ਹੈ ਕਿ ਅਖੌਤੀ ਅਕਾਲੀ ਧੁਰ ਅੰਦਰ ਤੱਕ ਕੰਬ ਚੁਕੇ ਹਨ, ਹੁਣ ਲੋਕਾਂ ਦਾ ਮੁੰਹ ਬੰਦ ਕਰਨਾ ਚਾਹੁੰਦੇ ਹਨ।

ਬਹੁਤ ਸਾਲ ਪਹਿਲਾਂ ਪ੍ਰੋ. ਦਰਸ਼ਨ ਸਿੰਘ ਖ਼ਾਲਸਾ ਨੇ ਭਾਈ ਗੁਰਦਾਸ ਵਾਰ 28 ਪਉੜੀ 13 "ਗੁਰ ਸਿਖੀ ਦੀ ਏਹ ਨੀਸਾਣੀ॥" ਦਾ ਕੀਰਤਨ ਕਰਦਿਆਂ ਪਾਣੀ ਦੀ ਉਦਾਹਰਣ "ਪਾਣੀ ਚਲੈ ਨੀਵਾਣੁ ਨੋ ਨਿਰਮਲੁ ਸੀਤਲੁ ਸੁਧੁ ਪਰਾਣੀ।" ਦੇਂਦਿਆਂ ਕਿਹਾ ਸੀ ਕਿ ਪਾਣੀ ਦਾ ਸੁਭਾਅ ਹੈ ਨੀਵਾਣ ਵੱਲ ਤੁਰਨਾ, ਪਰ ਜੇ ਕੋਈ ਇਸ ਪਾਣੀ ਨੂੰ ਕਿਸੇ ਬਰਤਨ ਵਿੱਚ ਪਾ ਕੇ, ਚੁਲ੍ਹੇ 'ਤੇ ਰੱਖ ਦੇਵੇ, ਤੇ ਪਾਣੀ ਉਬਲਣ ਲੱਗ ਪੈਂਦਾ ਹੈ, ਤੇ ਹੋਰ ਜੇ ਕੋਈ ਉਸ ਉਬਲਦੇ ਪਾਣੀ 'ਤੇ ਕੋਈ ਢੱਕਣ ਪਾ ਦੇਵੇ ਤਾਂ, ਤਾਂ ਫਿਰ ਪਾਣੀ ਦੇ ਉਬਾਲ ਨੂੰ ਬਰਤਨ ਦੇ ਅੰਦਰ ਰੱਖਣਾ ਮੁਸ਼ਕਿਲ ਹੋਂਦਾ ਹੈ ਤੇ ਫਿਰ ਧਮਾਕਾ ਹੁੰਦਾ ਹੈ। ਸਿੱਖ ਵੀ ਇਸੇ ਤਰ੍ਹਾਂ ਹੈ।

ਪੰਜਾਬ ਵਿੱਚ ਹੁਣ ਵੀ ਇਹ ਮਿਸਾਲ ਹੂਬਹੂ ਲਾਗੂ ਹੁੰਦੀ ਹੈ। ਪੰਜਾਬ ਸਰਕਾਰ ਜੋ ਪਿਛਲੇ ਸਮੇਂ 'ਚ ਸਿੱਖਾਂ ਅਤੇ ਪੰਜਾਬ ਵਾਸੀਆਂ 'ਤੇ ਜ਼ੁਲਮ ਕਰ ਰਹੀ ਹੈ, ਤੇ ਹੁਣ ਜਦੋਂ ਲੋਕ ਰੋਹ ਉਜਾਗਰ ਹੋ ਰਿਹਾ ਹੈ ਤਾਂ, ਉਸ ਦਾ ਵਿਸ਼ਲੇਸ਼ਣ ਕਰਣ ਦੀ ਬਜਾਏ, ਜ਼ੋਰ ਅਜਮਾਇਸ਼ ਕੀਤੀ ਜਾ ਰਹੀ ਹੈ। ਲੋਕਾਂ ਦਾ ਮੂੰਹ ਬੰਦ ਕਰਣ ਦਾ ਦਮਨਕਾਰੀ ਢੰਗ ਅਪਣਾਇਆ ਜਾ ਰਿਹਾ ਹੈ, ਜੋ ਕਿ ਸਰਾਸਰ ਅਣਮਨੁੱਖੀ ਹੈ। ਇਸ ਤਰ੍ਹਾਂ ਦਾ ਵਰਤਾਰਾ ਬਹੁਤੀ ਦੇਰ ਨਹੀਂ ਚਲਦਾ।

