ਝੂਠ ਦੀ ਕੋਈ ਸੀਮਾ ਹੁੰਦੀ ਹੈ, ਪਰ ਦੋਗਲੇਪਨ ਅਤੇ ਢੀਠਤਾਈ ਦੀ ਕੋਈ
ਸੀਮਾ ਨਹੀਂ ਹੁੰਦੀ। ਇਹ ਅਖਾਣ ਵੈਸੇ ਤਾਂ ਸਾਰੇ ਹੀ ਸਿਆਸੀ ਆਗੂਆਂ ’ਤੇ ਸਹੀ ਢੁਕਦੀ ਹੈ
ਪਰ ਬਾਦਲ ਦਲ ਦੇ ਆਗੂ ਤਾਂ ਸ਼ਾਇਦ ਬਣੇ ਹੀ ਇਸੇ ਵੱਡੇ ਗੁਣ ਦੀ ਬਦੌਲਤ ਹਨ। ਸ਼੍ਰੀ ਨਵਜੋਤ
ਸਿੱਧੂ ਵੱਲੋਂ ਰਾਜ ਸਭਾ ਦੀ ਮੈਂਬਰਸ਼ਿਪ ਤੋਂ ਅਸਤੀਫਾ ਦੇਣ ਪਿੱਛੋਂ ਬਣੀ ਕਸੂਤੀ ਸਥਿਤੀ
ਸਬੰਧੀ 21 ਜੁਲਾਈ 2016 ਦੀ ਸ਼ਾਮ ਨੂੰ ਫਾਸਟਵੇਅ ਨਿਊਜ਼ ਚੈੱਨਲ ’ਤੇ ਡੀਬੇਟ ਹੋ ਰਿਹਾ ਸੀ।
ਇਸ ਡੀਬੇਟ ਦੇ ਹੋਸਟ ਸਨ ਸ: ਰਣਬੀਰ ਸਿੰਘ ਰਾਣਾ ਅਤੇ ਗੈਸਟ ਦੇ ਤੌਰ
’ਤੇ ਬਾਦਲ ਦਲ ਵੱਲੋਂ ਸ: ਗੁਰਚਰਨ ਸਿੰਘ ਗਰੇਵਾਲ, ਕਾਂਗਰਸ ਵੱਲੋਂ ਸ਼੍ਰੀ ਰਮਨ ਅਤੇ
ਟਿੱਪਣੀਕਾਰ ਵਜੋਂ ਇੱਕ ਸੀਨੀਅਰ ਪੱਤਰਕਾਰ ਸ: ਪਰਮੇਸ਼ਰ ਸਿੰਘ ਸ਼ਾਮਲ ਸਨ। ਹੋਸਟ ਵੱਲੋਂ
ਪੁੱਛੇ ਗਏ ਇਕ ਸਵਾਲ ਕਿ ਜੇ ਕਰ ਸ਼੍ਰੀ ਸਿੱਧੂ “ਆਪ” ਵਿੱਚ
ਸ਼ਾਮਲ ਹੋ ਜਾਂਦੇ ਹਨ; ਤਾਂ ਕੀ ਸਿੱਖ ਵੋਟਰਾਂ ਦਾ ਝੁਕਾਉ “ਆਪ” ਵੱਲ ਵਧ ਸਕਦਾ ਹੈ?
ਇਸ ਦੇ ਜਵਾਬ ਵਿੱਚ ਸ: ਗਰੇਵਾਲ ਨੇ ਨਾਂਹ ਵਿੱਚ ਬੜਾ ਹੀ ਸਪਸ਼ਟ ਉੱਤਰ ਦਿੰਦੇ ਹੋਏ ਕਿਹਾ
ਕਿ ਇੱਕ ਤਾਂ ਪਿਛਲੇ ਸਮੇਂ ਵਿੱਚ ‘ਆਪ’ ਵੱਲੋਂ ਵੱਖ ਵੱਖ ਸਮੇਂ ’ਤੇ ਸਿੱਖ ਵਿਰੋਧੀ
ਕਾਰਵਾਈਆਂ ਕਾਰਨ ਸਿੱਖ ਇਸ ਪਾਰਟੀ ਤੋਂ ਦੂਰ ਜਾ ਚੱਕੇ ਹਨ।
ਦੂਸਰਾ ਟੀਵੀ ਸ਼ੋਆਂ ਵਿੱਚ ਸਿੱਧੂ ਇੱਕ ਮਸ਼ਕਰੇ ਦੇ ਤੌਰ ’ਤੇ ਕੁਝ ਐਸੀਆਂ ਹਰਕਤਾਂ
ਕਰਦੇ ਹਨ ਜਿਨ੍ਹਾਂ ਨੂੰ ਸਿੱਖ ਪ੍ਰਵਾਨ ਨਹੀਂ ਕਰਦੇ, ਤੀਸਰਾ ਭਾਜਪਾ ਦੀ ਟਿਕਟ ’ਤੇ ਲੋਕ
ਸਭਾ ਦਾ ਪਹਿਲੀ ਵਾਰ ਮੈਂਬਰ ਚੁਣੇ ਜਾਣ ਪਿੱਛੋਂ ਅੰਮ੍ਰਿਤਸਰ
ਵਿੱਖੇ ਆਪਣੀ ਨਵੀਂ ਕੋਠੀ ਦੀ ਚੱਠ ਕਰਨ ਸਮੇਂ; ਜਿਸ ਤਰ੍ਹਾਂ ਸਿੱਧੂ ਨੇ ਜਨੇਊ ਪਾ ਕੇ ਹਵਨ
ਕੀਤਾ ਉਸ ਨੂੰ ਸਿੱਖ ਬਿਲਕੁਲ ਪ੍ਰਵਾਨ ਨਹੀਂ ਕਰਦੇ ਇਸ ਲਈ ਸਿੱਧੂ ਕਾਰਨ ਸਿੱਖਾਂ ਦਾ
ਝੁਕਾਉ ‘ਆਪ’ ਵੱਲ ਹੋਣ ਦਾ ਤਾਂ ਸਵਾਲ ਹੀ ਪੈਦਾ ਨਹੀਂ ਹੁੰਦਾ, ਉਲਟਾ ਸਗੋਂ ਕੁਝ ਭੁਲੇਖਿਆਂ
ਕਾਰਨ ਜਿਨ੍ਹਾਂ ਸਿੱਖਾਂ ਦਾ ਝੁਕਾਉ ‘ਆਪ’ ਵੱਲ ਹੋਇਆ ਵੀ ਹੈ ਉਹ ਵੀ ਸਿੱਧੂ ਦੇ ਵਿਰੋਧ
ਵਿੱਚ ਕਿਨਾਰਾਕਸ਼ੀ ਕਰ ਸਕਦੇ ਹਨ।
ਭਾਵੇਂ ਇਸ ਵਿੱਚ ਕੋਈ ਸ਼ੱਕ ਨਹੀਂ ਕਿ
ਅਕਾਲੀ ਦਲ ਵੱਲੋਂ ‘ਆਪ’ ਵਿਰੋਧੀ ਇਸ ਧੂਆਂਧਾਰ ਪ੍ਰਚਾਰ ਸਦਕਾ ਕੁਝ ਭੋਲੇ ਸਿੱਖਾਂ ਵੱਲੋਂ
ਪ੍ਰਭਾਵਤ ਹੋਣ ਦੀ ਸੰਭਾਵਨਾਕਾਰਨ ਗਰੇਵਾਲ ਦਾ ਜਵਾਬ ਕਾਫੀ ਹੱਦ ਤੱਕ ਸਹੀ ਸਿੱਧ ਹੋ ਸਕਦਾ
ਹੈ ਪਰ ਫਿਰ ਵੀ ਇੱਕ ਸਿੱਖ ਹੋਣ ਦੇ ਨਾਤੇ ਮੈਨੂੰ ਸ: ਗਰੇਵਾਲ ਦਾ ਇਹ ਜਵਾਬ ਕਾਫੀ
ਅਜੀਬ ਜਿਹਾ ਲੱਗਾ। ਇਸ ਕਾਰਨ ਅੱਜ ਸਵੇਰੇ ਹੀ ਮੈਂ ਆਪਣੇ ਫੋਨ ਨੰ: 9855480797 ਤੋਂ
ਉਨ੍ਹਾਂ ਦੇ ਫੋਨ ਨੰ: 9814898643 ’ਤੇ ਫੋਨ ਕਰ ਕੇ ਬੇਨਤੀ ਕੀਤੀ ਕਿ ਸਿੱਧੂ ਵੱਲੋਂ ਹਵਨ
ਕਰਵਾਏ ਜਾਣ ਸਬੰਧੀ ਤੁਹਾਡੇ ਵੱਲੋਂ ਟੀਵੀ ਡੀਬੇਟ ਦੌਰਾਨ ਦਿੱਤਾ ਗਿਆ ਜਵਾਬ ਬਹੁਤ ਹੀ
ਵਧੀਆ ਸੀ ਅਤੇ ਮੈਨੂੰ ਕਾਫੀ ਅੱਛਾ ਲੱਗਾ। ਪਰ ਮੈਨੂੰ ਹੈਰਾਨੀ ਇਸ ਗੱਲ ਦੀ ਹੋ ਰਹੀ ਹੈ ਕਿ
ਸ: ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਮੁਕਟ ਬੰਨ੍ਹ ਕੇ ਹਵਨ ਕਰਨੇ ਅਤੇ ਨਵੀਂ ਵਹੁਟੀ ਵਾਲੇ
ਲਿਬਾਸ ਵਰਗੀ ਵਿਸ਼ੇਸ਼ ਚੁੰਨੀ ਓਡ ਕੇ ਬੀਬੀ ਹਰਸਿਮਰਤ ਕੌਰ ਬਾਦਲ ਵੱਲੋਂ ਸ਼ਿਵਲਿੰਗ ਪੂਜਾ
ਕੀਤੇ ਜਾਣ ਨੂੰ ਸਿੱਖ ਕਿਹੜੀ ਮਜ਼ਬੂਰੀ ਵਿੱਚ ਪ੍ਰਵਾਨ ਕਰ ਰਹੇ ਹਨ?
