ਅੰਮ੍ਰਿਤਸਰ,
(28 ਅਪ੍ਰੈਲ, ਜਸਬੀਰ ਸਿੰਘ ਪੱਟੀ): ਪੰਜਾਬ ਦੇ ਕੈਬਨਟ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਨੂੰ
ਅੱਜ ਉਸ ਵੇਲੇ ਭਾਰੀ ਰਾਹਤ ਮਿਲੀ ਜਦੋਂ ਉਨ੍ਹਾਂ ਖਿਲਾਫ ਤਖ਼ਤ ਹਜ਼ੂਰ ਸਾਹਿਬ ਵਲੋਂ ਜਾਰੀ
ਤਨਖਾਹੀਆ ਕਰਾਰ ਦੇਣ ਦਾ ਹੁਕਮਨਾਮਾ ਵਾਪਸ ਲੈ ਲਿਆ ਗਿਆ।
ਤਖ਼ਤ ਹਜ਼ੂਰ ਸਾਹਿਬ ਦੇ ਜਥੇਦਾਰ ਵਲੋਂ ਇਹ ਫੈਸਲਾ ਮਜੀਠੀਆ ਵਲੋਂ
ਲਿਖਤੀ ਮੁਆਫ਼ੀ ਮੰਗਣ ਉਪਰੰਤ ਕੀਤਾ ਗਿਆ ਹੈ। ਨਵੇਂ ਜਾਰੀ ਆਦੇਸ਼ ’ਚ ਸਿੰਘ ਸਾਹਿਬ ਵਲੋਂ
ਕਿਹਾ ਗਿਆ ਹੈ ਕਿ ਮਜੀਠੀਆ ਵਲੋਂ ਭੇਜਿਆ ਮੁਆਫੀਨਾਮਾ ਮਿਲ ਗਿਆ ਹੈ।
ਇਸ ’ਚ ਮਜੀਠੀਆ ਨੇ ਕਿਹਾ ਹੈ ਕਿ ਜੋ ਵੀ ਸਿੰਘ ਸਾਹਿਬ ਦਾ ਫੈਸਲਾ
ਹੈ ਉਹ ਸਿਰ ਮੱਥੇ ’ਤੇ ਹੈ। ਇਸ ਲਈ ਮਜੀਠੀਆ ਨੂੰ ਜੋ ਵੀ ਸੇਵਾ ਲਗਾਈ ਜਾਵੇਗੀ, ਉਸ ਨੂੰ
ਪੂਰੀ ਕਰਨ ਉਪਰੰਤ ਉਨ੍ਹਾਂ ਨੂੰ ਮੁਆਫ ਕਰ ਦਿੱਤਾ ਜਾਵੇਗਾ।
ਮਜੀਠੀਆ ਦੇ ਅੰਮ੍ਰਿਤਸਰ ਵਿਖੇ ਇਕ ਚੋਣ ਜਲਸੇ ਨੂੰ ਸੰਬੋਧਨ ਕਰਦੇ
ਹੋਏ ਤੁਕ ਨੂੰ ਤੋੜ ਮਰੋੜ ਕੇ ਪੇਸ਼ ਕਰਨ ਉਪਰੰਤ ਤਖ਼ਤ ਹਜ਼ੂਰ ਸਾਹਿਬ ਵਲੋਂ ਉਨ੍ਹਾਂ ਖਿਲਾਫ
ਐਤਵਾਰ ਨੂੰ ਹੁਕਮਨਾਮਾ ਜਾਰੀ ਕਰ ਦਿੱਤਾ ਗਿਆ ਸੀ ਪਰ ਅੱਜ ਮਜੀਠੀਆ ਵਲੋਂ ਤਖ਼ਤ ਤੇ
ਮੁਆਫ਼ੀਨਾਮਾ ਭੇਜਣ ਉਪਰੰਤ ਉਨ੍ਹਾਂ ਖਿਲਾਫ ਜਾਰੀ ਹੁਕਮਨਾਮਾ ਵਾਪਸ ਲੈ ਲਿਆ ਗਿਆ ਹੈ।
ਇਥੇ ਇਹ ਦੱਸਣਯੋਗ ਹੈ ਕਿ ਆਮ ਤੌਰ ’ਤੇ ਜੋ ਵੀ ਹੁਕਮਨਾਮਾ ਜਾਰੀ
ਹੁੰਦਾ ਹੈ, ਉਹ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਵਲੋਂ ਬਾਕੀ 4 ਤਖ਼ਤਾਂ ਦੇ ਜਥੇਦਾਰਾਂ
ਨਾਲ ਮਿਲ ਕੇ ਸਾਂਝੇ ਤੌਰ ’ਤੇ ਜਾਰੀ ਕੀਤਾ ਜਾਂਦਾ ਹੈ, ਪਰ ਮਜੀਠੀਆ ਵਲੋਂ ਅਕਾਲ ਤਖ਼ਤ ਤੇ
ਪੇਸ਼ ਹੋ ਕੇ ਮੁਆਫੀ ਮੰਗੇ ਜਾਣ ਦੇ ਬਾਵਜੂਦ ਤਖ਼ਤ ਹਜੂਰ ਸਾਹਿਬ ਵਲੋਂ ਹੁਕਮਨਾਮਾ ਜਾਰੀ ਕਰ
ਦਿੱਤਾ ਗਿਆ ਸੀ।
ਇਹ ਵੀ ਜ਼ਿਕਰਯੋਗ ਹੈ ਕਿ ਅਕਾਲ ਤਖਤ ਦੇ ਜਥੇਦਾਰ ਵਲੋਂ ਮਜੀਠੀਆ ਦਾ
ਮੁਆਫੀਨਾਮਾ ਤਾਂ ਸਵੀਕਾਰ ਕਰ ਲਿਆ ਗਿਆ ਹੈ, ਪਰ ਇਸ ਤੇ ਫ਼ੈਸਲਾ ਇਕ ਮਈ ਨੂੰ ਅਗਲੀ ਹੋਣ
ਵਾਲੀ ਪੰਜ ਸਿੰਘ ਸਾਹਿਬਾਨਾਂ ਦੀ ਮੀਟਿੰਗ ’ਚ ਹੀ ਲਿਆ ਜਾਵੇਗਾ। ਇਸ ਮੀਟਿੰਗ ਲਈ ਬਿਕਰਮ
ਮਜੀਠੀਆ ਨੂੰ ਪਹਿਲਾਂ ਹੀ ਤਲਬ ਕੀਤਾ ਜਾ ਚੁੱਕਾ ਹੈ। ਮੀਟਿੰਗ ਵਿਚ ਬਿਕਰਮ ਸਿੰਘ ਮਜੀਠੀਆ
ਵੱਲੋਂ ਦਿੱਤੇ ਗਏ ਮੁਆਫੀਨਾਮੇ ’ਤੇ ਗੰਭੀਰਤਾ ਨਾਲ ਵਿਚਾਰ ਚਰਚਾ ਕੀਤੀ ਜਾਵੇਗੀ।
