Main News Page

ਇਕ ਵਾਰੀ ਮੇਲੇ ਦੀ ਭੀੜ ਵਿਚ ਇਕ ਪਹਿਲਵਾਨ ਦਾ ਮੋਢਾ ਇਕ ਸੁਕੜੂ ਜਿਹੇ ਬੰਦੇ ਨਾਲ਼ ਖਹਿ ਗਿਆ। ਸੁਕੜੂ ਜਿਹੇ ਬੰਦੇ ਨੇ ਪਹਿਲਵਾਨ ਨੂੰ ਗਾਲ੍ਹ ਕੱਢ ਦਿੱਤੀ। ਪਹਿਲਵਾਨ ਨੇ ਉਸ ਤੋਂ ਮੁਆਫ਼ੀ ਮੰਗੀ ਤੇ ਕਿਹਾ ਕਿ ਭੀੜ ਬਹੁਤ ਹੋਣ ਕਰ ਕੇ ਉਸ ਤੋਂ ਅਣਜਾਣੇ ‘ਚ ਮੋਢਾ ਲੱਗ ਗਿਆ ਹੈ, ਸੋ ਉਹ ਮੁਆਫ਼ ਕਰ ਦੇਵੇ। ਪਰ ਸੁਕੜੂ ਬੰਦਾ ਤਾਂ ਹੋਰ ਚੌੜਾ ਹੋ ਗਿਆ ਤੇ ਹੋਰ ਵੀ ਭੈੜੀ ਗਾਲ੍ਹ ਪਹਿਲਵਾਨ ਨੂੰ ਕੱਢ ਦਿੱਤੀ। ਪਹਿਲਵਾਨ ਨੇ ਫਿਰ ਵੀ ਸ਼ਾਂਤੀ ਦਾ ਪੱਲਾ ਨਾ ਛੱਡਦਿਆਂ ਫਿਰ ਮੁਆਫ਼ੀ ਮੰਗੀ, ਪਰ ਸੁਕੜੂ ਹੋਰ ਆਕੜ ਗਿਆ ਤੇ ਐਤਕੀਂ ਪਹਿਲਵਾਨ ਨੂੰ ਮਾਂ ਦੀ ਗਾਲ਼੍ਹ ਕੱਢ ਦਿਤੀ। ਪਹਿਲਵਾਨ ਨੇ ਫਿਰ ਗੁੱਸੇ ‘ਚ ਆ ਕੇ ਸੁਕੜੂ ਦੇ ਜਦ ਥੱਪੜ ਮਾਰਿਆ ਤੇ ਉਹ ਦਸ ਫੁੱਟ ‘ਤੇ ਜਾ ਕੇ ਡਿੱਗਾ। ਉੱਠ ਕੇ ਕੱਪੜੇ ਝਾੜੇ ਤੇ ਫਿਰ ਗਾਲ਼ੀ ਕੱਢ ਕੇ ਕਹਿੰਦਾ, “ਹੁਣ ਮਾਰ ਤੈਨੂੰ ਦੇਖਾਂ ਵੱਡੇ ਭਲਵਾਨ ਨੂੰ”, ਪਹਿਲਵਾਨ ਨੇ ਫੇਰ ਇਕ ਥੱਪੜ ਮਾਰਿਆ ਤੇ ਐਤਕੀਂ ਜਨਾਬ ਸੁਕੜੂ ਹੋਰੀਂ ਹੋਰ ਵੀ ਦੂਰ ਜਾ ਕੇ ਡਿੱਗੇ। ਪਰ ਉਹ ਢੀਠ ਬੰਦਾ ਫਿਰ ਉੱਠ ਕੇ ਗਾਲ੍ਹ ਕੱਢ ਕੇ ਭਲਵਾਨ ਨੂੰ ਕਹਿੰਦਾ, “ਹੁਣ ਮਾਰ ਤੈਨੂੰ ਦੇਖਾਂ ਵੱਡੇ ਭਲਵਾਨ ਨੂੰ”।

