ਮੂਲ
ਨਾਨਕਸ਼ਾਹੀ ਕੈਲੰਡਰ ਵਿਚ ਗੁਰਪੁਰਬ ਤੇ ਹੋਰ ਇਤਿਹਾਸਕ ਦਿਹਾੜਿਆਂ ਦੀਆਂ ਸਟੀਕ ਤਰੀਕਾਂ ਨੂੰ
ਨਜ਼ਰਅੰਦਾਜ ਕਰਕੇ, ਜਿਸ ਤਰ੍ਹਾਂ ਮੁੱਖ ਸੇਵਾਦਾਰ ਸ੍ਰੀ ਅਕਾਲ ਤਖਤ ਸਾਹਿਬ ਨੇ ਸੰਘ ਪਰਿਵਾਰ ਤੇ
ਸਿੱਖੀ ਭੇਸ ਵਿਚਲੇ ਉਸਦੇ ਸੰਭਾਵਤ ਏਜੰਟ ਸੰਤ-ਬਾਬਿਆਂ ਨੂੰ ਖੁਸ਼ ਕਰਨ ਲਈ ਨਕਲੀ ਨਾਨਕਸ਼ਾਹੀ
ਕੈਲੰਡਰ ਵਿਚ ਗੁਰਪੁਰਬਾਂ ਦੀਆਂ ਤਰੀਕਾਂ ਸੈਟ ਕੀਤੀਆਂ, ਉਨ੍ਹਾਂ ਦੇ ਗੁਣ-ਦੋਸ਼ ਉਸ ਸਮੇਂ ਸਾਹਮਣੇ
ਆ ਗਏ, ਜਦੋਂ ਦਸ਼ਮੇਸ਼ ਪਿਤਾ ਦਾ ਪ੍ਰਕਾਸ਼ ਪੁਰਬ ਤੇ ਸਾਹਿਬਜ਼ਾਦਿਆਂ ਦਾ ਸ਼ਹੀਦੀ ਦਿਹਾੜਾ ਇਕੋ ਦਿਨ
ਹੀ ਆ ਗਿਆ।
ਤਰੀਕਾਂ ਦੇ ਮਾਮਲੇ ‘ਤੇ ਜੱਥੇਦਾਰ ਨੂੰ ਆਪਣੀ ਗਲਤੀ ਦਾ ਅਹਿਸਾਸ ਹੋਇਆ
ਤੇ ਉਨ੍ਹਾਂ ਨੇ ਤੁਰੰਤ ਐਲਾਨ ਕੀਤਾ ਕਿ 28 ਦਸੰਬਰ ਨੂੰ ਸ਼ਹੀਦੀ ਪੁਰਬ ਅਤੇ 7 ਜਨਵਰੀ ਨੂੰ
ਦਸ਼ਮੇਸ਼ ਪਿਤਾ ਦਾ ਪ੍ਰਕਾਸ਼ ਦਿਵਸ ਮਨਾਇਆ ਜਾਵੇ। ਸੰਗਤਾਂ ਨੇ ਅਜੇ ਰਾਹਤ ਮਹਿਸੂਸ ਕੀਤੀ ਹੀ ਸੀ
ਕਿ ਪਤਾ ਨਹੀਂ ਮੁੜ ਕਿਹੜੀ ਬਿੱਲੀ ਨਿਛ ਗਈ। ਮੁੱਖ ਸੇਵਾਦਾਰ ਨੇ ਮੁੜ ਐਲਾਨ ਕਰ ਦਿੱਤਾ ਕਿ
ਪ੍ਰਕਾਸ਼ ਪੁਰਬ 28 ਨੂੰ ਹੀ ਮਨਾਇਆ ਜਾਵੇ, ਪਹਿਲਾ ਕੀਤਾ ਗਿਆ ਫੈਸਲਾ ਵਾਪਸ ਲੈ ਲਿਆ ਗਿਆ ਹੈ।
ਮੁੱਖ ਸੇਵਾਦਾਰ ਨੇ ਆਪਣੇ ਸਿਆਸੀ ਪ੍ਰਭੂਆਂ ਦੀ ਖੁਸ਼ਨੁਦੀ ਹਾਸਲ ਕਰਨ ਲਈ
