Main News Page

ਅੰਮ੍ਰਿਤਸਰ, (24 ਫਰਵਰੀ,ਪੀ.ਐਸ.ਐਨ): ਇਥੋਂ ਦੇ ਇੱਕ ਇਬਣ ਵਿੱਚ ਸਥਿਤੀ ਉਸ ਸਮੇਂ ਤਣਾਅਪੂਰਨ ਹੋ ਗਈ ਜਦੋਂ ਨਿਹੱਥੇ ਸਿੱਖਾਂ ਤੇ ਆਸ਼ੂਤੋਸ਼ ਦੇ ਕ੍ਰਿਪਾਨਾਂ, ਗੰਡਾਸੀਆ ਤੇ ਡਾਂਗਾਂ ਨਾਲ ਲੈਸ ਗੁੰਡਿਆਂ ਨੇ ਹਮਲਾ ਕਰ ਦਿੱਤਾ। ਮੌਕੇ ਤੇ ਮੌਜੂਦ ਪੁਲਿਸ ਪਾਰਟੀ ਜਿਸਦੀ ਅਗਵਾਈ ਡੀ ਐਸ ਪੀ ਅਟਾਰੀ ਹਰਦੇਵ ਸਿੰਘ ਕਰ ਰਹੇ ਸਨ ਮੂਕ ਦਰਸ਼ਕ ਬਣ ਕੇ ਤਮਾਸ਼ਾ ਦੇਖਦੀ ਰਹੀ। ਜਾਣਕਾਰੀ ਅਨੁਸਾਰ ਅੰਮ੍ਰਿਤਸਰ ਤੇ ਬੀੜ ਬਾਬਾ ਬੁੱਢਾ ਸਾਹਿਬ ਵਿਚਾਲੇ ਪਿੰਡ ਇਬਣ ਵਿਖੇ ਸਿੱਖ ਸੰਗਤ ਨੂੰ ਆਸ਼ੂਤੋਸ਼ ਦੇ ਚੇਲਿਆਂ ਵਲੋਂ ਸਮਾਗਮ ਆਯੋਜਿਤ ਕੀਤੇ ਜਾਣ ਸਬੰਧੀ ਜਾਣਕਾਰੀ ਮਿਲੀ ਤਾਂ ਸਵੇਰ ਤੋਂ ਹੀ ਇਲਾਕੇ ਦੇ ਮੋਹਤਵਰ ਲੋਕਾਂ ਨੇ ਇਸ ਸਮਾਗਮ ਨੂੰ ਰੋਕਣ ਲਈ ਅੰਮ੍ਰਿਤਸਰ ਦੇ ਡਿਪਟੀ ਕਮਿਸ਼ਨਰ ਕਾਹਨ ਸਿੰਘ ਪੰਨੂ ਨੂੰ ਅਪੀ ਕੀਤੀ ਜਿਨ੍ਹਾਂ ਨੇ ਤੁਰੰਤ ਪੁਲਿਸ ਪ੍ਰਸ਼ਾਸਨ ਨੂੰ ਯੋਗ ਕਾਰਵਾਈ ਕਰਨ ਦੇ ਹੁਕਮ ਦਿੱਤੇ। ਇਸ ਤੇ ਡੀ ਐਸ ਪੀ ਅਟਾਰੀ ਹਰਦੇਵ ਸਿੰਘ ਪੁਲਿਸ ਫੋਰਸ ਲੈ ਕੇ ਅਪਰਬਾਰੀ ਨਹਿਰ ਦੇ ਪੁੱਲ ਤੇ ਪਹੁੰਚ ਗਏ। ਇਥੇ ਗੁਰੂ ਨਾਨਕ ਨਾਮ ਲੇਵਾ ਸੰਗਤਾਂ ਵਾਹਿਗੁਰੂ ਦਾ ਨਾਂ ਜਪ ਰਹੀਆਂ ਸਨ ਅਤੇ ਪੁਲਿਸ ਨੂੰ ਇਸ ਸਮਾਗਮ ਨੂੰ ਰੋਕਣ ਲਈ ਅਮਲ ਤੇ ਇੰਤਜ਼ਾਰ 'ਚ ਸਨ।

