8
ਅਗਸਤ: ਗੁਰਦੁਆਰਾ ਸਾਹਿਬ ਵਿਖੇ ਬਚਿਤ੍ਰ ਨਾਟਕ (ਕਥਿਤ ਦਸਮ ਗ੍ਰੰਥ) ਨੂੰ ਸ੍ਰੀ ਗੁਰੂ
ਗ੍ਰੰਥ ਸਾਹਿਬ ਜੀ ਮਹਾਰਾਜ ਵਾਂਗ ਚੰਦੋਏ ਤੇ ਚਵਰ ਸਹਿਤ ਬਰਾਬਰ, ਟੇਡਾ ਜਾਂ ਵੱਖਰੇ
ਸਿੰਘਾਸਣ ’ਤੇ ਅਸਥਾਪਨ ਕਰਨਾ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਘੋਰ ਅਪਮਾਨ ਹੈ।
ਅਜਿਹੇ ਦੋਸ਼ੀਆਂ 'ਤੇ ਬੇਅਬਦੀ ਦਾ ਮੁੱਕਦਮਾ ਦਰਜ ਹੋਣਾ ਚਾਹੀਦਾ
ਹੈ। ਕਿਉਂਕਿ, ਇੱਕ ਤਾਂ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਮਹਾਰਾਜ ਦੇ ‘ਗੁਰੂ
ਮਾਨਿਓ ਗ੍ਰੰਥ’ ਦੇ ਆਖ਼ਰੀ ਹੁਕਮ ਦਾ ਉਲੰਘਣ ਕਰਕੇ ਗੁਰੂ ਦਾ ਸ਼ਰੀਕ ਖੜਾ ਕਰਨ ਵਾਲੀ ਭਾਰੀ
ਭੁੱਲ ਹੈ। ਅਤੇ ਦੂਜੇ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸ੍ਰੀ ਅੰਮ੍ਰਿਤਸਰ ਮੁਤਾਬਿਕ
ਪੰਥ ਪ੍ਰਵਾਣਿਤ ਸਿੱਖ ਰਹਿਤ ਮਰਯਾਦਾ ਅਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਵਿਸ਼ੇਸ਼ ਆਦੇਸ਼ਾਂ ਦੀ
ਅਣਦੇਖੀ ਕਰਨ ਦੀ ਗੁਸਤਾਖ਼ੀ ਹੈ। ਇਹ ਲਫ਼ਜ਼ ਹਨ ਅੰਤਰਾਸ਼ਟਰੀ ਸਿੱਖ ਪ੍ਰਚਾਰਕ ਗਿਆਨੀ ਜਗਤਾਰ
ਸਿੰਘ ਜਾਚਕ ਹੁਰਾਂ ਦੇ, ਜਿਹੜੇ ਉਨ੍ਹਾਂ ਨਿਊਯਾਰਕ ਤੋਂ ਭੇਜੇ ਪ੍ਰੈਸਨੋਟ ਵਿੱਚ ਕਹੇ ਹਨ।
ਉਨ੍ਹਾਂ ਸਪਸ਼ਟ ਕੀਤਾ ਕਿ ਸਿੱਖ ਰਹਿਤ ਮਰਯਾਦਾ ਦੇ ਕਿਤਾਬਚੇ ਦੇ ਪੰਨਾ
13 ’ਤੇ ‘ਗੁਰਦੁਆਰੇ’ ਦੇ ਸਿਰਲੇਖ ਹੇਠ ਸਪਸ਼ਟ ਲਿਖਿਆ ਹੈ ਕਿ “ਸ੍ਰੀ
ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਵਾਕਰ (ਤੁੱਲ) ਕਿਸੇ ਪੁਸਤਕ ਨੂੰ ਅਸਥਾਪਨ ਨਹੀਂ ਕਰਨਾ।”
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਤਿੰਨ ਸੌ ਸਾਲਾ ਗੁਰਗੱਦੀ ਪੁਰਬ ਵੇਲੇ 2008 ਵਿੱਚ ਸ੍ਰੀ
ਅਕਾਲ ਤਖ਼ਤ ਦੇ ਜਥੇਦਾਰ ਗਿਆਨੀ ਜੋਗਿੰਦਰ ਸਿੰਘ ‘ਵਿਦਾਂਤੀ’ ਹੁਰਾਂ ਵਿਸੇਸ਼ ਆਦੇਸ਼ ਜਾਰੀ
