* ਹਰਿਆਣਾ ਗੁਰਦੁਆਰਾ ਕਮੇਟੀ ਬਾਰੇ
ਬਿੱਲ ਬਣਿਆ ਕਾਨੂੰਨ - ਰਾਜਪਾਲ ਨੇ ਦਿੱਤੀ ਮਨਜ਼ੂਰੀ
ਚੰਡੀਗੜ੍ਹ,
14 ਜੁਲਾਈ (ਜੀ.ਸੀ. ਭਾਰਦਵਾਜ/ ਰਾਜ ਕੁਮਾਰ ਭਾਰਦਵਾਜ):
ਹਰਿਆਣਾ ਵਿਧਾਨ ਸਭਾ ਵਲੋਂ ਪਾਸ ਕੀਤੇ ਬਿਲ ਨੂੰ, ਦੋ ਦਿਨ ਮਗਰੋਂ ਹੀ, ਰਾਜਪਾਲ ਜਗਨਨਾਥ
ਪਹਾੜੀਆ ਵਲੋਂ ਮਨਜ਼ੂਰੀ ਦੇਣ ਉਪ੍ਰੰਤ ਸੂਬੇ ਦੀ ਵਖਰੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦਾ ਐਕਟ
ਹੋਂਦ ਵਿਚ ਆ ਗਿਆ ਹੈ। ਹਰਿਆਣਾ ਸਰਕਾਰ ਨੇ ਅੱਜ ਦੀ ਤਰੀਕ ਵਿਚ ਇਸ ਦਾ
ਨੋਟੀਫ਼ੀਕੇਸ਼ਨ ਵੀ ਜਾਰੀ ਕਰਨ ਦਾ ਮਨ ਬਣਾਇਆ ਹੈ।
ਅੱਜ ਇਥੇ ਪ੍ਰੈੱਸ ਕਲੱਬ ਵਿਚ ਮੁੱਖ ਮੰਤਰੀ
ਭੂਪਿੰਦਰ ਸਿੰਘ ਹੁੱਡਾ ਨੇ ਪੱਤਰਕਾਰਾਂ ਨੂੰ ਦਸਿਆ ਕਿ ਕਾਂਗਰਸ ਸਰਕਾਰ ਦਾ ਦ੍ਰਿੜ੍ਹ ਇਰਾਦਾ
ਹੈ ਕਿ 41 ਮੈਂਬਰੀ ਐਡਹਾਕ ਕਮੇਟੀ ਪਹਿਲਾਂ ਹੋਂਦ ਵਿਚ ਲਿਆ ਕੇ, ਗੁਰਦਵਾਰਾ ਚੋਣ ਕਮਿਸ਼ਨ
ਸਥਾਪਤੀ ਉਪ੍ਰੰਤ, ਹਰਿਆਣਾ ਦੇ ਸਿੱਖ ਵੋਟਰਾਂ ਦੀਆਂ ਵੋਟਾਂ ਬਣਾਈਆਂ ਜਾਣ ਅਤੇ ਸਾਲ ਦੇ
ਅੰਦਰ-ਅੰਦਰ ਸ਼ਨਾਖਤੀ ਫ਼ੋਟੋ ਕਾਰਡ ਬਣਾ ਕੇ 40 ਵਾਰਡਾਂ ਵਿਚ ਚੋਣਾਂ ਵੀ ਕਰਵਾ ਦਿਤੀਆਂ ਜਾਣ।
ਮੁੱਖ ਮੰਤਰੀ ਨੇ ਸਪੱਸ਼ਟ ਕੀਤਾ ਕਿ ਵਿਧਾਨ ਸਭਾ ਵਿਚ 11 ਜੁਲਾਈ ਨੂੰ
ਪਾਸ ਕੀਤੇ ਹਰਿਆਣਾ ਗੁਰਦਵਾਰਾ ਪ੍ਰਬੰਧਕ ਬਿਲ-2014 ਨੂੰ ਸਿਰਫ਼ ਰਾਜਪਾਲ ਦੀ ਪ੍ਰਵਾਨਗੀ ਦੀ
ਲੋੜ ਹੈ, ਅਤੇ ਇਸ ਨੂੰ ਹੁਣ ਰਾਸ਼ਟਰਪਤੀ ਕੋਲ ਭੇਜਣ ਦੀ ਕੋਈ ਲੋੜ ਨਹੀਂ। ਹੁੱਡਾ ਦਾ ਕਹਿਣਾ
ਸੀ ਕਿ ਇਹ ਐਕਟ ਭਾਵੇਂ ਗੁਰਦਵਾਰਿਆਂ ਦੀ ਸਾਂਭ ਸੰਭਾਲ ਬਾਰੇ ਬਣਾਇਆ ਗਿਆ ਹੈ, ਪਰ ਸਿੱਖਾਂ
ਦੀਆਂ ਭਾਵਨਾਵਾਂ ਨਾਲ ਕੋਈ ਖਿਲਵਾੜ ਨਹੀਂ ਕੀਤਾ, ਸਗੋਂ ਉਨ੍ਹਾਂ ਵਿਚ ਏਕਤਾ ਲਿਆਉਣ ਵਲ ਇਕ
ਵੱਡਾ ਕਦਮ ਹੈ।
ਮੁੱਖ ਮੰਤਰੀ ਨੇ ਸਪੱਸ਼ਟ ਕੀਤਾ ਕਿ ਆਉਂਦੀਆਂ ਵਿਧਾਨ ਸਭਾ ਚੋਣਾਂ
