Main News Page

ਬਲਵਿੰਦਰ ਸਿੰਘ ਰੰਗੀਲੇ ਦੀ ਇਕ ਹੋਰ ਗੱਪ
ਅਖੇ ਪ੍ਰਮਾਤਮਾ ਨੇ ਕਾਰੀਗਰ ਦਾ ਰੂਪ ਧਾਰ ਕੇ ਮਕਾਨ ਬਣਾ ਦਿਤਾ ਤੇ ਕਬੀਰ ਜੀ ਦਾ ਰੂਪ ਧਾਰ ਕੇ ਲੰਗਰ ਲਾ ਦਿਤੇ

* ਅਜਿਹੀਆਂ ਗੱਪਾਂ ਲਈ ਸਿੱਖ ਧਰਮ ਵਿਚ ਕੋਈ ਥਾਂ ਨਹੀਂ - ਭਾਈ ਹਰਜੀਤ ਸਿੰਘ

ਯੂ ਟਿਊਬ ਤੇ ਪਈ ਵੀਡੀਉ ਵਿਚ ਇਸ ਰਾਗੀ ਵਲੋ ਗੁਰਮਤਿ ਸਿਧਾਤਾਂ ਤੋ ਦੂਰ ਜਾ ਕੇ ਇਕ ਕਹਾਣੀ ਸੁਣਾਈ ਗਈ ਹੈ ਜਿਸ ਮੁਤਾਬਕ ਭਗਤ ਕਬੀਰ ਜੀ ਦੇ ਬਹੁਤ ਦੁਸ਼ਮਨ ਸਨ ਤੇ ਇਕ ਵਾਰ ਉਨਾਂ ਨੇ ਬਨਾਰਸ ਸ਼ਹਿਰ ਵਿਚ ਢੰਡੋਰਾ ਪਿਟਵਾ ਦਿਤਾ ਕਿ ਕਬੀਰ ਦੇ ਘਰ ਲੰਗਰ ਲਾਏ ਜਾਣਗੇ ਤੇ ਦੋ ਦੋ ਸੋਨੇ ਦੀਆਂ ਮੋਹਰਾਂ ਵੀ ਦਿਤੀਆਂ ਜਾਣਗੀਆਂ। ਭੰਡਾਰੇ ਦਾ ਸਾਰਿਆਂ ਨੂੰ ਖੁੱਲਾ ਸੱਦਾ ਹੈ। ਭਗਤ ਜੀ ਨੂੰ ਇਸ ਗੱਲ ਦਾ ਜਦੋ ਪਤਾ ਲੱਗਾ ਤਾਂ ਉਹ ਘਰ ਦੇ ਪਿਛਲੇ ਦਰਵਾਜਿਉਂ ਬਾਹਰ ਨਿਕਲ ਕੇ ਜੰਗਲ ਵਿਚ ਚਲੇ ਗਏ। ਇਸ ਤੇ ਪ੍ਰਮਾਤਮਾ ਨੇ ਭਗਤ ਕਬੀਰ ਦਾ ਰੂਪ ਧਾਰਨ ਕਰ ਲਿਆ ਤੇ ਗੱਡੇ ਭਰ ਕੇ ਰਾਸ਼ਨ ਆ ਗਿਆ ਤੇ ਦੇਖਦੇ ਹੀ ਦੇਖਦੇ ਚਾਹ, ਪਕੋੜੇ, ਜਲੇਬੀਆਂ ਆਦਿ ਦੇ ਲੰਗਰ ਲੱਗ ਗਏ। ਜਦੋ ਭਗਤ ਕਬੀਰ ਜੀ ਵਾਪਸ ਆਏ ਤਾਂ ਪ੍ਰਮਾਤਮਾ ਨੇ ਕਿਹਾ ਕਿ ਮੈ ਸਾਰਾ ਦਿਨ ਤੇਰੀ ਡਿਊਟੀ ਨਿਭਾਈ ਹੈ ਹੁਣ ਤੂੰ ਸੰਭਾਲ।