ਕੀਤੇ ਸਨ ਕਿ ‘ਦਸਮ ਗ੍ਰੰਥ’ ਸਿੱਖ ਸਾਹਿਤ ਦਾ ਅੰਗ ਤਾਂ ਮੰਨਿਆ ਜਾ ਸਕਦਾ ਹੈ। ਪਰ, ਕਿਸੇ
ਵੀ ਗੁਰਦੁਆਰੇ ਵਿਖੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਾਂਗ ਪ੍ਰਕਾਸ਼ ਨਹੀਂ ਕੀਤਾ ਜਾ ਸਕਦਾ।
ਕਿਉਂਕਿ, ਦਸਮ ਪਾਤਸ਼ਾਹ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਮਹਾਰਾਜ ਨੇ ਗੁਰਿਆਈ ਸ੍ਰੀ ਗੁਰੂ
ਗ੍ਰੰਥ ਸਾਹਿਬ ਨੂੰ ਬਖ਼ਸ਼ੀ ਹੈ।
ਪਰ ਦੁੱਖ ਦੀ ਗੱਲ ਹੈ ਕਿ ਇਤਨੀ ਸਪਸ਼ਟਤਾ ਦੇ ਬਾਵਜੂਦ ਵੀ ਸ੍ਰੀ
ਅਕਾਲ ਤਖ਼ਤ ਸਾਹਿਬ ਤੋਂ ਲਗਭਗ 25 ਕੁ ਮੀਲ ਦੀ ਦੂਰੀ ਉੱਤੇ ਪ੍ਰਸਿੱਧ ਪਿੰਡ ਸਭਰਾਵਾਂ ਵਿਖੇ
ਬਾਬਾ ਬੀਰ ਸਿੰਘ ਦੇ ਯਾਦਗਰੀ ਅਸਥਾਨ ਗੁਰਦੁਆਰਾ ਸ੍ਰੀ ਦਮਦਮਾ ਸਾਹਿਬ ਵਿੱਚ ਸ੍ਰੀ ਗੁਰੂ
ਗ੍ਰੰਥ ਸਾਹਿਬ ਦੇ ਬਰਾਬਰ ਦਸਮ ਗ੍ਰੰਥ ਨੂੰ ਅਸਥਾਪਨ ਕੀਤਾ ਜਾ ਚੁੱਕਾ ਹੈ। ਸੂਝਵਾਨ ਨਗਰ
ਨਿਵਾਸੀ ਤਾਂ ਵਿਰੋਧ ਪ੍ਰਦਰਸ਼ਨ ਕਰ ਰਹੇ ਹਨ।
ਪਰ, ਹੈਰਾਨੀ ਹੈ ਕਿ ਪੰਥ ਦੀ ਪ੍ਰਤੀਨਿਧ
ਅਖਵਾਉਂਦੀ ਸ਼੍ਰੋਮਣੀ ਕਮੇਟੀ, ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਮਜੂਦਾ ਜਥੇਦਾਰ ਅਤੇ ਸ੍ਰੀ ਗੁਰੂ
ਗ੍ਰੰਥ ਸਾਹਿਬ ਦੀ ਸਾੜਫੂਕ ਦੁਆਰਾ ਹੋ ਰਹੀ ਸਾਜਸ਼ੀ ਬੇਅਦਬੀ ਦਾ ਵਿਰੋਧ ਕਰਨ ਵਾਲੀਆਂ ਸਿੱਖ
ਜਥੇਬੰਦੀਆਂ ਮੂਕ-ਦਰਸ਼ਨ ਬਣ ਕੇ ਵੇਖ ਰਹੀਆਂ ਹਨ । ਇਉਂ ਜਾਪਦਾ ਹੈ ਕਿ ਉਨ੍ਹਾਂ
ਨੂੰ ਗੁਰਦੁਆਰੇ ਵਿਖੇ ਦਸਮ ਗ੍ਰੰਥ ਦਾ ਅਸਥਾਪਨ ਗੁਰੂ ਦੀ ਬੇਅਦਬੀ ਨਹੀਂ ਜਾਪਦਾ । ਗਿਆਨੀ
ਜਾਚਕ ਨੇ ਅਖ਼ੀਰ ਵਿੱਚ ਸਿੱਖ ਆਗੂਆਂ ਨੂੰ ਸੁਚੇਤ ਕੀਤਾ ਹੈ ਕਿ ਜੇ ਇਸ ਮਸਲੇ ਨੂੰ ਛੇਤੀ ਨਾ
ਕੀਤਾ ਸੁਲਝਾਇਆ ਗਿਆ ਤਾਂ ਕਿਸੇ ਵੀ ਵੇਲੇ ਸਭਰਾਵਾਂ ਵਿਖੇ ਸ੍ਰੀ ਨਨਕਾਣਾ ਸਾਹਿਬ ਵਾਲਾ
ਸਾਕਾ ਵਰਤ ਸਕਦਾ ਹੈ ।