ਚੰਡੀਗੜ੍ਹ, 10 ਨਵੰਬਰ: ਸਿੱਖ ਜਗਤ ਦੇ ਤਿੱਖੇ ਵਿਰੋਧ ਦਾ ਸਾਹਮਣਾ ਕਰਦੀ
ਆ ਰਹੀ ਰਾਸ਼ਟਰੀਆ ਸਿੱਖ ਸੰਗਤ, ਜਿਹੜੀ ਆਰ.ਐਸ.ਐਸ. ਦੀਆਂ ਜਨਤਕ ਜਥੇਬੰਦੀਆਂ ਵਿਚੋਂ ਇੱਕ ਮੋਹਰੀ
ਜਥੇਬੰਦੀ ਹੈ, ਵਲੋਂ ਦਿੱਲੀ ਵਿਚ ਆਪਣੇ ਨਵੇਂ ਦਫਤਰ ਵਿਚ ਸ੍ਰੀ ਗੁਰੁ ਨਾਨਕ ਦੇਵ ਜੀ ਦੇ
ਪ੍ਰਕਾਸ਼ ਪੁਰਬ ਮੌਕੇ ਕਰਵਾਏ ਗਏ ਕੀਰਤਨ ਸਮਾਗਮ ਵਿਚ ਸ਼ਮੂਲੀਅਤ ਕਰਕੇ, ਦਿੱਲੀ ਸਿੱਖ ਗੁਰਦੁਆਰਾ
ਮੈਨੇਜਮੈਂਟ ਕਮੇਟੀ ਦੇ ਅਹੁਦੇਦਾਰਾਂ ਨੇ ਇਸ ਵਿਵਾਦਤ ਸੰਸਥਾ ਨੂੰ ਇੱਕ ਤਰਾਂ ਨਾਲ ਆਪਣੀ ਮਾਨਤਾ
ਦੇ ਦਿੱਤੀ ਹੈ।
ਰਾਸ਼ਟਰੀਆ ਸਿੱਖ ਸੰਗਤ ਵਲੋਂ ਸਾਲ ੨੦੦੦ ਵਿਚ ਪੰਜਾਬ ਅੰਦਰ ਸ਼ੁਰੂ ਕੀਤੀਆਂ
ਗਈਆਂ ਸਗਰਮੀਆਂ ਦਾ ਪ੍ਰਕਾਸ਼ ਸਿੰਘ ਬਾਦਲ ਦੀ ਅਗਵਾਈ ਵਾਲੇ ਸ਼੍ਰੋਮਣੀ ਅਕਾਲੀ ਦਲ ਨੂੰ ਛੱਡ ਕੇ
ਤਕਰੀਬਨ ਸਾਰੀਆਂ ਹੀ ਸਿੱਖ ਜਥੇਬੰਦੀਆਂ ਨੇ ਡੱਟ ਕੇ ਵਿਰੋਧ ਕੀਤਾ ਸੀ ਅਤੇ ਇਹਨਾਂ ਜਥੇਬੰਦੀਆਂ
ਵਲੋਂ ਕੀਤੇ ਗਏ ਜ਼ਬਰਦਸਤ ਮੁਜ਼ਾਹਰਿਆਂ ਕਰ ਕੇ ਰਾਸ਼ਟਰੀਆ ਸਿੱਖ ਸੰਗਤ ਨੂੰ ਸੂਬੇ ਵਿਚ ਆਪਣੀਆਂ
ਸਰਗਰਮੀਆਂ ਠੱਪ ਕਰਨੀਆਂ ਪਈਆਂ ਸਨ। ਉਸ ਤੋਂ ਕੁਝ ਸਾਲ ਬਾਅਦ ਪੰਜਾਬ
ਵਿਚ ਰਾਸ਼ਟਰੀਆ ਸਿੱਖ ਸੰਗਤ ਦਾ ਮੁੱਖੀ ਰੁਲਦਾ ਸਿੰਘ ਦਾ ਪਟਿਆਲਾ ਵਿਚ ਕਤਲ ਵੀ ਹੋ ਗਿਆ ਸੀ।
ਰਾਸ਼ਟਰੀਆ ਸਿੱਖ ਸੰਗਤ ਵਲੋਂ ਜਾਰੀ ਕੀਤੇ ਗਏ
