E-Mail:
jsjodhpuri@yahoo.com
ਮਨਦੀਪ ਸੁੱਜੋਂ ਦੀ ਕਵਿਤਾ 'ਧਰਮ' ਦੇ ਜਵਾਬ ਵਿੱਚ
ਬੇਧਰਮੇ - ਬੇਅਣਖੇ ਹੋ ਗਏ,
ਲੁੱਟਦੇ ਪਏ ਰਾਹਗੀਰਾਂ ਨੂੰ ।
ਡਾਕੇ ਮਾਰਨ ਸਿੱਖਰ ਦੁਪਹਿਰੇ,
ਸਮਝਣ ਜਿਵੇਂ ਬਾਪ ਦੀਆਂ ਜਗੀਰਾਂ ਨੂੰ ।
ਬੇਪੱਤ ਕਰਦੇ ਰਾਹ ਜਾਂਦੀਆਂ ਨੂੰ,
ਸਾਹਿਬਾਂ, ਸੱਸੀਆਂ, ਹੀਰਾਂ ਆਖਕੇ,
ਮਾਂ ਦੀਆਂ ਜਾਈਆਂ ਧੀਆਂ ਨੂੰ ।
ਬੱਸਾਂ ਦੇ ਵਿੱਚ ਦਿਨ ਦਿਹਾੜੇ ਲੁੱਟਦੇ ਪੱਤਾਂ,
ਕਤਲ ਕਰ ਦਿੰਦੇ ਦੇ ਕੇ ਕਸ਼ਟ ਸਰੀਰਾਂ ਨੂੰ ।
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!?
ਧੀਆਂ ਨੂੰ ਪਏ 'ਪੁਰਜੇ' ਦੱਸਦੇ,
ਕਹਿਣ 'ਪਟੋਲੇ' ਤੋਂ ਨਹੀਂ ਸੰਗਦੇ,
ਇਹ ਵੀਰਾਂ ਦੀਆਂ ਭੈਣਾਂ ਨੂੰ ।
ਲੱਚਰਤਾ ਏਨ੍ਹਾਂ ਏਨੀ ਫੈਲਾਈ,
ਸ਼ਰਮ ਆਵੇ ਟੀਵੀ ਦੀਆਂ ਤਸਵੀਰਾਂ ਨੂੰ ।
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!?
ਨਸ਼ਿਆਂ ਨੇ ਮੱਤ ਐਸੀ ਮਾਰੀ,
ਰਿਹਾ ਸਤਿਕਾਰ ਨਾ ਭੈਣਾਂ - ਭਾਈਆਂ ਦਾ ।
ਮਾਂ - ਬਾਪ ਨੂੰ ਠੁੱਡੇ ਮਾਰਨ,
ਜਾਇਦਾਦ ਲਈ ਕਤਲ ਕਰ ਜਾਵਣ,
ਧਾਰਿਆ ਰੂਪ ਕਸਾਈਆਂ ਦਾ ।
ਸ਼ਰਮ - ਹਯਾ ਨੂੰ ਛਿੱਕੇ ਟੰਗਕੇ,
ਉਪਦੇਸ਼ ਕੀ ਦੇਣਾ ਦੁਨੀਆਂ ਨੂੰ !
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!?
ਬੇਧਰਮੇ ਲਈ ਜੇਲ੍ਹ ਕੀ ਕਰਲੂ !
ਜੇਲਰ ਦਾ ਉਪਦੇਸ਼ ਕੀ ਕਰਲੂ !
ਜੇ ਬੇਧਰਮੇ ਨੇ ਅਮਲ ਨਹੀਂ ਕਰਨਾ,
ਅਮਲਾਂ ਬਾਜੋਂ ਨਹੀਂਓ ਸਰਨਾ,
ਰੱਖਿਓ ਯਾਦ ਗੁਰੂ - ਪੀਰਾਂ ਦੇ ਬੋਲਾਂ ਨੂੰ ।
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!?
|
ਜੇਲਰ
ਦਾ ਕੰਮ ਹੋਕਾ ਦੇਣਾ,
ਕਿ ਭਾਈ ਰਲ ਮਿਲਕੇ ਰਹਿਣਾ,
ਜੇ ਚਾਹੁੰਦੇ ਹੋ "ਬੇਗਮ ਪੁਰਾ" ਵਸਾਉਣਾ ।
"ਬੇਗਮ ਪੁਰਾ ਸਹਰ ਕੋ ਨਾਉ ॥
ਦੂਖੁ ਅੰਦੋਹੁ ਨਹੀ ਤਿਹਿ ਠਾਉ ॥"
ਦੋਸ਼ ਨਾ ਦੇਣਾ ਮੁੜਕੇ ਕੱਲ੍ਹ ਨੂੰ,
ਲੇਖ ਦੀਆਂ ਲਕੀਰਾਂ ਨੂੰ,
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!?
