ਅੰਮ੍ਰਿਤਸਰ
25 ਨਵੰਬਰ (ਜਸਬੀਰ ਸਿੰਘ) ਸ੍ਰ. ਹਰਵਿੰਦਰ ਸਿੰਘ ਸਰਨਾ ਸਕੱਤਰ ਜਨਰਲ ਸ਼੍ਰੋਮਣੀ ਅਕਾਲੀ ਦਲ
ਦਿੱਲੀ ਨੇ ਜਥੇਦਾਰ ਅਕਾਲ ਤਖਤ ਗਿਆਨੀ ਗੁਰਬਚਨ ਸਿੰਘ ਵੱਲੋ ਇੱਕ ਵਾਰੀ ਫਿਰ ਸ੍ਰੀ ਗੁਰੂ
ਗੋਬਿੰਦ ਸਿੰਘ ਜੀ ਦੇ ਪ੍ਰਕਾਸ਼ ਗੁਰਪੁਰਬ ਦੀ ਤਰੀਕ ਬਦਲਣ ਦਾ ਕੜਾ ਨੋਟਿਸ ਲੈਦਿਆ ਕਿਹਾ ਕਿ
ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਨੂੰ ਉਹ ਚਿੱਠੀਆ, ਈਮੇਲਾਂ ਤੇ ਫੈਕਸਾਂ ਜਨਤਕ ਕਰਨੀਆ ਚਾਹੀਦੀਆ
ਹਨ ਜਿਹਨਾਂ ਨੂੰ ਮੁੱਖ ਰੱਖ ਤੇ ਪਹਿਲਾਂ ਗੁਰਪੁਰਬ ਸੱਤ ਜਨਵਰੀ 23 ਪੋਹ ਤੇ ਫਿਰ ਦੁਬਾਰਾ ਆਪਣੇ
ਹੀ ਆਦੇਸ਼ਾਂ ਨੂੰ ਬਦਲ ਕੇ 28 ਦਸੰਬਰ ਪੋਹ ਸੁਦੀ ਸੱਤ ਕਰ ਦਿੱਤਾ ਗਿਆ ਹੈ।
ਜਾਰੀ ਇੱਕ ਬਿਆਨ ਰਾਹੀ ਸ੍ਰ ਸਰਨਾ ਨੇ ਕਿਹਾ ਕਿ ਸ੍ਰੀ ਅਕਾਲ ਤਖਤ ਸਾਹਿਬ
ਸਿੱਖਾਂ ਦਾ ਸਰਵ ਉਚ ਪਵਿੱਤਰ ਅਸਥਾਨ ਹੈ ਜਿਸ ਦੀ ਉਸਾਰੀ ਛੇਵੇ ਪਾਤਸ਼ਾਹ ਸ੍ਰੀ ਗੁਰੂ ਹਰਗੋਬਿੰਦ
ਸਾਹਿਬ ਨੇ ਆਪਣੇ ਕਰ ਕਮਲਾਂ ਨਾਲ ਬਾਬਾ ਬੁੱਢਾ ਦੀ ਤੇ ਭਾਈ ਗੁਰਦਾਸ ਜੀ ਦੇ ਸਹਿਯੋਗ ਨਾਲ ਕੀਤੀ
ਸੀ ਪਰ ਅੱਜ ਇਸ ਪਵਿੱਤਰ ਅਸਥਾਨ ਦਾ ਜਿਸ ਤਰੀਕੇ ਨਾਲ ਜਥੇਦਾਰਾਂ ਵੱਲੋ ਸਿਆਸੀਕਰਨ ਕਰਕੇ ਇਸ ਦੀ
ਮਹੱਤਤਾ ਨੂੰ ਘਟਾਇਆ ਜਾ ਰਿਹਾ ਹੈ ਉਹ ਕਿਸੇ ਵੀ ਰੂਪ ਵਿੱਚ ਜਾਇਜ ਨਹੀਂ ਹੈ।
ਉਹਨਾਂ ਕਿਹਾ ਕਿ ਖਾਲਸਾ ਪੰਥ ਦੇ ਸਿਰਜਣਹਾਰ ਸ੍ਰੀ ਗੁਰੂ ਗੋਬਿੰਦ ਸਿੰਘ
ਦੇ ਗੁਰਪੁਰਬ ਵਿੱਚ ਬਾਰ ਬਾਰ ਤਬਦੀਲੀ ਕਰਕੇ ਜਿਹੜਾ ਭੰਬਸਭੂਸਾ ਸੰਗਤਾਂ ਵਿੱਚ ਪਾਇਆ ਰਿਹਾ ਹੈ
ਉਸ ਨੂੰ ਲੈ ਕੇ ਸੰਗਤਾਂ ਕਾਫੀ ਖਫਾ ਹਨ। ਉਹਨਾਂ ਕਿਹਾ ਕਿ ਪਹਿਲਾਂ ਸਿੱਖਾਂ ਦੇ ਨਾਨਕਸ਼ਾਹੀ
ਕੈਂਲੰਡਰ ਨੂੰ ਬਦਲ ਕੇ ਸਤਿਆਨਾਸ ਕਰ ਦਿੱਤਾ ਤੇ ਹੁਣ ਤੁਗਲਕੀ ਆਦੇਸ਼ ਜਾਰੀ ਕਰਕੇ ਸੰਗਤਾਂ ਨੂੰ
ਗੁੰਮਰਾਹ ਕੀਤਾ ਜਾ ਰਿਹਾ ਹੈ। ਉਹਨਾਂ ਕਿਹਾ ਕਿ ਗਿਆਨੀ ਗੁਰਬਚਨ ਸਿੰਘ ਵੱਲੋ ਇਹ ਬਿਆਨ ਦਿੱਤਾ
