ਜਬਲਪੁਰ,
23 ਨਵੰਬਰ 2014: ਅੱਜ ਸਿੱਖ ਸੇਵਕ ਜੱਥਾ, ਜਬਲਪੁਰ ਅਤੇ ਗੁਰਮਤਿ ਮਿਸ਼ਨ, ਜਬਲਪੁਰ ਜੱਥੇਬੰਦੀਆਂ
ਵਲੋਂ ਗੁਰਮਤਿ ਸਮਾਗਮ ਕਰਵਾਏ ਗਏ, ਜਿਸ ਵਿਚ ਪ੍ਰੋਫੇਸਰ ਦਰਸ਼ਨ ਸਿੰਘ ਜੀ ਖਾਲਸਾ, ਉਚੇਚੇ ਤੌਰ
'ਤੇ ਗੁਰਬਾਣੀ ਕੀਰਤਨ ਦਾ ਪ੍ਰੋਗ੍ਰਾਮ ਕਰਨ ਲਈ ਜਬਲਪੁਰ ਪੁੱਜੇ।
ਪ੍ਰੋਫੇਸਰ ਸਾਹਿਬ ਦਾ ਸਤਿਕਾਰ ਅਤੇ ਸਨਮਾਨ,
ਕੌਮ ਵਿੱਚ ਕਿਨਾਂ ਹੈ, ਇਸ ਦਾ ਅੰਦਾਜਾ ਉਨ੍ਹਾਂ ਨੂੰ ਹਵਾਈ ਅੱਡੇ ਤੇ ਲੈਣ ਪੁੱਜੀਆਂ ਸੰਗਤਾਂ
ਦੇ ਉਤਸਾਹ ਤੋਂ ਸਾਫ ਦਿਸ ਰਿਹਾ ਸੀ। ਕੌਮ ਦੀ ਮਹਾਨ ਸ਼ਖਸ਼ਿਅਤ ਨੂੰ ਜੀ ਆਇਆਂ ਕਹਿਣ ਲਈ, ਨੌਜੁਆਨ
ਕੀ ਤੇ ਬਜੁਰਗ ਕੀ, ਸਾਰੇ ਹੀ ਕਤਾਰਾਂ ਲਾ ਕੇ ਹਵਾਈ ਅੱਡੇ ਦੇ ਬਾਹਰ ਖੜੇ ਸੀ। ਭੋਪਾਲ ਦੀਆਂ
ਸੰਗਤਾਂ ਵਾਂਗ ਜਬਲਪੁਰ ਦੀ ਸੰਗਤ ਵਿਚ ਵੀ ਪ੍ਰੋਫੇਸਰ ਦਰਸ਼ਨ ਸਿੰਘ ਜੀ ਦੇ ਪ੍ਰਤੀ, ਪਿਆਰ ਅਤੇ
ਸਤਕਾਰ ਠਾਠਾਂ ਮਾਰ ਰਿਹਾ ਸੀ।
ਫਗਵਾੜੇ ਨੇੜੇ ਪਿੰਡ ਰਸੂਲਪੁਰ ਵਿਖੇ ਪ੍ਰੋ. ਦਰਸ਼ਨ ਸਿੰਘ ਖ਼ਾਲਸਾ ਜੀ ਨੇ ਕਲ 22 ਨਵੰਬਰ ਨੂੰ
ਗੁਰਬਾਣੀ ਦਾ ਕੀਰਤਨ ਕੀਤਾ ਸੀ। ਅੱਜ ਸਵੇਰੇ ਜਬਲਪੁਰ ਪੁੱਜ ਕੇ ਉਹ ਦੀਵਾਨ ਹਾਲ ਵਿਚ ਕੀਰਤਨ
ਕਰਨ ਚਲੇ ਗਏ। ਗੁਰਬਾਣੀ ਪ੍ਰੇਮੀ ਸੰਗਤਾਂ ਦਾ ਹਜ਼ੂਮ ਉਮੜ ਉਮੜ ਕੇ ਦੀਵਾਨ ਹਾਲ ਵਿਚ ਪੁੱਜ ਰਿਹਾ
ਸੀ।
