ਸਾਡੇ ‘ਤੇ ਵੀ ਮੇਹਰ ਹੋਈ, ਓਸ ਸੱਚੇ ਪਾਤਸ਼ਾਹ ਦੀ,
ਜਿੱਤ ਲਈ ਅਖ਼ੀਰ ਅਸੀਂ, ਚੋਣਾਂ ਵਾਲੀ ਜੰਗ ਜੀ।
ਚਿਰਾਂ ਦੀ ਉਡੀਕ ਸਾਡੀ, ਪੂਰੀ ਹੋਈ ਹੁਣ ਆਕੇ,
ਪਿੱਟਿਆ ਹੈ ਕਈ ਸਾਲ, ਬੜਾ ਅਸੀਂ ਧੰਦ ਜੀ।
ਸਾਨੂੰ ਕਈਆਂ ਵੋਟਰਾਂ ਨੇ, ਬੜਾ ਹੈ ਖ਼ਰਾਬ ਕੀਤਾ,
ਥੱਕ ਗਿਆ ਮੂੰਹ ਸਾਡਾ, ਵੋਟਾਂ ਮੰਗ ਮੰਗ ਜੀ।
ਕਰਾਂਗੇ ਤਰੀਕੇ ਨਾਲ, ਸਿੱਧੇ ਕਦੇ ਏਨ੍ਹਾਂ ਨੂੰ ਵੀ,
ਚੰਗੀ ਤਰ੍ਹਾਂ ਪੈਰ ਪਹਿਲਾਂ, ਲਈਏ ਜ਼ਰਾ ਬੰਨ੍ਹ ਜੀ।
ਸਾਡੀ ਏ ਕਮੇਟੀ ਹੁਣ, ਮੈਂ ਆਂ ਪ੍ਰਧਾਨ ਏਥੇ,
ਖੰਘਣ ਨਈਂ ਦੇਣਾ ਅਸੀਂ, ਕੋਈ ਭਾਈਬੰਦ ਜੀ।
ਉਂਜ ਖਾਉ ਪੀਉ ਮੌਜ ਕਰੋ, ਰੱਜ ਰੱਜ ਗੱਫੇ ਲਾਉ,
ਸ਼ਰਤ ਐ ਏਨੀ ਸਾਡੀ, ਬਸ ਮੂੰਹ ਰੱਖੋ ਬੰਦ ਜੀ।

ਪੱਤੀ ਵਾਲਾ ਦੁੱਧ, ਲੌਂਗ ਲੈਚੀ ਵਾਲੀ ਚਾਹ ਛਕੋ,
ਲੱਡੂ ਤੇ ਜਲੇਬੀ, ਨਾਲ ਖਾਉ ਕਲਾਕੰਦ ਜੀ।
ਮੱਠੀਆਂ, ਸਮੋਸੇ ਤੇ ਪਕੌੜੇ ਨਾਲ ਚਟਣੀ ਦੇ,
ਖਾਣ ਪੀਣ ਵਿਚ ਕੋਈ, ਰੱਖਿਉ ਨਾ ਸੰਗ ਜੀ।
ਐਪਲ, ਔਰੰਜ ਚਾਹੇ, ਛਕੋ ਜੀ ਬਨਾਨੇ ਤੁਸੀਂ,
ਖਾਉ ਖ਼ਰਬੂਜ਼ੇ, ਛਕੋ ਮਿੱਠੇ ਮਿੱਠੇ ਅੰਬ ਜੀ।
ਖਾਣ ਪੀਣ ਵਿਚ ਕੋਈ, ਕਮੀ ਜੇ ਨਜ਼ਰ ਆਵੇ,
ਸੰਗਣਾ ਨਈਂ ਮੂਲ਼ੇ, ਸਾਨੂੰ ਦੱਸਿਉ ਨਿਸ਼ੰਗ ਜੀ।
ਸਾਡੀ ਏ ਕਮੇਟੀ ਹੁਣ, ਮੈਂ ਆਂ ਪ੍ਰਧਾਨ ਏਥੇ,
ਖੰਘਣ ਨਈਂ ਦੇਣਾ ਅਸੀਂ, ਕੋਈ ਭਾਈਬੰਦ ਜੀ।
ਉਂਜ ਖਾਉ ਪੀਉ ਮੌਜ ਕਰੋ, ਰੱਜ ਰੱਜ ਗੱਫੇ ਲਾਉ,
ਸ਼ਰਤ ਐ ਏਨੀ ਸਾਡੀ, ਬਸ ਮੂੰਹ ਰੱਖੋ ਬੰਦ ਜੀ।

