ਅੰਮ੍ਰਿਤਸਰ,
21 ਜੂਨ (ਚਰਨਜੀਤ ਸਿੰਘ): ਹਮੇਸ਼ਾ ਵਿਵਾਦਾਂ ਵਿਚ ਘਿਰੇ ਰਹਿਣ ਵਾਲੇ ਤਖ਼ਤ ਸ੍ਰੀ ਹਰਿਮੰਦਰ
ਪਟਨਾ ਸਾਹਿਬ ਦੇ ਹਟਾਏ ਜਾ ਚੁੱਕੇ ਮੁੱਖ ਸੇਵਾਦਾਰ ਗਿਆਨੀ ਇਕਬਾਲ ਸਿੰਘ ਇਕ ਹੋਰ ਨਵੇਂ
ਵਿਵਾਦ ਵਿਚ ਘਿਰ ਗਏ ਹਨ। ਗਿਆਨੀ ਇਕਬਾਲ ਸਿੰਘ ਨੇ, ਸਿੱਖ ਰਹਿਤ ਮਰਿਆਦਾ ਦੀਆਂ ਧੱਜੀਆਂ
ਉਡਾਉਂਦਿਆਂ, ਜੀਵਤ ਪਤਨੀ ਦੇ ਹੁੰਦਿਆਂ ਤੀਜਾ ਵਿਆਹ ਕਰਵਾਇਆ ਸੀ ਤੇ ਗਿਆਨੀ ਇਕਬਾਲ ਸਿੰਘ
ਦੀ ਤੀਜੀ ਪਤਨੀ ਨੇ ਦੋਸ਼ ਲਾਇਆ ਕਿ ਉਸ ਦੀ ਮਾਰ-ਕੁਟਾਈ ਕੀਤੀ ਗਈ ਹੈ।
ਇਸ ਸਬੰਧੀ ਗਿਆਨੀ ਇਕਬਾਲ ਸਿੰਘ ਦੀ ਤੀਜੀ
ਪਤਨੀ ਬੀਬੀ ਬਲਜੀਤ ਕੌਰ ਨੇ ਗਿਆਨੀ ਇਕਬਾਲ ਸਿੰਘ, ਉਸ ਦੇ ਪੁੱਤਰ ਗੁਰਪ੍ਰਸਾਦ ਸਿੰਘ ਤੇ
ਨੂੰਹ ਹਰਲੀਨ ਕੌਰ ਅਤੇ ਪਟਨਾ ਸਾਹਿਬ ਦੇ ਚੌਕ ਥਾਣਾ ਵਿਖੇ 18 ਜੂਨ ਨੂੰ ਇਕ ਐਫ਼.ਆਈ.ਆਰ.
ਨੰਬਰ 93/14 ਦਰਜ ਕਰਵਾਈ ਹੈ। ਇਸ ਸਬੰਧੀ ਬੀਬੀ ਬਲਜੀਤ ਕੌਰ ਨੇ ਕਿਹਾ ਕਿ ਗਿਆਨੀ
ਇਕਬਾਲ ਸਿੰਘ ਨਾਲ ਉਸ ਦਾ ਵਿਆਹ 26 ਜੂਨ, 2003 ਨੂੰ ਦਿੱਲੀ ਵਿਚ ਹੋਇਆ ਸੀ।
ਇਸ ਮੌਕੇ ਬਾਬਾ ਕਰਮਜੀਤ ਸਿੰਘ ਯਮੁਨਾਨਗਰ ਤੇ ਬਾਬਾ ਚਮਕੌਰ ਸਿੰਘ
ਹਾਜ਼ਰ ਸਨ। ਗਿਆਨੀ ਇਕਬਾਲ ਸਿੰਘ ਦਾ
ਪਹਿਲਾ ਵਿਆਹ ਇੰਦਰਜੀਤ ਕੌਰ ਨਾਂ ਦੀ ਔਰਤ ਨਾਲ 14 ਮਈ, 1982 ਨੂੰ ਹੋਇਆ ਸੀ ਜਦਕਿ ਹੁਣ
ਗਿਆਨੀ ਇਕਬਾਲ ਸਿੰਘ ਨੇ ਇਕ ਹੌਰ ਔਰਤ ਕੁਲਵੰਤ ਕੌਰ ਨਾਲ ਘਰ ਵਸਾ ਲਿਆ ਹੈ। ਜੰਮੂ