ਇੱਕ ਪ੍ਰੈਸ ਬਿਆਨ ਅਨੁਸਾਰ ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਜਨਰਲ ਸਕੱਤਰ ਮਨਜਿੰਦਰ
ਸਿੰਘ ਸਿਰਸਾ, ਉਪ-ਪ੍ਰਧਾਨ ਤਨਵੰਤ ਸਿੰਘ ਅਤੇ ਮੈਂਬਰ ਗੁਰਲਾਦ ਸਿੰਘ ਨੇ ਕੀਰਤਨ ਸਮਾਗਮ ਵਿਚ
ਹਾਜ਼ਰੀ ਭਰੀ। ਇਹਨਾਂ ਆਗੂਆਂ ਵਿਚ ਪੰਜਾਬ, ਹਰਿਆਣਾ ਤੇ ਦਿੱਲੀ ਦੇ ਕਈ ਭਾਜਪਾ ਆਗੂਆਂ
ਨੇ ਵੀ ਇਸ ਪ੍ਰੋਗਰਾਮ ਵਿਚ ਸ਼ਮੂਲੀਅਤ ਕੀਤੀ।
ਇਸ ਮੌਕੇ ਹੋਏ ਇਕੱਠ ਨੂੰ ਸੰਬੋਧਨ ਕਰਦਿਆਂ, ਰਾਸ਼ਟਰੀਆ ਸੇਵਕ ਸੰਘ ਦੇ
ਜਨਰਲ ਸਕੱਤਰ ਭੱਈਆਜੀ ਜੋਸ਼ੀ ਨੇ ਕਿਹਾ ਕਿ ਗੁਰੂ ਨਾਨਕ ਨੇ ਸਰਬੱਤ ਦੇ ਭਲੇ ਅਤੇ ਮਾਨਵੀ ਭਾਈਚਾਰੇ
ਦਾ ਸੰਦੇਸ਼ ਦਿੱਤਾ ਸੀ। ਉਹਨਾਂ ਕਿਹਾ ਕਿ ਗੁਰੁ ਨਾਨਕ ਦੇਵ ਜੀ ਨੇ ਮੁਗਲਾਂ ਦੇ ਜ਼ੁਲਮੀ ਰਾਜ ਦਾ
ਸਖਤ ਵਿਰੋਧ ਕੀਤਾ ਸੀ। ਜਦੋਂ ਹਿੰਦੋਸਤਾਨ ਵਿਚ ਕੂੜ ਦਾ ਹਨੇਰਾ ਪਸਰਿਆ ਹੋਇਆ ਸੀ ਅਤੇ ਲੋਕਾਂ
ਉੱਤੇ ਅਤਿਆਚਾਰ ਹੋ ਰਹੇ ਸਨ ਤਾਂ ਉਸ ਵੇਲੇ ਗੁਰੁ ਨਾਨਕ ਦੇਵ ਜੀ ਨੇ ਇੱਕ ਨਵੀ ਲਹਿਰ ਸ਼ੁਰੂ ਕੀਤੀ
ਜਿਸ ਉੱਤੇ ਚੱਲ ਕੇ ਦਸਵੇਂ ਪਾਤਸ਼ਾਹ ਨੇ ਮੁਗਲ ਰਾਜ ਦਾ ਅੰਤ ਕੀਤਾ।
ਰਾਸ਼ਟਰੀਆ ਸਿੱਖ ਸੰਗਤ ਦੇ ਇਸ ਵੇਲੇ ਗੁਰਚਰਨ ਸਿੰਘ ਗਿੱਲ਼ ਪ੍ਰਧਾਨ ਹਨ ਜਦੋਂ
ਕਿ ਅਵਤਾਰ ਸਿੰਘ ਇਸ ਦੇ ਜਨਰਲ ਸਕੱਤਰ ਹਨ।
ਇੱਕ ਝਲਕ ਮਨਜਿੰਦਰ ਸਿਰਸਾ ਦੇ
ਸਿੱਖੀ ਪਿਆਰ ਦੀ...