ਥੋੜੇਂ ਸਮੇਂ ਮਗਰੋਂ ਸਮਾਗਮ ਵਾਲੀ ਥਾਂ ਤੋਂ ਮੁੜ ਕੇ ਹਰਦੇਵ ਸਿੰਘ ਨੇ ਸਿੱਖਾਂ ਨੂੰ ਦੱਸਿਆ ਕਿ ਪੁਲਿਸ ਨੇ ਸਮਾਗਮ ਰੁਕਵਾ ਦਿੱਤਾ ਹੈ ਤੇ ਜੇਕਰ ਤੁਸੀ ਆਪਣੀ ਤਸੱਲੀ ਕਰਨਾ ਚਾਹੁੰਦੇ ਹੋ ਤਾਂ ਕੋਈ ਵੀ 2 ਜਾ ਤਿੰਨ ਸਿੰਘ ਜਾ ਕੇ ਤਸੱਲੀ ਕਰ ਲੈਣ। ਡੀ ਐਸ ਪੀ ਦੇ ਭਰੋਸਾ ਦਿਵਾਉਣ ਤੇ ਪੁਲਿਸ ਫੋਰਸ ਨਾਲ ਤਿੰਨ ਵਿਅਕਤੀ ਭਾਈ ਸੁਖਜਿੰਦਰ ਸਿੰਘ ਝਬਾਲ, ਭਾਈ ਸੁਖਜਿੰਦਰ ਸਿੰਘ ਅਤੇ ਭਾਈ ਜਗਨਪ੍ਰੀਤਮ ਸਿੰਘ ਮੋਟਰਸਾਈਕਲ ਤੇ ਸਵਾਰ ਹੋ ਕੇ ਸਮਾਗਮ ਵਾਲੀ ਥਾਂ ਤੇ ਮੁਆਇਨੇ ਲਈ ਚਲੇ ਗਏ। ਪੁਲਿਸ ਤਮਾਸ਼ਾ ਦੇਖਣ ਲਈ ਇੱਕ ਪਾਸੇ ਖੜੀ ਹੋ ਗਈ। ਸਿੱਖਾਂ ਨੂੰ ਦੇਖਦਿਆਂ ਹੀ ਪਹਿਲਾ ਤੋਂ ਵਿਉਂਤ ਬਣਾਈ ਬੈਠੇ ਆਸ਼ੂਤੋਸ਼ ਤੇ 50-50 ਗੁੰਡਿਆਂ ਨੇ ਇਨ੍ਹਾਂ ਤਿੰਨਾਂ ਸਿੱਖਾਂ ਤੇ ਕਾਤਲਾਨਾ ਹਮਲਾ ਕਰ ਦਿੱਤਾ।

ਹਸਪਤਾਲ 'ਚ ਗੰਭੀਰ ਹਾਲਤ ਵਿਚ ਜੇਰੇ ਇਲਾਜ ਭਾਈ ਜਗਨਦੀਪ ਸਿੰਘ ਨੇ ਦੱਸਿਆ ਕਿ ਆਸ਼ੂਤੋਸ਼ ਦੇ ਗੁੰਡੇ ਸਮਾਗਮ ਵਾਲੀ ਥਾਂ ਦੇ ਬਾਹਰ ਪਹਿਲਾ ਹੀ ਇਸ ਤਾਗ 'ਚ ਬੈਠੇ ਸਨ। ਉਨ੍ਹਾਂਨੇ ਦਾਤਰਾਂ, ਕ੍ਰਿਪਾਨਾਂ, ਗੰਡਾਸਿਆਂ, ਇੱਟਾਂ ਨਾਲ ਸਾਡੇ ਤੇ ਹਮਲਾ ਕਰ ਦਿੱਤਾ ਅਤੇ ਪੁਲਿਸ ਦੇ ਜਵਾਨ ਪਤਾ ਨਹੀਂ ਕਿੱਧਰ ਗਾਇਬ ਹੋ ਗਏ। ਤਿੰਨ ਸਿੱਖਾਂ ਨੂੰ ਬੇਹੋਸ਼ੀ ਦੀ ਹਾਲਤ 'ਚ ਛੱਡ ਕੇ ਆਸ਼ੂਤੋਸ਼ ਦੇ ਗੁੰਡੇ ਉਥੋਂ ਖਿਸਕ ਗਏ। ਬਾਅਦ ਵਿੱਚ ਇਕ ਜ਼ਖਮੀ ਸਿੱਖ ਨੇ ਮੋਬਾਇਲ ਰਾਹੀਂ ਆਪਣੇ ਸਾਥੀ ਨੂੰ ਸੱਦਿਆ ਜਿਨ੍ਹਾਂਨੇ ਉਨ੍ਹਾਂਨੂੰ ਹਸਪਤਾਲ ਪਹੁੰਚਾਇਆ। ਡਾਕਟਰਾਂ ਅਨੁਸਾਰ ਸੁਖਜਿੰਦਰ ਸਿੰਘ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ। ਮਾਮਲੇ ਦੀ ਜਾਂਚ ਕਰ ਰਹੀ ਥਾਣਾ ਚਾਟੀਵਿੰਡ ਦੇ ਮੁਖੀ ਕੁਲਦੀਪ ਸਿੰਘ ਨੇ ਦੱਸਿਆ ਕਿ ਫੱਟੜ ਵਿਅਕਤੀਆਂ ਦੇ ਬਿਆਨ ਲਏ ਜਾ ਰਹੇ ਹਨ ਇਸ ਤੋਂ ਬਾਅਦ ਹੀ ਪੁਲਿਸ ਕੋਈ ਕਾਰਵਾਈ ਕਰੇਗੀ।

Source: Punjab Spectrum