ਜੇ ਸੌਦਾ ਸਾਧ ਵਰਗੇ ਡੇਰੇਦਾਰ ਆਪਣੇ ਸ਼੍ਰਧਾਲੂਆਂ ਨੂੰ ਵੋਟ ਬੈਂਕ
ਵਜੋਂ ਵਰਤ ਕੇ ਕਾਂਗਰਸ, ਭਾਜਪਾ, ਬਾਦਲ ਦਲ ਆਦਿਕ ਸਾਰੀਆਂ ਹੀ ਪਾਰਟੀਆਂ ਨੂੰ ਆਪਣੀਆਂ
ਉਂਗਲੀਆਂ ’ਤੇ ਨਚਾਉਣ ਵਿੱਚ ਸਫਲ ਹੋ ਰਿਹਾ ਹੈ ਤਾਂ ਕੋਈ ਕਾਰਣ ਨਹੀਂ ਕਿ ਸਿੱਖ ਮੁਸਲਮਾਨ
ਈਸਾਈ ਤੇ ਦਲਿਤਾਂ ਦਾ ਜਥੇਬੰਦਕ ਇਕੱਠ ਆਪਣੀਆਂ ਕੌਮਾਂ ਲਈ ਇਨਸਾਫ ਨਾ ਲੈ ਸਕਣ।
ਅੱਜ
ਮਿਤੀ 16 ਨਵੰਬਰ ਦੇ ਅਖ਼ਬਾਰਾਂ ਵਿੱਚ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਦਿੱਲੀ ਇਕਾਈ ਅਤੇ
ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ:
ਮਨਜੀਤ ਸਿੰਘ ਜੀਕੇ ਦਾ ਬਹੁਤ ਹੀ ਭਾਵਪੂਰਤ ਬਿਆਨ ਛਪਿਆ; ਜਿਸ ਵਿੱਚ ਉਨ੍ਹਾ ਨੇ
ਕਿਹਾ ਹੈ ਕਿ ‘1984 ਸਿੱਖ ਕਤਲੇਆਮ ਦੇ ਮੁੱਖ ਆਰੋਪੀ ਸੱਜਣ
ਕੁਮਾਰ ਦੇ ਪੁੱਤਰ ਜਗਪ੍ਰਵੇਸ਼ ਕੁਮਾਰ ਨੂੰ ਕਾਂਗਰਸ ਵਲੋਂ ਦਿੱਲੀ ਵਿਧਾਨ ਸਭਾ ਚੋਣਾਂ ਵਿਚ
ਸੰਗਮ ਵਿਹਾਰ ਤੋਂ ਟਿਕਟ ਦੇਣਾਂ, ਦੰਗਾ ਪੀੜਤਾਂ ਦੇ ਜਖਮਾਂ ’ਤੇ ਲੂਣ ਛਿੜਕਨ ਅਤੇ ਇਨਸਾਫ਼
ਨੂੰ ਲੀਹੋ ਲਾਉਣ ਵਾਲੀ ਕਾਰਗੁਜ਼ਾਰੀ ਹੈ।
ਸ: ਜੀ.ਕੇ. ਨੇ ਦਾਅਵਾ ਕੀਤਾ ਕਿ 29 ਸਾਲ ਬਾਅਦ ਵੀ ਇਨਸਾਫ਼ ਦੀ
ਤਲਾਸ਼ ਕਰ ਰਹੀ ਸਿੱਖ ਕੌਮ ਦੇ ਹੌਂਸਲੇ ਨੂੰ ਢਾਹ ਲਾਉਣ ਵਾਸਤੇ ਕਾਂਗਰਸ ਨੇ ਇਹ ਗਿਣੀ ਮਿਥੀ
ਸਾਜਿਸ਼ ਕੀਤੀ ਹੈ। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਸੱਜਨ ਕੁਮਾਰ ਨੂੰ ਸਰਕਾਰੀ ਛੱਤਰੀ ਹੇਠ
ਸੁਰਖਿਆ ਦੇਣ ਵਾਲੀ ਕਾਂਗਰਸ ਸਰਕਾਰ ਨਹੀਂ ਚਾਹੁੰਦੀ ਕਿ ਸੱਜਨ ਕੁਮਾਰ ਜਾਂ ਉਸ ਦੇ ਪਰਿਵਾਰ
’ਤੇ ਕੋਈ ਸੇਕ ਆਏ ਕਿਉਂਕਿ ਅਗਰ ਸੱਜਨ ਕੁਮਾਰ ਨੂੰ ਕੋਈ ਅਦਾਲਤ 84 ਦੇ ਸਿੱਖ ਕਤਲੇਆਮ ਮਸਲੇ
’ਤੇ ਦੋਸ਼ੀ ਕਰਾਰ ਦਿੰਦੀ ਹੈ ਤਾਂ ਇਸ ਗੱਲ ਦੀ ਸੰਭਾਵਨਾ ਹੈ ਕਿ ਆਪਨੇ ਆਪ ਨੂੰ ਫਸਦਾ ਵੇਖ
ਕੇ ਸੱਜਨ ਕੁਮਾਰ ਉਸ ਵੇਲੇ ਦੇ ਪ੍ਰਧਾਨ ਮੰਤਰੀ ਦੇ ਘਰ ਬੈਠ ਕੇ ਸਾਜਿਸ਼ ਕਰਨ ਵਾਲੇ ਲੋਕਾਂ
ਦੇ ਨਾਮ ਨਾ ਲੈ ਲਵੇ। ਅਕਾਲੀ ਦਲ ਵਲੋਂ 2009 ਵਿਚ ਸੱਜਨ ਅਤੇ ਟਾਈਟਲਰ ਦੀਆਂ ਲੋਕ ਸਭਾ
ਟਿਕਟਾਂ, ਸੜਕਾਂ ’ਤੇ ਮੋਰਚਾ ਲਗਾ ਕੇ ਕਟਾਉਣ ਦਾ ਦਾਅਵਾ ਕਰਦੇ ਹੋਏ ਸ: ਜੀਕੇ ਨੇ ਕਿਹਾ
ਕਿ ਬੇਸ਼ਕ ਅਸੀਂ ਸੱਜਨ ਦੀ ਟਿਕਟ ਕਟਵਾਉਣ ਵਿਚ ਕਾਮਯਾਬ ਰਹੇ ਸੀ, ਪਰ ਕਾਂਗਰਸ ਪਾਰਟੀ ਨੇ