ਦੋਗਲੇਪਨ ਅਤੇ ਢੀਠਤਾਈ ਦੀ ਮਿਸਾਲ ਪੇਸ਼ ਕਰਦੇ ਹੋਏ ਸ: ਗਰੇਵਾਲ ਜੀ
ਝੱਟ ਕਹਿਣ ਲੱਗੇ ਵੇਖੋ ਜੀ ਆਪਣੇ ਘਰ ਵਿੱਚ ਰੱਖੇ ਸਮਾਗਮ ਵਿੱਚ ਸਿੱਖੀ ਰਵਾਇਤਾਂ ਦੇ ਉਲਟ
ਕੋਈ ਰਸਮ ਨਿਭਾਉਣੀ ਹੋਰ ਗੱਲ ਹੈ ਅਤੇ ਸਾਰੇ ਧਾਰਮਾਂ ਦਾ ਸਤਿਕਾਰ ਕਰਨਾ ਹੋਰ ਗੱਲ ਹੁੰਦੀ
ਹੈ। ਸ: ਬਾਦਲ ਸਾਹਿਬ ਸਾਰੇ ਧਰਮਾਂ ਦਾ ਸਤਿਕਾਰ ਕਰਦੇ ਹਨ; ਇਸ ਲਈ ਉਨ੍ਹਾਂ ਨੂੰ ਹਰ ਥਾਂ
ਹੀ ਜਾਣਾ ਪੈਂਦਾ ਹੈ। ਸੋ ਜੇ ਕਿਤੇ ਉਥੇ ਕਿਸੇ ਹੋਰ ਧਰਮ ਵਾਲਿਆਂ ਦਾ ਕੋਈ ਸਮਾਗਮ ਚੱਲ
ਰਿਹਾ ਹੈ ਤਾਂ ਉਸ ਵਿੱਚ ਸ਼ਾਮਲ ਹੋ ਜਾਣ ਹੋਰ ਗੱਲ ਹੁੰਦੀ ਹੈ। ਵੈਸੇ ਤਾਂ ਸ: ਗਰੇਵਾਲ ਵੀ
ਅਣਜਾਣ ਤਾਂ ਨਹੀਂ ਹਨ, ਪਰ ਫਿਰ ਵੀ ਉਨ੍ਹਾਂ ਨੂੰ ਚੇਤਾ ਕਰਵਾਇਆ ਕਿ ਕਿਸੇ ਧਰਮ ਦਾ
ਸਤਿਕਾਰ ਕਰਨਾ ਹੋਰ ਗੱਲ ਹੁੰਦੀ ਹੈ ਅਤੇ ਕਿਸੇ ਨਿਜੀ ਜਾਂ ਸਿਆਸੀ ਹਿੱਤਾਂ ਦੀ ਪੂਰਤੀ ਲਈ
ਬਹੁ ਗਿਣਤੀ ਨੂੰ ਖੁਸ਼ ਕਰਨ ਲਈ ਆਪਣੇ ਧਰਮ ਵਿੱਚ ਵਿਵਰਜਿਤ ਦੱਸੇ ਗਏ ਫੋਕਟ ਕਰਮਕਾਂਡ ਜਨਤਕ
ਤੌਰ ’ਤੇ ਖ਼ੁਦ ਨਿਭਾਉਣੇ ਹੋਰ ਗੱਲ ਹੁੰਦੀ ਹੈ। ਇਸ ਪੱਖੋਂ ਹੋਰਨਾਂ ਧਰਮ ਵਾਲਿਆਂ ਦੇ ਪਹਿਲਾਂ
ਤੋਂ ਚੱਲ ਰਹੇ ਫੋਕਟ ਕਰਮ ਕਾਂਡਾਂ ਦੌਰਾਨ ਪਹੁੰਚਣ ਸਮੇਂ ਚੁੱਪ ਕਰਕੇ ਕੋਲ ਖੜ੍ਹ ਜਾਣਾ ਤੇ
ਉਸ ’ਤੇ ਕੋਈ ਚੁਭਵੀਂ ਟਿੱਪਣੀ ਨਾ ਕਰਨਾ ਉਸ ਧਰਮ ਦਾ ਸਤਿਕਾਰ ਕਿਹਾ ਜਾ ਸਕਦਾ ਹੈ, ਪਰ
ਉਨ੍ਹਾਂ ਫੋਕਟ ਕਰਮ ਕਾਂਡਾਂ; ਜਿਨ੍ਹਾਂ ਦੇ ਕਰਨ ਦੀ ਗੁਰੂ ਗ੍ਰੰਥ ਸਾਹਿਬ ਜੀ ਅਤੇ ਸਿੱਖ
ਰਹਿਤ ਮਰਿਆਦਾ ਵਿੱਚ ਸਖਤ ਮਨਾਹੀ ਕੀਤੀ ਗਈ ਹੋਵੇ; ਆਪਣੇ ਸਿਆਸੀ ਹਿਤਾਂ ਦੀ ਪੂਰਤੀ ਲਈ ਬਹੁ
ਗਿਣਤੀ ਦੇ ਧਰਮ ਦੇ ਮੰਨਣ ਵਾਲਿਆਂ ਨੂੰ ਖੁਸ਼ ਕਰਨ ਲਈ ਉਹ ਬਿਬਰਜਿਤ ਫੋਕਟ ਕ੍ਰਮ ਕਾਂਡ ਖ਼ੁਦ
ਨਿਭਾਉਣੇ ਹੋਰ ਗੱਲ ਹੈ।
ਸੋ ਜੇ ਹਵਨ ਕਰਨ ਅਤੇ ਸ਼ਿਵਲਿੰਗ ਪੂਜਾ
ਸੁਭਾਵਤ ਤੌਰ ’ਤੇ ਹੀ ਪਹਿਲਾਂ ਹੋ ਰਹੀ ਹੋਵੇ ਤਾਂ ਬਾਦਲ ਸਾਹਿਬ ਅਤੇ ਬੀਬੀ ਬਾਦਲ ਉਥੇ
ਪਹੁੰਚਣ ’ਤੇ ਸਤਿਕਾਰ ਦੀ ਭਾਵਨਾ ਨਾਲ ਕੋਲ ਖੜ੍ਹ ਸਕਦੇ ਸਨ, ਪਰ ਉਹ ਤਾਂ ਵਿਸ਼ੇਸ਼ ਤੌਰ ’ਤੇ
ਮੁਕਟ ਪਹਿਨ ਕੇ ਖ਼ੁਦ ਹਵਨ ਕਰਨ ਲੱਗ ਪੈਂਦੇ ਹਨ ਤੇ ਬੀਬੀ ਬਾਦਲ ਵਿਸ਼ੇਸ਼ ਤੌਰ ’ਤੇ ਪੂਜਾ ਲਈ
ਲਿਆਂਦੀ ਗਈ ਚੁੰਨੀ ਓਡ ਕੇ ਗੜਵੀ ਨਾਲ ਸ਼ਿਵਲਿੰਗ ’ਤੇ ਪਾਣੀ ਪਾਉਂਦੀ ਹੋਈ ਸਿੱਖੀ ਦਾ ਜਲੂਸ
ਕੱਢ ਰਹੀ ਰਹੀ ਹੈ। ਸਿਆਸੀ ਕਾਰਨਾਂ ਕਰਕੇ ਸ਼੍ਰੀ ਸਿੱਧੂ ਨੇ ਵੀ ਬਹੁ ਗਿਣਤੀ
ਵਾਲਿਆਂ ਨੂੰ ਖੁਸ਼ ਕਰਨ ਲਈ ਕਪੜੇ ਉਤਾਰ ਕੇ ਤੇ ਜਨੇਊ ਪਹਿਨ ਕੇ ਹਵਨ ਕੀਤਾ ਸੀ ਤੇ ਬਿਲਕੁਲ
ਉਸੇ ਹੀ ਭਾਵਨਾ ਅਧੀਨ ਸ: ਬਾਦਲ ਨੇ ਮੁਕਟ ਪਹਿਨ ਕੇ ਹਵਨ ਅਤੇ ਬੀਬੀ ਬਾਦਲ ਨੇ ਸ਼ਿਵਲਿੰਗ
ਪੂਜਾ ਕੀਤੀ। ਸੋ ਤਿੰਨਾਂ ਹੀ ਕੇਸਾਂ ਵਿੱਚ ਕੋਈ ਵੀ ਅੰਤਰ ਨਹੀਂ।
ਇੱਥੇ ਇੱਕ ਹੋਰ
ਘਟਨਾ ਜਿਸ ਦੀ ਖ਼ਬਰ ਬਹੁਤੇ ਸਿੱਖਾਂ ਦੇ ਧਿਆਨ ਵਿੱਚ ਨਹੀਂ ਆਈ ਜਾਂ ਹੁਣ ਵਿਸਰ
ਚੁੱਕੀ ਹੈ, ਉਸ ਦਾ ਚੇਤਾ ਕਰਵਾਉਣਾ ਵੀ ਇੱਥੇ ਯੋਗ ਹੋਵੇਗਾ; ਜਿਸ ਮੁਤਾਬਿਕ ਜਿਸ ਸਮੇਂ
ਕੈਪਟਨ ਦੀ ਕਾਂਗਰਸ ਦੌਰਾਨ ਬਾਦਲ ਪਿਉ ਪੁੱਤਰ ਜੇਲ੍ਹ ਦੀ ਹਵਾ ਫੱਕ ਕੇ ਆਏ ਸਨ, ਉਸ ਸਮੇਂ
ਆਪਣੇ ਪ੍ਰਵਾਰ ’ਤੇ ਮੰਡਰਾ ਰਹੇ ਸੰਕਟਾਂ ਦੇ ਮੋਚਨ ਲਈ ਬਾਦਲ ਪ੍ਰਵਾਰ ਨੇ ਆਪਣੇ ਘਰ ਵਿੱਚ
ਜਗਰਾਤਾ ਵੀ ਕਰਾਇਆ ਸੀ ਅਤੇ ਗਿਆਨੀ ਗੁਰਮੁਖ ਸਿੰਘ ਜੋ ਹੁਣ
ਤਖ਼ਤ ਦਮਦਮਾ ਸਾਹਿਬ ਦੇ ਜਥੇਦਾਰ ਹਨ ਅਤੇ ਉਸ ਸਮੇਂ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਗ੍ਰੰਥੀ
ਹੁੰਦੇ ਸਨ, ਤੋਂ ਸੰਕਟ ਮੋਚਨ ਸੰਪਟ ਪਾਠ ਵੀ ਕਰਵਾਇਆ ਸੀ। ਸਿੱਖ ਰਹਿਤ ਮਰਿਆਦਾ
ਅਨੁਸਾਰ ਜਗਰਾਤੇ ਕਰਵਾਉਣੇ ਅਤੇ ਸੰਪਟ ਪਾਠ ਕਰਵਾਉਣੇ ਦੋਵੇਂ ਹੀ ਗਲਤ ਹਨ ਪਰ ਕਿਉਂਕਿ ਅਲੀ
ਚੋਣ ਵਿਚ ਬਾਦਲ ਸਰਕਾਰ ਮੁੜ ਸਤਾ ਵਿੱਚ ਆ ਗਈ ਸਤਾ ਦੇ ਪ੍ਰਵਭਾਵ ਅਧੀਨ ਸਾਰੇ ਸਰਕਾਰੀ
ਗਵਾਹ ਮੁਕਰ ਗਏ ਤੇ ਬਾਦਲ ਪ੍ਰਵਾਰ ਦਾ ਖਹਿੜਾ ਛੁੱਟ ਗਿਆ।