ਪ੍ਰੋਫੇਸਰ ਸਾਹਿਬ ਨੇ ਗੁਰਬਾਣੀ ਸ਼ਬਦ "ਗਉੜੀ ਮਹਲਾ ੯ ॥ ਨਰ ਅਚੇਤ ਪਾਪ ਤੇ ਡਰੁ ਰੇ॥ ਦੀਨ ਦਇਆਲ ਸਗਲ ਭੈ ਭੰਜਨ ਸਰਨਿ ਤਾਹਿ ਤੁਮ ਪਰੁ ਰੇ ॥੧॥ ਰਹਾਉ ॥ ਬੇਦ ਪੁਰਾਨ ਜਾਸ ਗੁਨ ਗਾਵਤ
ਤਾ ਕੋ ਨਾਮੁ ਹੀਐ ਮੋ ਧਰੁ ਰੇ ॥ ਪਾਵਨ ਨਾਮੁ ਜਗਤਿ ਮੈ ਹਰਿ ਕੋ ਸਿਮਰਿ ਸਿਮਰਿ ਕਸਮਲ ਸਭ ਹਰੁ
ਰੇ ॥੧॥ ਮਾਨਸ ਦੇਹ ਬਹੁਰਿ ਨਹ ਪਾਵੈ ਕਛੂ ਉਪਾਉ ਮੁਕਤਿ ਕਾ ਕਰੁ ਰੇ ॥ ਨਾਨਕ ਕਹਤ ਗਾਇ ਕਰੁਨਾ
ਮੈ ਭਵ ਸਾਗਰ ਕੈ ਪਾਰਿ ਉਤਰੁ ਰੇ ॥੨॥੯॥੨੫੧॥ {ਪੰਨਾ 220} ਸਬਦ ਦਾ ਗਾਇਨ ਅਤੇ
ਵਿਆਖਿਆ ਕੀਤੀ।
ਬਹੁਤ ਸਾਰੇ ਵੀਰ ਭੋਪਾਲ ਅਤੇ ਰਾਇਪੁਰ ਤੋਂ ਵੀ ਪ੍ਰੋਫੇਸਰ ਸਾਹਿਬ ਤੋਂ ਗੁਰਬਾਣੀ ਕੀਰਤਨ ਸੁਨਣ
ਲਈ ਪੁਜੇ ਸੀ। ਸਿੱਖ ਸੇਵਕ ਜੱਥਾ, ਜਬਲਪੁਰ ਜਥੇਬੰਦੀ ਦੇ ਸਰਦਾਰ ਗਜਿੰਦਰ ਸਿੰਘ, ਸਰਦਾਰ
ਮਨਮੋਹਨ ਸਿੰਘ ਅਤੇ ਹੋਰ ਨੌਜਵਾਨ ਵੀਰ ਅਤੇ ਗੁਰਮਤਿ ਮਿਸ਼ਨ, ਜਬਲਪੁਰ ਜੱਥੇਬੰਦੀ ਦੇ ਸਰਦਾਰ ਜੋਗਾ
ਸਿੰਘ, ਸਰਦਾਰ ਰਵਿੰਦਰ ਸਿੰਘ ਜੀ, ਸਰਦਾਰ ਬਲਬੀਰ ਸਿੰਘ, ਮਨਮੀਤ ਸਿੰਘ ਅਤੇ ਹੋਰ ਬਹੁਤ ਸਾਰੀ
ਸੰਗਤ ਹਵਾਈ ਅੱਡੇ 'ਤੇ ਪੁੱਜੇ ਸੀ। ਨੌਜਵਾਨ ਬੱਚੇ ਕਾਰਾਂ ਅਤੇ ਜੀਪਾਂ 'ਤੇ ਨਿਸ਼ਾਨ ਸਾਹਿਬ ਲਗਾ
ਕੇ ਅੱਗੇ ਅੱਗੇ ਸੀ। ਅੱਜ ਦਾ ਪ੍ਰੋਗ੍ਰਾਮ ਚੜ੍ਹਦੀਕਲਾ ਵਿੱਚ ਹੋਇਆ ਅਤੇ ਸੰਗਤਾਂ ਗੁਰਬਾਣੀ
ਕੀਰਤਨ ਸੁਣ ਕੇ ਨਿਹਾਲ ਹੋ ਉਠੀਆਂ।