Main News Page

ਨਵੀਂ ਦਿੱਲੀ, (2 ਅਪ੍ਰੈਲ 2014):- ਆਮ ਆਦਮੀ ਪਾਰਟੀ ਦੇ ਮੁਖੀ ਅਰਵਿੰਦ ਕੇਜਰੀਵਾਲ ਨੇ ਵਾਰਾਨਸੀ ਲੋਕ ਸਭਾ ਹਲਕੇ ‘ਚ ਨਰਿੰਦਰ ਮੋਦੀ ਨੂੰ ਹਰਾਉਣ ਦਾ ਭਰੋਸਾ ਪ੍ਰਗਟ ਕਰਦਿਆਂ ਕਿਹਾ ਹੈ ਕਿ ਉਨ੍ਹਾਂ ਸੁਰੱਖਿਅਤ ਸੀਟ ਨਹੀਂ ਚੁਣੀ ਕਿਉਂਕਿ ਉਨ੍ਹਾਂ ਦਾ ਮੁੱਖ ਟੀਚਾ ਭਾਜਪਾ ਦੇ ਪ੍ਰਧਾਨ ਮੰਤਰੀ ਅਹੁਦੇ ਦੇ ਉਮੀਦਵਾਰ ਨੂੰ ਹਰਾਉਣਾ ਹੈ।

ਕੇਜਰੀਵਾਲ ਨੇ ਕਿਹਾ, ‘ਮੈਂ ਵਾਰਾਨਸੀ ਤੋਂ ਲੜ ਰਿਹਾ ਹਾਂ ਕਿਉਂਕਿ ਮੈਂ ਮੋਦੀ ਨੂੰ ਹਰਾਉਣਾ ਚਾਹੁੰਦਾ ਹਾਂ ਅਤੇ ਕੁਮਾਰ ਵਿਸ਼ਵਾਸ ਰਾਹੁਲ ਗਾਂਧੀ ਨੂੰ ਅਮੇਠੀ ਵਿਚ ਹਰਾਏਗਾ। ਅਸੀਂ ਜਿੱਤਣ ਅਤੇ ਸੰਸਦ ਵਿਚ ਪੁੱਜਣ ਲਈ ਸੁਰੱਖਿਅਤ ਸੀਟਾਂ ਨਹੀਂ ਚੁਣੀਆਂ।’

ਜਦ ਮੀਡੀਆ ਰੀਪੋਰਟਾਂ ਦੇ ਹਵਾਲੇ ਨਾਲ ਪੁਛਿਆ ਗਿਆ ਕਿ ਉਹ ਨਰਿੰਦਰ ਮੋਦੀ ਦੁਆਰਾ ਗੈਸ ਕੀਮਤਾਂ ਨਾ ਵਧਾਉਣ ਦਾ ਫ਼ੈਸਲਾ ਕਰਨ ‘ਤੇ ਭਾਜਪਾ ਵਿਚ ਸ਼ਾਮਲ ਹੋ ਸਕਦੇ ਹਨ ਤਾਂ ਉਨ੍ਹਾਂ ਕਿਹਾ ਕਿ ਉਹ ਇਨ੍ਹਾਂ ਪਾਰਟੀਆਂ ਵਿਚ ਕਦੇ ਵੀ ਸ਼ਾਮਲ ਨਹੀਂ ਹੋਣਗੇ ਅਤੇ ਉਨ੍ਹਾਂ ਦੇ ਬਿਆਨ ਦੇ ਗ਼ਲਤ ਅਰਥ ਕੱਢੇ ਗਏ ਹਨ। ਰਾਜਧਾਨੀ ਵਿਚ ਤੀਜੇ ਦਿਨ ਰੋਡ ਸ਼ੋਅ ਕਰਦਿਆਂ ਉਨ੍ਹਾਂ ਲੋਕਾਂ ਨੂੰ ਉਨ੍ਹਾਂ ‘ਤੇ ਗੁਜਰਾਤ ਅਤੇ ਹਰਿਆਣੇ ਵਿਚ ਹੋਏ ਹਮਲਿਆਂ ਦੀ ਯਾਦ ਦਿਵਾਈ ਅਤੇ ਕਿਹਾ ਕਿ ਵਾਰਾਨਸੀ ਵਿਚ ਉਸ ਉਤੇ ਆਂਡੇ ਸੁੱਟੇ ਗਏ ਸਨ।

ਅੱਜ ਰੋਡ ਸ਼ੋਆਂ ਦੌਰਾਨ ਲੋਕਾਂ ਦੀ ਭਾਰੀ ਭੀੜ ਵੇਖਣ ਨੂੰ ਮਿਲੀ। ਲੋਕਾਂ ਦੇ ਜ਼ਬਰਦਸਤ ਹੁੰਗਾਰੇ ਨੂੰ ਵੇਖਦਿਆਂ ਉਨ੍ਹਾਂ ਕਾਂਗਰਸ ਅਤੇ ਭਾਜਪਾ ‘ਤੇ ਹੱਲਾ ਬੋਲਿਆ ਅਤੇ ਕਿਹਾ, ‘ਉਹ ਕਹਿੰਦੇ ਹਨ ਕਿ ਮੈਂ ਭੱਜ ਗਿਆ ਹਾਂ, ਮੈਂ ਪਾਕਿਸਤਾਨ ਨਹੀਂ ਭੱਜਿਆ। ਮੈਂ ਇਥੇ ਹੀ ਰਹਾਂਗਾ ਅਤੇ ਤੁਹਾਨੂੰ ਪ੍ਰੇਸ਼ਾਨ ਕਰਦਾ ਰਹਾਂਗਾ।’ ਉਹ ਸਥਾਨਕ ਉਮੀਦਵਾਰ ਰਾਜਮੋਹਨ ਗਾਂਧੀ ਨਾਲ ਖੁਲ੍ਹੀ ਜੀਪ ਵਿਚ ਸਵਾਰ ਸਨ।

ਸਥਾਨਕ ਮੁੱਦੇ ਚੁੱਕਦਿਆਂ ਉਨ੍ਹਾਂ ਕਿਹਾ ਕਿ ਕਾਂਗਰਸ ਅਤੇ ਭਾਜਪਾ ਨੇ ਪਾਣੀ ਅਤੇ ਬਿਜਲੀ ‘ਤੇ ਸਬਸਿਡੀ ਰੱਦ ਕਰ ਦਿਤੀ ਹੈ। ਇਨ੍ਹਾਂ ਦੋਹਾਂ ਪਾਰਟੀਆਂ ਨੇ ਗਠਜੋੜ ਕੀਤਾ ਹੋਇਆ ਹੈ। ਰੋਡ ਸ਼ੋਅ ਦੌਰਾਨ ਲੋਕ ਅਪਣੇ ਘਰਾਂ ਦੀਆਂ ਤਾਕੀਆਂ ਵਿਚੋਂ ਹੱਥ ਅਤੇ ਝੰਡੇ ਹਿਲਾ ਕੇ ਕੇਜਰੀਵਾਲ ਦਾ ਸਵਾਗਤ ਕਰ ਰਹੇ ਸਨ। ਔਰਤਾਂ ਨੇ ‘ਆਰਤੀ’ ਕੀਤੀ ਅਤੇ ਕਈਆਂ ਨੇ ਉਸ ਦੇ ਗਲ ਹਾਰ ਪਾਏ।