ਨਿਊ
ਯਾਰਕ, 9 ਅਗੱਸਤ : ਸਿੱਖ ਨੌਜਵਾਨ ਨੂੰ ਟਰੱਕ ਨਾਲ ਘੜੀਸੇ ਜਾਣ ਤੋਂ ਕੁੱਝ ਦਿਨ ਬਾਅਦ ਹੀ
ਇਕ ਹੋਰ ਸਿੱਖ ਅਤੇ ਉਸ ਦੀ ਮਾਤਾ 'ਤੇ ਨਸਲੀ ਹਮਲਾ ਹੋਇਆ ਹੈ। ਹਮਲਾ ਕਰਨ ਵਾਲੇ ਮੁੰਡਿਆਂ
ਨੇ ਸਿੱਖ ਨੂੰ 'ਓਸਾਮਾ ਬਿਨ ਲਾਦੇਨ' ਦਸਦਿਆਂ ਉਸ ਦੀ ਕੁੱਟਮਾਰ ਕੀਤੀ ਜਿਸ ਕਾਰਨ ਸਿੱਖਾਂ
ਅੰਦਰ ਕਾਫ਼ੀ ਗੁੱਸਾ ਅਤੇ ਰੋਹ ਹੈ। ਘਟਨਾ 7 ਅਗੱਸਤ ਦੀ ਰਾਤ ਦੀ ਹੈ।
ਹਮਲੇ ਦਾ ਸ਼ਿਕਾਰ ਹੋਏ ਭੌਤਿਕ ਵਿਗਿਆਨੀ ਸਿੱਖ ਨੇ ਦਸਿਆ ਕਿ ਉਹ ਅਤੇ
ਉਸ ਦੀ ਮਾਂ ਪੱਗਾਂ ਬੰਨ੍ਹਦੇ ਹਨ ਅਤੇ ਅਪਣੇ ਅਕੀਦੇ ਮੁਤਾਬਕ ਵਾਲ ਵੀ ਨਹੀਂ ਕਟਾਉਂਦੇ। ਉਸ
ਨੇ ਦਸਿਆ, '7 ਅਗੱਸਤ ਦੀ ਰਾਤ ਨੂੰ ਕਰੀਬ 10 ਮੁੰਡੇ ਉਨ੍ਹਾਂ ਨੂੰ ਘੇਰ ਕੇ 'ਓਸਾਮਾ ਬਿਨ
ਲਾਦੇਨ' ਕਹਿਣ ਲੱਗੇ। ਮੁੰਡਿਆਂ ਨੇ ਸਾਨੂੰ ਵਾਪਸ ਅਪਣੇ ਦੇਸ਼ ਚਲੇ ਜਾਣ ਲਈ ਕਿਹਾ। ਅਸੀਂ
ਉਨ੍ਹਾਂ ਨੂੰ ਬਹੁਤ ਰੋਕਿਆ ਪਰ ਉਨ੍ਹਾਂ ਮੇਰੇ ਚਿਹਰੇ ਅਤੇ ਗਰਦਨ 'ਤੇ ਮੁੱਕੇ ਮਾਰੇ। ਇਸ
ਤੋਂ ਇਲਾਵਾ ਉਨ੍ਹਾਂ ਸਾਡੇ ਉਤੇ ਬੋਤਲ ਸੁਟਣ ਦੀ ਵੀ ਕੋਸ਼ਿਸ਼ ਕੀਤੀ ਅਤੇ ਫਿਰ ਮੌਕੇ ਤੋਂ
ਦੌੜ ਗਏ।'
ਇਸ ਸ਼ਖ਼ਸ ਨੇ ਅਪਣੇ ਨਾਮ ਦਾ ਪ੍ਰਗਟਾਵਾ ਨਹੀਂ ਕੀਤਾ ਹੈ ਅਤੇ ਕਿਹਾ
ਹੈ ਕਿ ਉਨ੍ਹਾਂ ਮੁੰਡਿਆਂ ਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਕਿ ਉਹ ਸਿੱਖ ਹਨ ਪਰ ਉਹ ਨਾ ਮੰਨੇ।
ਅਖ਼ੀਰ ਉਨ੍ਹਾਂ ਦੇ ਦੌੜ ਜਾਣ ਤੋਂ ਬਾਅਦ ਪੁਲਿਸ ਨੂੰ ਬੁਲਾਇਆ ਗਿਆ। ਇਹ ਸਿੱਖ ਹੁਣ ਹਸਪਤਾਲ
