ਅੰਮ੍ਰਿਤਸਰ
10 ਸਤੰਬਰ (ਜਸਬੀਰ ਸਿੰਘ) ਸ਼੍ਰੋਮਣੀ ਅਕਾਲੀ ਦਲ (ਪੰਚ ਪ੍ਰਧਾਨੀ) ਦੇ ਮੀਤ ਪ੍ਰਧਾਨ ਸ੍ਰੀ
ਬਲਦੇਵ ਸਿੰਘ ਸਿਰਸਾ ਨੇ ਉ¤ਤਰ ਪ੍ਰਦੇਸ਼ ਦੇ ਸ਼ਹਿਰ ਮੁਜੱਫਰਨਗਰ ਵਿੱਚ ਦੋ ਸੰਪਰਦਾਵਾਂ ਵਿੱਚ
ਹੋਈਆਂ ਫਿਰਕੂ ਖੂਨੀ ਝੜਪਾਂ ਨੂੰ ਮੰਦਭਾਗਾ ਕਰਾਰ ਦਿੰਦਿਆਂ ਕਿਹਾ ਕਿ ਸਿਆਂਸੀ ਆਂਗੂ ਚੋਣਾਂ
ਦਾ ਲਾਹਾ ਲੈਣ ਲਈ ਹੀ ਅਜਿਹੀਆਂ ਸਮਾਜ ਵਿਰੋਧੀ ਹਰਕਤਾਂ ਅੰਜਾਮ ਦਿੰਦੇ ਹਨ।
ਜਾਰੀ ਇੱਕ ਬਿਆਨ ਰਾਹੀਂ ਸ੍ਰ. ਸਿਰਸਾ ਨੇ ਕਿਹਾ, ਕਿ ਦੇਸ ਵਿੱਚ
ਵਾਪਰ ਰਹੀਆਂ ਅਜਿਹੀਆਂ ਘਟਨਾਵਾਂ ਜਿਥੇ ਮਨੁੱਖਤਾ ਲਈ ਹਾਨੀਕਾਰਕ ਹਨ, ਉਥੇ ਸਮਾਜ ਵਿੱਚ ਵੀ
ਅਸਾਵਾਂਪਨ ਪੈਦਾ ਕਰਦੀਆਂ ਹਨ। ਉਹਨਾਂ ਕਿਹਾ ਕਿ ਇੱਕ ਮਾਮੂਲੀ ਝਗੜੇ ਨੂੰ ਦੋ ਧਰਮਾਂ ਦੇ
ਲੋਕਾਂ ਦਾ ਮਾਮਲਾ ਬਣਾ ਕੇ ਪੇਸ਼ ਕਰਨਾ ਸਾਬਤ ਕਰਦਾ ਹੈ, ਕਿ ਯੂ.ਪੀ ਸਰਕਾਰ ਵੀ ਅਜਿਹੀਆਂ
ਘਟਨਾਵਾਂ ਨੂੰ ਰੋਕਣ ਲਈ ਗੰਭੀਰ ਨਹੀਂ ਹੈ। ਉਹਨਾਂ ਕਿਹਾ ਕਿ ਜਦੋਂ ਸੂਬਾ ਤੇ ਕੇਂਦਰ
ਸਰਕਾਰ ਨੂੰ ਪਤਾ ਹੈ ਕਿ ਮੁਜੱਫਰਨਗਰ ਵਿੱਚ ਦੋ ਧਿਰਾਂ ਹਿੰਦੂ ਤੇ ਮੁਸਲਮਾਨਾਂ ਵਿੱਚ ਦੰਗੇ
ਹੁੰਦੇ ਰਹਿੰਦੇ ਹਨ, ਤਾਂ ਫਿਰ ਸਰਕਾਰ ਤੇ ਜਿਲ੍ਵਾ ਪ੍ਰਸ਼ਾਸ਼ਨ ਨੇ ਚੰਗਿਆੜੀ ਸੁਲਗਣ ਤੋਂ
ਪਹਿਲਾਂ ਹੀ ਲੋੜੀਦੀ ਕਾਰਵਾਈ ਕਰਕੇ ਮਾਮਲੇ ਨੂੰ ਠੱਪ ਕਰਨਾ ਚਾਹੀਦਾ ਸੀ।
ਉਹਨਾਂ ਕਿਹਾ ਕਿ ਫਿਰਕੂ ਦੰਗਿਆਂ ਦੀ ਇਸ ਖੇਡ ਨੂੰ ਜੇਕਰ ਤੁਰੰਤ
ਰੋਕਿਆ ਨਾ ਗਿਆ ਤਾਂ ਇਹ ਅੱਗ ਸਾਰੇ ਦੇਸ ਵਿੱਚ ਵੀ ਭੜਕ ਸਕਦੀ ਹੈ। ਉਹਨਾਂ ਕਿਹਾ ਕਿ ਘੱਟ
ਗਿਣਤੀ ਕੌਮਾਂ ਭਾਰਤ ਵਿੱਚ ਸੁਰੱਖਿਅਤ ਨਹੀਂ ਹਨ ਅਤੇ ਗੁਜਰਾਤ ਦੰਗੇ, ਨਵੰਬਰ 1984 ਵਿੱਚ
ਸਿੱਖਾਂ ਦੀ ਕੀਤੀ ਗਈ ਨਸ਼ਲਕੁਸ਼ੀ ਅਤੇ ਉੜੀਸਾ ਵਿੱਚ ਇਸਾਈ ਮਿਸ਼ਨਰੀਆਂ ਦਾ ਕਤਲ ਕੀਤੇ ਜਾਣੇ
ਸਾਬਤ ਕਰਦੇ ਹਨ, ਕਿ ਦੇਸ ਦੀ ਸੁਰੱਖਿਆਂ ਪੂਰੀ ਤਰ੍ਹਾਂ ਚਰਮਰਾ ਗਈ ਹੈ ਅਤੇ ਬਹੁ ਗਿਣਤੀ