ਗੁਰੂ ਘਰ ਪ੍ਰਤੀ ਆਪਣੀਆਂ ਜੁੰਮੇਵਾਰੀਆਂ ਨਾਲ ਧ੍ਰੋਹ ਕਮਾਉਂਦੇ ਹੋਏ ਸ਼ਰੇਆਮ ਝੂਠ ਬੋਲਣ ਤੋਂ
ਗੁਰੇਜ਼ ਨਹੀਂ ਕੀਤਾ ਕਿ ਫੈਸਲਾ ਵਾਪਸ ਲੈਣ ਲਈ ਸੰਗਤਾਂ ਦੀਆਂ ਚਿੱਠੀਆਂ ਆਈਆਂ ਹਨ। ਮੁੱਖ
ਸੇਵਾਦਾਰ ਜੀ ਕੀ ਚਿੱਠੀਆਂ ਪਾਉਣ ਵਾਲਿਆਂ ਨੂੰ ਨਹੀਂ ਪਤਾ ਕਿ 28 ਦਸੰਬਰ ਨੂੰ ਸਾਹਿਬਜਾਦਿਆਂ
ਦਾ ਸ਼ਹੀਦੀ ਪੁਰਬ ਤੇ ਗੁਰੂ ਗੋਬਿੰਦ ਸਿੰਘ ਜੀ ਦਾ ਪ੍ਰਕਾਸ਼ ਪੁਰਬ ਇਕੋ ਦਿਨ ਕਿਵੇਂ ਮਨਾਏ ਜਾ
ਸਕਣਗੇ, ਵਿਸ਼ੇਸ਼ ਕਰਕੇ ਚਮਕੌਰ ਸਾਹਿਬ ਤੇ ਫਤਹਿ ਗੜ੍ਹ ਸਾਹਿਬ ਵਿਚ?
ਮੁੱਖ ਸੇਵਾਦਾਰ ਜੀ ਕ੍ਰਿਪਾ ਕਰਕੇ ਆਈਆਂ ਚਿੱਠੀਆਂ ਜਨਤਕ ਕੀਤੀਆਂ ਜਾਣ, ਤਾਂਕਿ ਉਨ੍ਹਾਂ ਲੋਕਾਂ
ਦੇ ਪਿਛੋਕੜ ਤੋਂ ਸੰਗਤਾਂ ਜਾਣੂੰ ਹੋ ਸਕਣ।
ਦਾਸ ਪੁਛਣਾ ਚਾਹੁੰਦਾ ਹੈ ਕਿ ਮੂਲ ਨਾਨਕਸ਼ਾਹੀ
ਕੈਲੰਡਰ ਨੂੰ ਲਾਗੂ ਕਰਨ ਲਈ ਤਾਂ ਸਾਰੀ ਦੁਨੀਆਂ ਦੇ ਪੰਥ ਪ੍ਰਸਤ ਲੋਕ ਪਿਛਲੇ ਕਈ ਸਾਲਾਂ ਤੋਂ
ਹਰ ਸੰਭਵ ਤਰੀਕੇ ਨਾਲ ਆਪਣੀਆਂ ਭਾਵਨਾਵਾਂ ਲਿਖਤੀ ਰੂਪ ‘ਚ ਵੀ ਮੁੱਖ ਸੇਵਾਦਾਰ ਸ੍ਰੀ ਅਕਾਲ ਤਖਤ
ਸਾਹਿਬ ਤੇ ਸ਼੍ਰੋਮਣੀ ਕਮੇਟੀ ਪਾਸ ਪਹੁੰਚਾਉਂਦੇ ਆ ਰਹੇ ਹਨ। ਫਿਰ ਉਨ੍ਹਾਂ ਚਿੱਠੀਆਂ ਉੱਤੇ ਹੁਣ
ਤੱਕ ਗੌਰ ਕਰਨ ਦਾ ਕਿਸੇ ਨੇ ਕਸ਼ਟ ਕਿਉਂ ਨਹੀਂ ਕੀਤਾ?