ਸਿਧਾਂਤਕ ਤੌਰ ਸਿੱਖੀ ਨੂੰ ਤਿਲਾਂਜਲੀ
ਦੇ ਚੁੱਕੇ ਬਾਦਲ ਪ੍ਰਵਾਰ ਨੇ ਇਹ ਪ੍ਰਭਾਵ ਲਿਆ ਕਿ ਇਨ੍ਹਾਂ ਮਨਮਤੀ ਕ੍ਰਮਕਾਂਡ
ਨਿਭਾਉਣ ਕਾਰਨ ਹੀ ਉਨ੍ਹਾਂ ਦੇ ਸਿਰ ਤੋਂ ਸੰਕਟਾਂ ਦਾ ਮੋਚਨ ਹੋਇਆ ਹੈ; ਸੋ ਇਹੋ ਅਹਿਸਾਨ
ਚੁਕਾਉਣ ਬਦਲੇ ਗਿਆਨੀ ਗੁਰਮੁਖ ਸਿੰਘ ਨੂੰ ਪਹਿਲਾਂ ਅਕਾਲ ਤਖ਼ਤ ਦੇ ਹੈੱਡ ਗ੍ਰੰਥੀ ਤੇ ਬਾਅਦ
ਵਿੱਚ ਤਖ਼ਤ ਸ਼੍ਰੀ ਦਮਦਮਾ ਸਾਹਿਬ ਦੇ ਜਥੇਦਾਰ ਲਗਾਇਆ ਗਿਆ ਸੀ। ਭਾਵੇਂ ਸ਼੍ਰੀ ਸਿੱਧੂ ਦੀ
ਕਾਰਵਾਈ ਨੂੰ ਸਿੱਖ ਪਸੰਦ ਨਹੀਂ ਕਰਦੇ ਪਰ ਸਿੱਧੂ ਤਾਂ ਇੱਕ ਫੁਕਰਾ ਕਿਸਮ ਦਾ ਮਸ਼ਕਰਾ,
ਦਾਹੜੀ ਕੱਟਣ ਵਾਲਾ ਪਤਿਤ ਹੈ, ਜੋ ਆਰਐੱਸਐੱਸ ਦੀਆਂ ਦਿਸ਼ਾ-ਨਿਰਦੇਸ਼ਾਂ ਅਧੀਨ ਚੱਲਣ ਵਾਲੀ
ਭਾਜਪਾ ਦਾ ਮੈਂਬਰ ਸੀ ਜਿਸ ਦਾ ਟੀਚਾ ਸਿੱਖਾਂ ਵਿੱਚ ਸਿਧਾਂਤਕ ਤੌਰ ’ਤੇ ਗਿਰਾਵਟ ਵਿੱਚ
ਲਿਆ ਕੇ ਸਿੱਖ ਧਰਮ ਨੂੰ ਹਿੰਦੂ ਧਰਮ ਦਾ ਇੱਕ ਅੰਗ ਸਿੱਧ ਕਰਨਾ ਹੈ। ਬਾਦਲ ਪ੍ਰਵਾਰ ’ਤੇ
ਵੱਧ ਰੋਸ ਇਸ ਕਾਰਨ ਹੈ ਕਿਉਂਕਿ ਸ: ਬਾਦਲ ਨੂੰ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ
‘ਫਖ਼ਰ-ਏ-ਕੌਮ, ਪੰਥ ਰਤਨ’ ਵਰਗੇ ਮਹਾਨ ਅਵਾਰਡ ਦਿੱਤਾ ਹੋਇਆ ਹੈ, ਸ਼੍ਰੋਮਣੀ ਅਕਾਲੀ ਦਲ
ਸਮੇਤ ਪੰਥ ਦੀਆਂ ਸਾਰੀਆਂ ਸਿਰਮੌਰ ਸੰਸਥਾਵਾਂ (ਜਿਨ੍ਹਾਂ ਦਾ ਫਰਜ ਸਿੱਖੀ ਸਿਧਾਂਤਾਂ ਦੀ
ਪਹਿਰੀਦਾਰੀ ਤੇ ਪ੍ਰਚਾਰ ਕਰਨਾ ਹੈ) ਦਾ ਕਰਤਾ ਧਰਤਾ ਹੈ।
ਸੋ ਇਖ਼ਲਾਕੀ ਤੌਰ ’ਤੇ ਬਾਦਲ ਪ੍ਰਵਾਰ ਦਾ
ਤਾਂ ਫਰਜ ਬਣਦਾ ਹੈ ਕਿ ਉਹ ਸਿੱਖੀ ਸਿਧਾਂਤ ਵਿਰੁੱਧ ਕੋਈ ਵੀ ਐਸੀ ਕਾਰਵਾਈ ਨਾ
ਕਰਨ ਜਿਸ ਕਾਰਨ ਸਮੁਚੇ ਤੌਰ ’ਤੇ ਸਿੱਖ ਅਤੇ ਖਾਸ ਤੌਰ ’ਤੇ ‘ਫਖ਼ਰ-ਏ-ਕੌਮ, ਪੰਥ ਰਤਨ’ ਵਰਗੇ
ਮਹਾਨ ਅਵਾਰਡ ਦਾਗਦਾਰ ਹੁੰਦੇ ਵਿਖਾਈ ਦਿੰਦੇ ਹੋਣ ਕਿਉਂਕਿ ਇਸ ਨਾਲ ਇਹ ਸੰਦੇਸ਼ ਜਾਂਦਾ ਹੈ
ਕਿ ਜੇ ਕਰ ‘ਫਖ਼ਰ-ਏ-ਕੌਮ ਅਤੇ ਪੰਥ ਰਤਨ’ ਵਰਗੇ ਮਹਾਨ ਅਵਾਰਡ ਲੈਣ ਵਾਲਾ ਵਿਅਕਤੀ, ਸਿੱਖੀ
ਸਿਧਾਂਤ ਦੀ ਇਸ ਤਰ੍ਹਾਂ ਖਿੱਲੀ ਉਡਾਂਉਂਦਾ ਹੈ ਤਾਂ ਆਮ ਸਿੱਖ ਕਿੰਨੀ ਕੁ ਉਡਾਉਂਦੇ ਹੋਣਗੇ?
ਜਿਕਰਯੋਗ ਗੱਲ ਇਹ ਹੈ ਕਿ ਭਾਈ ਮਤੀ ਦਾਸ ਜੀ, ਭਾਈ ਦਿਆਲਾ ਜੀ, ਭਾਈ ਸਤੀ ਦਾਸ ਜੀ, ਭਾਈ
ਜੈਤਾ ਜੀ (ਬਾਬਾ ਜੀਵਨ ਸਿੰਘ ਜੀ) ਭਾਈ ਸੰਗਤ ਸਿੰਘ ਜੀ, ਬਾਬਾ ਬੰਦਾ ਸਿੰਘ ਬਹਾਦਰ ਜੀ,
ਭਾਈ ਮਨੀ ਸਿੰਘ ਜੀ, ਭਾਈ ਤਾਰੂ ਸਿੰਘ ਜੀ, ਭਾਈ ਸੁਬੇਗ ਸਿੰਘ ਜੀ, ਭਾਈ ਸ਼ਾਹਬਾਜ ਸਿੰਘ ਜੀ
ਆਦਿਕ ਅਨੇਕਾਂ ਐਸੇ ਸਿੰਘ ਸਿੰਘਣੀਆਂ ਹੋਏ ਹਨ ਜਿਨ੍ਹਾਂ ਨੇ ਸਿੱਖ ਧਰਮ ਦੇ ਸਿਧਾਂਤਾਂ ’ਤੇ
ਪਹਿਰਾ ਦਿੰਦੇ ਹੋਏ ਅਨੇਕਾਂ ਅਸਹਿ ਤੇ ਅਕਹਿ ਕਸ਼ਟ ਸਹਾਰਦੇ ਹੋਏ ਸ਼ਹੀਦੀਆਂ ਪ੍ਰਾਪਤ ਕੀਤੀਆਂ,
ਆਪਣੇ ਮਸੂਮ ਬੱਚਿਆਂ ਦੇ ਟੋਟੇ ਕਰਵਾ ਕੇ ਹਾਰ ਆਪਣੇ ਗਲ਼ਾਂ ਵਿੱਚ ਪਵਾਏ, ਦਿਹਾੜੀ ਵਿੱਚ
ਅੱਧੀ ਰੋਟੀ ’ਤੇ ਗੁਜਾਰਾ ਕਰਕੇ ਕੇ ਸਵਾ ਸਵਾ ਪੀਹਣ ਪੀਸੇ ਪਰ ਮੁਗਲਾਂ ਦੇ ਅਜੇਹੇ ਅਸਿਹ
ਤਸੀਹੇ ਵੀ ਉਨ੍ਹਾਂ ਨੂੰ ਨਾ ਧਰਮ ਤੋਂ ਡੁਲਾ ਸਕੇ ਤੇ ਨਾ ਹੀ ਗੁਰੂ ਤੋਂ ਬੇਮੁੱਖ ਕਰਵਾ ਸਕੇ;
ਇਸ ਦੇ ਬਾਵਯੂਦ ਵੀ ਉਨ੍ਹਾਂ ਵਿੱਚੋਂ ਕਿਸੇ ਇੱਕ ਨੂੰ ਵੀ ਕਿਸੇ ਨੇ ਅੱਜ ਤੱਕ ਸ਼੍ਰੀ ਅਕਾਲ
ਤਖ਼ਤ ਸਾਹਿਬ ਤੋਂ ‘ਫਖ਼ਰ-ਏ-ਕੌਮ ਅਤੇ ਪੰਥ ਰਤਨ’ ਵਰਗੇ ਮਹਾਨ ਅਵਾਰਡ ਨਹੀਂ ਦਿੱਤੇ ਜਦੋਂ ਕਿ
ਸਿਆਸੀ ਲਾਲਸਾਵਾਂ ਅਧੀਨ ਬਣੇ ਭੇਖੀ ਸਿੱਖ ਆਗੂ ਜੋ ਸਿੱਖੀ ਸਿਧਾਂਤਾਂ ਦੇ ਕਦੀ ਵੀ ਨੇੜੋਂ
ਦੀ ਨਹੀਂ ਲੰਘਦਾ ਅਤੇ ਸੁਆਰਥੀ ਨੀਤੀ ਤਹਿਤ ਸਿੱਖੀ ਸਿਧਾਂਤਾਂ ਦੀ ਖਿੱਲੀ ਉਡਾਉਣ ਤੋਂ ਕਦੀ
ਵੀ ਗੁਰੇਜ ਨਹੀਂ ਕਰਦਾ; ਉਸ ਬਾਦਲ ਨੂੰ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ‘ਫਖ਼ਰ-ਏ-ਕੌਮ ਅਤੇ
ਪੰਥ ਰਤਨ’ ਵਰਗੇ ਮਹਾਨ ਅਵਾਰਡ ਦਿੱਤਾ ਗਿਆ ਹੋਵੇ ਤਾਂ ਇਸ ਤੋਂ ਵੱਧ ਸਿੱਖਾਂ ਲਈ ਹੋਰ ਵੱਡੀ
ਸ਼ਰਮ ਦੀ ਗੱਲ ਕਿਹੜੀ ਹੋ ਸਕਦੀ ਹੈ?
