* ਕੁਲਦੀਪ ਸਿੰਘ ਸਖਤ ਤੇ ਪ੍ਰੋ.
ਘੱਗਾ ਉਪਰ ਬਣਾਇਆ ਕੇਸ ਅਤੇ ਦਾਦੂਵਾਲ ਦੇ ਦੀਵਾਨਾਂ ’ਤੇ ਲਗਾਈ ਪਾਬੰਦੀ ਸਿੱਧ ਕਰਦੀ ਹੈ,
ਕਿ ਬਾਦਲ ਸਰਕਾਰ ਅਜਿਹੀਆਂ ਕਾਰਵਾਈਆਂ ਕਰਕੇ ਪੰਥ ਵਿਰੋਧੀ, ਕਾਤਲ ਤੇ ਬਲਾਤਕਾਰੀ ਡੇਰੇਦਾਰਾਂ
ਤੇ ਫਿਰਕਾਪ੍ਰਸਤ ਹਿੰਦੂਆਂ ਦੀਆਂ ਵੋਟਾਂ ਬਟੋਰਨ ਦੇ ਯਤਨ ਵਿੱਚ ਹੈ
ਬਠਿੰਡਾ
7 ਸਤੰਬਰ (ਕਿਰਪਾਲ ਸਿੰਘ): ਗਿਆਨੀ ਕੁਲਦੀਪ ਸਿੰਘ ਸਖਤ ਅਤੇ ਪ੍ਰੋ. ਘੱਗਾ ਉੱਪਰ ਧਾਰਾ
295ਏ ਅਧੀਨ ਦਰਜ ਕੀਤਾ ਕੇਸ ਅਤੇ ਬਾਬਾ ਦਾਦੂਵਾਲ ਦੇ ਦੀਵਾਨਾਂ ’ਤੇ ਜਿਲ੍ਹਾ ਬਠਿੰਡਾ
ਪ੍ਰਸ਼ਾਸ਼ਨ ਵੱਲੋਂ ਲਗਾਈ ਗਈ ਪਾਬੰਦੀ ਸਿੱਧ ਕਰਦੀ ਹੈ, ਕਿ ਬਾਦਲ ਸਰਕਾਰ ਅਜਿਹੀਆਂ ਕਾਰਵਾਈਆਂ
ਕਰਕੇ ਪੰਥ ਵਿਰੋਧੀ, ਕਾਤਲ ਤੇ ਬਲਾਤਕਾਰੀ ਡੇਰੇਦਾਰਾਂ ਤੇ ਫਿਰਕਾਪ੍ਰਸਤ ਹਿੰਦੂਆਂ ਦੀ ਵੋਟਾਂ
ਬਟੋਰਨ ਦੇ ਯਤਨ ਵਿੱਚ ਹੈ।
ਇਹ ਸ਼ਬਦ, ਪੰਜਾਬ ਸਰਕਾਰ ਵੱਲੋਂ ਸਿੱਖੀ ਪ੍ਰਚਾਰ ਨੂੰ ਰੋਕਣ ਲਈ ਧਾਰਾ
295-ਏ ਦੀ ਹੋ ਰਹੀ ਦੁਰਵਰਤੋਂ ਦੇ ਵਿਰੋਧ ਵਿੱਚ 4 ਸਤੰਬਰ ਨੂੰ ਬਠਿੰਡੇ ਵਿਖੇ ਰਾਜਨੀਤਕ,
ਸਮਾਜਿਕ, ਧਾਰਮਿਕ, ਮੁਲਾਜ਼ਮ ਤੇ ਪ੍ਰਚਾਰਕ ਸਿੱਖ ਜਥੇਬੰਦੀਆਂ ਅਤੇ ਸਿੱਖ ਸੰਪਰਦਾਵਾਂ ਦੇ
ਮੁਖੀਆਂ ਦੀ ਹੋਈ ਭਰਵੀਂ ਇਕਤ੍ਰਤਾ ਵਿੱਚ 29 ਸਿੱਖ ਜਥੇਬੰਦੀਆਂ ਦੀ ਬਣਾਈ ਗਈ ਇੱਕ ਸਾਂਝੀ
ਤਾਲਮੇਲ ਕਮੇਟੀ ਦੇ ਮੈਂਬਰਾਂ ਨੇ ਇੱਕ ਸਾਂਝੇ ਬਿਆਨ ਵਿੱਚ ਕਹੀ। ਇਸ ਕਮੇਟੀ ਨੇ ਰਾਮਪੁਰਾ
