ਮਸਤੂਆਣਾ, 14
ਅਪਰੈਲ - ਹਲਕਾ ਸੰਗਰੂਰ ਤੋਂ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਭਗਵੰਤ ਮਾਨ ਨੇ ਕਿਹਾ ਕਿ ਜੇ
ਲੋਕ ਚਾਹੁਣ ਤਾਂ ਬੰਦਾ ਅਰਸ਼ ’ਤੇ ਪੁੱਜ ਸਕਦਾ ਹੈ ਤੇ ਜੇ ਨਾ ਚਾਹੁਣ ਤਾਂ ਬੰਦਾ ਫਰਸ਼ ’ਤੇ ਆ ਸਕਦਾ
ਹੈ। ਸ੍ਰੀ ਮਾਨ ਨੇ ਅੱਜ ਇੱਥੇ ਗੁਰਦੁਆਰਾ ਗੁਰਸਾਗਰ ਸਾਹਿਬ ਅਤੇ ਗੁਰਦੁਆਰਾ ਮਾਤਾ ਭੋਲੀ ਕੌਰ ਵਿਖੇ
ਵਿਸਾਖੀ ਦਿਹਾੜੇ ’ਤੇ ਮੱਥਾ ਟੇਕਿਆ।
ਉਨ੍ਹਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਅੱਜ
ਸਵੇਰੇ ਪਿੰਡ ਕੰਮੋਮਾਜਰਾ ਖੁਰਦ ਵਿਖੇ ਜਦੋਂ ਚੋਣ ਪ੍ਰਚਾਰ ਕਰਨ ਲਈ ਜਾ ਰਹੇ ਸਨ ਤਾਂ ਉਨ੍ਹਾਂ ਨੂੰ
15-20 ਵਿਅਕਤੀਆਂ ਵੱਲੋਂ ਕਾਲੀਆਂ ਝੰਡੀਆਂ ਦਿਖਾਈਆਂ ਗਈਆਂ। ਜਦੋਂ ਉਨ੍ਹਾਂ ਨੂੰ ਇਸ ਸਬੰਧੀ ਪੁੱਛਿਆ
ਗਿਆ ਤਾਂ ਉਨ੍ਹਾਂ ਝਗੜਾ ਕਰਨ ਦੀ ਕੋਸ਼ਿਸ਼ ਕੀਤੀ ਅਤੇ ਪੁਲੀਸ ਮੁਲਾਜ਼ਮਾਂ ਦੇ ਆਉਣ ’ਤੇ ਕੁਝ ਵਿਅਕਤੀ
ਭੱਜ ਗਏ ਅਤੇ ਕੁਝ ਪੁਲੀਸ ਨੇ ਫੜ ਲਏ। ਸ੍ਰੀ ਮਾਨ ਨੇ ਕਿਹਾ ਕਿ ਵਿਰੋਧੀ ਪਾਰਟੀਆਂ ਉਨ੍ਹਾਂ ਦੇ ਇਕੱਠ
ਨੂੰ ਦੇਖ ਕੇ ਬੁਖਲਾਹਟ ਵਿੱਚ ਹਨ।
ਅੱਜ ਸਾਰੇ ਦਿਨ ਦੇ ਪ੍ਰੋਗਰਾਮ ਉਨ੍ਹਾਂ ਵਿਅਕਤੀਆਂ ਵੱਲੋਂ ਖਲਲ
ਪਾਉਣ ਕਰਕੇ ਰੱਦ ਕਰਨੇ ਪਏ। ਇਸ ਕਾਰਨ ਉਨ੍ਹਾਂ ਅੱਜ ਮਸਤੂਆਣਾ ਸਾਹਿਬ ਵਿਖੇ ਤਕਰੀਬਨ ਸਵਾ ਘੰਟਾ
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਹਾਜ਼ਰੀ ਭਰੀ ਅਤੇ ਕੀਰਤਨ ਦਾ ਆਨੰਦ ਮਾਣਿਆ। ਜਦੋਂ ਉਨ੍ਹਾਂ ਨੂੰ
ਤਿੰਨ ਵਜੇ ਤੋਂ ਬਾਅਦ ਦੇ ਪ੍ਰੋਗਰਾਮਾਂ ਵਿੱਚ ਚੋਣ ਪ੍ਰਚਾਰ ਕਰਨ ਲਈ ਪੁੱਛਿਆ ਗਿਆ ਤਾਂ ਉਨ੍ਹਾਂ
ਕਿਹਾ ਕਿ ਅੱਜ ਵਿਰੋਧੀ ਪਾਰਟੀਆਂ ਦੇ ਵਿਅਕਤੀਆਂ ਵੱਲੋਂ ਚੋਣ ਪ੍ਰਚਾਰ ਵਿੱਚ ਰੁਕਾਵਟਾਂ ਪਾਈਆਂ ਗਈਆਂ
ਸਨ ਇਸ ਲਈ ਅੱਜ ਉਨ੍ਹਾਂ ਇੱਥੇ ਮੱਥਾ ਟੇਕ ਕੇ ਅਰਦਾਸ ਕੀਤੀ ਹੈ ਅਤੇ ਅਗਲੇ ਪ੍ਰੋਗਰਾਮ 15 ਅਪਰੈਲ
ਤੋਂ ਸਵੇਰੇ ਸ਼ੁਰੂ ਕਰਨਗੇ।
ਇਸ ਮੌਕੇ ਗੁਰਦੁਆਰਾ ਗੁਰ ਸਾਗਰ ਮਸਤੂਆਣਾ ਸਾਹਿਬ ਵਿਖੇ ਪ੍ਰਬੰਧਕਾਂ
ਨੇ ਸ੍ਰੀ ਮਾਨ ਅਤੇ ਉਨ੍ਹਾਂ ਦੀ ਪਤਨੀ ਇੰਦਰਪ੍ਰੀਤ ਕੌਰ ਦਾ ਸਿਰੋਪਾਉ ਦੇ ਕੇ ਸਨਮਾਨ ਵੀ ਕੀਤਾ। ਇਸ
ਮੌਕੇ ਭਾਈ ਦਰਸ਼ਨ ਸਿੰਘ, ਭਾਈ ਇਕਬਾਲ ਸਿੰਘ ਗੋਸਲ, ਗੁਰਜੰਟ ਸਿੰਘ ਦੁੱਗਾ, ਬਚਨ ਬੇਦਿਲ, ਬੀਬੀ
ਹਰਪ੍ਰੀਤ ਕੌਰ ਮਾਨ, ਗਿਆਨ ਸਿੰਘ ਮਾਨ, ਪ੍ਰਿੰਸ ਭਾਰਦਵਾਜ, ਗੁਰਚਰਨ ਸਿੰਘ ਈਲਵਾਲ ਸਾਬਕਾ ਸਰਪੰਚ,
ਗੁਰਤੇਜ ਮਡਾਹਰ ਅਤੇ ਹੋਰ ਸ਼ਾਮਲ ਸਨ।