ਸ: ਗਰੇਵਾਲ ਤੋਂ ਅਗਲੀ ਗੱਲ ਪੁੱਛੀ ਗਈ
ਕਿ ਐੱਸਵਾਈਐੱਲ ਮੁੱਦੇ ’ਤੇ ਕੇਜਰੀਵਾਲ ਦੀ ਸਰਕਾਰ ਵੱਲੋਂ ਸੁਪ੍ਰੀਮ ਕੋਰਟ ਵਿੱਚ ਪੰਜਾਬ
ਵਿਰੋਧੀ ਹਲਫੀਆ ਬਿਆਨ ਦਰਜ ਕਰਵਾਉਣ ਕਾਰਨ ਬਾਦਲ ਸਮੇਤ ਸਮੁਚੀ ਅਕਾਲੀ ਲੀਡਰਸ਼ਿਪ
‘ਆਪ’ ਨੂੰ ਤਾਂ ਪੰਜਾਬ ਵਿਰੋਧੀ ਦੱਸ ਰਹੀ ਹੈ ਹਾਲਾਂ ਕਿ ਦਿੱਲੀ ਸਰਕਾਰ ਨੇ ਉਹ ਹਲਫੀਆ
ਬਿਆਨ ਵਾਪਸ ਲੈ ਕੇ ਨਵਾਂ ਹਲਫੀਆ ਬਿਆਨ ਦਰਜ ਵੀ ਕਰਵਾ ਦਿੱਤਾ ਹੈ। ਪਰ ਮੋਦੀ ਦੀ ਕੇਂਦਰ
ਸਰਕਾਰ ਜਿਸ ਵਿੱਚ ਅਕਾਲੀ ਦਲ ਖ਼ੁਦ ਭਾਈਵਾਲ ਵੀ ਹੈ ਉਸ ਨੇ ਵੀ ਤਾਂ ਪੰਜਾਬ ਵਿਰੋਧੀ ਹਲਫੀਆ
ਬਿਆਨ ਦਰਜ ਕਰਵਾਇਆ ਹੈ ਜਿਸ ਕਾਰਨ ਐੱਸਵਾਈਐੱਲ ਮੁੱਦਾ ਮੁੜ ਭਖ ਪਿਆ ਹੈ। ਕੇਂਦਰ ਸਰਕਾਰ
ਦੇ ਪ੍ਰਤੱਖ ਤੌਰ ’ਤੇ ਪੰਜਾਬ ਵਿਰੋਧੀ ਸਟੈਂਡ ਕਾਰਣ ਹੀ ਸ: ਬਾਦਲ ਨੂੰ ਬਿਆਨ ਦੇਣ ਲਈ
ਮਜਬੂਰ ਹੋਣਾ ਪੈ ਰਿਹਾ ਹੈ ਕਿ ਪੰਜਾਬ ਦਾ ਪਾਣੀ ਦੇ ਨਾਲੋਂ ਤਾਂ ਉਹ ਸ਼ਹੀਦੀ ਦੇਣ ਨੂੰ
ਤਰਜੀਹ ਦੇਣਗੇ। ਇਸ ਦੇ ਨਾਲ ਹੀ ਉਹ ਪੰਜਾਬੀਆਂ ਨੂੰ ਵੀ ਪੰਜਾਬ ਦੇ ਪਾਣੀਆਂ ਲਈ ਕੁਰਬਾਨੀਆਂ
ਦੇਣ ਦੇ ਸੱਦੇ ਵੀ ਹਰ ਰੋਜ ਦੇ ਰਹੇ ਹਨ। ਪਰ ਇਸ ਸਭ ਕੁਝ ਦੇ ਬਾਵਜੂਦ ਬਾਦਲ ਸਮੇਤ ਕਿਸੇ
ਵੀ ਅਕਾਲੀ ਆਗੂ ਨੇ ਸ਼੍ਰੀ ਮੋਦੀ, ਭਾਜਪਾ ਜਾਂ ਕੇਂਦਰ ਸਰਕਾਰ ਵਿਰੁੱਧ ਕਦੀ ਵੀ ਜ਼ੁਬਾਨ ਨਹੀਂ
ਖੋਲ੍ਹੀ ਜਦੋਂ ਕਿ ਕੇਜਰੀਵਾਲ ਸਰਕਾਰ ਦੇ ਹਲਫੀਆ ਬਿਆਨ ਜਿਹੜਾ ਵਾਪਸ ਵੀ ਲੈ ਲਿਆ ਜਾ ਚੁੱਕਾ
ਹੈ, ਉਸ ਵਿਰੁੱਧ ਸਾਰੇ ਅਕਾਲੀ ਆਗੂ ਬਿਨਾਂ ਨਾਗਾ ਹਰ ਰੋਜ ਹੀ ਮੁਹਾਰਨੀ ਪੜ੍ਹਨ ਤੋਂ ਨਹੀ
ਉਕ ਰਹੇ।
ਕਸੂਤੇ ਥਾਂ ਫਸਿਆ ਜਾਣ ਕੇ ਮੇਰੇ ਵੱਲੋਂ
ਪੁੱਛੇ ਸਵਾਲਾਂ ਦਾ ਜਵਾਬ ਦੇਣ ਦੀ ਥਾਂ ਸ: ਗਰੇਵਾਲ ਨੇ ਮੇਰੇ ਨਾਮ ਅਤੇ ਸਿਰਨਾਮੇ
ਸਬੰਧੀ ਪੁੱਛਗੁੱਛ ਕਰਨੀ ਸ਼ੁਰੂ ਕਰ ਦਿੱਤੀ। ਨਾਮ ਅਤੇ ਸਿਰਨਾਮਾ ਪੁੱਛ ਕੇ ਕਹਿਣ ਲੱਗੇ ਹੁਣ
ਮੈਂ ਕਿਸੇ ਮੀਟਿੰਗ ਵਿੱਚ ਬੈਠਾ ਹਾਂ ਬਾਅਦ ਵਿੱਚ ਖ਼ੁਦ ਬੈਕ ਕਾਲ ਕਰ ਕੇ ਤੁਹਾਡੇ ਸਾਰੇ
ਸਵਾਲਾਂ ਦੇ ਜਵਾਬ ਦੇਵਾਂਗਾ। ਜਿਸ ਨੇ ਇੱਕ ਵਾਰ ਹੀ ਮਸਾਂ ਖਹਿੜਾ ਛੁਡਵਾਇਆ ਹੋਵੇ ਉਸ ਨੇ
ਬੈਕ ਕਾਲ ਤਾਂ ਕਿਥੋਂ ਕਰਨੀ ਸੀ। ਗੱਲਾਂ ਤਾਂ ਹੋਰ ਵੀ ਬਹੁਤ ਸਾਰੀਆਂ ਕਰਨ ਵਾਲੀਆਂ ਹਨ
ਜਿਨ੍ਹਾਂ ਵਿੱਚ ਅਕਾਲੀ ਦਲ ਦਾ ਦੋਗਲਾਪਨ ਸਾਫ ਤੌਰ ’ਤੇ ਸਪਸ਼ਟ ਹੁੰਦਾ ਹੈ। ਭਾਵੇਂ ਉਨ੍ਹਾਂ
ਸਾਰੀਆਂ ਦਾ ਇਸ ਇਕੋ ਲੇਖ ਵਿੱਚ ਵੇਰਵਾ ਦੇਣਾ ਸੰਭਵ ਨਹੀਂ ਹੈ ਪਰ ਕੁਝ ਕੁ ਦਾ ਟੂਕ ਮਾਤ੍ਰ
ਹਵਾਲਾ ਦੇਣਾ ਜਰੂਰੀ ਹੈ। ਮਿਸਾਲ ਵਜੋਂ ਅਕਾਲੀ ਦਲ ਨੇ 1982 ਵਿੱਚ ਐੱਸਵਾਈਐੱਲ ਵਿਰੁੱਧ
ਮੋਰਚਾ ਲਾਇਆ ਪਰ ਰਾਜੀਵ-ਲੌਂਗੋਵਾਲ ਸਮਝੌਤੇ ਅਧੀਨ ਇਸੇ ਨਹਿਰ ਦੀ ਉਸਾਰੀ ਕਰਨ ਦੀ
ਜਿੰਮੇਵਾਰੀ ਕਬੂਲ ਕੀਤੀ। ਪ੍ਰਕਾਸ਼ ਸਿੰਘ ਬਾਦਲ ਨੇ ਮੁੱਖ ਮੰਤਰੀ ਹੁੰਦਿਆਂ ਖ਼ੁਦ ੳਸਾਰੀ ਲਈ
ਹਰਿਆਣਾ ਤੋਂ ਕ੍ਰੋੜ ਰੁਪਈਆ ਵਸੂਲ ਕੀਤਾ ਜਿਹੜਾ ਕਿ ਹੁਣ ਫਸੇ ਨੂੰ ਵਪਸ ਕਰਨਾ ਪਿਆ। ਨਹਿਰ
ਦੀ ਉਸਾਰੀ ਲਈ ਜਮੀਨ ਐਕੂਆਇਰ ਕਰਨ ਲਈ ਇਸੇ ਬਾਦਲ ਨੇ ਨੋਟੀਫਿਕੇਸ਼ਨ ਜਾਰੀ ਕੀਤਾ ਜਿਸ ਨੂੰ
ਹੁਣ ਡੀਨੋਟੀਫਾਈ ਕਰਨ ਦਾ ਡਰਾਮਾ ਵੀ ਇਸੇ ਆਗੂ ਵੱਲੋਂ ਰਚਿਆ ਗਿਆ ਹੈ। ਜਮੀਨ ਦੀ ਐਕੂਜਿਸ਼ਨ
ਦਾ ਬਹੁਤਾ ਕੰਮ ਬਾਦਲ ਤੇ ਬਰਨਾਲਾ ਦੀ ਅਕਾਲੀ ਸਰਕਾਰ ਦੌਰਾਨ ਹੀ ਹੋਇਆ। ਜੇ ਇੰਦਰਾ ਗਾਂਧੀ