ਗਿਆ ਹੈ ਕਿ ਉਹਨਾਂ ਨੇ ਦਸਮ ਪਿਤਾ ਗੁਰੂ ਗੋਬਿੰਦ ਸਿੰਘ ਜੀ ਦਾ ਗੁਰਪੁਰਬ ਸੱਤ ਜਨਵਰੀ ਨੂੰ ਇਸ
ਕਰਕੇ ਕੀਤਾ ਸੀ ਕਿਉਕਿ 28 ਦਸੰਬਰ ਨੂੰ ਛੋਟੇ ਸਾਹਿਬਜਾਂਦਿਆ ਦੇ ਸ਼ਹੀਦੀ ਜੋੜ ਮੇਲੇ ਇੱਕੋ ਦਿਨ
ਆ ਗਏ ਸਨ ਅਤੇ ਸ਼ਹੀਦੀ ਦਿਹਾੜਾ ਤੇ ਪ੍ਰਕਾਸ਼ ਦਿਹਾੜਾ ਸੰਗਤਾਂ ਇਕੱਠੇ ਨਹੀਂ ਮਨਾ ਸਕਦੀਆ ਅਤੇ
ਸ਼੍ਰੋਮਣੀ ਕਮੇਟੀ ਨੇ ਸੱਤ ਜਨਵਰੀ ਨੂੰ ਸਰਕਾਰ ਨੂੰ ਛੁੱਟੀ ਕਰਨ ਲਈ ਵੀ ਲ੍ਰਿਖ ਵੀ ਦਿੱਤਾ ਸੀ।
ਉਹਨਾਂ ਕਿਹਾ ਕਿ ਉਹਨਾਂ ਨੇ ਉਸ ਵੇਲੇ ਵੀ ਕਿਹਾ ਸੀ ਕਿ ਸ੍ਰੀ ਗੁਰੂ
ਗੋਬਿੰਦ ਸਿੰਘ ਦੇ ਪ੍ਰਕਾਸ਼ ਪੁਰਬ ਦੇ ਸੱਤ ਜਨਵਰੀ ਦਿਹਾੜੇ ਨੂੰ ਪੱਕੇ ਤੌਰ 'ਤੇ ਪ੍ਰਵਾਨਗੀ ਦੇ
ਦਿੱਤੀ ਜਾਵੇ ਤਾਂ ਕਿ ਬਾਰ ਬਾਰ ਤਰੀਕ ਬਦਲਣ ਦਾ ਝੰਜਟ ਹੀ ਖਤਮ ਹੋ ਜਾਵੇ, ਪਰ ਜਥੇਦਾਰ ਗਿਆਨੀ
ਗੁਰਬਚਨ ਸਿੰਘ ਨੇ ਇਹ ਕਹਿ ਕੇ ਪਹਿਲੀ ਮਿਤੀ 28 ਦਸੰਬਰ ਦੁਬਾਰਾ ਗੁਰਪੁਰਬ ਦੀ ਹੀ ਕਰ ਦਿੱਤੀ
ਹੈ ਕਿ ਉਹਨਾਂ ਨੂੰ ਦੇਸਾਂ ਵਿਦੇਸ਼ਾਂ ਤੋ ਸੰਗਤਾਂ ਦੀਆ ਈਮੇਲਾਂ, ਫੈਕਸਾਂ ਆਈਆ ਸਨ, ਕਿ ਤਰੀਕ
ਵਿੱਚ ਤਬਦੀਲੀ ਨਾ ਕੀਤੀ ਜਾਵੇ। ਉਹਨਾਂ ਕਿਹਾ ਕਿ ਜਥੇਦਾਰ ਜੀ ਦੇ ਇਸ ਬਿਆਨ ਵਿੱਚ ਕੋਈ ਵਜ਼ਨ ਨਹੀਂ
ਹੈ ਤੇ ਸਾਰੇ ਜਾਣਦੇ ਹਨ ਕਿ ਜੋ ਕੁਝ ਵੀ ਹੋ ਰਿਹਾ ਹੈ ਉਹ ਬਹਿਰੂਨੀ ਦਬਾ ਕਰਕੇ ਹੋ ਰਿਹਾ ਹੈ।
ਉਹਨਾਂ ਕਿਹਾ ਕਿ ਈਸਾਈਆ ਵਿੱਚ ਕਦੇ ਉਹਨਾਂ ਦੇ ਤਿਉਹਾਰ ਨਹੀਂ ਬਦਲੇ ਗਏ। ਕਦੇ ਵੀ ਕ੍ਰਿਸਮਿਸ
ਦੇ ਤਿਉਹਾਰ 25 ਦਸੰਬਰ ਦੀ ਤਰੀਕ ਨੂੰ ਅੱਗੇ ਪਿੱਛੇ ਕਰਨ ਦੀ ਹਿੰਮਤ ਨਹੀਂ ਪਈ, ਇਸ ਲਈ ਜਥੇਦਾਰਾਂ
ਨੂੰ ਚਾਹੀਦਾ ਹੈ ਕਿ ਉਹ ਸਿੱਖ ਫਲਸਫੇ ਨੂੰ ਫੁੱਟਬਾਲ ਨਾ ਬਣਾਉਣ ਤੇ ਉਹ ਵੀ ਗੁਰੂ ਸਾਹਿਬਾਨ ਦੇ
ਗੁਰਪੁਰਬਾਂ ਦੀਆ ਤਰੀਕਾ ਉਹੀ ਰਹਿਣ ਦੇਣ ਜਿਹੜੀਆ ਮੂਲ ਨਾਨਕਸ਼ਾਹੀ ਕੈਲੰਡਰ ਅਨੁਸਾਰ ਨਿਰਧਾਰਿਤ
ਕੀਤੀਆ ਗਈਆ ਹਨ।