ਪਹਿਲਾਂ ਉਸਦੇ ਭਰਾ ਤੇ ਹੁਣ ਉਸ ਦੇ ਪੁੱਤਰ ਨੂੰ ਟਿਕਟ ਦੇ ਕੇ 84 ਦੇ ਪੀੜਤਾਂ ਨੂੰ
ਬੇਗਾਨਗੀ ਦਾ ਅਹਿਸਾਸ ਕਰਵਾ ਦਿੱਤਾ ਹੈ। ਉਨ੍ਹਾਂ ਖਦਸ਼ਾ ਪ੍ਰਗਟਾਇਆ ਕਿ ਕਾਂਗਰਸ ਦੀ ਜਾਂਚ
ਏਜੰਸੀਆਂ ’ਤੇ ਪ੍ਰਭਾਵ ਪਾਉਣ ਦੀ ਇਹ ਇਕ ਕੋਸ਼ਿਸ਼ ਹੋਵੇ ਕਿ ਸੱਜਨ ਦੀ ਸਿਆਸੀ ਤਾਕਤ ਹਾਲੇ
ਤਕ ਮੌਜੂਦ ਹੈ।’
ਸ: ਜੀਕੇ ਦੇ ਉਪ੍ਰੋਕਤ ਬਿਆਨ ਦਾ ਇੱਕ ਇੱਕ ਸ਼ਬਦ ਸੱਚਾਈ ਭਰਪੂਰ
ਹੈ, ਇਸ ਲਈ ਉਨ੍ਹਾਂ ਦੇ ਇਸ ਬਿਆਨ ਦੀ ਸ਼ਲਾਘਾ ਕਰਨ ਅਤੇ ਉਨ੍ਹਾਂ ਦੀ ਸਿਆਸੀ ਮਨੋਵਿਰਤੀ ਦਾ
ਦੂਸਰਾ ਪਾਸਾ ਚੈੱਕ ਕਰਨ ਲਈ ਉਨ੍ਹਾਂ ਨੂੰ ਫ਼ੋਨ ਕੀਤਾ।
ਉਨ੍ਹਾਂ ਦੇ ਬਿਆਨ ਦੀ ਸ਼ਲਾਘਾ ਕਰਨ ਉਪ੍ਰੰਤ ਉਨ੍ਹਾਂ ਤੋਂ ਪੁੱਛਿਆ
ਗਿਆ ਕਿ ਕੀ ਤੁਸੀਂ ਜਾਣਦੇ ਹੋ ਕਿ ਸਿੱਖਾਂ ਸਮੇਤ ਹੋਰ ਘੱਟ ਗਿਣਤੀਆਂ ਦੇ ਕਾਤਲਾਂ ਨੂੰ ਇਸ
ਦੇਸ਼ ਵਿੱਚ ਸਜਾਵਾਂ ਕਿਉਂ ਨਹੀਂ ਮਿਲਦੀਆਂ? ਸ: ਜੀਕੇ ਨੇ ਆਪਣਾ ਪਹਿਲਾ ਬਿਆਨ ਹੀ
ਦੁਹਰਾਉਂਦੇ ਹੋਏ ਕਿਹਾ ਕਾਰਣ ਤਾਂ ਸਾਫ਼ ਹੈ ਕਿ ਕਾਂਗਰਸ ਨਹੀਂ ਚਾਹੁੰਦੀ ਕਿ ਸਿੱਖਾਂ ਦੇ
ਕਤਾਲਾਂ ਨੂੰ ਸਜਾ ਮਿਲੇ। ਸ: ਜੀਕੇ ਨੂੰ ਦੱਸਿਆ ਗਿਆ ਇਹ ਤਾਂ ਤੁਹਾਡੇ ਦੱਸਣ ਦੀ ਲੋੜ ਨਹੀਂ,
ਕਿਉਂਕਿ ਇਹ ਤਾਂ ਸਪਸ਼ਟ ਹੀ ਹੈ ਕਿ ਕੋਈ ਵੀ ਪਾਰਟੀ ਆਪਣੇ ਆਗੂ ਜਾਂ ਵਰਕਰ ਨੂੰ ਸਜਾ ਨਹੀਂ
ਦਿਵਾਉਣੀ ਚਾਹੁੰਦੀ। ਪਰ ਇਸ ਤੋਂ ਵੱਡਾ ਕਾਰਣ ਇਹ ਹੈ ਕਿ ਤੁਹਾਡੇ ਸਮੇਤ ਅਕਾਲੀ ਦਲ ਬਾਦਲ
ਦਾ ਵੀ ਕੋਈ ਆਗੂ ਕਾਤਲਾਂ ਨੂੰ ਸਜਾਵਾਂ ਨਹੀਂ ਦਿਵਾਉਣਾ ਚਾਹੁੰਦਾ ਸਗੋਂ ਅਖ਼ਬਾਰੀ ਬਿਆਨ ਦੇ
ਕੇ ਸਿਆਸੀ ਰੋਟੀਆਂ ਹੀ ਸੇਕ ਰਹੇ ਹਨ। ਕਿਸ ਨੂੰ ਨਹੀਂ ਪਤਾ ਕਿ ਘੱਟ ਗਿਣਤੀਆਂ ਦੇ ਪੀੜਤਾਂ
ਨੂੰ ਬੇਗਾਨਗੀ ਦਾ ਅਹਿਸਾਸ ਸਿਰਫ ਕਾਂਗਰਸ ਹੀ ਨਹੀਂ ਕਰਵਾ ਰਹੀ ਸਗੋਂ ਭਾਜਪਾ ਵੀ ਕਿਸੇ
ਤੋਂ ਘੱਟ ਨਹੀਂ ਹੈ।
ਇੱਥੋਂ ਤੱਕ ਕਿ ਸਿੱਖ ਹਿੱਤਾਂ ਲਈ ਹੋਂਦ ਵਿੱਚ ਆਇਆ ਸ਼੍ਰੋਮਣੀ ਅਕਾਲੀ
ਦਲ ਬਾਦਲ ਵੀ ਬਹੁ ਗਿਣਤੀ ਤੇ ਭਾਜਪਾ ਨੂੰ ਖੁਸ਼ ਰੱਖ ਕੇ ਲੰਬਾ ਸਮਾਂ ਸਤਾ ਵਿੱਚ ਬਣੇ ਰਹਿਣ
ਲਈ ਸਿੱਖਾਂ ਦੇ ਹਿੱਤਾਂ ਦੀ ਅਣਦੇਖੀ ਕਰਕੇ ਉਨ੍ਹਾਂ ਨੂੰ ਬੇਗਾਨਗੀ ਦਾ ਅਹਿਸਾਸ ਕਰਵਾ ਰਿਹਾ
ਹੈ। ਉਨ੍ਹਾਂ ਨੂੰ ਉਦਾਹਰਣ ਦਿੱਤੀ ਗਈ ਕਿ ਪੰਜਾਬ ਵਿੱਚ ਕਾਲ਼ੇ ਦੌਰ ਦੌਰਾਨ ਆਲਮ ਸੈਨਾ ਬਣਾ
ਕੇ ਸਿੱਖ ਨੌਜਵਾਨਾਂ ਨੂੰ ਘਰਾਂ ਵਿੱਚੋਂ ਚੁੱਕ ਕੇ ਖਤਮ ਕਰਨ ਵਾਲੇ ਸਾਬਕਾ ਪੁਲਿਸ ਅਧਿਕਾਰੀ