ਫੂਲ ਦੇ ਇੱਕ ਹਿੰਦੂ ਸਗੰਠਨ ਵੱਲੋਂ ਕੁੱਤੇ ਦੀ ਫੋਟੋ ’ਤੇ ਪ੍ਰੋ. ਇੰਦਰ ਸਿੰਘ ਘੱਗਾ ਦਾ
ਮੂੰਹ ਲਾ ਕੇ ਕੀਤੀ ਰੋਸ ਰੈਲੀ ਅਤੇ ਬਰਨਾਲੇ ਵਿੱਚ ਮਚਾਏ ਹੜਦੰਗ ਦੀ ਜ਼ੋਰਦਾਰ ਨਿਖੇਧੀ ਕੀਤੀ
ਹੈ।
ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਦੇ ਇਲਾਕੇ ਵਿੱਚ ਪਿੰਡ ਤਿਊਣਾ ਪੁਜਾਰੀਆਂ
ਵਿਖੇ ਬਾਬਾ ਦਾਦੂਵਾਲ ਦੇ ਪ੍ਰੋਗਰਾਮਾਂ ’ਤੇ ਲਾਈ ਪਾਬੰਦੀ ਨੂੰ ਵੀ ਗੰਭੀਰਤਾ ਨਾਲ ਲਿਆ
ਹੈ। ਤਾਲਮੇਲ ਕਮੇਟੀ ਦੇ ਮੁਖੀ ਆਗੂ ਗੁਰਦੀਪ ਸਿੰਘ ਬਰਾੜ ਬਠਿੰਡਾ, ਯੂਨਾਈਟਿੱਡ ਸਿੱਖ
ਮੂਵਮੈਂਟ ਦੇ ਮੁਖੀ ਭਾਈ ਮੋਹਕਮ ਸਿੰਘ, ਪੰਚ ਪ੍ਰਧਾਨੀ ਦੇ ਬਾਬਾ ਹਰਦੀਪ ਸਿੰਘ, ਸਿੱਖ
ਮਿਸ਼ਨਰੀ ਜਥੇਬੰਦੀਆਂ ਦੇ ਨੁਮਾਇੰਦੇ ਗਿਆਨੀ ਜਗਤਾਰ ਸਿੰਘ ਜਾਚਕ ਤੇ ਪ੍ਰੋ. ਹਰਜਿੰਦਰ ਸਿੰਘ
ਸਭਰਾਅ, ਬਾਬਾ ਬਲਜੀਤ ਸਿੰਘ ਦਾਦੂਵਾਲ, ਭਾਈ ਪੰਥਪ੍ਰੀਤ ਸਿੰਘ, ਗੁਰਦੁਆਰਾ ਕਮੇਟੀਆਂ ਦੇ
ਨੁਮਾਇੰਦੇ ਨੱਥਾ ਸਿੰਘ ਨਰੂਆਣਾ, ਲੋਕ ਜਨ ਸ਼ਕਤੀ ਪੰਜਾਬ ਦੇ ਪ੍ਰਧਾਨ ਕਿਰਨਜੀਤ ਸਿੰਘ ਗਹਿਰੀ,
ਸ਼੍ਰੋਮਣੀ ਅਕਾਲੀ ਦਲ (ਅ) ਦੇ ਜਿਲ੍ਹਾ ਬਠਿੰਡਾ ਪ੍ਰਧਾਨ ਪਰਮਿੰਦਰ ਸਿੰਘ ਬਾਲਿਆਂਵਾਲੀ,
ਸ਼ਹਿਰੀ ਪ੍ਰਧਾਨ ਹਰਫੂਲ ਸਿੰਘ, ਏਕਸ ਕੇ ਬਾਰਿਕ ਜਥੇਬੰਦੀ ਬਠਿੰਡਾ ਇਕਾਈ ਦੇ ਪ੍ਰਧਾਨ
ਮਹਿੰਦਰ ਸਿੰਘ, ਮੁਲਾਜ਼ਮ ਜਥੇਬੰਦੀਆਂ ਦੇ ਨੁਮਾਇੰਦੇ ਬਲਜੀਤ ਸਿੰਘ ਬਰਾੜ, ਕਿਰਪਾਲ ਸਿੰਘ
ਬਠਿੰਡਾ ਅਤੇ ਅਕਾਲ ਸਹਾਇ ਜਥੇਬੰਦੀ ਦੇ ਕੌਮੀ ਪ੍ਰਧਾਨ ਭਾਈ ਦਰਸ਼ਨ ਸਿੰਘ ਘੋਲੀਆ ਨੇ ਇੱਕ
