Main News Page

ਲੁਧਿਆਣਾ ਦੇ ਫਰਜ਼ੀ ਮੁਕਾਬਲੇ ਵਿੱਚ ਪੁਲਿਸ ਵਲੋਂ ਮਾਰੇ ਸਕੇ ਭਰਾਵਾਂ ਦੇ ਪਿਤਾ ਦੇ ਮੂੰਹੋਂ ਸੁਣੋ ਸਰਕਾਰੀ ਦਹਿਸ਼ਤਗਰਦੀ ਦੀ ਸੱਚਾਈ

ਭਦੌੜ/ਸ਼ਹਿਣਾ 1 ਅਕਤੂਬਰ (ਸਾਹਿਬ ਸੰਧੂ): ਪੰਜਾਬ ਪੁਲਿਸ ਮੁੱਢ ਤੋਂ ਹੀ ਆਪਣੇ ਮਾੜੇ ਕਾਰਨਮਿਆਂ ਕਾਰਨ ਸੁਰਖੀਆਂ ਵਿੱਚ ਰਹਿੰਦੀ ਆਈ ਹੈ ਤੇ ਵਰਦੀਧਾਰੀ ਬਿਨ੍ਹਾ ਵਜ਼੍ਹਾ ਹੀ ਆਪਣੀਆਂ ਨਿੱਜ਼ੀ ਕਿੜਾਂ ਕੱਢਣ ਲਈ ਨੋਜਵਾਨਾਂ ਨੂੰ ਝੁੱਠੇ ਪੁਲਿਸ ਮੁਕਾਬਲਿਆਂ ਜਾਂ ਝੁੱਠੇ ਕੇਸ ਪਾ ਜੇਲ੍ਹ ਅੰਦਰ ਸੁੱਟ ਰਹੀ ਹੈ। ਜਿਸ ਦੀਆਂ ਅਨੇਕਾਂ ਉਦਹਾਰਨਾ ਸਾਹਮਣੇ ਆ ਚੁੱਕੀਆਂ ਤੇ ਇਸ ਤਰਾਂ ਹੀ ਪਿਛਲੇ ਦਿਨੀਂ ਮਾਛੀਵਾੜਾ ਪੁਲਿਸ ਵੱਲੋਂ ਪਿੰਡ ਦੋ ਦਲਿਤ ਸਕੇ ਭਰਾਵਾਂ ਦਾ ਬਣਾਇਆ ਫਰਜ਼ੀ ਮੁਕਾਬਲਾ ਜੋ ਬਆਦ ਵਿੱਚ ਸਿੱਧੇ ਤੌਰ ਤੇ ਕਤਲ ਦੇ ਰੂਪ ਵਿੱਚ ਸਾਹਮਣੇ ਆ ਹੀ ਗਿਆ ਕਿ ਪੁਲਿਸ ਨੇ ਇਹ ਮੁਕਾਬਲਾ ਨਹੀ ਸਗੋ ਸੋਦੇ ਤਹਿਤ ਜਾਣਬੁੱਝ ਉਕਤ ਦੋਨਾਂ ਸਕੇ ਭਰਾਵਾਂ ਦਾ ਕਤਲ ਕੀਤਾ ਸੀ।

ਇਸ ਮੰਦਭਾਗੀ ਘਟਨਾਂ ਦੀ ਸ਼ੋਸਲ ਸਾਇਟਾਂ ਤੇ ਮੀਡੀਆ ’ਚ ਚਰਚਾ ਹੋਣ ਕਾਰਨ ਪੰਜਾਬ ਸਰਕਾਰ ਦੀ ਅੱਖ ਖੁੱਲਣ ਤੇ ਉਕਤ ਪੁਲਿਸ ਮੁਲਾਜਮਾਂ ਅਤੇ ਪਿੰਡ ਤੱਖਰਾਂ ਦੇ ਸਰਪੰਚ ਦੇ ਪਤੀ ਖਿਲਾਫ਼ ਕਤਲ ਦਾ ਮਾਮਲਾ ਦਰਜ਼ ਕਰ ਉਹਨਾਂ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਮੌਕੇ ਦੇ ਐਸ. ਐਸ. ਪੀ ਨੂੰ ਵੀ ਬਰਖ਼ਾਸਤ ਕਰ ਦਿੱਤਾ ਗਿਆ ਪਰ ਫਿਰ ਵੀ ਲੋਕਾਂ ਅੰਦਰ ਇਨਸਾਫ਼ ਲਈ ਪੁਲਿਸ ਪ੍ਰਤੀ ਦਿਨ ਬ ਦਿਨ ਰੋਸ ਦੀ ਲਹਿਰ ਵਧਦੀ ਜਾ ਰਹੀ ਹੈ। ਜਿਸ ਦੇ ਸਿੱਟੇ ਵੱਜੋਂ ਪੰਜਾਬ ਸਮੇਤ ਦੇਸ਼ਾਂ ਵਿਦੇਸ਼ਾਂ ਤੋਂ ਵੀ ਇਸ ਘਟਨਾਂ ਨੂੰ ਜੰਗਲ ਰਾਜ਼ ਪੁਲਿਸ ਦੀ ਗੁੰਡਾਗਰਦੀ ਦੇ ਨਾਮ ਹੇਠ ਸਮੁੱਚੀ ਪੰਜਾਬ ਪੁਲਿਸ ਨੂੰ ਭੰਡਿਆ ਜਾ ਰਿਹਾ ਹੈ।