ਇਜ਼ਹਾਰ ਆਲਮ ਨੂੰ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਵੱਲੋਂ 2012 ਦੀਆਂ ਵਿਧਾਨ ਸਭਾ ਚੋਣਾਂ
ਮੌਕੇ ਮਲੇਰਕੋਟਲਾ ਤੋਂ ਟਿਕਟ ਦਿੱਤੀ ਗਈ। ਬਾਬਾ ਧੁੰਮਾ ਸਮੇਤ ਸਮੁੱਚੀਆਂ ਸਿੱਖ ਜਥੇਬੰਦੀਆਂ
ਵੱਲੋਂ ਇਸ ਦੀ ਭਾਰੀ ਵਿਰੋਧਤਾ ਕੀਤੀ ਗਈ। ਹੋਰ ਜਥੇਬੰਦੀਆਂ ਦੀ ਤਾਂ ਸ: ਬਾਦਲ ਨੇ ਕੀ
ਪ੍ਰਵਾਹ ਕਰਨੀ ਸੀ ਪਰ ਆਪਣੇ ਭਾਈਵਾਲ ਬਾਬਾ ਹਰਨਾਮ ਸਿੰਘ ਧੁੰਮਾ ਦੀ ਲਾਜ਼ ਰੱਖਣ ਲਈ ਇਜ਼ਹਾਰ
ਆਲਮ ਦੀ ਟਿਕਟ ਤਾਂ ਕੱਟ ਦਿੱਤੀ ਪਰ ਬਿਲਕੁਲ ਕਾਂਗਰਸ ਦੇ ਪੈਟਰਨ ’ਤੇ ਅਕਾਲੀ ਦਲ ਵੱਲੋਂ
ਉਸੇ ਇਜ਼ਹਾਰ ਆਲਮ ਦੀ ਪਤਨੀ ਨੂੰ ਟਿਕਟ ਦੇ ਕੇ ਸਿਰਫ ਜਿਤਾਇਆ ਹੀ ਨਹੀਂ ਬਲਕਿ ਉਸ ਨੂੰ
ਪਹਿਲੀ ਵਾਰ ਹੀ ਜਿਤਣ ’ਤੇ ਚੀਫ ਪਾਰਲੀਮੈਂਟਰੀ ਸਕੱਤਰ ਬਣਾ ਦਿੱਤਾ ਗਿਆ ਜਦੋਂ ਕਿ 4-4
ਵਾਰੀ ਜਿੱਤਣ ਵਾਲੇ ਕਈ ਅਕਾਲੀ ਵਿਧਾਇਕਾਂ ਨੂੰ ਪੁੱਛਿਆ ਤੱਕ ਨਹੀਂ ਗਿਆ। ਸੱਜਣ ਕੁਮਾਰ
ਤਾਂ ਫਿਰ ਵੀ ਕਾਂਗਰਸ ਦਾ ਬਹੁਤ ਪੁਰਾਣਾ ਵਰਕਰ ਹੈ ਤੇ ਉਸ ਦੀ ਕਾਂਗਰਸ ਨੂੰ ਦੇਣ ਵੀ ਹੈ
ਪਰ ਅਕਾਲੀ ਦਲ ਦਾ ਪ੍ਰਧਾਨ ਤੇ ਸਰਪ੍ਰਸਤ ਦੋਵੇਂ ਹੀ ਦੱਸਣ ਕਿ ਇਜ਼ਹਾਰ ਆਲਮ ਜਾਂ ਉਸ ਦੀ
ਪਤਨੀ ਦੀ ਸ਼੍ਰੋਮਣੀ ਅਕਾਲੀ ਦਲ ਨੂੰ ਕੀ ਦੇਣ ਹੈ ਜਿਸ ਬਦਲੇ ਉਸ ਨੂੰ ਇਤਨੀ ਸਿਆਸੀ
ਅਹਿਮੀਅਤ ਦਿੱਤੀ ਜਾ ਰਹੀ ਹੈ? ਕੀ ਕਾਂਗਰਸ ਵਾਂਗ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਵੀ ਸਿੱਖ
ਹਿੱਤਾਂ ਦੀ ਅਣਦੇਖੀ ਕਰਕੇ ਉਨ੍ਹਾਂ ਨੂੰ ਆਪਣੇ ਘਰ ਵਿੱਚ ਹੀ ਬੇਗਾਨਗੀ ਦਾ ਅਹਿਸਾਸ ਨਹੀਂ
ਕਰਵਾ ਰਿਹਾ ਤੇ ਇਹ ਪ੍ਰਭਾਵ ਨਹੀਂ ਦਿੱਤਾ ਜਾ ਰਿਹਾ ਕਿ ਸਿੱਖਾਂ ਦੇ ਕਾਤਲਾਂ ਨੂੰ ਇਸ ਦੇਸ਼
ਵਿੱਚ ਸਜਾਵਾਂ ਨਹੀਂ ਸਗੋਂ ਸਿਆਸੀ ਤਾਕਤ ਹੀ ਮਿਲਣੀ ਹੈ!
ਦੂਸਰੀ ਮਿਸਾਲ ਹੈ ਕਿ 2009 ਦੀਆਂ ਲੋਕ ਸਭਾ ਚੋਣਾਂ
ਤੋਂ ਐਨ ਪਹਿਲਾਂ ਭਾਜਪਾ ਦੇ ਪ੍ਰਮੁੱਖ ਆਗੂ ਸ਼੍ਰੀ ਲਾਲ ਕ੍ਰਿਸ਼ਨ ਅਡਵਾਨੀ ਨੇ ਆਪਣੀ
ਸਵੈਜੀਵਨੀ ‘ਮਾਈ ਕੰਟਰੀ ਮਾਈ ਲਾਈਫ’ ਪੁਸਤਕ ਰੀਲੀਜ਼
ਕੀਤੀ ਜਿਸ ਵਿੱਚ ਉਸ ਨੇ ਸਾਫ ਲਿਖਿਆ ਹੈ, ਕਿ ਇੰਦਰਾ ਗਾਂਧੀ ਅਕਾਲ ਤਖ਼ਤ ’ਤੇ ਹਮਲਾ ਕਰਨ
ਵਿੱਚ ਹਿਚਕਿਚਾਹਟ ਵਿਖਾ ਰਹੀ ਸੀ ਪਰ ਉਸ (ਅਡਵਾਨੀ) ਨੇ ਹੀ ਇੰਦਰਾ ਨਾਲ ਵਾਰ ਵਾਰ ਮਿਲਣੀਆਂ
ਕਰਕੇ ਹਮਲਾ ਕਰਨ ਲਈ ਤਿਆਰ ਕੀਤਾ। ਇਸ ਦੇ ਬਾਵਯੂਦ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਨੇ ਇੰਦਰਾ
