ਨਵੀਂ ਦਿੱਲੀ, 8 ਮਾਰਚ 2016
ਇਥੇ
ਜਾਰੀ ਇਕ ਪ੍ਰੈਸ ਬਿਆਨ ਵਿਚ ਧਾਰਮਕ ਸੰਸਥਾ
'ਗੁਰੂ ਗ੍ਰੰਥ ਦਾ ਖਾਲਸਾ ਪੰਥ' ਦੀ ਦਿੱਲੀ ਇਕਾਈ ਦੇ ਕਨਵੀਨਰ ਸਰਬਜੀਤ ਸਿੰਘ ਐਡਵੋਕੋਟ
ਅਤੇ ਜਨਰਲ ਸਕੱਤਰ ਜਸਪਾਲ ਸਿੰਘ ਨੇ ਅਕਾਲ ਤਖਤ ਦੇ ਸਾਬਕਾ ਜਥੇਦਾਰ ਪ੍ਰੋ: ਦਰਸ਼ਨ ਸਿੰਘ
ਦੀ ਕਾਰ 'ਤੇ ਬੰਬ ਨਾਲ ਹਮਲਾ ਕੀਤੇ ਜਾਣ ਦੀ ਘਟਨਾ ਦੀ ਸਖਤ ਨਿੰਦਾ ਕੀਤੀ।
ਉਨ੍ਹਾਂ ਕਿਹਾ ਕਿ ਸਾਕਾ ਨੀਲਾ ਤਾਰਾ ਉਪਰੰਤ ਜਦ ਸਿੱਖ ਕੌਮ ਅਤਿ ਗੰਭੀਰ ਸਥਿਤੀ ਦਾ ਸਾਹਮਣਾ
ਕਰ ਰਹੀ ਸੀ, ਉਸ ਸਮੇਂ ਪ੍ਰੋ: ਦਰਸ਼ਨ ਸਿੰਘ ਨੇ ਦਲੇਰੀ ਅਤੇ ਸੂਝਬੂਝ ਨਾਲ ਕੌਮ ਦੀ ਅਗਵਾਈ
ਕੀਤੀ ਸੀ।
ਅਜੋਕੇ ਸਮੇਂ ਵੀ ਪ੍ਰੋ: ਦਰਸ਼ਨ ਸਿੰਘ ਕੀਰਤਨ-ਵਖਿਆਨ ਰਾਹੀਂ ਸਿੱਖਾਂ ਨੂੰ ਸਿਰਫ ਗੁਰੂ
ਗ੍ਰੰਥ ਸਾਹਿਬ ਜੀ ਤੋਂ ਅਗਵਾਈ ਲੈਣ ਦੀ ਪ੍ਰੇਰਣਾ ਕਰ ਰਹੇ ਹਨ, ਜਿਸ ਵਿਚ ਕਿਸੇ ਨੂੰ ਵੀ
ਕੋਈ ਇਤਰਾਜ਼ ਨਹੀਂ ਹੋਣਾ ਚਾਹੀਦਾ।
ਪਰ ਪੰਥ-ਵਿਰੋਧੀ ਤਾਕਤਾਂ ਦੀਆਂ ਕਠਪੁਤਲੀਆਂ
ਬਣ ਚੁੱਕੀਆਂ ਕੁਝ ਅਖੌਤੀ ਸੰਪਰਦਾਵਾਂ ਦੇ ਏਜੰਟ ਗੁੰਮਰਾਹਕੁੰਨ ਪ੍ਰਚਾਰ ਰਾਹੀਂ ਪ੍ਰੋ:
ਦਰਸ਼ਨ ਸਿੰਘ ਨੂੰ ਬਦਨਾਮ ਕਰਨ ਲਈ ਵੱਖ-ਵੱਖ ਹਥਕੰਡੇ ਅਪਣਾਉਂਦੇ ਰਹਿੰਦੇ ਹਨ।
ਵਿਚਾਰ-ਚਰਚਾਵਾਂ ਵਿਚ ਹਰ ਵਾਰੀ ਮੂੰਹ ਦੀ ਖਾਣ ਉਪਰੰਤ ਇਹ ਗੁੰਡੇਨੁਮਾ ਅਨਸਰ ਹੁਣ ਏਨੇ
ਬੌਖਲਾ ਗਏ ਹਨ ਕਿ ਉਨ੍ਹਾਂ ਨੇ ਕਾਰ ਵਿਚ ਬੰਬ ਲਗਾ ਕੇ ਪ੍ਰੋ: ਦਰਸ਼ਨ ਸਿੰਘ ਨੂੰ ਜਾਨੋਂ
ਮਾਰਨ ਦੀ ਕੋਸ਼ਿਸ਼ ਕੀਤੀ।
ਸ੍ਰ: ਸਰਬਜੀਤ ਸਿੰਘ ਨੇ ਕਿਹਾ ਕਿ ਇਹ ਹਮਲਾ ਪ੍ਰੋ: ਦਰਸ਼ਨ
ਸਿੰਘ ਜਾਂ ਕਿਸੇ ਹੋਰ ਪ੍ਰਚਾਰਕ ਨੂੰ ਨਹੀਂ, ਬਲਕਿ ਗੁਰਮਤਿ ਵਿਚਾਰਧਾਰਾ ਨੂੰ ਕਤਲ ਕਰਨ ਲਈ