ਨਿਵਾਸੀ ਬੀਬੀ ਬਲਜੀਤ ਕੌਰ ਨੇ ਦਸਿਆ ਕਿ ਇਕਬਾਲ ਸਿੰਘ ਅਕਸਰ ਉਸ ਦੀ ਮਾਰ-ਕੁਟਾਈ ਕਰ ਕੇ
ਉਸ ਨੂੰ ਘਰ ਤੋਂ ਬਾਹਰ ਕੱਢ ਦਿੰਦਾ ਸੀ। ਹੁਣ ਉਸ ਦੇ ਪੁੱਤਰ ਤੇ ਨੂੰਹ ਨੇ ਵੀ ਰਹਿੰਦੀ
ਕਸਰ ਪੂਰੀ ਕਰ ਦਿਤੀ ਹੈ। ਉਨ੍ਹਾਂ ਦਸਿਆ ਕਿ ਜਦ ਉਹ ਅਪਣੀ ਬੀਮਾਰ ਮਾਂ ਦਾ ਪਤਾ ਲੈਣ ਲਈ
ਜੰਮੂ ਗਈ ਸੀ ਤਾਂ ਉਸ ਦੇ ਕਪੜੇ, ਗਹਿਣੇ ਤੇ ਨਕਦੀ ਕੰਢ ਲਈ ਗਈ।
ਬੀਬੀ ਨੇ ਦਸਿਆ ਕਿ ਇਕਬਾਲ ਸਿੰਘ ਵਿਰੁਧ
ਪੁਲਿਸ ਨੇ ਧਾਰਾ 498 ਏ,323,341,504,379, 406 ਅਤੇ 420 ਦੇ ਤਹਿਤ ਪਰਚਾ ਦਰਜ ਕਰ ਲਿਆ
ਹੈ।
ਤਖ਼ਤ ਪਟਨਾ ਸਾਹਿਬ ਕਮੇਟੀ ਦੀ ਮੀਟਿੰਗ ਅੱਗੇ
ਪਾਈ
ਅੰਮ੍ਰਿਤਸਰ, 21 ਜੂਨ (ਚਰਨਜੀਤ ਸਿੰਘ): ਤਖ਼ਤ ਸ੍ਰੀ ਹਰਿਮੰਦਰ ਜੀ
ਪਟਨਾ ਸਾਹਿਬ ਕਮੇਟੀ ਦੇ ਸਕੱਤਰ ਸ. ਚਰਨਜੀਤ ਸਿੰਘ ਨੇ ਦਸਿਆ ਕਿ ਤਖ਼ਤ ਸਾਹਿਬ ਕਮੇਟੀ ਦੀ
ਅੱਜ 22 ਜੂਨ ਨੂੰ ਹੋਣ ਵਾਲੀ ਮੀਟਿੰਗ ਅਕਾਲ ਤਖ਼ਤ ਸਾਹਿਬ ਦੇ ਮੁੱਖ ਸੇਵਾਦਾਰ ਦੇ ਹੁਕਮ
ਤੋਂ ਬਾਅਦ ਅੱਗੇ ਪਾ ਦਿਤੀ ਗਈ ਹੈ। ਇਸ
ਪੱਤਰਕਾਰ ਨਾਲ ਫ਼ੋਨ 'ਤੇ ਗੱਲ ਕਰਦਿਆਂ ਚਰਨਜੀਤ ਸਿੰਘ ਨੇ ਕਿਹਾ ਕਿ ਗਿਆਨੀ ਗੁਰਬਚਨ ਸਿੰਘ
ਵਾਰ-ਵਾਰ ਸਾਨੂੰ ਹਦਾਇਤਾਂ ਜਾਰੀ ਕਰ ਰਹੇ ਹਨ ਕਿ ਗਿਆਨੀ ਇਕਬਾਲ ਸਿੰਘ ਮਾਮਲੇ ਤੇ ਕਮੇਟੀ
ਅਜੇ ਕੋਈ ਫ਼ੈਸਲਾ ਨਾ ਕਰੇ। ਉਨ੍ਹਾਂ ਕਿਹਾ ਕਿ ਗਿਆਨੀ ਇਕਬਾਲ ਸਿੰਘ ਦੀ ਤੀਜੀ ਪਤਨੀ
ਨੇ ਵੀ ਉਨ੍ਹਾਂ 'ਤੇ ਕੇਸ ਕੀਤਾ ਹੋਇਆ ਹੈ, ਇਸ ਦੀ ਜਾਣਕਾਰੀ ਗਿਆਨੀ ਗੁਰਬਚਨ ਸਿੰਘ ਨੂੰ
ਦਿਤੀ ਗਈ ਹੈ।