ਸਾਂਝੇ ਬਿਆਨ ਵਿੱਚ ਕਿਹਾ ਹੈ ਕਿ ਜਦੋਂ ਪ੍ਰੋ. ਘੱਗੇ ਦਾ ਕੇਸ ਅਦਾਲਤ ਵਿੱਚ ਹੈ, ਤਾਂ ਇੱਕ
ਅੰਮ੍ਰਿਤਧਾਰੀ ਸਿੱਖ ਵਿਦਵਾਨ ਦਾ ਇਸ ਤਰ੍ਹਾਂ ਅਪਮਾਨ ਕਰਨਾ ਤਾਂ ਅਦਾਲਤ ਦੀ ਮਾਨਹਾਨੀ ਤੇ
ਸਿੱਖ ਕੌਮ ਨੂੰ ਚੈਲੰਜ ਕਰਨ ਵਾਲੀ ਘਟਨਾ ਹੈ।
ਉਨ੍ਹਾਂ ਕਿਹਾ ਪੁਲੀਸ ਪ੍ਰਸ਼ਾਸਨ ਨੂੰ ਚਾਹੀਦਾ ਹੈ ਕਿ ਅਜਿਹੇ ਭੈੜੇ
ਅਨੁਸਰਾਂ ਵਿਰੁਧ ਕੇਸ ਦਰਜ ਕੇ ਜੇਲ੍ਹ ਵਿੱਚ ਸੁੱਟੇ, ਤਾਂ ਕਿ ਪੰਜਾਬ ਦੇ ਸ਼ਾਂਤਮਈ ਮਹੌਲ
ਨੂੰ ਵਿਗੜਨ ਤੋਂ ਬਚਾਇਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ 11 ਸਤੰਬਰ ਦੀ ਬਠਿੰਡੇ ਵਿੱਚ ਹੋਣ
ਵਾਲੀ ਸਿੱਖ ਜਥੇਬੰਦੀਆਂ ਦੀ ਮੀਟਿੰਗ ਵਿੱਚ ਇਸ ਘਟਨਾ ਨੂੰ ਗੰਭੀਰਤਾ ਨਾਲ ਵਿਚਾਰਿਆ ਜਾਏਗਾ।
ਕਿਉਂਕਿ ਗਿਆਨੀ ਕੁਲਦੀਪ ਸਿੰਘ ਸਖਤ ’ਤੇ ਪ੍ਰੋ. ਘੱਗਾ ਉਪਰ ਬਣਾਇਆ ਕੇਸ ਅਤੇ ਦਾਦੂਵਾਲ ਦੇ
ਦੀਵਾਨਾਂ ਤੇ ਲਗਾਈ ਪਾਬੰਦੀ ਸਿੱਧ ਕਰਦੀ ਹੈ ਕਿ ਬਾਦਲ ਸਰਕਾਰ ਅਜਿਹੀਆਂ ਕਾਰਵਾਈਆਂ ਕਰਕੇ
ਪੰਥ ਵਿਰੋਧੀ, ਕਾਤਲ ਤੇ ਬਲਾਤਕਾਰੀ ਡੇਰੇਦਾਰਾਂ ਤੇ ਫਿਰਕਾਪ੍ਰਸਤ ਹਿੰਦੂਆਂ ਦੀ ਵੋਟਾਂ
ਬਟੋਰਨ ਦੇ ਯਤਨ ਵਿੱਚ ਹੈ। ਕਿਉਂਕਿ, ਬਾਦਲ ਕੇ ਸਮਝਦੇ ਹਨ ਕਿ ਸਿੱਖਾਂ ਨੇ ਤਾਂ ਪੰਥ ਦੇ
ਨਾਂ ਵੋਟਾਂ ਪਾ ਹੀ ਦੇਣੀਆਂ ਹਨ, ਬਾਕੀਆਂ ਨੂੰ ਖੁਸ਼ ਕਰ ਲਓ। ਇਸ ਲਈ ਸਿੱਖੀ ਨੂੰ ਬਚਾਉਣ
ਲਈ ਹੁਣ ਸਮਾਂ ਹੈ ਪੰਥ ਨੂੰ ਬਾਦਲ ਅਕਾਲੀ ਦਲ ਨਾਲੋਂ ਨਿਖੇੜ ਕੇ ਵੇਖਣ ਦਾ।