ਨੇ ਦਰਬਾਰਾ ਸਿੰਘ ਦੀ ਧੌਣ ’ਤੇ ਗੋਡਾ ਰੱਖ ਕੇ ਸੁਪ੍ਰੀਮ ਕੋਰਟ ਵਿੱਚੋਂ ਕੇਸ ਵਾਪਸ ਕਰਵਾ
ਵੀ ਦਿੱਤਾ ਸੀ ਤਾਂ ਉਸ ਤੋਂ ਬਾਅਦ ਵਿੱਚ ਇੱਕ ਵਾਰ ਬਰਨਾਲਾ ਸਰਕਾਰ ਅਤੇ ਤਿੰਨ ਵਾਰ ਬਾਦਲ
ਅਕਾਲੀ ਦਲ ਵੱਲੋਂ ਮੁੱਖ ਮੰਤਰੀ ਬਣ ਚੁੱਕੇ ਹਨ ਕਦੀ ਵੀ ਇਨ੍ਹਾਂ ਨੇ ਉਹੀ ਕੇਸ ਦੁਬਾਰਾ ਨਹੀਂ
ਕੀਤਾ ਜਦੋਂ ਕਿ ਕਾਨੂੰਨੀ ਤੌਰ ’ਤੇ ਦੁਬਾਰਾ ਕੇਸ ਕਰਨ ’ਤੇ ਕੋਈ ਰੋਕ ਨਹੀਂ ਹੁੰਦੀ।
2007 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਬਾਦਲ ਦਲ ਨੇ ਚੋਣ ਵਾਅਦਾ
ਕੀਤਾ ਸੀ ਕਿ ਉਨ੍ਹਾਂ ਦੀ ਸਰਕਾਰ ਬਣਨ ’ਤੇ ਪਹਿਲੇ ਹੀ ਸੈਸ਼ਨ ਦੌਰਾਨ ਕੈਪਟਨ ਵੱਲੋਂ ਪਾਸ
ਕਰਵਾਏ ਗਏ ‘ਟਰਮੀਨੇਸ਼ਨ ਆਫ ਪੰਜਾਬ ਵਾਟਰ ਐਗਰੀਮੈਂਟਸ ਐਕਟ-2004’ ਦੀ ਧਾਰਾ 5 ਖਤਮ ਕਰ
ਦਿੱਤੀ ਜਾਵੇਗੀ ਪਰ ਜਦੋਂ 4 ਸਾਲ ਲੰਘ ਜਾਣ ਪਿੱਛੋਂ ਸੁਖਬੀਰ ਬਾਦਲ ਨੂੰ ਇਸ ਚੋਣ ਵਾਅਦੇ
ਦਾ ਚੇਤਾ ਕਰਵਾਇਆ ਗਿਆ ਤਾਂ ਉਸ ਦਾ ਜਵਾਬ ਸੀ ਕਿ ਅਕਾਲੀ ਦਲ ਦੀ ਵਿਧਾਨ ਸਭਾ ਵਿੱਚ
ਬਹੁਗਿਣਤੀ ਨਾ ਹੋਣ ਕਰਕੇ ਭਾਈਵਾਲ ਭਾਜਪਾ ਤੋਂ ਬਿਨਾਂ ਸੋਧ ਸੰਭਵ ਨਹੀਂ ਤੇ ਭਾਜਪਾ ਇਸ ਲਈ
ਸਹਿਮਤ ਨਹੀਂ ਹੈ ਇਸ ਕਾਰਨ ਇਹ ਸੋਧ ਨਹੀਂ ਸਕੀ। ਇਸ ਤੋਂ ਸਿੱਧ ਹੁੰਦਾ ਹੈ ਕਿ ਜਿਤਨਾ
ਕਾਂਗਰਸ ਦਾ ਪੰਜਾਬ ਵਿਰੋਧੀ ਸਟੈਂਡ ਹੈ ਭਾਜਪਾ ਦਾ ਵੀ ਉਤਨਾ ਹੀ ਹੈ ਪਰ ਇਸ ਦੇ ਬਾਵਯੂਦ
ਬਾਦਲ ਦਲ ਭਾਜਪਾ ਨੂੰ ਪੰਜਾਬ ਹਿਤਕਾਰੀ ਅਤੇ ਕਾਂਗਰਸ ਨੂੰ ਪੰਜਾਬ ਵਿਰੋਧੀ ਦੱਸਣ ਵਿੱਚ
ਦੋਗਲਾ ਰੋਲ ਨਿਭਾ ਰਿਹਾ ਹੈ। ਜਿਸ ਬਾਦਲ ਦਲ ਦਾ ਆਪਣਾ ਹੀ ਸਮੇਂ ਸਮੇਂ ’ਤੇ ਐੱਸਵਾਈਐੱਲ
ਸਬੰਧੀ ਸਟੈਂਡ ਬਦਲ ਰਿਹਾ ਹੈ ਉਸ ਵੱਲੋਂ ‘ਆਪ’ ਨੂੰ ਆਪਣਾ ਸਟੈਂਡ ਸਪਸ਼ਟ ਕਰਨ ਦੀ ਹਰ ਰੋਜ
ਮੁਹਾਰਨੀ ਪੜ੍ਹਨੀ ਦੋਗਲੇਪਾਨ ਅਤੇ ਢੀਠਤਾਈ ਦੀ ਉਘੜਵੀਂ ਮਿਸਾਲ ਹੈ।
ਇਸੇ ਤਰ੍ਹਾਂ ਬਾਦਲ ਦਲ ਕੁਝ
ਧਾਰਮਿਕ ਮੁੱਦਿਆਂ ਨੂੰ ਸਿਆਸੀ ਕਾਰਨਾ ਕਰਕੇ ਲੋੜ ਤੋਂ ਵੱਧ ਉਛਾਲ ਕੇ ਇਸ ਅਵੱਗਿਆ ਲਈ
‘ਆਪ’ ਨੂੰ ਮਹਾਂਦੋਸ਼ੀ ਸਿੱਧ ਕਰਨ ਲਈ ਅੱਡੀਚੋਟੀ ਦਾ ਜੋਰ ਲਾ ਰਿਹਾ ਹੈ; ਜਿਨ੍ਹਾਂ ਵਿਚੋਂ
ਖਾਸ ਤੌਰ ’ਤੇ ਗੁਰਦੁਆਰਾ ਸੀਸ ਗੰਜ ਨਜ਼ਦੀਕ ਪਿਆਉ ਦੀ ਕੰਧ ਤੋੜਨ ਦਾ ਦੋਸ਼ੀ ‘ਆਪ’ ਨੂੰ ਉਸ
ਸਮੇਂ ਠਹਿਰਾਉਣਾ ਜਦੋਂ ਕਿ ਕੰਧ ਢਾਹੁਣ ਦੀ ਜਿੰਮੇਵਾਰ ਦਿੱਲੀ ਨਗਰ ਨਿਗਮ ’ਤੇ ਭਾਜਪਾ ਦਾ
ਕਬਜ਼ਾ ਹੈ ਤੇ ਦਿੱਲੀ ਪੁਲਿਸ ਦਾ ਸਿੱਧਾ ਕੰਟਰੋਲ ਕੇਂਦਰ ਦੀ ਐੱਨਡੀਏ ਸਰਕਾਰ ਕੋਲ ਹੈ ਜਿਸ
ਵਿੱਚ ਬਾਦਲ ਦਲ ਖ਼ੁਦ ਭਾਈਵਾਲ ਹੈ। ਇਸ ਤਰ੍ਹਾਂ ਦਿੱਲੀ ਦੀ ‘ਆਪ’ ਸਰਕਾਰ ਦੀ ਕਿਸੇ ਤਰ੍ਹਾਂ
ਵੀ ਕਾਨੂੰਨੀ ਦਖ਼ਲ ਅੰਦਾਜ਼ੀ ਸੰਭਵ ਨਹੀਂ ਹੈ। ਪਰ ਅਕਾਲੀ ਦਲ ਇੱਕੋ ਰੱਟ ਲਾ ਰਿਹਾ ਹੈ ਕਿ
ਚਾਂਦਨੀ ਚੌਕ ਦੀ ‘ਆਪ’ ਵਿਧਾਇਕਾ ਅਲਕਾ ਲਾਂਬਾ ਦੇ ਇਸ਼ਾਰੇ ’ਤੇ ਇਹ ਸਾਰੀ ਕਾਰਵਾਈ ਹੋਈ ਹੈ
ਇਸ ਲਈ ਸਮੁੱਚੀ ਪਾਰਟੀ ਤੇ ਖਾਸ ਕਰਕੇ ਇਸ ਦਾ ਮੁਖੀ ਕੇਜਰੀਵਾਲ ਪਿਆਉ ਦੀ ਕੰਧ ਤੋੜਨ ਦਾ
ਮਹਾਂਦੋਸ਼ੀ ਹੈ ਜੋ ਕਾਂਗਰਸ ਵੱਲੋਂ 1984 ਵਿੱਚ ਦਰਬਾਰ ਸਾਹਿਬ ’ਤੇ ਹਮਲਾ ਕਰਨ ਦੇ ਤੁਲ
ਹੈ। ਪਹਿਲੀ ਗੱਲ ਤਾਂ ਇਹ ਹੈ ਕਿ ਅਲਕਾ ਲਾਂਬਾ ਵੱਲੋਂ ਕੀਤੀ ਦਖ਼ਲ ਅੰਦਾਜ਼ੀ ਦਾ ਕੋਈ ਵੀ