ਕੀਤਾ ਗਿਆ ਸੀ,
ਤਾਂ ਜੋ ਸਾਬਕਾ ਜਥੇਦਾਰ ਵੱਲੋਂ ਗੁਰੂ ਗ੍ਰੰਥ ਸਾਹਿਬ ਦੀ ਸਰਬ-ਉੱਚਤਾ ਅਤੇ ਸੰਪੂਰਨ ਗੁਰਤਾ
ਬਾਰੇ ਚਲਾਈ ਜਾ ਰਹੀ ਜਾਗਰੁਕਤਾ ਲਹਿਰ ਨੂੰ ਬੰਦ ਕਰਵਾਇਆ ਜਾ ਸਕੇ। ਪਰ ਅਜਿਹੀਆਂ ਕਾਇਰਾਨਾ
ਕਾਰਵਾਈਆਂ ਗੁਰਮਤਿ ਪ੍ਰਚਾਰ ਲਹਿਰ ਨੂੰ ਕਤਈ ਰੋਕ ਨਹੀਂ ਪਾਉਣਗੀਆਂ ਕਿਉਂਕਿ ਗੁਰੂ ਗ੍ਰੰਥ
ਸਾਹਿਬ ਦੀ ਸਰਬ-ਉੱਚਤਾ ਲਹਿਰ ਵਿਚ ਯੋਗਦਾਨ ਪਾਉਂਦਿਆਂ ਸ਼ਹਾਦਤ ਪ੍ਰਾਪਤ ਕਰਨਾ ਕਿਸੇ ਵੀ
ਪ੍ਰਚਾਰਕ ਲਈ ਫਖ਼ਰ ਦੀ ਗੱਲ ਹੋਵੇਗੀ।
ਸਰਬਜੀਤ
ਸਿੰਘ ਨੇ ਕਿਹਾ ਕਿ ਪ੍ਰੋ: ਦਰਸ਼ਨ ਸਿੰਘ 'ਤੇ ਹੋਏ ਇਸ ਕਾਤਿਲਾਨਾ ਹਮਲੇ ਦੀ ਜਾਂਚ
ਸੀ.ਬੀ.ਆਈ. ਜਾਂ ਅਜਿਹੀ ਕਿਸੇ ਹੋਰ ਉੱਚ ਪੱਧਰੀ ਜਾਂਚ ਏਜੰਸੀ ਕੋਲੋਂ ਕਰਵਾਈ ਜਾਣੀ ਚਾਹੀਦੀ
ਹੈ
ਕਿਉਂਕਿ ਕਿਸੇ ਪ੍ਰਚਾਰਕ 'ਤੇ ਬੰਬ ਨਾਲ ਜਾਨਲੇਵਾ ਹਮਲਾ ਕਰਨਾ ਕੋਈ ਛੋਟਾ ਅਪਰਾਧ ਨਹੀਂ ਹੈ
ਅਤੇ ਇਸ ਸਾਜਿਸ਼ ਦੇ ਅਸਲ ਰਚਨਹਾਰਾਂ ਨੂੰ ਸਾਹਮਣੇ ਲਿਆਉਣਾ ਸੌਖਾ ਨਹੀਂ ਹੋਵੇਗਾ।
ਇਸਦੇ ਇਲਾਵਾ, ਪਿਛਲੇ ਦਿਨੀਂ ਗੁਰਦੁਆਰਾ ਬੰਗਲਾ ਸਾਹਿਬ ਦੀ ਸਟੇਜ ਤੋਂ
ਆਪਣੀ ਵਿਰੋਧੀ ਵਿਚਾਰਧਾਰਾ ਵਾਲੇ ਪ੍ਰਚਾਰਕਾਂ ਖਿਲਾਫ ਹਿੰਸਕ ਤਰੀਕੇ ਅਪਣਾਉਣ ਦੀ ਪ੍ਰੇਰਨਾ
ਦਾ ਵਖਿਆਨ ਦੇਣ ਵਾਲੇ ਕੀਰਤਨੀਏ ਮਨਪ੍ਰੀਤ ਸਿੰਘ ਕਾਨਪੁਰੀ ਅਤੇ ਉਸਨੂੰ ਧਾਰਮਕ ਸਟੇਜ ਦੀ
ਦੁਰਵਰਤੋਂ ਕਰਨ ਦੀ ਇਜਾਜ਼ਤ ਦੇਣ ਵਾਲੇ ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਪ੍ਰਧਾਨ ਅਤੇ ਜਨਰਲ
ਸਕੱਤਰ ਖਿਲਾਫ ਵੀ ਕਤਲ ਨੂੰ ਸ਼ਹਿ ਦੇਣ ਦੇ ਦੋਸ਼ ਵਿਚ ਪਰਚਾ ਦਰਜ ਕੀਤਾ ਜਾਣਾ ਚਾਹੀਦਾ ਹੈ।