ਕਿਵੇਂ
ਭੁੱਲਾਵਾਂ ਨੰਵਬਰ ਸੰਨ ਚੁਰਾਸੀ ਨੂੰ
-: ਗੁਰਜਾਪ ਸਿੰਘ
ਕਿਵੇਂ ਭੁੱਲਾਵਾਂ ਨੰਵਬਰ ਸੰਨ ਚੁਰਾਸੀ ਨੂੰ, ਕਿਵੇਂ ਹਟਾਵਾਂ
ਚਿਹਰੇ 'ਤੇ ਛਾਈ ਉਦਾਸੀ ਨੂੰ।
ਕਿਵੇਂ ਭੁੱਲਾਂ, ਅੱਥਰੂ ਡਿੱਗਦੇ ਅਜੇ ਵੀ ਨੈਣਾਂ ਦੇ, ਕਿਵੇਂ ਭੁੱਲਾਂ ਉਹ ਵਿਰਲਾਪ
ਰੋਂਦੀਆਂ ਭੈਣਾਂ ਦੇ।
ਅੱਲੇ ਨੇ ਜਖਮ ਅਜੇ, ਆਏ ਨਾ ਖਰਿੰਡ, ਲੜ ਰਹੇ ਨੇ ਅਜੇ ਵੀ ਸੀਨੇ,
ਵਾਂਗ ਭਰਿੰਡ।
ਆਉਂਦਾ ਹੈ ਸੇਕ ਅਜੇ ਵੀ ਬਲਦੇ ਟਾਇਰਾਂ ਦਾ, ਕਿਵੇਂ ਭੁਲਾਂ ਦੇਵਾਂ ਚੇਤਾ, ਉਸ ਖੂਨੀ
ਕਹਿਰਾਂ ਦਾ।
ਗਵਾਚੀਆਂ ਭੈਣਾਂ ਦੀਆਂ ਚੁੰਨੀਆਂ ਅਜੇ ਨਾ ਲੱਭੀਆਂ, ਮਾਸੂਮਾਂ
ਦੀਆਂ ਚੀਕਾਂ ਜਾਣ ਨਾ ਦਬਾਇਆਂ ਦੱਬੀਆਂ।
ਕਿਵੇਂ ਭੁੱਲਾਂ, ਮਾਂਵਾਂ ਦੀਆਂ ਸਿਸਕੀਆਂ ਬਾਪੂਆਂ ਦੇ ਹਾੜੇ, ਕਾਤਲਾਂ ਦੀ ਭੀੜ ਨੇ,
ਜਵਾਨ ਪੁੱਤ ਜਿਨਾਂ ਦੇ ਮਾਰੇ।
ਹਿੱਕ ਤੇ ਦੀਵਾਂ ਜੋ ਬਾਲਿਆ, ਉਹ ਜਾਣਾ ਨਾ ਬੁਝਾਇਆ, ਦਿੱਤਾ
ਜੋ ਸਾਨੂੰ ਦੁੱਖ, ਉਹ ਸਾਥੋਂ ਜਾਣਾ ਨਾ ਭੁਲਾਇਆ।
ਤੁਹਾਡਾ ਤਾਕਤ ਦਾ ਗਰੂਰ, ਅਸੀਂ ਤੋੜਕੇ ਰਹਾਂਗੇ, ਪਾਈ ਜਿਹੜੀ ਭਾਜੀ, ਅਸੀਂ ਮੋੜਕੇ
ਰਹਾਂਗੇ।
ਕਿਵੇਂ ਭੁੱਲਾਂ ਮੈਂ, ਕਾਤਲਾਂ ਦੀ ਭੀੜ ਦੀ ਸ਼ਰਾਰਤ ਹਾਸੀ ਨੂੰ,
ਕਿਵੇਂ ਭੁਲਾਵਾਂ ਮੈ ਨੰਵਬਰ ਸੰਨ ਚੁਰਾਸੀ ਨੂੰ। |
|