ਸਰਕਾਰੀ ਸਬੂਤ ਨਹੀਂ ਮਿਲਦਾ ਅਤੇ ਉਹ ਖ਼ੁਦ ਵੀ ਇਸ ਤੋਂ ਇਨਕਾਰ ਕਰ ਰਹੀ ਹੈ। ਪਰ ਜੇ ਮੰਨ
ਵੀ ਲਿਆ ਜਾਵੇ ਕਿ ਸਾਰੀ ਕਾਰਵਾਈ ਅਲਕਾ ਲਾਂਬਾ ਦੇ ਕਹਿਣ ’ਤੇ ਦਿੱਲੀ ਨਗਰ ਨਿਗਮ ਤੇ
ਕੇਂਦਰ ਸਰਕਾਰ ਨੂੰ ਕਰਨੀ ਪਈ ਤਾਂ ਦੂਸਰਾ ਪੱਖ ਜਿਸ ਅਨੁਸਾਰ ਇਸ ਦੀ ਤੁਲਨਾ ਦਰਬਾਰ ਸਾਹਿਬ
’ਤੇ ਹਮਲੇ ਨਾਲ ਕੀਤੀ ਜਾਂਦੀ ਹੈ ਉਸ ਵਿੱਚ ਤਾਂ ਲਾਲ ਕ੍ਰਿਸ਼ਨ ਅਡਵਾਨੀ ਖ਼ੁਦ ਆਪਣੀ ਕਿਤਾਬ
ਵਿੱਚ ਲਿਖ ਰਿਹਾ ਹੈ ਕਿ ਇੰਦਰਾ ਗਾਂਧੀ ਕਾਰਵਾਈ ਕਰਨ ਵਿੱਚ ਹਿਚਕਚਾਟ ਵਿਖਾ ਰਹੀ ਸੀ ਤਾਂ
ਉਸ (ਅਡਵਾਨੀ) ਨੇ ਹੀ ਕਈ ਵਾਰ ਨਿਜੀ ਤੌਰ ’ਤੇ ਇੰਦਰਾ ਨੂੰ ਮਿਲ ਕੇ ਕਾਰਵਾਈ ਕਰਨ ਲਈ
ਤਿਆਰ ਕੀਤਾ। ਉਸ ਕੇਸ ਵਿੱਚ ਤਾਂ ਬਾਦਲ ਦਲ ਨਾ ਅਡਵਾਨੀ ਨੂੰ ਤੇ ਨਾ ਹੀ ਭਾਜਪਾ ਨੂੰ ਦੋਸ਼ੀ
ਮੰਨ ਰਿਹਾ ਹੈ ਤੇ ਸਾਰਾ ਦੋਸ਼ ਇੰਦਰਾ ਜਾਂ ਕਾਂਗਰਸ ਸਿਰ ਮੜ੍ਹ ਰਿਹਾ ਹੈ ਕਿ ਆਖਰ ਸਰਕਾਰ
ਤੇ ਫੌਜ ਤਾਂ ਕੇਂਦਰ ਦੀ ਕਾਂਗਰਸ ਸਰਕਾਰ ਪਾਸ ਹੀ ਸੀ ਇਸ ਲਈ ਸਿਰਫ ਉਹ ਹੀ ਜਿੰਮੇਵਾਰ ਹੈ।
ਉਨ੍ਹਾਂ ਅਨੁਸਾਰ ਜਿਹੜਾ ਸਰਕਾਰ ਤੋਂ ਹੀ ਬਾਹਰ ਹੈ ਉਹ ਜੋ ਮਰਜੀ ਕਹੇ ਉਸ ਦਾ ਕੀ ਦੋਸ਼ ਹੈ।
ਪਰ ਪਿਆਉ ਦੀ ਕੰਧ ਤੋੜਨ ਦੀ ਸਾਰੀ ਜਿੰਮੇਵਾਰੀ ਸਿਰਫ ਇਸ਼ਾਰਾ ਕਰਨ ਵਾਲੀ ਅਲਕਾ ਲਾਂਬਾ ਤੇ
ਉਸ ਦੀ ਸਮੁੱਚੀ ਪਾਰਟੀ ਦਾ ਹੀ ਦੱਸਿਆ ਜਾ ਰਿਹਾ ਹੈ ਕਿ ਜਦੋਂ ਕਿ ਇਸ ਕੇਸ ਵਿੱਚ ਸਤਾਧਾਰੀ
ਭਾਜਪਾ ਜਿਸ ਦੇ ਹੁਕਮਾਂ ਅਧੀਨ ਪਿਆਉ ਦੀ ਕੰਧ ਢਾਹੀ ਗਈ ਉਸ ਨੂੰ ਬਿਲਕੁਲ ਹੀ ਕਲੀਨ ਚਿੱਟ
ਦਿੱਤੀ ਜਾ ਰਹੀ ਹੈ।
ਦੂਸਰਾ ਸਭ ਤੋਂ
ਵੱਧ ਉਛਾਲਿਆ ਜਾ ਰਿਹਾ ਮੁੱਦਾ ਹੈ ‘ਆਪ’ ਦੇ ਯੂਥ ਵਿੰਗ ਦੇ ਚੋਣ ਮੈਨੀਫੈਸਟੋ ਦੇ ਕਵਰ ਪੇਜ
’ਤੇ ਦਰਬਾਰ ਸਾਹਿਬ ਦੀ ਫੋਟੋ ਲਾ ਕੇ ਇਸ ’ਤੇ ਪਾਰਟੀ ਦਾ ਚੋਣ ਨਿਸ਼ਾਨ ਝਾੜੂ ਛਾਪਣਾ ਤੇ ਇਸ
ਦੀ ਤੁਲਨਾ ਧਾਰਮਿਕ ਗ੍ਰੰਥਾਂ ਨਾਲ ਕਰਨੀ। ‘ਆਪ’ ਦੇ ਇਸ ਬੱਜਰ ਪਾਪ ਸਦਕਾ ਤਾਂ
ਅਖੌਤੀ ਬਾਦਲ ਦਲੀਆਂ ਤੇ ਇਨ੍ਹਾਂ ਦੇ ਟੁਕੜਿਆਂ ’ਤੇ ਪਲਨ ਵਾਲੇ ਟੁੱਕਰਬੋਚਾਂ ਦੇ ਹਿਰਦੇ
ਵਲੂੰਧਰੇ ਜਾਣ ਸਦਕਾ ਲਹੂ ਲੁਹਾਨ ਹੋਏ ਦੱਸਣ ਦੇ ਖੇਖਨ ਕੀਤੇ ਜਾ ਰਹੇ ਹਨ ਅਤੇ ਧੜਾ ਧੜ
ਧਾਰਾ 295ਏ ਅਧੀਨ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦੇ ਕੇਸ ਦਰਜ ਕਰਵਾਉਣ ਸ਼ੁਰੂ
ਕਰ ਦਿੱਤੇ। ਐਸਾ ਕਰਨ ਸਮੇਂ ਇਹ ਬਿਲਕੁਲ ਨਹੀਂ ਸੋਚ ਰਹੇ ਕਿ ਇਸ ਤਰ੍ਹਾਂ ਦੀ ਗਲਤੀਆਂ ਤਾਂ
ਸੈਂਕੜੇ ਵਾਰ ਇਹ ਖ਼ੁਦ ਕਰ ਚੁੱਕੇ ਹਨ ਤੇ ਹੁਣ ਵੀ ਕਰਦੇ ਜਾ ਰਹੇ ਹਨ। ਉਘੜਵੀਂ ਮਿਸਾਲ ਹੈ
ਕਿ 2004 ਦੀਆਂ ਦਿੱਲੀ ਗੁਰਦੁਆਰਾ ਚੋਣਾਂ ਸਮੇਂ ਇਸੇ ਬਾਦਲ ਦਲ ਨੇ ਚੋਣ ਫੈਸਟੋ ’ਤੇ
ਗੁਰਦੁਆਰਾ ਬੰਗਲਾ ਸਾਹਿਬ ਦੀ ਫੋਟੋ ਛਾਪ ਕੇ ਉਸ ’ਤੇ ਪਾਰਟੀ ਦਾ ਚੋਣ ਨਿਸ਼ਾਨ ਝਾੜੂ ਛਾਪਿਆ
ਸੀ।
- ਅੰਮ੍ਰਿਤਸਰ ਦੇ ਦਰਸ਼ਨ ਅਤੇ ਖ਼ਾਲਸਾ
ਵਿਰਾਸਤ ਅਨੰਦਪੁਰ ਸਾਹਿਬ ਦੀ ਯਾਤਰਾ ਕਰਵਾਉਣ ਵਾਲੀਆਂ ਬੱਸਾਂ ’ਤੇ ਦਰਬਾਰ
ਸਾਹਿਬ ਦੀ ਫੋਟੋ ਨਾਲ ਚੋਣ ਨਿਸ਼ਾਨ ਤੱਕੜੀ ਛਾਪਣੀ,
- ਮਾਈ ਭਾਗੋ ਸਕੀਮ ਅਧੀਨ
ਵਿਦਿਆਰਥਣਾਂ ਨੂੰ ਸਰਕਾਰੀ ਖਜ਼ਾਨੇ ਵਿੱਚੋਂ ਵੰਡੇ ਜਾਣ ਵਾਲੇ ਸਾਈਕਲਾਂ ਦੀ ਟੋਕਰੀ
’ਤੇ ਬਾਦਲ ਦੀ ਫੋਟੋ ਛਾਪਣੀ ਤੇ ਸਿੱਖ ਇਤਿਹਾਸ ਵਿੱਚ ਸਤਿਕਾਰਤ ਮਾਈ ਭਾਗੋ ਦਾ ਨਾਮ
