ਨਵੀਂ ਦਿੱਲੀ, 19 ਅਪ੍ਰੈਲ (ਅਮਨਦੀਪ ਸਿੰਘ/ਸੁਖਰਾਜ
ਸਿੰਘ) : ਵੱਖ-ਵੱਖ ਸਿੱਖ ਜਥੇਬੰਦੀਆਂ ਵਲੋਂ ਪ੍ਰੋ. ਦੇਵਿੰਦਰਪਾਲ ਸਿੰਘ ਭੁੱਲਰ ਦੀ ਫਾਂਸੀ
ਮੁਆਫ਼ੀ ਲਈ ਪੰਜਾਬ ਭਰ ਵਿਚੋਂ ਕਰਵਾਏ ਗਏ ਲੱਖਾਂ ਲੋਕਾਂ ਦੇ ਦਸਤਖ਼ਤਾਂ ਵਾਲੀ ਪਟੀਸ਼ਨ ਅੱਜ
ਰਾਸ਼ਟਰਪਤੀ ਭਵਨ ਨੂੰ ਸੌਂਪ ਕੇ ਪ੍ਰੋ. ਭੁੱਲਰ ਦੀ ਫਾਂਸੀ ਬਾਰੇ ਰਾਸ਼ਟਰਪਤੀ ਨੂੰ
ਮੁੜ-ਵਿਚਾਰ ਕਰਨ ਦੀ ਅਪੀਲ ਕੀਤੀ ਗਈ। ਫ਼ਤਿਹਗੜ੍ਹ ਸਾਹਿਬ ਤੋਂ ਦਿੱਲੀ ਪੁੱਜੇ ਇਨਸਾਫ਼ ਮਾਰਚ
ਦੇ ਕਾਫ਼ਲੇ ਨੂੰ ਸੁਰੱਖਿਆ ਮੁਲਾਜ਼ਮਾਂ ਨੇ ਪਾਰਲੀਮੈਂਟ ਥਾਣੇ ਕੋਲ ਹੀ ਰੋਕ ਲਿਆ।
ਇਸ ਤੋਂ
ਪਹਿਲਾਂ ਮਾਰਚ ਵਿਚ ਸ਼ਾਮਲ ਸੈਂਕੜੇ ਸਿੰਘਾਂ-ਸਿੰਘਣੀਆਂ ਨੇ ਇਤਿਹਾਸਕ ਗੁਰਦਵਾਰਾ ਬੰਗਲਾ
ਸਾਹਿਬ ਵਿਖੇ ਪ੍ਰੋ. ਭੁੱਲਰ ਦੀ ਫਾਂਸੀ ਮੁਆਫ਼ੀ ਲਈ ਗੁਰੂ ਗ੍ਰੰਥ ਸਾਹਿਬ ਦੇ ਸਨਮੁਖ ਅਰਦਾਸ
ਕੀਤੀ। ਮਾਰਚ ਪੂਰੀ ਤਰ੍ਹਾਂ ਸ਼ਾਂਤਮਈ ਰਿਹਾ। ਮਾਰਚ ਵਿਚ ਸ਼ਾਮਲ ਸਿੱਖ 'ਸਿਆਸੀ ਕਤਲ ਬੰਦ ਕਰੋ',
'ਪ੍ਰੋ. ਭੁੱਲਰ ਨੂੰ ਰਿਹਾਅ ਕਰੋ' ਦੇ ਜ਼ੋਰਦਾਰ ਨਾਹਰੇ ਲਗਾ ਰਹੇ ਸਨ। ਇਕ ਵਫ਼ਦ ਨੇ
ਰਾਸ਼ਟਰਪਤੀ ਭਵਨ ਵਿਖੇ ਲੱਖਾਂ ਦਸਤਖ਼ਤਾਂ ਵਾਲੇ ਬੰਡਲ ਤੇ 8 ਹਜ਼ਾਰ ਪੰਚਾਇਤਾਂ ਵਲੋਂ ਪਾਸ
ਕੀਤੇ ਗਏ ਮਤਿਆਂ ਵਾਲੀ ਪਟੀਸ਼ਨ ਸੌਂਪੀ।
ਪੱਤਰਕਾਰ ਜਰਨੈਲ ਸਿੰਘ ਨੇ ਕਿਹਾ ਕਿ ਸਰਕਾਰ ਸਿਰਫ਼ ਪ੍ਰੋ. ਭੁੱਲਰ
ਨੂੰ ਨਹੀਂ ਬਲਕਿ ਇਨਸਾਫ਼ ਨੂੰ ਫਾਂਸੀ 'ਤੇ ਟੰਗਣ ਦੀਆਂ ਤਿਆਰੀਆਂ ਕਰ ਰਹੀ ਹੈ ਜਿਸ ਨੂੰ
ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਬਾਬਾ ਬਲਜੀਤ ਸਿੰਘ ਦਾਦੂਵਾਲ, ਖ਼ਾਲਸਾ ਐਕਸ਼ਨ ਕਮੇਟੀ ਦੇ ਆਗੂ
ਭਾਈ ਮੋਹਕਮ ਸਿੰਘ, ਆਲ ਇੰਡੀਆ ਸਿੱਖ ਸਟੂਡੈਂਟਸ ਫ਼ੈਡਰੇਸ਼ਨ ਦੇ ਪ੍ਰਧਾਨ ਸ.ਕਰਨੈਲ ਸਿੰਘ
ਪੀਰ ਮੁਹੰਮਦ, ਭਾਈ ਬਲਦੇਵ ਸਿੰਘ ਸਿਰਸਾ, ਸ. ਗੁਰਿੰਦਰਪਾਲ ਸਿੰਘ ਧਨੌਲਾ, ਦਿੱਲੀ ਕਮੇਟੀ
ਦੇ ਜਨਰਲ ਸਕੱਤਰ ਸ. ਮਨਜਿੰਦਰ ਸਿੰਘ ਸਿਰਸਾ, ਭਾਈ ਪਰਮਜੀਤ ਸਿੰਘ ਰਾਣਾ ਤੇ ਹੋਰ
ਜਥੇਬੰਦੀਆਂ ਦੇ ਨੁਮਾਇੰਦੇ ਵੀ ਇਸ ਮਾਰਚ ਵਿਚ ਸ਼ਾਮਲ ਸਨ।