ਹੁਣ ਪਹਿਲਵਾਨ ਹੱਸ ਪਿਆ ਤੇ ਕਹਿਣ ਲੱਗਾ, “ਹੁਣ ਤੈਨੂੰ ਈ ਮਾਰੀ ਜਾਵਾਂ ਮੇਲਾਂ ਨਾ ਵੇਖਾਂ”।

ਪਾਠਕ ਹੈਰਾਨ ਹੋਣਗੇ ਪਈ ਇਹ ਕਹਾਣੀ ਕੀਹਦੇ ‘ਤੇ ਢੁੱਕਦੀ ਐ? ਜਨਾਬ, ਇਹ ਕਹਾਣੀ ਢੁੱਕਦੀ ਐ ਆਪਣੇ ਮੱਕੜ ਸਾਹਿਬ ‘ਤੇ। ਆਹ ਜਿਹੜਾ ਮੋਹਨ ਭਾਗਵਤ ਨੇ ਹੁਣੇ ਜਿਹੇ ਬਿਆਨ ਦਿੱਤੈ ਕਿ ਭਾਰਤ ਵਿਚ ਰਹਿਣ ਵਾਲ਼ਾ ਹਰ ਵਿਅਕਤੀ ਹਿੰਦੂ ਐ, ਇਸ ‘ਤੇ ਮੱਕੜ ਨੇ ਕਿਹੈ ਪਈ ਮੋਹਨ ਭਾਗਵਤ ਬਿਆਨ ਵਾਪਸ ਲਵੇ, ਨਹੀਂ ਤਾਂ ਅਸੀਂ ਉਸ ‘ਤੇ ਕਾਰਵਾਈ ਕਰਾਂਗੇ।

ਪਾਠਕ ਜਣੋ! ਇਹੋ ਜਿਹਾ ਹੀ ਬਿਆਨ ਭਾਗਵਤ ਨੇ ਜਨਵਰੀ 2014 ਵਿਚ ਵੀ ਦਿੱਤਾ ਸੀ ਤੇ ਉਦੋਂ ਵੀ ਮੱਕੜ ਸਾਹਿਬ ਨੇ ਮੋਹਨ ਭਾਗਵਤ ‘ਤੇ ਕਾਰਵਾਈ ਕਰਨ ਦਾ ਬਿਆਨ ਦਿੱਤਾ ਸੀ। ਸਭ ਜਾਣਦੇ ਹਨ ਕਿ ਮੋਹਨ ਭਾਗਵਤ ਨੇ ਬਿਆਨ ਵਾਪਸ ਨਹੀਂ ਲਿਆ ਸੀ, ਸਗੋਂ ਭਾਰਤ ਦਾ ਰਾਜ-ਭਾਗ ਸੰਭਾਲਣ ਤੋਂ ਬਾਅਦ ਤਾਂ ਉਹਨਾਂ ਦਾ ਹਰ ਲੱਲੂ ਪੰਜੂ ਅਜਿਹੇ ਬਿਆਨ ਦੇਣ ਲੱਗ ਪਿਆ ਹੈ।

ਕੀ ਮੱਕੜ ਸਾਹਿਬ ਦੱਸਣਗੇ ਕਿ ਜਨਵਰੀ ਤੋਂ ਬਾਅਦ ਮੋਹਨ ਭਾਗਵਤ ਦੇ ਖ਼ਿਲਾਫ਼ ਕੀ ਕਾਰਵਾਈ ਕੀਤੀ ਹੈ? ਹੁਣ ਕੀ ਕਾਰਵਾਈ ਕਰੋਗੇ? ਕਿ ਅਜਿਹੇ ਬਿਆਨ ਦੇ ਕੇ ਸਿੱਖ ਕੌਮ ਨੂੰ ਬੁੱਧੂ ਬਣਾਉਣ ਦੀ ਕੋਸ਼ਿਸ਼ ਕਰਦੇ ਰਹੋਗੇ। ਆਰ.ਐੱਸ.ਐੱਸ. ਦੀ ਰਹਿਨੁਮਾਈ ‘ਚ ਚੱਲਣ ਵਾਲ਼ੇ ਲੋਕ ਉਹਨਾਂ ਦੇ ਵਿਰੁੱਧ ਕਿਵੇਂ ਬੋਲ ਸਕਦੇ ਹਨ? ਅੱਜ ਹਰ ਸਿੱਖ ਨੂੰ ਇਹ ਗੱਲ ਸਮਝ ਲੈਣੀ ਚਾਹੀਦੀ ਹੈ।