ਚੇਨ ਕਵਰ ਤੇ ਲਿਖਣਾ ਜਿਸ ’ਤੇ ਸਾਈਕਲ ਚਲਾਉਣ ਸਮੇਂ ਹਮੇਸ਼ਾਂ ਪੈਰ ਘਿਸਦੇ ਰਹਿਣ ਕਰਕੇ
ਮਾਈ ਭਾਗੋ ਦਾ ਤ੍ਰਿਸਕਾਰ ਹੁੰਦਾ ਰਹਿੰਦਾ ਹੈ।
- ਚਿੰਤਪੁਰਨੀ ਦੀ ਯਾਤਰਾ ਵਾਲੀਆਂ
ਬੱਸਾਂ ’ਤੇ ਮਾਤਾ ਚਿੰਤਪੁਰਨੀ ਦੀ ਫੋਟੋ ਬੱਸ ਦੇ ਉਸ ਨਿਚਲੇ ਹਿੱਸੇ ’ਤੇ
ਛਾਪਣਾ ਜੋ ਹਮੇਸ਼ਾਂ ਹੀ ਯਾਤਰੀਆਂ ਦੇ ਪੈਰਾਂ ਹੇਠ ਰਹਿਣ ਕਰਕੇ ਮਾਤਾ ਚਿੰਤਪੁਰਨੀ ਦਾ
ਸਤਿਕਾਰ ਘਟਾਉਣਾ,
- ਆਪਣੇ ਪਾਰਟੀ ਚੋਣ ਨਿਸ਼ਾਨ
‘ਤਕੜੀ’ ਨੂੰ ਬਾਬੇ ਨਾਨਕ ਦੀ ਤੱਕੜੀ ਦੱਸ ਕੇ ਭੋਲੇ ਸਿੱਖਾਂ ਨੂੰ ਗੁਮਰਾਹ
ਕਰਨਾ ਆਦਿਕ ਅਨੇਕਾਂ ਗਲਤੀਆਂ ਅਕਸਰ ਕਰਦੇ ਰਹਿੰਦੇ ਹਨ।
ਅੱਜ ਹਿਰਦੇ ਵਲੂੰਧਰੇ ਜਾਣ ਕਾਰਨ ਲਹੂ ਲੁਹਾਨ ਹੋਏ ਫਿਰਦੇ ਕਿਸੇ
ਬਾਦਲ ਦਲੀਏ ਜਾਂ ਉਨ੍ਹਾਂ ਦੇ ਟੁੱਕਰ ਬੋਚਾਂ ਦੇ ਹਿਰਦੇ ਜਾਂ ਭਾਵਨਾਵਾਂ ਨੂੰ ਉਸ ਸਮੇਂ
ਆਂਚ ਤੱਕ ਨਹੀਂ ਆਈ ਤੇ ਨਾ ਹੀ ਕਦੀ ਆਉਣੀ ਹੈ ਕਿਉਂਕਿ ਅਜੇਹੀਆਂ ਗਲਤੀਆਂ ਕਰਨ ਨੂੰ ਇਹ
ਤਾਂ ਆਪਣਾ ਜਨਮ ਸਿੱਧ ਅਧਿਕਾਰ ਮੰਨੀ ਬੈਠੇ ਹਨ। ਅਕਾਲੀ ਦਲ ਦਾ ਇਹ ਦੂਹਰਾ ਸਟੈਂਡ
ਦੋਗਲੇਪਨ ਅਤੇ ਢੀਠਤਾਈ ਦੀ ਸਿਖਰ ਹੈ ਜਿਸ ਦੀ ਕੋਈ ਸੀਮਾ ਹੀ ਨਹੀਂ ਰਹੀ।
ਚੋਣ ਮੈਨੀਫੈਸਟੋ ਨੂੰ ਧਾਰਮਿਕ ਗ੍ਰੰਥਾਂ
ਨਾਲ ਕਰਨ ਦੀ ਅਵੱਗਿਆ ਕਰਨ ਸਬੰਧੀ ਮੇਰੇ ਕੁਝ ਵੱਖਰੇ ਖਿਆਲ ਹਨ। ਮੇਰਾ ਮੰਨਣਾਂ ਹੈ ਕਿ
ਕਿਸੇ ਵੀ ਸਿਆਸੀ ਪਾਰਟੀ ਸਮੇਤ ਆਪਣੇ ਆਪ ਨੂੰ ਪੰਥਕ ਪਾਰਟੀ ਦੱਸਣ ਵਾਲੀ ਅਕਾਲੀ ਪਾਰਟੀ
ਜਾਂ ਉਸ ਦੇ ਆਗੂਆਂ ਦਾ ਕੋਈ ਧਰਮ ਹੁੰਦਾ ਹੀ ਨਹੀਂ। ਉਨ੍ਹਾਂ ਦਾ ਧਾਰਮਿਕ ਗ੍ਰੰਥਾਂ
ਵਿੱਚ ਪੂਰਨ ਸ਼ਰਧਾ ਹੋਣ ਦਾ ਵਿਖਾਵਾ ਤਾਂ ਬਹੁਤ ਕੀਤਾ ਜਾਂਦਾ ਹੈ ਪਰ ਉਨ੍ਹਾਂ ਵਿੱਚ ਦਰਜ
ਸਿਧਾਂਤਾਂ ਦੇ ਉਹ ਨੇੜ ਦੀ ਲੰਘਣ ਦੀ ਕੋਸ਼ਿਸ਼ ਨਹੀਂ ਕਰਦੇ। ਉਨ੍ਹਾਂ ਦਾ ਇੱਕੋ ਇੱਕ ਟੀਚਾ
ਹੁੰਦਾ ਹੈ ਹਰ ਕੀਮਤ ’ਤੇ ਸਤਾ ਹਾਸਲ ਕਰਨੀ ਭਾਵੇਂ ਐਸਾ ਕਰਦੇ ਸਮੇਂ ਉਨ੍ਹਾਂ ਨੂੰ ਆਪਣੇ
ਧਰਮ ਜਾਂ ਅਸੂਲਾਂ ਦੀ ਬਲੀ ਹੀ ਕਿਉਂ ਨਾ ਦੇਣੀ ਪਵੇ! ਇਸੇ ਕਾਰਨ ਉਨ੍ਹਾਂ ਦਾ ਚੋਣ ਫੈਸਟੋ
ਝੂਠ ਦੇ ਪੁਲੰਦੇ ਤੋਂ ਵੱਧ ਕੁਝ ਨਹੀਂ ਹੁੰਦਾ। ਮਿਸਾਲ ਦੇ ਤੌਰ ’ਤੇ 2007 ਵਿੱਚ ਅਕਾਲੀ
ਦਲ ਵੱਲੋਂ ‘ਟਰਮੀਨੇਸ਼ਨ ਆਫ ਪੰਜਾਬ ਵਾਟਰ ਐਗਰੀਮੈਂਟਸ ਐਕਟ-2004’ ਦੀ ਧਾਰਾ 5 ਖਤਮ ਕਰਨ,
ਪੰਜਾਬ ਵਿੱਚ ਝੂਠੇ ਪੁਲਿਸ ਮੁਕਾਬਲੇ ਬਣਾਉਣ ਵਾਲੇ ਦੋਸ਼ੀ ਪੁਲਿਸ ਅਫਸਰਾਂ ’ਤੇ ਕੇਸ ਦਰਜ
ਕਰਕੇ ਉਨ੍ਹਾਂ ਨੂੰ ਸਜਾਵਾਂ ਦੇਣੀਆਂ, ਜੇਲ੍ਹਾਂ ’ਚ ਬੰਦ ਨੌਜਵਾਨਾਂ ਨੂੰ ਰਿਹਾਅ ਕਰਨਾ
ਆਦਿਕ ਅੱਜ ਤੱਕ ਵਫਾ ਨਹੀਂ ਹੋਏ। ਉਸ ਤੋਂ ਪਿਛਲੇ ਜਾਰੀ ਕੀਤੇ ਗਏ ਚੋਣ ਮੈਨੀਫੈਸਟੋਆਂ
ਵਿੱਚ ਨੌਜਵਾਨ ਨੂੰ ਰੋਜ਼ਗਾਰ ਦੇਣਾ ਅਤੇ ਵਿਦਿਆਰਥੀਆਂ ਨੂੰ ਲੈਪਟਾਪ ਦੇਣ ਵਰਗੇ ਅਨੇਕਾਂ
ਹੋਰ ਵਾਅਦੇ ਕੀਤੇ ਗਏ ਸਨ ਜਿਹੜੇ ਅੱਜ ਤੱਕ ਵਫਾ ਨਹੀਂ ਹੋਏ ਤੇ ਅੱਜ ਇਨ੍ਹਾਂ ਨੂੰ ਚੇਤਾ
ਵੀ ਨਹੀਂ ਹੈ ਕਿ ਇਹ ਵਾਅਦੇ ਕੀਤੇ ਵੀ ਸਨ ਜਾਂ ਨਹੀਂ। ਇਸੇ ਤਰ੍ਹਾਂ 2014 ਦੀਆਂ ਲੋਕ ਸਭਾ
ਦੌਰਾਨ ਭਾਜਪਾ ਨੇ ਚੋਣ ਵਾਅਦੇ ਕੀਤੇ ਸਨ ਭ੍ਰਿਸ਼ਟਾਚਾਰ ਤੇ ਮਹਿੰਗਾਈ ਘਟਾਈ ਜਾਵੇਗੀ,
ਵਿਦੇਸ਼ਾਂ ਵਿੱਚ ਜਮ੍ਹਾਂ ਕਾਲਾ ਧਨ ਵਾਪਸ ਲਿਆ ਕੇ ਹਰ ਭਾਰਤੀ ਦੇ ਖਾਤੇ ਵਿੱਚ 15-15 ਲੱਖ
