ਜਲੰਧਰ
— ਹਰਿਆਣਾ ‘ਚ ਚੋਣਾਂ ਦੌਰਾਨ ਭਾਰਤੀ ਜਨਤਾ ਪਾਰਟੀ ਅਤੇ ਸ਼੍ਰੋਮਣੀ ਅਕਾਲੀ ਦਲ ਵਿਚਾਲੇ ਆਪਸੀ
ਸੰਬੰਧਾਂ ‘ਚ ਭਾਰੀ ਖਟਾਸ ਪਾਈ ਜਾ ਰਹੀ ਹੈ। ਅਕਾਲੀ ਦਲ ਵਲੋਂ ਹਰਿਆਣਾ ਚੋਣਾਂ ‘ਚ ਭਾਜਪਾ ਦੀ
ਬਜਾਏ ਇਨੈਲੋ ਨਾਲ ਸਹਿਯੋਗ ਕਰਕੇ ਚੋਣ ਪ੍ਰਚਾਰ ਕਰ ਰਹੀ ਹੈ। ਇਸ ਕਾਰਨ ਭਾਜਪਾ ਅਤੇ ਅਕਾਲੀ ਦਲ
ਦਰਮਿਆਨ ਪਾਰਾ ਹੋਰ ਵੀ ਡੂੰਘਾ ਹੁੰਦਾ ਜਾ ਰਿਹਾ ਹੈ। ਸਾਬਕਾ ਐੱਮ. ਪੀ. ਨਵਜੋਤ ਸਿੰਘ ਸਿੱਧੂ
ਨੇ ਅਕਾਲੀ ਦਲ ‘ਤੇ ਗੰਭੀਰ ਦੋਸ਼ ਲਾਏ ਹਨ, ਜਿਸ ਪਿੱਛੋਂ ਇਹ ਗੱਲ ਕਾਫੀ ਹੱਦ ਤਕ ਸਪੱਸ਼ਟ ਹੋਣ
ਲੱਗੀ ਹੈ ਕਿ ਅਕਾਲੀ ਦਲ ਅਤੇ ਭਾਜਪਾ ਦਰਮਿਆਨ ਸੰਬੰਧ ਪਹਿਲਾਂ ਵਰਗੇ ਨਹੀਂ ਰਹੇ ਹਨ। ਇਸ ਤੋਂ
ਵੀ ਵੱਡਾ ਮਾਮਲਾ ਹਰਿਆਣਾ ‘ਚ ਭਾਜਪਾ ਦੀ ਇਕ ਬੈਠਕ ਦੌਰਾਨ ਸਾਹਮਣੇ ਆਇਆ ਜਿਥੇ ਭਾਜਪਾ ਦੇ ਕੌਮੀ
ਜਥੇਬੰਦਕ ਸਕੱਤਰ ਸ਼ਿਵ ਪ੍ਰਕਾਸ਼ ਨੇ ਮੁੱਖ ਤੌਰ ‘ਤੇ ਹਿੱਸਾ ਲਿਆ। ਸੂਤਰਾਂ ਮੁਤਾਬਕ ਬੈਠਕ ‘ਚ
ਪੰਜਾਬ ਦੇ ਨਾਲ-ਨਾਲ ਹੋਰਨਾਂ ਸੂਬਿਆਂ ਦੇ ਵੀ ਭਾਜਪਾ ਆਗੂ ਮੌਜੂਦ ਸਨ।
ਸੂਤਰਾਂ ਮੁਤਾਬਕ ਜਥੇਬੰਦਕ ਸਕੱਤਰ ਨੇ ਸਪੱਸ਼ਟ ਕੀਤਾ ਕਿ ਭਾਜਪਾ ਦੇ ਆਗੂਆਂ
ਨੂੰ ਆਪਣੇ ਪੱਧਰ ‘ਤੇ ਤਿਆਰੀ ਕਰਨੀ ਹੋਵੇਗੀ ਅਤੇ ਸਹਿਯੋਗੀ ਪਾਰਟੀਆਂ ‘ਤੇ ਨਿਰਭਰ ਨਹੀਂ ਰਹਿਣਾ
ਚਾਹੀਦਾ। ਬੈਠਕ ਦੌਰਾਨ ਕਈ ਭਾਜਪਾ ਆਗੂਆਂ ਨੇ ਸਹਿਯੋਗੀ ਪਾਰਟੀਆਂ ਨੂੰ ਲੈ ਕੇ ਪਾਰਟੀ ਸਾਹਮਣੇ
ਰੋਸ ਪ੍ਰਗਟ ਵੀ ਕੀਤਾ।
ਸੂਤਰ ਦੱਸਦੇ ਹਨ ਕਿ ਜਥੇਬੰਦਕ ਸਕੱਤਰ ਦਾ ਇਸ਼ਾਰਾ ਕਾਫੀ ਹੱਦ ਤਕ ਸਪੱਸ਼ਟ
ਹੈ ਅਤੇ ਪਾਰਟੀ ਹਾਈਕਮਾਨ ਵੀ ਚਾਹੁੰਦੀ ਹੈ ਕਿ ਅਕਾਲੀ ਦਲ ਦੀਆਂ ਨੀਤੀਆਂ ਨਾਲ ਸਮਝੌਤਾ ਕਰਨ ਦੀ
ਬਜਾਏ ਵੱਖਰੇ ਤੌਰ ‘ਤੇ ਚੋਣ ਲੜੀ ਜਾਵੇ। ਸਿੱਧੂ ਅਤੇ ਜਥੇਬੰਦਕ ਸਕੱਤਰ ਹੀ ਨਹੀਂ ਹਰਿਆਣਾ ‘ਚ
ਬਾਦਲਾਂ ਨੂੰ ਲੈ ਕੇ ਆਰ. ਪੀ. ਸਿੰਘ ਨੇ ਵੀ ਸ਼ਨੀਵਾਰ ਬਹੁਤ ਸਾਰੀਆਂ ਗੱਲਾਂ ਕਹੀਆਂ। ਪੂਰੇ
ਹਰਿਆਣਾ ਦੇ ਘਟਨਾ ਚੱਕਰ ਨੂੰ ਲੈ ਕੇ ਇਹ ਗੱਲ ਸਪੱਸ਼ਟ ਹੋ ਰਹੀ ਹੈ, ਕਿ ਭਾਜਪਾ ਆਉਣ ਵਾਲੇ ਸਮੇਂ
‘ਚ ਆਪਣੇ ਦਮ ‘ਤੇ ਚੋਣਾਂ ਲੜਨ ਦੀ ਤਿਆਰੀ ਕਰ ਰਹੀ ਹੈ।
ਭਾਜਪਾ ਦੀ ਬੁਲਾਰਨ ਮੀਨਾਕਸ਼ੀ ਲੇਖੀ ਨੇ
ਵੀ ਚੰਡੀਗੜ੍ਹ ‘ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸਪੱਸ਼ਟ ਕੀਤਾ ਹੈ ਕਿ ਹਰਿਆਣਾ ਦੀਆਂ ਚੋਣਾਂ
ਪਿੱਛੋਂ ਸ਼੍ਰੋਮਣੀ ਅਕਾਲੀ ਦਲ ਨਾਲ ਗਠਜੋੜ ‘ਤੇ ਵਿਚਾਰ ਕੀਤਾ ਜਾਵੇਗਾ।