ਗਾਂਧੀ ਦੇ ਬਰਾਬਰ ਦੇ ਦੋਸ਼ੀ ਅਡਵਾਨੀ ਨੂੰ ਡਾ: ਮਨਮੋਹਨ ਸਿੰਘ ਦੇ ਮੁਕਾਬਲੇ ਪ੍ਰਧਾਨ ਮੰਤਰੀ
ਬਣਾਉਣ ਲਈ ਅੱਡੀ ਚੋਟੀ ਦਾ ਜੋਰ ਲਾਇਆ। ਇਹ ਵੱਖਰੀ ਗੱਲ ਹੈ ਕਿ ਉਹ ਸਫਲ ਨਹੀਂ ਹੋ ਸਕੇ।
ਤੀਸਰੀ ਮਿਸਾਲ ਹੈ ਕਿ ਜਿਸ ਤਰ੍ਹਾਂ ਕਾਂਗਰਸ ਪਾਰਟੀ
ਨੇ 1984 ’ਚ ਸਿੱਖਾਂ ਦੀ ਨਸਲਕੁਸ਼ੀ ਕਰਕੇ ਹਿੰਦੂ ਮਾਨਸਿਕਤਾ ਨੂੰ ਖੁਸ਼ ਕਰਕੇ ਉਨ੍ਹਾਂ ਦੀਆਂ
ਭਾਵਨਾਵਾਂ ਕੈਸ਼ ਕਰਕੇ ਕੇਂਦਰ ਵਿੱਚ ਆਪਣੀ ਮੁੜ ਸਰਕਾਰ ਬਣਾ ਲਈ ਉਸੇ ਤਰ੍ਹਾਂ 2002 ਵਿੱਚ
ਗੁਜਰਾਤ ਵਿੱਚ ਮੁਸਲਮਾਨਾਂ ਦਾ ਕਤਲੇਆਮ ਕਰਵਾ ਕੇ ਨਰਿੰਦਰ ਮੋਦੀ ਮੁੱਖ ਮੰਤਰੀ ਬਣਿਆ ਤੇ
ਅੱਜ ਤੱਕ ਆਪਣੀ ਕੁਰਸੀ ’ਤੇ ਸਿਰਫ ਕਾਇਮ ਹੀ ਨਹੀਂ ਸਗੋਂ ਦਿਨੋ ਦਿਨ ਆਪਣੀ ਸਿਆਸੀ ਤਾਕਤ
ਵਧਾ ਰਿਹਾ ਹੈ। ਭਾਜਪਾ ਨੇ ਆਪਣੇ ਸਭ ਤੋਂ ਪੁਰਾਣੇ ਤੇ ਸੀਨੀਅਰ ਨੇਤਾ ਅਡਵਾਨੀ ਦੇ ਇਤਰਾਜਾਂ
ਨੂੰ ਅਣਦੇਖਿਆਂ ਕਰਕੇ ਮੁਸਲਮਾਨਾਂ ਦੇ ਕਤਲੇਆਮ ਦੇ ਮੁੱਖ ਨਾਇਕ ਮੋਦੀ ਨੂੰ ਦੇਸ਼ ਦੇ ਅਗਲੇ
ਪ੍ਰਧਾਨ ਮੰਤਰੀ ਦੇ ਅਹੁਦੇ ਦਾ ਉਮੀਦਵਾਰ ਐਲਾਨ ਦਿੱਤਾ ਹੈ। ਹਮੇਸ਼ਾਂ ਨਿਤਾਣਿਆਂ ਅਤੇ
ਤਸ਼ੱਦਦ ਨਾਲ ਲਤਾੜੇ ਗਏ ਪੀੜਤਾਂ ਦੀ ਮੱਦਦ ਵਿੱਚ ਖੜ੍ਹਨ ਵਾਲਾ ਸ਼੍ਰੋਮਣੀ ਅਕਾਲੀ ਦਲ ਹੁਣ
ਬਿਨਾਂ ਸੋਚੇ ਵੀਚਾਰੇ ਘੱਟ ਗਿਣਤੀਆਂ ਦੇ ਕਾਤਲ ਮੋਦੀ ਦੇ ਸਮਰਥਨ ਵਿੱਚ ਡਟ ਗਿਆ ਹੈ। ਕੀ
ਮੁਸਲਮਾਨਾਂ ਦੇ ਕਾਤਲ ਮੋਦੀ ਨੂੰ ਦੇਸ਼ ਦੇ ਪ੍ਰਧਾਨ ਮੰਤਰੀ ਦੇ ਉਮਦੀਦਵਾਰ ਵਜੋਂ ਅਕਾਲੀ ਦਲ
ਸਮੇਤ ਐੱਨਡੀਏ ਵੱਲੋਂ ਸਮਰਥਨ ਦੇਣਾ 2002 ਦੇ ਮੁਸਲਿਮ ਪੀੜਤਾਂ ਨੂੰ ਬੇਗਾਨਗੀ ਦਾ ਅਹਿਸਾਸ
ਕਰਵਾਉਣਾ ਨਹੀਂ ਹੈ? ਕੀ ਘੱਟ ਗਿਣਤੀਆਂ ਲਈ ਇਹ ਖ਼ਦਸ਼ਾ ਪ੍ਰਗਟਾਏ ਜਾਣਾ ਯੋਗ ਨਹੀਂ ਹੋਵੇਗਾ
ਕਿ ਇਸ ਦੇਸ਼ ਦੀਆਂ ਸਮੁੱਚੀਆਂ ਪਾਰਟੀਆਂ ਘੱਟ ਗਿਣਤੀਆਂ ਨੂੰ ਇਹ ਪ੍ਰਭਾਵ ਦੇਣ ਦੀ ਕੋਸ਼ਿਸ਼
ਕਰ ਰਹੀਆਂ ਹਨ ਕਿ ਇਸ ਦੇਸ਼ ਵਿੱਚ ਸਤਾ ਕੇਵਲ ਤੇ ਕੇਵਲ ਘੱਟ ਗਿਣਤੀਆਂ ਦੇ ਕਾਤਲਾਂ ਲਈ ਹੀ
ਰਾਖਵੀਂ ਹੈ।
ਮੋਦੀ ਦੀ ਸਿਰਫ ਮੁਸਲਮਾਨ ਵਿਰੋਧੀ
ਮਾਨਸਿਕਤਾ ਹੀ ਨਹੀਂ, ਸਿੱਖਾਂ ਅਤੇ ਪੰਜਾਬ ਦਾ ਵੀ ਉਹ ਧੁਰ ਅੰਦਰੋਂ ਕੱਟੜ ਵਿਰੋਧੀ ਹੈ।
ਅਨੇਕਾਂ ਹੋਰਨਾਂ ਤੋਂ ਇਲਾਵਾ ਇਸ ਦੀਆਂ ਪ੍ਰਤੱਖ ਤੌਰ ’ਤੇ ਦੋ ਮੁੱਖ ਉਦਾਹਰਣਾਂ ਇਹ ਹਨ:-
ਪਹਿਲੀ ਉਦਾਹਰਣ ਤਾਂ ਇਹ ਹੈ ਕਿ 1965 ਵਿੱਚ