ਸੇਵੀਆਂ ਤੇ ਖੀਰ, ਖਾਉ ਜ਼ਰਦਾ ਪਲਾਉ ਤੁਸੀਂ,
ਕੀ ਕਿਹੈ ਮਿੱਠਾ ਥੋੜ੍ਹੈ? ਬਈ ਪਾ ਲਉ ਹੋਰ ਖੰਡ ਜੀ।
ਪੰਜ ਪ੍ਰਕਾਰ ਦੇ ਪਰੌਂਠੇ, ਪੱਕਦੇ ਨੇ ਪਹੁ-ਫ਼ੁਟਾਲੇ,
ਰੱਜ ਰੱਜ ਖਾਉ ਏਥੇ, ਨਾਲ਼ ਲੈ ਕੇ ਜਾਉ ਲੰਚ ਜੀ,
ਅੱਧੀ ਰਾਤੀਂ ਕੰਮ ਛੱਡ, ਰੋਟੀ ਖਾਵੋ ਏਥੇ ਆਕੇ,
ਟੱਬਰ ਨੂੰ ਘਰ ਜਾ ਕੇ, ਕਰਨਾ ਨਈਂ ਤੰਗ ਜੀ।
ਰੱਖਣਾ ਇਹ ਯਾਦ, ਚਾਹਟਾ ਵੀ ਛਕਾਂਵਦੇ ਆਂ,
ਕਮੇਟੀ ਦੇ ਖਿਲਾਫ਼ ਕਦੇ, ਪਾੜਿਆ ਜੇ ਸੰਘ ਜੀ।
ਸਾਡੀ ਏ ਕਮੇਟੀ ਹੁਣ, ਮੈਂ ਆਂ ਪ੍ਰਧਾਨ ਏਥੇ,
ਖੰਘਣ ਨਈਂ ਦੇਣਾ ਅਸੀਂ, ਕੋਈ ਭਾਈਬੰਦ ਜੀ।
ਉਂਜ ਖਾਉ ਪੀਉ ਮੌਜ ਕਰੋ, ਰੱਜ ਰੱਜ ਗੱਫੇ ਲਾਉ,
ਸ਼ਰਤ ਐ ਏਨੀ ਸਾਡੀ, ਬਸ ਮੂੰਹ ਰੱਖੋ ਬੰਦ ਜੀ।

ਕਮਰਾ ਤੁਹਾਡੇ ਲਈ, ਬਾਬਿਉ ਹੈ ਖੋਲ੍ਹ ਦਿੱਤਾ,
ਖੋਲ੍ਹੋ ਇਕ ਦੂਜੇ ਨਾਲ, ਦਿਲਾਂ ਵਾਲੀ ਗੰਢ ਜੀ।
ਟੈਲੀ ਦੇਖੋ ਤਾਸ਼ ਖੇਡੋ, ਵੀਡੀਉ ‘ਤੇ ਮੂਵੀ ਲਾਉ,
ਸੁਣੋ ਤੇ ਸੁਣਾਉ, ਬਾਲ੍ਹੋ ਮਾਹੀਏ ਵਾਲੇ ਛੰਦ ਜੀ।
ਪੜ੍ਹੋ ਪੇਪਰ ਪੰਜਾਬੀ, ਚਾਹੇ ਹੋਣ ਅੰਗਰੇਜ਼ੀ,
ਭਾਵੇਂ ਮੰਗਵਾਉ ਤੁਸੀਂ, ਉਰਦੂ ਦਾ ਜੰਗ ਜੀ।
ਕਮੇਟੀ ਦੇ ਖਿਲਾਫ਼ ਕਦੇ, ਕੀਤੀ ਕੋਈ ਚੂੰ ਪੀਂ,
ਕਰ ਦਿਆਂਗੇ ਸਭ ਕੁਝ, ਰਾਤੋ ਰਾਤ ਬੰਦ ਜੀ।
ਸਾਡੀ ਏ ਕਮੇਟੀ ਹੁਣ, ਮੈਂ ਆਂ ਪ੍ਰਧਾਨ ਏਥੇ,
ਖੰਘਣ ਨਈਂ ਦੇਣਾ ਅਸੀਂ, ਕੋਈ ਭਾਈਬੰਦ ਜੀ।
ਉਂਜ ਖਾਉ ਪੀਉ ਮੌਜ ਕਰੋ, ਰੱਜ ਰੱਜ ਗੱਫੇ ਲਾਉ,
ਸ਼ਰਤ ਐ ਏਨੀ ਸਾਡੀ, ਬਸ ਮੂੰਹ ਰੱਖੋ ਬੰਦ ਜੀ।