ਬੇਧਰਮੇ ਹੀ ਸਤਾ ਤੇ ਭਾਰੂ,
ਬਣਾਉਂਦੇ ਨੀਤੀ ਨਿੱਤ ਹੀ ਮਾਰੂ,
ਦੱਸੋ ਹੁਣ ਡੁੱਬਦੇ ਨੂੰ ਕੌਣ ਤਾਰੂ ?
ਅਣਖਾਂ ਵਾਲੇ ਤਰ ਜਾਵਣਗੇ,
'ਵਰਦੀ' ਸਣੇ ਹੀ ਮਰ ਜਾਵਣਗੇ,
ਮੌਤ ਵੀ ਹਾਰਕੇ ਇਹੀ ਕਹੇਗੀ,
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!?
ਸਾਡਾ ਬਾਪੂ ਕਹਿੰਦਾ ਸਾਨੂੰ,
"ਰਾਜ ਬਿਨਾ ਨਹਿ ਧਰਮ ਚਲੇ ਹੈਂ ॥
ਧਰਮ ਬਿਨਾ ਸਭ ਦਲੇ ਮਲੇ ਹੈਂ ॥"
"ਕੋਊ ਕਿਸੀ ਕੋ ਰਾਜ ਨਾ ਦੇਹਿ ਹੈਂ ॥
ਜੋ ਲੇਹਿ ਹੈ ਨਿਜ ਬਲ ਸੇ ਲੇਹਿ ਹੈਂ ॥"
ਮੰਨਕੇ ਆਪਣੇ ਬਾਪੂ ਦਾ ਕਹਿਣਾ,
ਤੁਰ ਪਏ ਘਰੋਂ ਲੈਣ ਇਹ ਗਹਿਣਾ,
ਰਸਤੇ ਲਗਦੇ ਕਠਨ ਬੜੇ ਨੇ,
ਪੈਰ - ਪੈਰ ਤੇ ਚੋਰ ਖੜ੍ਹੇ ਨੇ,
ਕਠਿਨਾਈਆਂ ਨੂੰ ਜਰ ਜਾਵਾਂਗੇ,
ਗਿੱਚੀਓਂ ਚੋਰ ਨੂੰ ਫੜ੍ਹ ਲਵਾਂਗੇ ।
ਫੜ੍ਹਕੇ ਉਹਨੂੰ ਇਹੀ ਕਹਾਂਗੇ,
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!?
ਧਰਮ ਦੀ ਸਮਝ ਬੇਧਰਮੇ ਨੂੰ ਛੇਤੀ ਪੈ ਨਹੀਂ ਸਕਦੀ,
ਪੈ ਜਾਏ ਜੇ ਸਮਝ, ਸੱਚ - ਹੱਕ ਦੇ ਲਈ ਲੜ੍ਹਣ ਦੀ,
ਦੁਨੀਆਂ ਦੀ ਤਾਕਤ ਉਸ ਨੂੰ ਫਿਰ ਝੁਕਾ ਨਹੀਂ ਸਕਦੀ ।
'ਜੋਧਪੁਰੀ' ਕਹੇ ਕਰੋ ਪਹਿਚਾਣ ਸਾਰੇ,
ਆਪਣੇ ਹੀ ਅੰਦਰ ਛੁਪੇ ਸੱਚ ਦੀ ।
ਕਹਿਣਾ ਨਾ ਪਵੇ ਫੇਰ ਕਿਸੇ ਨੂੰ,
ਬੇਧਰਮੇ ਮਾਰ ਮੜਾਸੇ ਬਹਿ ਗਏ,
ਕੀ ਕਹੀਏ, ਮਰੀਆਂ ਪਈਆਂ ਜ਼ਮੀਰਾਂ ਨੂੰ ?!?!? |