ਭਾਰਤ-ਪਾਕਿ ਜੰਗ ਬਾਅਦ ਤਤਕਾਲੀ ਪ੍ਰਧਾਨ ਮੰਤਰੀ ਮਰਹੂਮ ਸ਼੍ਰੀ ਲਾਲ ਬਹਾਦਰ ਸ਼ਾਸ਼ਤਰੀ ਨੇ
ਪੰਜਾਬੀ ਕਿਸਾਨਾਂ ਨੂੰ ਕੱਛ ਖੇਤਰ ਵਿੱਚ ਆ ਕੇ ਖੇਤੀ ਕਰਨ ਦਾ ਸੱਦਾ ਦਿੱਤਾ ਸੀ। ਸ਼ਾਸਤਰੀ
ਜੀ ਦਾ ਮੰਤਵ ਸੀ ਕਿ ਬਹਾਦਰ ਤੇ ਮਿਹਨਤੀ ਪੰਜਾਬੀ ਕਿਸਾਨ ਇੱਕ ਤਾਂ ਇੱਥੋਂ ਦੀ ਬੇਅਬਾਦ
ਜ਼ਮੀਨ ਨੂੰ ਆਬਾਦ ਕਰਕੇ ਫ਼ਸਲ ਪੈਦਾ ਕਰਨਗੇ ਤੇ ਗੁਜਰਾਤ ਦਾ ਵਿਕਾਸ ਕਰਨਗੇ, ਦੂਜਾ ਸਮੇਂ-ਸਮੇਂ
ਇਸ ਖੇਤਰ ਦੀ ਰਾਖੀ ਵੀ ਕਰਨਗੇ। ਸ਼ਾਸਤਰੀ ਜੀ ਦੇ ਸੱਦੇ ’ਤੇ ਪੰਜਾਬ ਦੇ ਲਗਪਗ ਇੱਕ ਹਜ਼ਾਰ
ਕਿਸਾਨਾਂ ਨੇ ਉੱਥੇ ਜ਼ਮੀਨਾਂ ਖਰੀਦੀਆਂ ਸਨ। ਗੁਜਰਾਤ ਸਰਕਾਰ ਨੇ ਇਨ੍ਹਾਂ ਦੀਆਂ ਰਜਿਸਟਰੀਆਂ
ਵੀ ਇਨ੍ਹਾਂ ਦੇ ਨਾਂ ਕਰ ਦਿੱਤੀਆਂ ਸਨ। ਗੁਜਰਾਤ ’ਚ ਵਸੇ ਪੰਜਾਬੀ ਕਿਸਾਨਾਂ ਨੇ ਜਿੱਥੇ
ਗੁਜਰਾਤ ਦੇ ਵਿਕਾਸ ਵਿੱਚ ਹਿੱਸਾ ਪਾਇਆ, ਉੱਥੇ ਖੇਤੀਬਾੜੀ ਰਾਹੀਂ ਗੁਜਰਾਤ ਦੇ ਲੋਕਾਂ ਦਾ
ਢਿੱਡ ਵੀ ਭਰਿਆ। ਪਰ ਗੁਜਰਾਤ ਦੀ ਮੋਦੀ ਸਰਕਾਰ ਆਪਣੀਆਂ ਫਾਸ਼ੀਵਾਦੀ ਨੀਤੀਆਂ ਤਹਿਤ ਉਥੋਂ
ਦੇ ਪੰਜਾਬੀ ਕਿਸਾਨਾਂ ਨੂੰ ਉਜਾੜਨ ਦੇ ਰਾਹ ਤੁਲੀ ਹੋਈ ਹੈ। ਗੁਜਰਾਤ ਸਰਕਾਰ ਨੇ ਤਿੰਨ ਸਾਲ
ਪਹਿਲਾਂ ਇੱਕ ਨਾਮਨਿਹਾਦ ਮੁਰਦਾ ਮਾਲ ਐਕਟ ਦੇ ਪੱਜ ਕੱਛ ਖੇਤਰ ਵਿੱਚ ਵੱਸਦੇ ਲਗਪਗ 1000
ਪੰਜਾਬੀ ਕਿਸਾਨਾਂ ਨੂੰ ਉਨ੍ਹਾਂ ਦੀਆਂ ਜ਼ਮੀਨਾਂ ਤੋਂ ਬੇਦਖ਼ਲ ਕਰਨ ਦੇ ਹੁਕਮ ਜਾਰੀ ਕਰ ਦਿੱਤੇ
ਸਨ। ਸਰਕਾਰ ਦੇ ਵਿਰੁੱਧ ਕਿਸਾਨਾਂ ਨੇ ਗੁਜਰਾਤ ਹਾਈ ਕੋਰਟ ਵਿੱਚ ਕੇਸ ਪਾਇਆ। ਅਦਾਲਤ ਨੇ
ਕਿਸਾਨਾਂ ਦਾ ਹੱਕ ਬਹਾਲ ਕਰਦਿਆਂ ਸਰਕਾਰ ਦੇ ਹੁਕਮ ਰੱਦ ਕਰ ਦਿੱਤੇ, ਪਰ ਪੰਜਾਬੀ ਕਿਸਾਨਾਂ
ਨੂੰ ਉੱਥੋਂ ਉਜਾੜਨ ਲਈ ਬਜ਼ਿੱਦ ਮੋਦੀ ਸਰਕਾਰ ਨੇ ਗੁਜਰਾਤ ਹਾਈ ਕੋਰਟ ਦੇ ਇਨ੍ਹਾਂ ਹੁਕਮਾਂ
ਨੂੰ ਸੁਪਰੀਮ ਕੋਰਟ ਵਿੱਚ ਚੁਣੌਤੀ ਦੇ ਦਿੱਤੀ ਤੇ ਹੁਣ ਕੇਸ ਸੁਪ੍ਰੀਮ ਕੋਰਟ ਵਿੱਚ ਚੱਲ
ਰਿਹਾ ਹੈ।
ਦੂਸਰੀ
ਉਦਾਹਰਣ ਹੈ 2009 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਅਕਾਲੀ-ਭਾਜਪਾ ਵਲੋਂ ਲੁਧਿਆਣਾ
ਵਿੱਚ ਚੋਣ ਮਹਾਂਰੈਲੀ ਕੀਤੀ ਗਈ; ਜਿਸ ਵਿੱਚ ਮੋਦੀ ਨੇ ਪੰਜਾਬ ਦੀ ਕਿਸੇ ਇੱਕ ਵੀ ਮੰਗ ਦਾ
ਜ਼ਿਕਰ ਨਹੀਂ ਕੀਤਾ ਸਗੋਂ ਕਿਹਾ ਕਿ ਦੇਸ਼ ਦੇ ਸਮੁੱਚੇ ਦਰਿਆ ਕਿਸੇ ਇੱਕ ਸੂਬੇ ਦੀ ਜਾਇਦਾਦ
ਨਹੀਂ ਬਲਕਿ ਕੌਮੀ ਸੰਪਤੀ ਹੈ।
ਉਨ੍ਹਾਂ ਅੱਗੇ ਕਿਹਾ ਕਿ ਪਿਛਲੀ ਐੱਨਡੀਏ ਸਰਕਾਰ ਦੌਰਾਨ ਉਨ੍ਹਾਂ ਨੇ