ਜਮ੍ਹਾਂ ਕਰਵਾਏ ਜਾਣਗੇ, ਕਿਸਾਨਾਂ ਦੀ ਖੇਤੀ ਜਿਨਸਾਂ ਦੇ ਭਾਅ ਨਿਸਚਿਤ ਕਰਨ ਲਈ
ਸਵਾਮੀਨਾਥਨ ਰੀਪੋਰਟ ਲਾਗੂ ਕੀਤੀ ਜਾਵੇਗੀ। ਪਰ ਸਰਕਾਰ ਬਣਨ ਪਿੱਛੋਂ ਭਾਜਪਾ ਦਾ ਕੌਮੀ
ਪ੍ਰਧਾਨ ਹੀ ਇਨ੍ਹਾਂ ਨੂੰ ਚੁਣਾਵੀ ਜੁਮਲਾ ਦੱਸਣ ਲੱਗ ਪਏ। ਸੋ ਇਨ੍ਹਾਂ ਲਈ ਚੋਣ ਮੈਨੀਫੈਸਟੋ
ਝੂਠ ਦੇ ਪੁਲੰਦੇ ਤੋਂ ਵੱਧ ਕੁਝ ਹੈ ਹੀ ਨਹੀਂ। ਇਸ ਝੂਠ ਦੇ ਪਸਾਰੇ ਵਿੱਚ ਜੇ ‘ਆਪ’ ਨੇ
ਆਪਣੇ ਚੋਣ ਮੈਨੀਫੈਸਟੋ ਸਬੰਧੀ ਇਹ ਕਿਹਾ ਹੈ ਕਿ ਉਨ੍ਹਾਂ ਲਈ ਇਹ ਹੀ ਗੁਰੂ ਗ੍ਰੰਥ ਸਾਹਿਬ
ਹੈ, ਇਹ ਹੀ ਗੀਤਾ ਤੇ ਬਾਈਬਲ ਹੈ। ਇਨ੍ਹਾਂ ਸ਼ਬਦਾਂ ਦੇ ਬੋਲਾਂ ਪਿੱਛੇ ਨਾ ਜਾਂਦਾ ਹੋਇਆਂ
ਮੈਂ ਇਨ੍ਹਾਂ ਸ਼ਬਦਾਂ ਰਾਹੀਂ ਪ੍ਰਗਟਾਈ ਭਾਵਨਾ ਵੇਖਦਾ ਹੋਇਆ ਇਸ ਨੂੰ ਸਆਸੀ ਖੇਤਰ ਇੱਕ ਚੰਗੀ
ਸ਼ੁਰੂਆਤ ਸਮਝਦਾ ਹਾਂ।
ਭਾਵਨਾਂ ਇਹ ਹੈ ਕਿ ਐਸਾ ਕਹਿਣ ਵਾਲੀ
ਪਾਰਟੀ ਆਪਣੇ ਕੀਤੇ ਚੋਣ ਵਾਅਦਿਆਂ ਨੂੰ ਉਸੇ ਭਾਵਨਾਂ ਨਾਲ ਪੂਰਾ ਕਰਨ ਦਾ ਯਤਨ ਕਰੇਗੀ ਜਿਵੇਂ
ਕਿ ਹਰ ਧਾਰਮਿਕ ਵਿਅਕਤੀ ਆਪਣੇ ਧਾਰਮਿਕ ਗ੍ਰੰਥ ਵਿੱਚ ਦਰਜ ਸਿਧਾਂਤਾਂ ’ਤੇ ਯਤਨ ਕਰਦਾ ਹੈ।
ਸੋ ਚਾਹੀਦਾ ਤਾਂ ਇਹ ਹੈ ਕਿ ਹਰ ਸਿਆਸੀ ਪਾਰਟੀ ਲਈ ਆਪਣਾ ਚੋਣ ਮੈਨੀਫੈਸਟੋ
ਧਾਰਮਿਕ ਗ੍ਰੰਥ ਦੇ ਤੁਲ ਸਮਝ ਕੇ ਉਨ੍ਹਾਂ ਵਿੱਚ ਕੀਤੇ ਵਾਅਦੇ ਪੂਰੇ ਕਰੇ। ਸੋ ਜੇ
ਭਾਵਨਾਂਵਾਂ ਨੂੰ ਠੇਸ ਪਹੁਚਾਉਣ ਦਾ ਕੇਸ ਦਰਜ ਕਰਵਾਉਣਾ ਹੀ ਹੈ ਤਾਂ ਉਨ੍ਹਾਂ ਪਾਰਟੀਆਂ
ਵਿਰੁੱਧ ਕਰਨਾ ਚਾਹੀਦਾ ਹੈ ਜਿਨ੍ਹਾਂ ਨੇ ਕੇਵਲ ਚੋਣਾਂ ਜਿੱਤਣ ਲਈ ਝੂਠ ਦਾ ਪੁਲੰਦਾ ਨਾਮੀ
ਚੋਣ ਫੈਸਟੋ ਜਾਰੀ ਕਰਕੇ ਭੋਲ਼ੇ ਲੋਕਾਂ ਨੂੰ ਗੁੰਮਰਾਹ ਕਰ ਕੇ ਵੋਟਾਂ ਤੇ ਸਤਾ ਹਾਸਲ ਕੀਤੀ
ਹੋਵੇ ਤੇ ਚੋਣਾਂ ਜਿੱਤਣ ਪਿਛੋਂ ਇਸ ਨੂੰ ਝੂਠ ਦਾ ਪੁਲੰਦਾ ਸਮਝ ਕੇ ਰੱਦੀ ਦੀ ਟੋਕਰੀ ਵਿੱਚ
ਸੁੱਟ ਦਿੱਤਾ ਜਾਵੇ ਜਾਂ ਖ਼ੁਦ ਹੀ ਇਸ ਨੂੰ ਚੋਣ ਜ਼ੁਮਲਾ ਦੱਸ ਕੇ ਲੋਕਾਂ ਨਾਲ ਮਜ਼ਾਕ ਕਰਨ
ਲੱਗ ਪੈਣ। ਸੋ ਸਮੇਂ ਤੋਂ ਪਹਿਲਾਂ ਅਜੇਹੇ ਮਸਲਿਆਂ ਨੂੰ ਉਭਾਰਨ ਵਾਲਿਆਂ ਦਾ ਕੇਵਲ ਮਕਸਦ
ਇਹ ਹੁੰਦਾ ਹੈ ਕਿ ਕੋਈ ਸਿਆਸੀ ਬਹਿਸ ਕਰਨ ਤੋਂ ਅਸਮਰਥ ਸਿਆਸੀ ਲੋਕਾਂ ਵੱਲੋਂ ਕੇਵਲ
ਧਾਰਮਿਕ ਭਾਵਨਾਵਾਂ ਦੇ ਨਾਮ ’ਤੇ ਲੋਕਾਂ ਦੇ ਜ਼ਜ਼ਬਾਤ ਭੜਕਾ ਅਸਲ ਮੁੱਦਾ ਨੂੰ ਰੋਲ ਦੇਣਾ।
ਸੋ ਐਸਾ ਯਤਨ ਹੀ ਅਕਾਲੀ ਦਲ ਤੇ ਕਾਂਗਰਸ ਵੱਲੋਂ ਕੀਤਾ ਜਾ ਰਿਹਾ
ਹੈ। ਹੈਰਾਨੀ ਦੀ ਗੱਲ ਹੈ ਕਿ ਜਿਹੜੀ ਅਕਾਲੀ ਪਾਰਟੀ ਹੁਣ ਤੱਕ ਹਰ ਚੋਣਾਂ ਸਮੇਂ 1984 ਦੀਆਂ
ਘਟਨਾਵਾਂ ਨੂੰ ਆਪਣੇ ਸਿਆਸੀ ਲਾਹੇ ਲਈ ਉਛਾਲਦੀ ਆ ਰਹੀ ਸੀ ਉਸ ਲਈ ਅੱਜ ਪਿਆਊ ਦੀ ਕੰਧ
ਢਾਹੁਣਾ ਅਤੇ ਚੋਣ ਮੈਨੀਫੈਸਟੋ ਤੇ ਦਰਬਾਰ ਸਾਹਿਬ ਦੀ ਫੋਟੋ ਲਾਉਣਾ ਅਕਾਲ ਤਖ਼ਤ ਸਾਹਿਬ ਨੂੰ
ਢਹਿ ਢੇਰੀ ਕਰਨ ਤੇ ਗੁਰੂ ਗ੍ਰੰਥ ਸਾਹਿਬ ਨੂੰ ਗੋਲ਼ੀਆਂ ਨਾਲ ਜਖ਼ਮੀ ਕਰਨ ਤੋ ਵੀ ਵੱਧ ਦਰਦ
ਮਹਿਸੂਸ ਕਰਨ ਲੱਗ ਪਈ ਹ। ਹੈਰਾਨੀ ਇਹ ਹੈ ਕਿ ਇਸ ਮਸਲੇ ’ਤੇ ਅਕਾਲੀ ਤੇ ਕਾਂਗਰਸ ਇੱਕ ਸੁਰ
ਹੋ ਕੇ ਆਪ ’ਤੇ ਸ਼ਬਦੀ ਹਮਲੇ ਕਰ ਰਹੇ। ਕਾਰਨ ਸਿਰਫ ਇਹ ਹੈ ਕਿ ਪਹਿਲਾਂ ਅਕਾਲੀ ਦਲ ਲਈ
ਕੁਰਸੀ ਤੇ ਕਬਜ਼ਾ ਕਰਨ ਵਿੱਚ ਕਾਂਗਰਸ ਰੋੜਾ ਜਾਪਦੀ ਸੀ ਪਰ ਅੱਜ ਇਨ੍ਹਾਂ ਦੋਵਾਂ ਪਾਰਟੀਆਂ
ਲਈ ‘ਆਪ’ ਸਭ ਤੋਂ ਵੱਡਾ ਰੋੜਾ ਜਾਪਦੀ ਹੈ।