ਨੂੰ ਘੱਟ ਗਿਣਤੀਆਂ ਨਾਲ ਵਧੀਕੀਆਂ ਕਰਨ ਦਾ ਅਧਿਕਾਰ ਦਿੱਤਾ ਗਿਆ ਹੈ। ਉਹਨਾਂ ਕਿਹਾ ਕਿ
ਸਿਆਸੀ ਆਂਗੂਆਂ ਵੱਲੋਂ ਅਜਿਹਾ ਕੁਝ ਲੋਕ ਸਭਾ ਚੋਣਾਂ ਨੂੰ ਲੈ ਕੇ ਚੋਣਾਂ ਵਿੱਚ ਸਿਆਸੀ
ਲਾਹਾ ਲੈਣ ਲਈ ਕੀਤਾ ਗਿਆ ਹੈ, ਜਿਸ ਨੂੰ ਮਨੁੱਖਤਾ ਤੇ ਇਖਲਾਕ ਤੋਂ ਗਿਰੀ ਹੋਈ ਕਾਰਵਾਈ ਹੀ
ਕਿਹਾ ਜਾ ਸਕਦਾ ਹੈ।
ਉਹਨਾਂ ਕਿਹਾ ਕਿ ਪੰਜਾਬ ਵਿੱਚ ਵੀ ਚੋਣਾਂ ਦੇ ਨੇੜੇ ਆਉਣ ਤੇ ਸਿਆਸੀ
ਆਗੂਆਂ ਵੱਲੋਂ ਅਜਿਹੀਆਂ ਹੀ ਹਰਕਤਾਂ ਕੀਤੀਆਂ ਜਾਂਦੀਆਂ ਹਨ, ਜਿਹਨਾਂ ਨੂੰ ਮੰਦਭਾਗਾ ਹੀ
ਕਿਹਾ ਜਾ ਸਕਦਾ ਹੈ। ਉਹਨਾਂ ਕਿਹਾ ਕਿ ਬਠਿੰਡਾ ਵਿੱਚ ਇੱਕ ਕਥਾਵਾਚਕ ਦੇ ਵਿਰੁੱਧ ਧਾਰਾ
295 ਏ ਲਗਾ ਕੇ ਜੇਲ ਵਿੱਚ ਬੰਦ ਕਰਨਾ, ਥਾਣਾ ਕੱਥੂਨੰਗਲ ਵਿਖੇ ਬਾਬਾ ਰਾਮ ਸਿੰਘ ਦੀ ਦਾਹੜੀ
ਕਤਰਨਾ ਤੇ ਪਾਰਲੀਮਾਨੀ ਸਕੱਤਰ ਸ੍ਰੀ ਸੋਮ ਪ੍ਰਕਾਸ਼ ਦੀ ਨੂੰ ਆਪਣਾ ਮੰਗ ਪੱਤਰ ਦੇਣ ਲਈ ਗਏ
ਨੇਤਰਹੀਣਾਂ ਤੇ ਹੋਰ ਅਪਾਹਜ ਵਿਅਕਤੀਆਂ ਨਾਲ ਬਦਤਮੀਜੀ ਹੀ ਨਹੀਂ ਕੀਤੀ ਗਈ, ਸਗੋਂ ਇੱਕ
ਅੰਮ੍ਰਿਤਧਾਰੀ ਨੇਤਰਹੀਣ ਵਿਅਕਤੀ ਦੀ ਵੀ ਦਾਹੜੀ ਪੁੱਟੀ ਜਾਣੀ, ਸਾਬਤ ਕਰਦੀ ਹੈ, ਕਿ ਹਾਕਮ
ਧਿਰ ਦੇ ਇਸ਼ਾਰਿਆਂ 'ਤੇ ਹੀ ਅਜਿਹੀਆਂ ਕਾਰਵਾਈਆਂ ਕੀਤੀਆਂ ਜਾ ਰਹੀਆਂ ਹਨ। ਉਹਨਾਂ ਕਿਹਾ ਕਿ
ਸਰਕਾਰ ਨੇ ਜੇਕਰ ਪੰਜਾਬ ਦੇ ਮਾਹੌਲ ਨੂੰ ਵੀ ਵਿਗਾੜਨ ਦੀ ਕੋਸ਼ਿਸ਼ ਕੀਤੀ, ਤਾਂ ਇਸ ਦੇ
ਭਿਆਂਨਕ ਸਿੱਟੇ ਨਿਕਲਣ ਤੋਂ ਵੀ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਉਹਨਾਂ ਕਿਹਾ ਕਿ ਘੱਟ
ਗਿਣਤੀਆਂ ਨਾਲ ਵਧੀਕੀਆਂ ਕਰਵਾ ਕੇ ਪੰਜਾਬ ਸਰਕਾਰ ਮਾਹੌਲ ਨੂੰ ਖਰਾਬ ਕਰਨਾ ਚਾਹੁੰਦੀ ਹੈ,
ਜਿਸ ਲਈ ਪੰਜਾਬ ਦੇ ਲੋਕਾਂ ਨੂੰ ਸੁਚੇਤ ਰਹਿਣ ਦੀ ਲੋੜ ਹੈ।
*
ਇਹ ਨਸਲਵਾਦੀ ਦੰਗੇ ਕਿਉਂ ਭੜਕੇ, ਇਸ ਲਈ ਇੱਥੇ ਕਲਿੱਕ ਕਰਕੇ,
ਜ਼ਰੂਰ ਪੜ੍ਹਨ ਦੀ ਕਿਰਪਾਲਤਾ ਕਰਨੀ ਜੀ।