ਸੁਝਾਉ ਦਿੱਤਾ ਸੀ ਕਿ ਦੇਸ਼ ਦੇ ਦਰਿਆਵਾਂ ਨੂੰ ਲਿੰਕ ਨਹਿਰਾਂ ਰਾਹੀਂ ਜੋੜ ਦਿੱਤਾ ਜਾਵੇ
ਤਾਂ ਕਿ ਉਨ੍ਹਾਂ ਲਿੰਕ ਨਹਿਰਾਂ ਰਾਹੀਂ ਦੇਸ਼ ਦੇ ਦੂਸਰੇ ਲੋੜਵੰਦ ਸੂਬਿਆਂ ਨੂੰ ਪਾਣੀ ਦਿੱਤਾ
ਜਾ ਸਕੇ। ਉਨ੍ਹਾਂ ਅੱਗੇ ਕਿਹਾ ਕੇਂਦਰ ਦੀ ਐੱਨਡੀਏ ਸਰਕਾਰ ਨੇ ਇਸ ਸੁਝਾਉ ’ਤੇ ਕੰਮ ਕਰਨਾ
ਵੀ ਸ਼ੁਰੂ ਕਰ ਦਿੱਤਾ ਸੀ ਪਰ ਕੇਂਦਰ ਵਿੱਚ ਸਰਕਾਰ ਬਦਲ ਜਾਣ ਕਾਰਣ ਇਹ ਸਕੀਮ ਵਿੱਚੇ ਹੀ ਧਰੀ
ਧਰਾਈ ਰਹਿ ਗਈ। ਉਨ੍ਹਾਂ ਦਾਅਵੇ ਨਾਲ ਕਿਹਾ ਕਿ ਜਦੋਂ ਹੁਣ ਐੱਨਡੀਏ ਸਰਕਾਰ ਹੋਂਦ ਵਿੱਚ ਆਈ
ਤਾਂ ਇਸ ਸਕੀਮ ’ਤੇ ਮੁੜ ਅਮਲ ਕੀਤਾ ਜਾਵੇਗਾ।
ਸ: ਪ੍ਰਕਾਸ਼ ਸਿੰਘ ਬਾਦਲ ਸਮੇਤ ਸਾਰੇ ਪ੍ਰਮੁਖ ਅਕਾਲੀ ਆਗੂ ਅਤੇ ਇਸ
ਦਲ ਨਾਲ ਮਿਲ ਕੇ ਚੱਲਣ ਵਾਲੇ ਭਾਰਤੀ ਕਿਸਾਨ ਯੂਨੀਅਨ (ਲੱਖੋਵਾਲ) ਦੇ ਪ੍ਰਧਾਨ ਅਜਮੇਰ
ਸਿੰਘ ਲੱਖੋਵਾਲ ਉਸ ਰੈਲੀ ਵਿੱਚ ਹਾਜ਼ਰ ਸਨ ਪਰ ਉਨ੍ਹਾਂ ਵਿੱਚੋਂ ਕਿਸੇ ਇੱਕ ਨੇ ਵੀ ਅੱਜ
ਤੱਕ ਮੋਦੀ ਦੀ ਉਸ ਪੰਜਾਬ ਵਿਰੋਧੀ ਤੇ ਕਿਸਾਨ ਮਾਰੂ ਸਕੀਮ ਦਾ ਵਿਰੋਧ ਨਹੀਂ ਕੀਤਾ। ਹੁਣ
ਜਦੋਂ ਮੋਦੀ ਪ੍ਰਧਾਨ ਮੰਤਰੀ ਦੇ ਅਹੁਦੇ ਲਈ ਭਾਜਪਾ ਉਮੀਦਵਾਰ ਹੈ ਤਾਂ ਸਪਸ਼ਟ ਹੈ ਕਿ
ਪ੍ਰਧਾਨ ਮੰਤਰੀ ਬਣਦਿਆਂ ਉਹ ਦੇਸ਼ ਦੇ ਸਾਰੇ ਦਰਿਆਵਾਂ ਨੂੰ ਲਿੰਕ ਨਹਿਰਾਂ ਰਾਹੀਂ ਜੋੜਨ ਦੀ
ਆਪਣੀ ਸਕੀਮ ’ਤੇ ਸ਼ਰਤੀਆ ਅਮਲ ਕਰੇਗਾ। ਸਤਲੁਜ-ਯਮੁਨਾ ਲਿੰਕ ਨਹਿਰ ਦੇ ਵਿਰੋਧ ਵਿੱਚ 1982
ਵਿੱਚ ਕਪੂਰੀ ਮੋਰਚਾ ਲਾਉਣ ਵਾਲਾ ਸ਼੍ਰੋਮਣੀ ਅਕਾਲ ਦਲ ਮੋਦੀ ਦੇ ਇਸ ਪੰਜਾਬ ਵਿਰੋਧੀ
ਮਨਸੁਬਿਆਂ ਦੇ ਬਾਵਯੂਦ ਉਸ ਨੂੰ ਪ੍ਰਧਾਨ ਮੰਤਰੀ ਬਣਾਉਣ ਲਈ ਕਿਸ ਸੋਚ ਅਧੀਨ ਬਿਨਾਂ ਸ਼ਰਤ
ਸਮਰਥਨ ਦੇ ਰਿਹਾ ਹੈ!
ਇਹ ਪ੍ਰਕਾਸ਼ ਸਿੰਘ ਬਾਦਲ ਜਾਂ ਉਸ ਦਾ ਫਰਜ਼ੰਦ ਸੁਖਬੀਰ ਸਿੰਘ ਬਾਦਲ
ਹੀ ਜਾਣੇ। ਬੱਸ ਸੋਚ ਇੱਕੋ ਹੈ ਕਿ ਲੰਬਾ ਸਮਾਂ ਸਤਾ ’ਤੇ ਟਿਕੇ ਰਹਿਣ ਲਈ ਆਪਣੇ ਸਿਆਸੀ
ਬਿਆਨਾਂ ਵਿੱਚ ਕੇਵਲ ਕਾਂਗਰਸ ਵਿਰੋਧੀ ਏਜੰਡੇ ਵਾਲਾ ਸੰਪਟ ਪਾਠ ਲਾ ਕੇ ਬਿਨਾਂ ਸ਼ਰਤ ਭਾਜਪਾ
ਦੀ ਝੋਲ਼ੀ ਵਿੱਚ ਡਿੱਗੇ ਰਹਿਣਾਂ। ਸੱਤਾ ਲਾਲਸਾ ਦੀ ਇਹ ਬੀਮਾਰੀ, ਛੂਤ ਦੀ ਬੀਮਾਰੀ ਵਾਂਗ
ਘੱਟ ਗਿਣਤੀਆਂ ਦੇ ਸਾਰੇ ਸਿਆਸੀ ਆਗੂਆਂ ਵਿੱਚ ਫੈਲ ਚੁੱਕੀ ਹੈ। ਇਸ ਬੀਮਾਰੀ ਕਾਰਣ ਇੱਕ
ਪਾਸੇ ਪ੍ਰਕਾਸ਼ ਸਿੰਘ ਬਾਦਲ ਬਿਆਨ ਦਾਗ ਰਿਹਾ ਹੈ ਕਿ ਦਿੱਲੀ ’ਚ ਜੇ ਭਾਜਪਾ ਇੱਕ ਸੀਟ ਵੀ