ਵਿਚ ਜ਼ੇਰੇ ਇਲਾਜ ਹੈ। ਉਸ ਦੀ ਮਾਂ ਭਾਰਤ ਤੋਂ ਉਸ ਕੋਲ ਰਹਿਣ ਆਈ ਹੋਈ ਹੈ। ਉਸ ਨੇ ਕਿਹਾ,
' ਮੈਂ ਚਾਹੁੰਦਾ ਹਾਂ ਕਿ ਪੁਲਿਸ ਇਸ ਘਟਨਾ ਨੂੰ ਨਫ਼ਰਤੀ ਅਪਰਾਧ ਸਮਝ ਕੇ ਜਾਂਚ-ਪੜਤਾਲ ਕਰੇ
ਅਤੇ ਹਮਲਾਵਰਾਂ ਨੂੰ ਫ਼ੌਰੀ ਤੌਰ 'ਤੇ ਗ੍ਰਿਫ਼ਤਾਰ ਕਰੇ। ਮੈਂ ਚਾਹੁੰਦਾ ਹਾਂ ਕਿ ਗਵਾਹ ਅੱਗੇ
ਆ ਕੇ ਪੁਲਿਸ ਨਾਲ ਸੰਪਰਕ ਕਰਨ।' ਭੌÎਤਿਕ ਵਿਗਿਆਨੀ ਨੇ ਅੱਗੇ ਕਿਹਾ, 'ਮੇਰੀ ਮਾਂ ਸਮਝਦੀ
ਸੀ ਕਿ ਅਮਰੀਕੀ ਲੋਕ ਧਾਰਮਕ ਆਜ਼ਾਦੀ ਦਾ ਸਤਿਕਾਰ ਕਰਦੇ ਹਨ। ਮੈਂ ਚਾਹੁੰਦਾ ਹਾਂ ਕਿ ਉਸ ਦਾ
ਇਸ ਵਿਸ਼ਵਾਸ ਨਾ ਟੁੱਟੇ ਤੇ ਸਾਨੂੰ ਇਨਸਾਫ਼ ਮਿਲੇ।'
ਸਿੱਖ ਜਥੇਬੰਦੀ ਸਿੱਖ ਕੁਲੀਸ਼ਨ ਨੇ ਕਿਹਾ ਹੈ, ' ਹੁਣ ਤਾਂ ਹੱਦ ਹੋ
ਗਈ ਹੈ। ਇਸ ਘਟਨਾ ਦੇ ਗਵਾਹ ਅੱਗੇ ਆ ਕੇ ਪੁਲਿਸ ਨੂੰ ਜਾਣਕਾਰੀ ਦੇਣ ਤਾਕਿ ਹਮਲਾਵਰ ਤੁਰਤ
ਫੜੇ ਜਾਣ।' ਹਮਲਾ ਕਰਨ ਵਾਲਿਆਂ ਵਿਚ ਗੋਰਾ ਮੁੰਡਾ, ਤਿੰਨ ਕੁੜੀਆਂ ਅਤੇ ਬਾਕੀ ਕਾਲੇ ਸਨ।
ਸਿੱਖ ਕੁਲੀਸ਼ਨ ਦੇ ਰਾਜਦੀਪ ਸਿੰਘ ਨੇ ਕਿਹਾ, 'ਅਸੀਂ ਅਜਿਹੇ ਕਟੜਵਾਦੀਆਂ ਦੇ ਹਮਲਿਆਂ ਤੋਂ
ਅੱਕ ਗਏ ਹਨ ਪਰ ਸਿੱਖ ਅਮਰੀਕੀ ਡਰਨਗੇ ਨਹੀਂ ਅਤੇ ਅਜਿਹੇ ਤੰਗਦਿਲ ਲੋਕਾਂ ਨੂੰ ਹਮਲੇ ਕਰਨ
ਦੀ ਇਜਾਜ਼ਤ ਨਹੀਂ ਦੇਣ ਦੇਣਗੇ।' ਹਾਲੇ ਕੁੱਝ ਦਿਨ ਪਹਿਲਾਂ ਹੀ ਗੋਰੇ ਟਰੱਕ ਡਰਾਈਵਰ ਨੇ
ਸਿੱਖ ਨੌਜਵਾਨ ਨੂੰ ਟੱਕਰ ਮਾਰ ਕੇ ਗੰਭੀਰ ਜ਼ਖ਼ਮੀ ਕਰ ਦਿਤਾ ਸੀ।