ਕੋਈ 35 ਕੁ ਸਾਲ ਪਹਿਲਾਂ ਵਿਚਾਰ ਪ੍ਰਚਲਿਤ ਕਿਤਾ ਗਿਆ ਕਿ ਸਿੱਖਾਂ ਲਈ "ਅਕਾਲ
ਤਖਤ ਸਰਵਉੱਚ" ਹੈ। ਇਹ ਵਿਚਾਰ ਸਿੱਖਾਂ ਦੀ ਪਕੜ ਵਿੱਚ ਆਉਣ ਤੋਂ ਪਹਿਲਾਂ ਹੀ ਰੂਪ ਵਟਾ
ਕੇ 'ਅਕਾਲ ਤਖਤ ਜਥੇਦਾਰ ਸਰਵਉੱਚ' ਬਣ ਗਿਆ।
ਜਥੇਦਾਰ ਕੋਲੋਂ ਮਨਭਾਉਂਦੇ ਹੁਕਮਨਾਮੇ ਜਾਰੀ
ਕਰਵਾ ਕੇ ਰਾਜਨੀਤੀ ਵਿੱਚ ਪਕੜ ਮਜ਼ਬੂਤ ਕਰਨ ਵਾਲੇ ਖਿਡਾਰੀਆਂ ਨੇ ਇਸ ਦਾ ਖੂਬ ਲਾਹਾ ਲਿਆ।
ਮਨਭਾਉਂਦੇ ਹੁਕਮਨਾਮੇ ਜਾਰੀ ਕਰਨ ਲਈ ਆਗਿਆਕਾਰੀ ਜਥੇਦਾਰ ਚਾਹੀਦੇ ਸਨ।
ਫਿਰ ਮਾੜੀ ਮੋਟੀ ਰੜਕ ਰੱਖਣ ਵਾਲੇ ਜਥੇਦਾਰਾਂ ਦੀ ਛੁੱਟੀ ਕਰਨ ਦਾ
ਦੌਰ ਚੱਲ ਪਿਆ। ਲੋਕਾਂ ਨੂੰ ਅਕਾਲ ਤਖਤ ਦੀ 'ਸਰਵਉੱਚਤਾ' ਵਾਲੀ ਖੇਡ ਪਿਛੇ ਸੁਆਰਥੀ
ਰਾਜਨੀਤੀ ਦਾ ਮਾੜਾ ਮਾੜਾ ਝੌਲਾ ਪੈਣ ਲੱਗ ਪਿਆ। ਫਿਰ ਰਾਜਨੀਤਕ ਖਿਡਾਰੀ ਅਤੇ ਜਥੇਦਾਰ ਦੋਨੋਂ
ਹੀ ਨੰਗੇ ਚਿੱਟੇ ਹੋ ਕੇ ਵਿਰੋਧੀਆਂ ਖਿਲਾਫ 'ਫਤਵੇ' ਅਤੇ ਸਹਿਯੋਗੀਆਂ ਨੂੰ ਤਗਮੇ ਦੇਣ ਲੱਗ ਪਏ।
ਹੁਣ ਜਦ 'ਸਰਵਉੱਚਤਾ' ਦੇ ਢੋਂਗ ਵਾਲੀ ਖੁੱਦੋ ਖਿੱਲਰ ਗਈ, ਤਾਂ 'ਸਿੰਘ ਸਾਹਿਬ' ਆਪਣੇ ਘਰਾਂ
ਅੰਦਰ ਦੁਬਕ ਗਏ।
ਹੁਣ ਅਰਦਾਸ ਵਿੱਚ ਹੋਈ ਤਬਦੀਲੀ ਦੇ ਮੁੱਦੇ ਨੂੰ ਲੈਕੇ ਕੁੱਝ 'ਕਰਨ'
ਬਹਾਨੇ ਮੁੜ ਸੁਰਜੀਤ ਹੋਣ ਦੀ 'ਕੁੱਤੇ ਝਾਕ' ਵਿੱਚ ਹਨ। ਪਰ ਹੁਣ ਕੋਈ ਇਹ ਨਹੀਂ ਕਹਿ ਰਿਹਾ ਕਿ
ਭਾਈ ਅਕਾਲ ਤਖਤ ਸਰਵਉੱਚ ਹੈ ਅਤੇ 'ਸਿੰਘ ਸਾਹਿਬ' ਦੇ ਹੁਕਮਨਾਮੇ 'ਤੇ ਫੁੱਲ ਚੜਾਓ।
ਵੈਸੇ ਗੁਰੂ ਦੀਆਂ ਸਿੱਖ ਸੰਗਤਾਂ ਨੇ ਇਹ ਗੱਲ ਸਮਝਣ ਵਿੱਚ ਅਤੇ
ਅਕਾਲ ਤਖਤ ਦੇ ਨਾਂ 'ਤੇ ਵਰਤਾਈ ਗੁਲਾਮੀ ਦਾ ਜੂੜ ਵੱਢਣ ਵਿੱਚ 35 ਸਾਲ ਗੁਆ ਲਏ।
ਟਿੱਪਣੀ:
ਜੀਵਨ ਜੀ, ਗੱਲ ਤੁਹਾਡੀ 100% ਦੁਰੁਸਤ ਹੈ... ...ਪਰ ਹੈਗੇ ਆ ਕਈ ਪ੍ਰਿ. ਪਰਵਿੰਦਰ ਸਿੰਘ (ਗੁਰਮਤਿ
ਸਿਖਲਾਈ ਕੇਂਦਰ) ਵਰਗੇ, ਉਹ ਹੁਣ ਮਾਨ ਦੇ ਥਾਪਿਆਂ ਕੋਲ ਘਸਾਈ ਕਰ ਰਹੇ ਹਨ, ਕਾਰਵਾਈ ਕਰਨ ਲਈ।
14 ਦਿਸੰਬਰ ਨੂੰ ਦੇਖ ਲਿਓ, ਇਨ੍ਹਾਂ ਬੇਨਤੀਆਂ ਦੇ ਆਦੀ ਸਿੱਖਾਂ ਦੀ ਅਸਲੀਯਤ... ਇਸ ਟਿੱਪਣੀ
ਨੂੰ ਗਲਤ ਨਜ਼ਰੀਏ ਨਾਲ ਨਾ ਲਿਉ, ਖ਼ਾਲਸਾ ਨਿਊਜ਼ ਨੂੰ ਖੁਸ਼ੀ ਹੋਵੇਗੀ ਕਿ ਸਾਨੂੰ ਗਲਤ ਸਾਬਿਤ ਕੀਤਾ
ਗਿਆ ਹੈ।
- ਸੰਪਾਦਕ ਖ਼ਾਲਸਾ ਨਿਊਜ਼