ਨਾ ਦਿੰਦੀ, ਤਾਂ ਵੀ ਅਕਾਲੀ ਦਲ ਨੇ ਚੱਟਾਨ ਵਾਂਗ ਉਸ ਦਾ ਸਾਥ ਦੇਣਾ ਸੀ। ਦੂਸਰੇ ਪਾਸੇ
ਯੂਥ ਕਾਂਗਰਸ ਅਹੁਦੇਦਾਰ ਸਿੱਖਾਂ ਦੀ ਦੁਸ਼ਮਣ ਦੱਸੀ ਜਾ ਰਹੀ ਇੰਦਰਾ ਗਾਂਧੀ ਦੀ ਬਰਸੀ ਮੌਕੇ
ਉਸ ਨੂੰ ਸ਼੍ਰਧਾਂਜਲੀਆਂ ਭੇਂਟ ਕਰਦੇ ਹੋਏ ਸਲਾਹਾਂ ਦੇ ਰਹੇ ਹਨ ਕਿ ਆਪਣਾ ਨੈਤਿਕ ਫਰਜ਼ ਬਣਦਾ
ਹੈ ਕਿ ਇੰਦਰਾ ਗਾਂਧੀ ਦੇ ਪੂਰਨਿਆਂ ’ਤੇ ਚੱਲ ਕੇ ਆਪਣਾ ਯੋਗਦਾਨ ਪਾਈਏ। ਇਸੇ ਤਰ੍ਹਾਂ ਇੱਕ
ਪਾਸੇ ਕੁਝ ਮੁਸਲਮਾਨ ਆਗੂ ਭਾਜਪਾ ਤੇ ਖਾਸ ਕਰਕੇ ਮੋਦੀ ਨੂੰ ਮੁਸਲਮਾਨਾਂ ਦੇ ਕਾਤਲ ਦੱਸ ਕੇ
ਕਾਂਗਰਸ ਦੀ ਝੋਲ਼ੀ ਵਿੱਚ ਡਿੱਗ ਚੁੱਕੇ ਹਨ ਤੇ ਦੂਸਰੇ ਪਾਸੇ ਸ਼ਾਹ ਨਿਵਾਜ਼ ਵਰਗੇ ਮੁਸਲਮਾਨ
ਆਗੂ ਆਪਣੀ ਕੌਮ ਨਾਲ ਵਿਸ਼ਵਾਸ਼ਘਾਤ ਕਰਦੇ ਹੋਏ ਭਾਜਪਾ ਦੇ ਸਭ ਤੋ ਵੱਡੇ ਚਮਚੇ ਬਣੇ ਹੋਏ ਹਨ;
ਤਾਂ ਇਨ੍ਹਾਂ ਦੋਵੇਂ ਪ੍ਰਮੁਖ ਪਾਰਟੀਆਂ ਨੂੰ ਕੀ ਲੋੜ ਪਈ ਹੈ ਕਿ ਉਹ ਘੱਟ ਗਿਣਤੀ ਕੌਮਾਂ
ਦਾ ਕਤਲੇਆਮ ਕਰਕੇ ਸਿਆਸੀ ਤਾਕਤ ਹਾਸਲ ਕਰਨ ਵਾਲੇ ਸੱਜਣ ਕੁਮਾਰ, ਜਗਦੀਸ਼ ਟਾਈਟਲਰ, ਕਮਲ
ਨਾਥ ਜਾਂ ਮੋਦੀ, ਅਡਵਾਨੀ ਵਰਗੇ ਕਾਤਲਾਂ ਨੂੰ ਸਜਾਵਾਂ ਦੇ ਕੇ ਆਪਣੇ ਵੋਟ ਬੈਂਕ ਨੂੰ ਖੋਰਾ
ਲਾਉਣ!
ਇਹ ਸਵਾਲ ਸੁਣਦਿਆਂ ਸ: ਜੀਕੇ ਨੂੰ ਠੀਕ
ਹੈ ਵੀਰ ਜੀ ਕਹਿਣ ਤੋਂ ਇਲਾਵਾ ਹੋਰ ਕੋਈ ਜਵਾਬ ਨਹੀਂ ਸੀ ਸੁੱਝ ਰਿਹਾ। ਪਰ ਜਦੋਂ ਐਸੇ
ਸਵਾਲਾਂ ਦੀ ਲੜੀ ਜਾਰੀ ਰਹੀ ਤਾਂ ਉਸ ਲਈ ਇਹ ਸਵਾਲ ਸੁਣਨੇ ਵੀ ਔਖੇ ਹੋ ਗਏ ਤੇ ਫ਼ੋਨ ਕੱਟ
ਗਏ।
ਇਨ੍ਹਾਂ ਹਾਲਤਾਂ ਵਿੱਚ ਭੋਲ਼ੇ ਸਿੱਖਾਂ ਨੂੰ ਸ: ਜੀਕੇ ਜਾਂ ਬਾਦਲਾਂ
ਦੇ ਫੋਕੇ ਬਿਆਨ ਸੁਣ ਕੇ ਖੁਸ਼ ਹੋਣ ਦੀ ਲੋੜ ਨਹੀਂ, ਕਿ ਉਹ 84 ਦੇ ਸਿੱਖ ਪੀੜਤਾਂ ਦੇ
ਹਮਦਰਦ ਹਨ ਤੇ ਸਿੱਖਾਂ ਦੇ ਕਾਤਲਾਂ ਨੂੰ ਜਰੂਰ ਸਜਾਵਾਂ ਦਿਵਾਉਣਗੇ। ਜੇ 1997 ਵਿੱਚ,
ਪੰਜਾਬ ਵਿੱਚ ਸਿੱਖ ਨੌਜਵਾਨਾਂ ਨੂੰ ਝੂਠੇ ਪੁਲਿਸ ਮੁਕਾਬਿਲਆਂ ਵਿੱਚ ਮਾਰਨ ਵਾਲੇ ਪੁਲਿਸ
ਅਧਿਕਾਰੀਆਂ ਨੂੰ ਸਜਾਵਾਂ ਦੇਣ ਦਾ ਚੋਣ ਵਾਅਦਾ ਕਰਕੇ ਚੋਣਾਂ ਜਿੱਤਣ ਪਿੱਛੋਂ, ਛੇ ਸਾਲ
ਤੱਕ ਕੇਂਦਰ ਵਿੱਚ ਐੱਨਡੀਏ ਦੀ ਸਰਕਾਰ, ਦਿੱਲੀ ਵਿੱਚ ਭਾਜਪਾ ਸਰਕਾਰ ਅਤੇ ਤਿੰਨ ਵਾਰ
ਪੰਜਾਬ ਵਿੱਚ ਅਕਾਲੀ ਭਾਜਪਾ ਸਰਕਾਰ ਬਣਾਉਣ ਅਤੇ ਉਸੇ ਸਮੇਂ ਸ਼੍ਰੋਮਣੀ ਕਮੇਟੀ ਤੇ ਦਿੱਲੀ
ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ’ਤੇ ਕਾਬਜ਼ ਰਹਿਣ ਪਿੱਛੋਂ ਵੀ ਸ: ਬਾਦਲ ਨਾ ਦਿੱਲੀ ਦੇ