‘ਖੰਡ ਪਾਠ ਰਖਵਾਉ, ਭਾਵੇਂ ਸੰਪਟ ਲੁਆਉ ਤੁਸੀਂ,
ਲੰਗਰ ਲੁਆਉ ਤੁਸੀਂ, ਭਾਵੇਂ ਤਿੰਨੇ ਡੰਗ ਜੀ।
ਸਾਡੀ ਮਰਯਾਦਾ ਹੋਊ, ਮਰਜ਼ੀ ਵੀ ਸਾਡੀ ਚੱਲੂ,
ਤੁਸੀਂ ਨਹੀਂ ਅੜਾਉਣੀ, ਕਿਸੇ ਗੱਲ ਵਿਚ ਟੰਗ ਜੀ।
ਕੁੱਤੇ ਵਾਲਾ ਪੱਬ, ਮੈਂ ਚਲਾਇਆ ਪੂਰੇ ਬਾਈ ਸਾਲ,
ਸਿੱਖਿਆ ਮੈਂ ਉਥੋਂ, ਹੈ ਚਲਾਉਣਾ ਪਰਬੰਧ ਜੀ।
ਚੁੱਪ ਵੀ ਕਰਾਉਣਾ ਅਸੀਂ, ਚੰਗੀ ਤਰ੍ਹਾਂ ਜਾਣਨੇ ਆਂ,
ਪਾਉਂਗੇ ਜੇ ਬਹੁਤੀ ਤੁਸੀਂ, ਆ ਕੇ ਏਥੇ ਡੰਡ ਜੀ,
ਸਾਡੀ ਏ ਕਮੇਟੀ ਹੁਣ, ਮੈਂ ਆਂ ਪ੍ਰਧਾਨ ਏਥੇ,
ਖੰਘਣ ਨਈਂ ਦੇਣਾ ਅਸੀਂ, ਕੋਈ ਭਾਈਬੰਦ ਜੀ।
ਉਂਜ ਖਾਉ ਪੀਉ ਮੌਜ ਕਰੋ, ਰੱਜ ਰੱਜ ਗੱਫੇ ਲਾਉ,
ਸ਼ਰਤ ਐ ਏਨੀ ਸਾਡੀ, ਬਸ ਮੂੰਹ ਰੱਖੋ ਬੰਦ ਜੀ।

ਰਹਿੰਦਾ ਏ ਧਿਆਨ ਸਾਡਾ, ਗੋਲਕ ‘ਚ ਹਰ ਵੇਲੇ,
ਪਿੰਜਰੇ ‘ਚ ਹੁੰਦਾ ਜਿਵੇਂ, ਤੋਤਾ ਕੋਈ ਬੰਦ ਜੀ।
ਦੀਵੇ ਨਾਲ ਭਾਲ ਕੇ, ਖਜਾਨਚੀ ਬਣਾਇਆ ਅਸੀਂ,
ਗੁਰੂ ਦੀਆਂ ਗੋਲਕਾਂ ਦੇ, ਉਹਨੇ ਚਾੜ੍ਹੇ ਬੜੇ ਚੰਦ ਜੀ।
ਗਿਣੀਆਂ ਨੇ ਬੋਤਲਾਂ, ਤੇ ਡੱਬੀਆਂ ਉਮਰ ਸਾਰੀ,
ਕੀਤੀ ਇਹਨੇ ਬੁੱਧੀ ਉਥੋਂ, ਬੜੀ ਪ੍ਰਚੰਡ ਜੀ।
ਹਿਸਾਬ ਤੇ ਕਿਤਾਬ , ਖ਼ੂਬ ਜਾਣਦੇ ਆਂ ਰੱਖਣਾ,
ਪੁੱਛਣਾ ਨਈਂ ਸਾਨੂੰ ਕੁਛ, ਕਰਨਾ ਨਈਂ ਤੰਗ ਜੀ।
ਸਾਡੀ ਏ ਕਮੇਟੀ ਹੁਣ, ਮੈਂ ਆਂ ਪ੍ਰਧਾਨ ਏਥੇ,
ਖੰਘਣ ਨਈਂ ਦੇਣਾ ਅਸੀਂ, ਕੋਈ ਭਾਈਬੰਦ ਜੀ।
ਉਂਜ ਖਾਉ ਪੀਉ ਮੌਜ ਕਰੋ, ਰੱਜ ਰੱਜ ਗੱਫੇ ਲਾਉ,
ਸ਼ਰਤ ਐ ਏਨੀ ਸਾਡੀ, ਬਸ ਮੂੰਹ ਰੱਖੋ ਬੰਦ ਜੀ।