ਸ. ਸੁਰਿੰਦਰ ਸਿੰਘ, ਬਲਤੇਜ ਪੰਨੂੰ, ਸ. ਪਪਲਪ੍ਰੀਤ ਸਿੰਘ, ਸ. ਰਘਬੀਰ ਸਿੰਘ ਭਰੋਵਾਲ ਆਦਿ ਨੂੰ ਪੁਲਿਸ ਵਲੋਂ ਹਿਰਾਸਤ 'ਚ ਲੈਣਾ, ਜਾਂ ਉਨ੍ਹਾਂ ਦੇ ਰਿਸ਼ਤੇਦਾਰਾਂ ਨੂੰ ਤੰਗ ਪਰੇਸ਼ਾਨ ਕਰਨਾ, ਕਿੱਧਰ ਦੀ ਅਕਲਮੰਦੀ ਹੈ। ਇਨ੍ਹਾਂ ਤੋਂ ਬਾਅਦ ਕਈ ਹੋਰਾਂ ਦਾ ਵੀ ਨੰਬਰ ਲੱਗ ਸਕਦਾ ਹੈ, ਸਾਡਾ ਵੀ ਲੱਗ ਸਕਦਾ ਹੈ।

ਸਾਰੇ ਸਿੱਖਾਂ ਅਤੇ ਪੰਜਾਬ ਵਾਸੀਆਂ ਨੂੰ ਇਸ ਦਮਨਕਾਰੀ ਨੀਤੀ ਦਾ ਮੂਂਹਤੋੜ ਜਵਾਬ ਦੇਣਾ ਚਾਹੀਦਾ ਹੈ। ਹੋਸ਼ ਗਵਾਕੇ, ਹਿੰਸਾ ਕਰਣ ਦੀ ਨਾ ਸੋਚੀ ਜਾਵੇ... ਲੋਕਾਂ ਦਾ ਸਭ ਤੋਂ ਵੱਡਾ ਹਥਿਆਰ ਹੈ "ਵੋਟ"। 2017 ਤੱਕ ਇਹ ਆਪਣੇ ਅੰਦਰ ਅੱਗ ਸੁਲਗਦੀ ਰੱਖੋ, ਤੇ ਇਨ੍ਹਾਂ ਦਾ ਵੋਟ ਰਾਹੀਂ ਤਖ਼ਤਾ ਪਲਟਾ ਦੇਓ!!!

ਗੁਰੂ ਸਭ ਨੂੰ ਜੋਸ਼ ਤੇ ਹੋਸ਼ ਦਾ ਸੁਮੇਲ ਬਖਸ਼ੇ, ਅਤੇ ਗੁਰੂ ਦੀ ਅਗਵਾਈ 'ਚ ਇਹ ਘਾਲਣਾ ਸਫਲ ਹੋਵੇ।

ਜੈਕਾਰੁ ਕੀਓ ਧਰਮੀਆ ਕਾ ਪਾਪੀ ਕਉ ਡੰਡੁ ਦੀਓਇ


ਵਾਹਿਗੁਰੂ ਜੀ ਕਾ ਖ਼ਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਹਿ॥
ਖ਼ਾਲਸਾ ਨਿਊਜ਼ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਸਮਰਪਿਤ ਹੈ। ਅਸੀਂ ਅਖੌਤੀ ਦਸਮ ਗ੍ਰੰਥ ਅਤੇ ਹੋਰ ਅਨਮਤੀ ਗ੍ਰੰਥ, ਪੱਪੂ (ਅਖੌਤੀ ਜੱਥੇਦਾਰ), ਪਖੰਡੀ ਸਾਧ, ਬਾਬੇ, ਪਾਸ਼ਰੂਕ (ਅਖੌਤੀ ਜਾਗਰੂਕ), ਅਨਮਤੀ ਕਰਮਕਾਂਡਾਂ ਦੇ ਖਿਲਾਫ ਪ੍ਰਚਾਰ ਕਰਦੇ ਰਹੇ ਹਾਂ ਅਤੇ ਕਰਦੇ ਰਹਾਂਗੇ।
ਅਸੀਂ ਹਰ ਉਸ ਸਿੱਖ / ਸਿੱਖ ਜਥੇਬੰਦੀ ਦਾ ਸਾਥ ਦੇਵਾਂਗੇ, ਜਿਸਦਾ ਨਿਸ਼ਚਾ ਸਿਰਫ ਸ੍ਰੀ ਗੁਰੂ ਗ੍ਰੰਥ ਸਾਹਿਬ 'ਤੇ ਹੋਵੇ, ਸੱਚ ਬੋਲਣ ਅਤੇ ਸੱਚ 'ਤੇ ਪਹਿਰਾ ਦੇਣ ਦੀ ਹਿੰਮਤ ਅਤੇ ਬਾਬਰ ਦੇ ਸਾਹਮਣੇ ਖਲੋ ਕੇ ਜਾਬਰ ਕਹਿਣ ਦੀ ਹਿੰਮਤ ਰੱਖਦਾ ਹੋਵੇ।



Disclaimer: Khalsanews.org does not necessarily endorse the views and opinions voiced in the news, articles, audios, videos or any other contents published on www.khalsanews.org and cannot be held responsible for their views.  Read full details...

Go to Top