ਕਿਸੇ ਕਾਂਗਰਸੀ ਕਾਤਲ ਨੂੰ ਸਜਾ ਦਿਵਾ ਸਕੇ ਤੇ ਨਾ ਹੀ ਪੰਜਾਬ ਵਿੱਚ ਸਿੱਖ ਨੌਜਵਾਨਾਂ ਦੇ
ਕਾਤਲ ਪੁਲਿਸੀਆਂ ਨੂੰ ਸਜਾ ਦਿੱਤੀ ਸਗੋਂ ਉਲਟਾ ਕਾਂਗਰਸ ਪੈਟਰਨ ’ਤੇ ਚਲਦਿਆਂ ਇਜ਼ਹਾਰ ਆਲਮ
ਤੇ ਉਸ ਦੀ ਪਤਨੀ ਨੂੰ ਸਿਆਸੀ ਤਾਕਤ ਨਾਲ ਨਿਵਾਜ਼ਣਾਂ ਅਤੇ ਸੁਮੇਧ ਸੈਣੀ ਵਰਗੇ ਕਾਤਲ ਜਿਸ
ਵਿਰੁੱਧ ਅਦਾਲਤਾਂ ਵਿੱਚ ਕੇਸ ਵੀ ਚੱਲ ਰਹੇ ਹੋਣ ਦੇ ਬਾਵਯੂਦ ਡੀਜੀਪੀ ਦੇ ਅਹੁੱਦੇ ’ਤੇ
ਬਿਰਾਜਮਾਨ ਕਰਨ ਵਾਲੇ ਬਾਦਲ ਨੇ ਸੁਰਜੀਤ ਸਿੰਘ ਸਾਬਕਾ ਥਾਣੇਦਾਰ ਵੱਲੋਂ ਅਦਾਲਤ ਵਿੱਚ ਇਹ
ਹਲਫੀਆ ਬਿਆਨ ਦਿੱਤੇ ਜਾਣ ਪਿੱਛੋਂ ਵੀ ਆਪਣੀਆਂ ਅੱਖਾਂ, ਕੰਨ ਤੇ ਜੀਭ ਨੂੰ ਤਾਲਾ ਲਾਇਆ
ਹੋਇਆ ਹੈ, ਤਾਂ ਉਸ ਤੋਂ ਕੀ ਉਮੀਦ ਰੱਖੀ ਜਾ ਸਕਦੀ ਹੈ, ਕਿ ਮੋਦੀ ਨੂੰ ਪ੍ਰਧਾਨ ਮੰਤਰੀ
ਬਣਾਉਣ ਪਿੱਛੋਂ ਉਹ ਸਿੱਖ ਪੀੜਤਾਂ ਨੂੰ ਕੋਈ ਇਨਸਾਫ਼ ਦਿਵਾਉਣਗੇ!
ਇਨ੍ਹਾਂ ਹਾਲਤਾਂ ਵਿੱਚ ਜੇ ਕਰ ਸਿੱਖ ਮੁਸਲਮਾਨ ਈਸਾਈ ਤੇ ਦਲਿਤ
ਆਦਿਕ ਆਪਣੇ ਵਿਰੁੱਧ ਹੋ ਰਹੇ ਅੱਤਿਆਚਾਰਾਂ ਤੋਂ ਕੁਝ ਛੁਟਕਾਰਾ ਪਾਉਣਾ ਚਾਹੁੰਦੇ ਹਨ ਤੇ
ਆਪਣੀ ਕੌਮ ਦੇ ਕਾਤਲਾਂ ਨੂੰ ਕੋਈ ਸਜਾ ਦਿਵਾਉਣੀ ਚਾਹੁੰਦੇ ਹਨ ਤਾਂ ਉਨ੍ਹਾਂ ਨੂੰ ਕੁਰਸੀ
ਦੇ ਲਾਲਚੀ ਆਪਣੇ ਸਿਆਸੀ ਨੇਤਾਵਾਂ ਤੋਂ ਕੋਈ ਆਸ ਨਹੀਂ ਰੱਖਣੀ ਚਾਹੀਦੀ ਸਗੋਂ ਉਹ ਸਾਰੇ
ਇੱਕ ਪਲੇਟਫਾਰਮ ’ਤੇ ਇਕੱਠੇ ਹੋ ਕੇ ਕੋਈ ਐਸਾ ਫੈਸਲਾ ਕਰਨ ਜਿਹੜਾ ਸਤਾਧਾਰੀਆਂ ਨੂੰ; ਕਾਤਲਾਂ
ਨੂੰ ਸਜਾਵਾਂ ਦੇਣ ਲਈ ਮਜ਼ਬੂਰ ਕਰ ਦੇਵੇ। ਇੱਕ ਫੈਸਲਾ ਇਹ ਵੀ ਹੋ ਸਕਦਾ ਹੈ ਕਿ ਹੁਣੇ ਹੁਣੇ
ਦੇਸ਼ ਦੇ ਵੋਟਰਾਂ ਨੂੰ ‘ਰਾਈਟ ਟੂ ਰੀਜੈਕਟ’ ਕਰਨ ਦਾ ਆਪਣਾ ਹੱਕ ਇਸਤੇਮਾਲ ਕਰਕੇ ਆਪਣੀ
ਇੱਕਮੁਠਤਾ ਦਾ ਸਬੂਤ ਦੇਣ। ਜੇ ਇਸ ਤਰ੍ਹਾਂ ਕਰਕੇ ਇਹ ਸਾਰੇ ਆਪਣੀ ਇੱਕਮੁਠਤਾ ਵਿਖਾਉਣ
ਵਿੱਚ ਸਫਲ ਹੋ ਜਾਂਦੇ ਹਨ, ਤਾਂ ਕੋਈ ਕਾਰਣ ਨਹੀਂ ਹੈ, ਕਿ ਸਤਾਧਾਰੀਆਂ ਨੂੰ ਘੱਟਗਿਣਤੀ ਨੂੰ
ਇਨਸਾਫ ਦੇਣ ਲਈ ਮਜਬੂਰ ਨਾ ਹੋਣਾ ਪਵੇ। ਜੇ ਸੌਦਾ ਸਾਧ ਵਰਗਾ ਡੇਰੇਦਾਰ ਆਪਣੇ ਸ਼੍ਰਧਾਲੂਆਂ
ਨੂੰ ਵੋਟ ਬੈਂਕ ਵਜੋਂ ਵਰਤ ਕੇ ਕਾਂਗਰਸ, ਭਾਜਪਾ, ਬਾਦਲ ਦਲ ਆਦਿਕ ਸਾਰੀਆਂ ਹੀ ਸਿਆਸੀ
ਪਾਰਟੀਆਂ ਨੂੰ ਆਪਣੀਆਂ ਉਂਗਲੀਆਂ ’ਤੇ ਨਚਾਉਣ ਵਿੱਚ ਸਫਲ ਹੋ ਰਿਹਾ ਹੈ, ਤਾਂ ਕੋਈ ਕਾਰਣ
ਨਹੀਂ ਕਿ ਸਿੱਖ ਮੁਸਲਮਾਨ ਈਸਾਈ ਤੇ ਦਲਿਤਾਂ ਦਾ ਜਥੇਬੰਦਕ ਇਕੱਠ ਆਪਣੀਆਂ ਕੌਮਾਂ ਲਈ
ਇਨਸਾਫ ਨਾ ਲੈ ਸਕਣ।
