ਪਿਛਲੇ
ਸਾਲ 2013 'ਚ ਮੈਂ ਜਦੋਂ ਇੰਡੀਆ ਦੇ ਪ੍ਰਚਾਰਕ ਦੌਰੇ ਦੌਰਾਣ ਦਿੱਲੀ ਦੇ ਕਿਸੇ ਗੁਰਦਵਾਰੇ
ਵਿੱਚ ਗੁਰਮਤਿ ਵਿਚਾਰ ਕਰਕੇ ਫਤਿਹ ਬੁਲਾਈ, ਤਾਂ ਅਜੇ ਮੈਂ ਸਟੇਜ 'ਤੇ ਹੀ ਸੀ ਕਿਸੇ ਅਖੌਤੀ
ਸਾਧ ਡਿਪਾਰਟਮੈਂਟ ਦੇ ਚੇਲੇ ਦੇ ਬੜੀਆਂ ਮਿਰਚਾਂ ਲੜੀਆਂ ਕਿ ਬਾਲੇ ਦੀਆਂ ਕਹਾਣੀਆਂ ਸੁਣਾ
ਕੇ ਤਾਂ ਅਸੀਂ ਰੋਟੀ-ਪਾਣੀ ਦਾ ਪ੍ਰਬੰਧ ਕਰਦੇ ਹਾਂ, ਪਰ ਇਹ ਭਾਈ ਸਟੇਜ 'ਤੇ ਬੈਠਾ ਸਾਡੀ
ਰੋਟੀ ਵਿੱਚ ਲੱਤ ਮਾਰਨ ਦੀ ਕੋਸਿਸ਼ ਕਰ ਰਿਹਾ ਹੈ।
ਬਸ ਫਿਰ ਕੀ ਹੋਣਾ ਸੀ! ਆਪਣੇ ਜਜ਼ਬਾਤਾਂ 'ਤੇ ਕਾਬੂ ਨਾ ਕਰ ਸਕਿਆ ਅਤੇ
ਬਾਲੇ ਵਾਲਾ ਸਿਆਪਾ ਮੇਰੇ ਸਟੇਜ ਤੋਂ ਹੇਠਾਂ ਉਤਰਣ ਤੋਂ ਪਹਿਲਾ ਮੇਰੇ ਅੱਗੇ ਪਾ ਕੇ ਬੈਠ
ਗਿਆ। ਹਾਲਾਂਕਿ ਇਸ ਗੁਰਦਵਾਰੇ ਵਿੱਚ ਮੈਂ ਸੈਮੀਨਾਰ ਨਹੀਂ, ਸਗੋਂ ਕਥਾ ਦੇ ਰੂਪ ਵਿੱਚ
ਗੁਰਮਤਿ ਵਿਚਾਰ ਕਰਨ ਲਈ ਗਿਆ ਸੀ, ਪਰ ਕਿਉਂਕਿ ਹੁਣ ਸਵਾਲ ਹਾਲ ਵਿੱਚ ਬੈਠੀ ਸੰਗਤ ਤੱਕ ਚਲਾ
ਗਿਆ ਸੀ, ਇਸ ਲਈ ਸੰਖੇਪ ਵਿੱਚ ਮੈਂਨੂੰ ਚੌਂਕੜਾ ਮਾਰ ਕੇ ਇਸ ਵਿਹਲੜ ਦੀ ਤਸੱਲੀ ਕਰਵਾਉਣੀ
ਪਈ।
ਵੈਸੇ ਬਾਲੇ ਦੇ ਮੁਰੀਦ ਬਹੁਤੇ ਅਖੌਤੀ
ਸਾਧ ਲਾਣੇ ਵਾਲੇ ਹੀ ਹਨ, ਕਿਉਂਕਿ ਬਾਲਾ ਸਾਖੀ ਦੀਆਂ ਜੱਬਲੀਆਂ ਨਾਲ ਇਨ੍ਹਾਂ ਦੀ
ਰੋਟੀ-ਪਾਣੀ ਦਾ ਪ੍ਰਬੰਧ ਜੁੜਿਆ ਹੋਇਆ ਹੈ ਅਤੇ ਇਹ ਹੀ ਵੱਡਾ ਕਾਰਣ ਹੈ, ਜੇ ਕੋਈ
ਭਾਈ ਬਲਦੀਪ ਸਿੰਘ ਰਾਮੂੰਵਾਲੀਆ
ਵਰਗਾ ਜਾਗਰੂਕ ਸੱਜਣ ਇਸ ਅਖੌਤੀ ਸਾਖੀ ਦੀ ਅਸਲੀਅਤ ਸੰਗਤਾਂ ਦੇ ਸਾਹਮਣੇ ਲੈ ਕੇ ਆਉਂਦਾ
ਹੈ, ਤਾਂ ਇਹ ਗੁੰਡਾਗਰਦੀ 'ਤੇ ਉੱਤਰ ਆਉਂਦੇ ਹਨ।
ਇਸੇ ਨੀਤੀ ਤਹਿਤ ਇਹ ਭਾਈ ਬਲਦੀਪ ਸਿੰਘ ਨੂੰ ਬੇਵਜ੍ਹਾ ਪੁਲਿਸ ਅਤੇ ਅਦਾਲਤੀ ਕੇਸਾਂ ਵਿੱਚ
ਉਲਝਾਉਣ ਦੀ ਕੋਸਿਸ਼ ਕਰ ਰਹੇ ਹਨ। ਸਾਰੇ ਪੰਥ ਦਰਦੀਆਂ ਨੂੰ ਬੇਨਤੀ ਹੈ ਕਿ ਇਸ ਵੀਰ ਦਾ ਵੱਧ
ਤੋਂ ਵੱਧ ਸਾਥ ਦੇਣ, ਕਿਉਂਕਿ ਇਹ ਨਿੱਜੀ ਲੜਾਈ ਦਾ ਮਸਲਾ ਨਹੀਂ, ਸਗੋਂ ਇਹ ਇੱਕ
ਵਿਚਾਰਧਾਰਿਕ ਜੰਗ ਹੈ।
ਭਾਈ ਬਲਦੀਪ ਸਿੰਘ ਰਾਮੂੰਵਾਲੀਆ ਜੀ ਨਾਲ
ਰੇਡਿਓ "ਸਿੰਘ ਨਾਦ" 'ਤੇ ਛੇਤੀ ਹੀ ਇਸ ਵਿਸ਼ੇ 'ਤੇ ਗਲਬਾਤ ਕੀਤੀ ਜਾਵੇਗੀ, ਜਿਸ ਦੀ
ਜਾਣਕਾਰੀ ਛੇਤੀ ਹੀ ਦਿੱਤੀ ਜਾਵੇਗੀ।