ਵਿਚ ਸਿੱਖ ਵੋਟਰਾਂ ਤੋਂ ਲਾਹਾ ਲੈਣ ਦੀ ਕੋਈ ਯੋਜਨਾ ਨਹੀਂ ਹੈ, ਸਗੋਂ ਇਹ ਤਾਂ ਉਨ੍ਹਾਂ ਦੀ
ਮੰਗ ਪਿਛਲੇ 10 ਸਾਲਾਂ ਤੋਂ ਚਲੀ ਆ ਰਹੀ ਸੀ। ਉਨ੍ਹਾਂ ਕਿਹਾ ਕਿ 2004 ਤੇ 2009 ਦੀਆਂ
ਚੋਣਾਂ ਵੇਲੇ, ਕਾਂਗਰਸ ਦੇ ਚੋਣ ਮੈਨੀਫ਼ੈਸਟੋ ਵਿਚ, ਵਖਰੀ ਕਮੇਟੀ ਬਾਰੇ ਵਾਅਦਾ ਕੀਤਾ ਸੀ
ਅਤੇ ਪਿਛਲੇ ਸਮੇਂ ਵਿਚ ਮੰਤਰੀ ਹਰਮੋਹਿੰਦਰ ਸਿੰਘ ਚੱਠਾ, ਰਣਦੀਪ ਸਿੰਘ ਸੁਰਜੇਵਾਲਾ ਅਤੇ
ਐਡਵੋਕੇਟ ਜਨਰਲ ਸਮੇਤ ਕਾਨੂੰਨਦਾਨਾਂ ਵਲੋਂ ਇਸ ਗੰਭੀਰ ਮਾਮਲੇ ਨੂੰ ਵਿਚਾਰਿਆ ਜਾਣਾ ਜ਼ਰੂਰੀ
ਸੀ। ਹੁੱਡਾ ਨੇ ਦਸਿਆ ਕਿ ਹੁਣ ਕਮੇਟੀ ਬਣਾਉਣ ਵਿਚ ਕੋਈ ਅੜਚਨ ਨਹੀਂ ਰਹੇਗੀ ਅਤੇ ਨਾ ਹੀ
ਇਸ ਐਕਟ ਨੂੰ ਹੁਣ ਰੱਦ ਕੀਤਾ ਜਾ ਸਕਦਾ ਹੈ।
ਪੱਤਰਕਾਰਾਂ ਵਲੋਂ ਸਹਿਜਧਾਰੀ ਸਿੱਖਾਂ ਦਾ ਮੁੱਦਾ ਅਤੇ ਵੋਟ ਦਾ ਹੱਕ
ਅਣਗੌਲਿਆਂ ਕਰਨ ਸਬੰਧੀ ਪੁੱਛੇ ਸਵਾਲਾਂ ਦਾ ਜਵਾਬ ਦਿੰਦਿਆਂ, ਭੁਪਿੰਦਰ ਸਿੰਘ ਹੁੱਡਾ ਨੇ
ਕਿਹਾ ਕਿ 2003 ਵਿਚ ਇਸ ਵਰਗ ਦੇ ਸਿੱਖਾਂ ਦੀਆਂ ਵੋਟਾਂ ਕੱਟਣ ਦਾ ਮਾਮਲਾ ਪਹਿਲਾਂ ਹਾਈ
ਕੋਰਟ ਵਿਚ ਫਿਰ ਸੁਪਰੀਮ ਕੋਰਟ ਵਿਚ ਬਕਾਇਆ ਪਿਆ ਹੈ ਅਤੇ ਇਸ ਨਵੇਂ ਬਿਲ ਵਿਚ ਹਰ ਪਹਿਲੂ
'ਤੇ ਕਾਨੂੰਨੀ ਵਿਚਾਰ ਕੀਤਾ ਗਿਆ ਸੀ। ਉਨ੍ਹਾਂ ਕਿਹਾ ਜਦੋਂ ਵੀ ਸੁਪਰੀਮ ਕੋਰਟ ਦਾ ਫ਼ੈਸਲਾ
ਆ ਜਾਵੇਗਾ, ਸਾਡੀ ਸਰਕਾਰ, ਇਸ ਨੂੰ ਸਹਿਜਧਾਰੀ ਸਿੱਖਾਂ ਦੇ ਹੱਕ ਵਿਚ ਵੋਟ ਦੇਣ ਦਾ ਹੱਕ
ਦੇ ਦੇਵੇਗੀ।
ਹਰਿਆਣਾ ਵਿਚ ਸਥਿਤ ਗੁਰਦਵਾਰਿਆਂ ਦੇ ਪ੍ਰਬੰਧ ਦਾ ਕੰਟਰੋਲ, ਜ਼ਮੀਨ
ਜਾਇਦਾਦਾਂ ਦਾ ਹੱਥ ਵਿਚ ਲੈਣਾ ਅਤੇ ਦਾਨ ਜਾਂ ਗੋਲਕ ਦੀ ਆਮਦਨ ਨੂੰ ਨਵੀਂ ਕਮੇਟੀ ਦੇ ਹੱਥ
ਵਿਚ ਦੇਣ ਸਮੇਂ ਕਿਸੇ ਝਗੜੇ ਦੀ ਨੌਬਤ ਆਉਣ ਬਾਰੇ ਮੁੱਖ ਮੰਤਰੀ ਨੇ ਭਰੋਸਾ ਦਿਤਾ ਅਤੇ
ਸਿੱਖ ਕੌਮ ਨੂੰ ਅਪੀਲ ਕੀਤੀ ਕਿ ਇਹ ਸਾਰਾ ਕੁੱਝ ਸੁੱਖ-ਸ਼ਾਂਤੀ ਨਾਲ ਨਿਬੇੜ ਲਿਆ ਜਾਵੇ।