ਰਾਗੀ ਨੇ ਹੋਰ ਕਹਾਣੀ ਸੁਨਾਉਂਦਿਆਂ ਕਿਹਾ ਕਿ ਇਕ ਵਾਰ ਭਗਤ ਨਾਮਦੇਵ ਜੀ ਦੇ ਘਰ ਨੂੰ ਅੱਗ ਲਗ ਗਈ। ਨੇੜਲੇ ਲੋਕ ਅੱਗ ਬੁਝਾਉਣ ਲਗ ਪਏ ਤੇ ਘਰ ਦਾ ਸਮਾਨ ਬਾਹਰ ਕੱਢਣ ਲਗ ਪਏ। ਪਰ ਜਦੋ ਨਾਮਦੇਵ ਜੀ ਆਏ ਤਾਂ ਉਨਾਂ ਘਰੋ ਬਾਹਰ ਕੱਢਿਆ ਸਮਾਨ ਫਿਰ ਅੱਗ ਵਿਚ ਸੁੱਟ ਦਿਤਾ। ਉਨਾਂ ਦੀ ਘਰਵਾਲੀ ਨੇ ਕਿਹਾ ਕਿ ਸਾਡੇ ਕੋਲ ਇਕ ਸੂਤ ਦਾ ਥਾਨ ਬਚਿਆ ਹੈ ਉਹ ਵੇਚ ਕੇ ਬੱਚਿਆਂ ਲਈ ਰੋਟੀ ਲੈ ਆਉ। ਜਦੋ ਨਾਮਦੇਵ ਜੀ ਬਜਾਰ ਗਏ ਤਾਂ ਪ੍ਰਮਾਤਮਾ ਨੇ ਗਰੀਬ ਦਾ ਰੂਪ ਧਾਰ ਕੇ ਉਹ ਥਾਨ ਮੰਗ ਲਿਆ ਤੇ ਨਾਮਦੇਵ ਜੀ ਥਾਨ ਦੇ ਕੇ ਜੰਗਲ ਵਿਚ ਚਲੇ ਗਏ। ਰੱਬ ਨੇ ਕਾਰੀਗਰ ਦਾ ਰੂਪ ਧਾਰਿਆ ਤੇ ਭਗਤ ਨਾਮਦੇਵ ਜੀ ਦਾ ਘਰ ਬਣਾ ਦਿਤਾ। ਦਿਨ ਚੜਦੇ ਲੋਕ ਨਵਾਂ ਮਕਾਨ ਦੇਖ ਕੇ ਹੈਰਾਨ ਹੋ ਗਏ।

ਇਸ ਬਾਰੇ ਸਿੱਖ ਫੁਲਵਾੜੀ ਦੇ ਸੰਪਾਦਕ ਭਾਈ ਹਰਜੀਤ ਸਿੰਘ ਨੇ ਕਿਹਾ ਕਿ ਇਹੋ ਜਿਹੀਆਂ ਗੱਪਾਂ ਲਈ ਸਿੱਖ ਧਰਮ ਵਿਚ ਕੋਈ ਥਾਂ ਨਹੀਂ। ਉਨਾਂ ਕਿਹਾ ਕਿ ਸਿੱਖ ਧਰਮ ਵਿਗਿਆਨਕ ਯੁੱਗ ਦਾ ਧਰਮ ਹੈ ਤੇ ਕਰਾਮਾਤਾਂ ਦਾ ਇਸ ਨਾਲ ਕੋਈ ਸਬੰਧ ਨਹੀਂ। ਉਨਾਂ ਕਿਹਾ ਕਿ ਸੰਗਤਾਂ ਨੂੰ ਇਸ ਬਾਰੇ ਸੁਚੇਤ ਹੋਣਾ ਚਾਹੀਦਾ ਹੈ ਤੇ ਆਪਣੇ ਸਮਾਗਮਾਂ ਵਿਚ ਕੇਵਲ ਉਨਾਂ ਰਾਗੀ,ਪ੍ਰਚਾਰਕਾਂ ਨੂੰ ਹੀ ਬੁਲਾਉਣਾ ਚਾਹੀਦਾ ਹੈ ਜੋ ਗੁਰਮਤਿ ਸਿਧਾਤਾਂ ਤੇ ਸ਼੍ਰੀ ਅਕਾਲ ਤਖਤ ਸਾਹਿਬ ਦੀ ਰਹਿਤ ਮਰਯਾਦਾ ਮੁਤਾਬਕ ਹੀ ਧਰਮ ਪ੍ਰਚਾਰ ਕਰਦੇ ਹੋਣ।