ਮਾਛੀਵਾੜਾ ਪੁਲਿਸ ਦੀ ਇਸ ਹਰਕਤ ਨੇ ਸਮੁੱਚੀ ਪੁਲਿਸ ਪਾਰਟੀ ਦੇ ਅਕਸ ਨੂੰ ਢਾਹ ਲਗਾ ਦਿੱਤੀ ਹੈ। ਇਸ ਘਟਨਾਂ ਤੋਂ ਪਹਿਲਾਂ ਅਮ੍ਰਿਤਸਰ ਵਿਖੇ ਪੁਲਿਸ ਦੇ ਇੱਕ ਕਾਂਸਟੇਬਲ ਗੁਰਪ੍ਰੀਤ ਦੁਆਰਾ ਇੱਕ ਭਿਖਾਰੀ ਪਤੀ ਪਤਨੀ ਤੇ ਅੰਨਾਂ ਤਸ਼ਦੱਤ ਢਾਹਿਆ ਸੀ। ਜਿਸ ਦੀ ਕਵਰੇਜ਼ ਮੀਡੀਆ ਵਿੱਚ ਆਉਣ ਕਾਰਨ ਉਸ ਨੂੰ ਵੀ ਸਸਪੈਂਡ ਕਰ ਦਿੱਤਾ ਗਿਆ ਸੀ। ਜ਼ਿਕਰਯੋਗ ਹੈ ਕਿ ਪੁਲਿਸ ਮੁਲਾਜਮਾਂ ਦੀਆਂ ਮਾੜੀਆਂ ਹਰਕਤਾਂ ਦਾ ਖਮਿਆਜ਼ਾ ਪੁਰੇ ਮਹਿਕਮੇ ਨੂੰ ਭੁਗਤਣਾ ਪੈ ਰਿਹਾ ਹੈ। ਇਹ ਵੀ ਨਹੀ ਕਿ ਪੁਰੀ ਪੰਜਾਬ ਪੁਲਿਸ ਮਾੜੀ ਹੈ।

ਪੁਲਿਸ ਮਹਿਕਮੇ ਅੰਦਰ ਅਜਿਹੇ ਵੀ ਇਮਾਨਦਾਰ ਪੁਲਿਸ ਅਫ਼ਸਰ ਮੋਜੂਦ ਹਨ। ਜੋ ਅਣਗਿਹਲੀ ਕਰਨ ਵਾਲੇ ਅਧਿਕਾਰੀਆਂ ਵਿਰੁੱਧ ਸਖ਼ਤ ਕਾਰਵਾਈ ਕਰ ਲੋਕਾਂ ਨੂੰ ਬਣਦਾ ਇਨਸਾਫ਼ ਵੀ ਦੇ ਰਹੇ ਹਨ ਪਰ ਇਸ ਮਹਿਕਮੇ ਅੰਦਰ ਇੱਕਠੀਆਂ ਹੋਈਆਂ ਕਾਲੀਆਂ ਭੇਡਾਂ ਕਾਰਨ ਸਮੁੱਚੇ ਪੁਲਿਸ ਮਹਿਕਮੇ ਦਾ ਅਕਸ ਪੂਰੀ ਤਰਾਂ ਵਿਗੜ ਚੁੱਕਿਆ ਹੈ ਤੇ ਲੋਕਾਂ ਦਾ ਪੁਲਿਸ ਪ੍ਰਸ਼ਾਸਨ ਤੋਂ ਬਿਲਕੁੱਲ ਵਿਸਵਾਸ ਉਠ ਗਿਆ ਹੈ। ਇਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਪੰਜਾਬ ਦੇ ਕਈ ਮੰਨੇ ਪ੍ਰਮੰਨੇ ਪੁਲਿਸ ਅਧਿਕਾਰੀਆਂ ਤੋਂ ਇਲਾਵਾ ਪੰਜਾਬ ਪੁਲਿਸ ਮੁੱਖੀ ਸਮੇਧ ਸ਼ੈਣੀ ਤੇ ਵੀ ਫਰਜ਼ੀ ਮੁਕਾਬਲਿਆਂ ਦੇ ਦੋਸ਼ ਲੱਗ ਚੁੱਕੇ ਹਨ। ਜ਼ੇਕਰ ਇਹਨਾਂ ਅਧਿਕਾਰੀਆਂ ਨਾਲ ਪ੍ਰਸ਼ਾਸਨ ਵੱਲੋਂ ਸਖ਼ਤੀ ਨਾਲ ਪੇਸ਼ ਨਾ ਆਇਆ ਗਿਆ ਤਾਂ ਭਵਿੱਖ ਵਿੱਚ ਵੀ ਇਸ ਤਰਾਂ ਦੇ ਫਰਜ਼ੀ ਮੁਕਾਬਲੇ ਹੋਣੇ ਸੁਭਾਵਿਕ ਹਨ।